Wase 19

Na Veivakalougatataki Vakayago kei na kena Vakayalo mai na Vosa ni Vuku

Sa solia vei keda na Tamada Vakalomalagi na Vosa ni Vuku me vakalougatataki keda meda bulabula vinaka ka vakarautaki keda ki na bula tawamudu.

Na Bula nei George Albert Smith

E a tauvi cokadra o George Albert Smith ni se gone. Tukuna vei tinana na vuniwai ka a qaravi koya me na davo tiko e vale o koya me tolu na macawa, me kania eso na kakana kaukauwa ka me na dau gunu kofi. Qai nanuma lesu vakaoqo o Peresitedi Smith:

“Ni sa lesu o vuniwai, au sa qai tukuna vei nau niu sega ni vinakata na gunuva na kofi. Au a sa vakavulici ni Vosa ni Vuku ka a solia na Turaga vei Josefa Simici, e vakasalataki keda meda kakua ni gunuva na kofi.

“E a tolu na luvei tinaqu ka lewe rua erau sa mate. Ka dau lomaleqataki au vakalevu sara kina o nau.”

Sa qai kerea o George Albert Smith na veivakalougatataki ni matabete, ka a ciqoma mai vei rau na nona dauveituberi ni matavuvale.

“Ni qai lako mai o vuniwai ena siga ka tarava au sa qito wavoki tale tiko kei ira na vo ni gone. E kidacala o koya. E qai mai vakarogoci au ka kunea ni sa yali sara ga na mate ka tauvi au voli.

“Au vakavinavinaka vua na Turaga niu sa bula vinaka tale. Au kila deivaki ni o Koya e vakabulai au.”¹

Vinakata o Peresitedi Smith me ra kila na Yalododonu Edaidai ni Vosa ni Vuku, ena sega walega ni kauta mai na bulabula vinaka vakayago, ia e kauta talega mai na veivakalougatataki vakayalo. E a vunautaka o koya ena dua na soqoni ni matabete ena koniferedi raraba na italanoa kei Taniela na parofita ni Veiyalayalati Makawa, ka a namaki vua me na kania na kena lewe ni manumanu kei na mena waini na tui:

“O Taniela e parofita ni Kalou, ka parofita baleta ni talairawarawa tiko ki na nona ivakaro na Kalou. Au na gadrevi kemuni … mo ni na dau nanuma deivaki tu ga na itukutuku oqo. O Taniela e maroroya na ivakavuvuli ni Kalou vata kei iratou na nona itokani, me baleta na mataqali kakana kei na gunu me ratou vakayagataka, ka me ratou na vakatatabutaka na kakana e dau vakarau ena nona teveli ni kana na tui. [Raica na Taniela 1:3–16.]”

E a tomana o Peresitedi Smith na vakamacalataka ni nona talairawarawa o Taniela ki na lawa ni Kalou baleta na tiko bulabula, e a sega walega ni taqomaki na nona bula, e a ciqoma talega e levu sara na veivakalougatataki vakayalo: “na veivakalougatataki mai vua na Kalou Kaukauwa.”² [Raica na vakatutu 1 ena tabana e 228.]

iVakavuvuli nei George Albert Smith

Na Vosa ni Vuku e ivakasala ni loloma mai vua na Tamada, o koya ka kila na veika kecega.

Meu wilika vei kemuni na ka e tukuna na Turaga ki na Lotu ena 27 ni Feperueri 1833.

“Na ivakaro meda bulabula kina sa tukuni ki na matabose ni bete levu era a soqoni tiko e Kirtland kei na isoqosoqo lewe ni Lotu, io kei ira talega na Yalododonu ni Saioni.—

“Raica sa vakauti yani ena vakanuinui vinaka, io sa sega ni vakaroti se lavaki vakaukauwa, ia sa vakatakilai ga meda bula kina, raica sa tukuni kina na ivakarau kei na loma ni Kalou me ra bula kina ko ira kece na lewe ni lotu ena gauna oqo.”

Oqo mo vakasamataka mada vakalailai—“me ra bula kina ko ira kecega na lewenilotu ena gauna oqo.”

“E soli me ivakavuvuli kei na kena yalayala, ka caka me baleti ira era malumalumu kei ira ka malumalumu taudua vei ira na yalododonu, o ira ka rawa ni ra vakatokai me ra yalododonu.” [Raica na V&V 89:1–3].

Sa qai tomana na Turaga ka tukuna vei keda na veika meda na vinaka kina, na kakana ena vinaka meda na kania, ka sa qai vakasalataki keda meda na qarauna na veika ena vakavu leqa ka na vakacacani keda [raica na V&V 89:5–17].

Au raica ni o keda eda sa vakalougatataki sara ga vakavinaka. … Sa lomani keda sara ga na Turaga, me taqomaki keda, vakasalataki keda, ka vakaroti keda ena levu sara na ka.³

Au raica ni Vosa ni Vuku, e ivakasala ni loloma mai vua na Tamada mai lomalagi, o Koya e gadreva meda na vakataki Koya. … Au taura me vaka niu luvena ka vakasalataki au ni kila na ka ena vinaka vei au, ka kaya vakaoqo, “Na luvequ, sa sega ni vinaka vei iko na veika oqo, kevaka mo na dro tani mai kina au na solia vei iko na veitokani ni noqu Yalotabu kei na vakacegu ni ko se bula tiko oqo e vuravura ka vakakina ena bula tawamudu.” Meu na qai rawa vakacava niu vakayagataka na veika sa vakatabui oqo, niu kila ni sa ivakaro sara ga ni Kalou meu vakatatabutaka na veika oqori. Au kila niu sa na vakarusai kevaka meu vakatara, ka ni o Koya ka kila e levu sara na ka mai vua e dua tale, sa tukuna ni ra na ca na veika oqo ka sa vakaroti au meu vakatatabutaki ira. …

… E kila o Koya ni sa rui ka bibi ka solia kina vei keda, ka vakaroti keda, ka me vaka ni o Koya ka kila na veika kece ka sa qai solia mai na ivakasala kei na ivakaro, baleta na veika vakavuravura oqo, sa na dodonu sara vei keda kece ka da sega ni kila se cava ena kauta mai na mataka ni dua na siga vou, meda sa na talairawarawa ki na ivakasala oqori. Au vakila ni o keda na Yalododonu Edaidai sa soli vei keda na Vosa ni Vuku me na vueti keda cake mai vei ira era na sega ni rokova.⁴

Na kosipeli i Jisu Karisito me na maroroya na yalo ni tamata, ka vakavaletaki tiko ena yago me baleta na marau tawamudu. Eda na lialia sara kevaka meda na rawai ki na ivakarau kei na itovo vakavuravura! … Na Tamada Vakalomalagi ena nona yalovinaka kei na yalololoma [sa vakarota]: “Au sa solia vei kemudou na ivakaro oqo mo dou bula kina. Io, au sa vakasalataki kemudou rawa oqo ena vuku ni veika ca kei na nodra inaki ca na tamata ena gauna oqo.” V&V 89:4… Na inaki ni kosipeli i Jisu Karisito me vakarautaki keda ki na veika totoka ni bula, me vaka sa tuvanaka tu na Turaga ni na vakakina, ena nona tukuna vei keda na veika meda cakava meda drovaka kina na veika sa vakarusa tiko na vuravura.⁵

Ko vakabauta li ni Turaga e solia vei keda na Vosa ni Vuku? O nanuma beka ni kila o koya na veika ena vinaka vei keda? Ko nanuma li ni na vakamarautaki koya kevaka meda na talairawarawa ki na lawa oqori? Tukuna o koya ni na vakadina kina. Ko nanuma li ni sa ka dina tiko vua?⁶

Kemuni na taciqu kei na ganequ, sa sega ni rawa ni da taura wale tu ga vakamamada na Vosa ni Vuku. E a soli me ivakasala ka ivakavuvuli, e sega ni ivakaro se vakasaurarataki, ia e vosa ni veivakavukui, mai vua na Tamada, me baleta na vakabulai ni yagoda kei na vakarautaki ni yaloda me baleta na bula tawamudu.⁷ [Raica na vakatutu 2 ena tabana e 228.]

Na Turaga sa yalataka na bulabula ni yago kei na ituvaki vinaka ni vakasama vei ira era talairawarawa ki na Vosa niVuku.

Au vakavinavinakataka na Vosa ni Vuku, dina ni rawarawa wale tu ga, me vaka e tukuna na Turaga, “a sa virikotori me rawa kina vei ira na lewe ni lotu sa malumalumu sara ena veika oqo me ra uasivi cake.” Au na cegu meu taroga … , eda sa bulakilikili beka meda vakatokai meda Yalododonu? O ira kece era nuitaka tiko me ra vakatokai me ra Yalododonu e dodonu me ra talairawarawa ki na Vosa ni Vuku. A cava na kena ibalebale vei keda? E solia vei keda na totoka ni bula, ena kauta tani mai vei keda na paisoni ka ra dau ceguva o ira era dau kania na tavako. Ena tarova na noda dau lomaloma ca ena kena dau mamai na tavako. Ena maroroi keda, kevaka meda na veitaqomaki, mai na kena dau vakayagataki na (wainimate) ka dau tu ena ti kei na kofi vakakina na gunuvi ni yaqona ni vavalagi. …

E sega walega ni tukuna vei keda na Tamada Vakalomalagi na ka meda na kua ni vakayagataka, e tukuna talega na veika meda levea, ia e tukuna talega na veika ena vinaka vei keda kevaka meda vakayagataka vakavuku. Sa tukuna tu vei keda o Koya ni kakana kece, na draunikau kecega na vua ni vaini, kei na veika tale eso, sa vinaka vua na tamata. Na lewe ni manumanu yavaiva kei na manumanu vuka ena ganita meda vakayagataka vakavuku ena yalo-vakavinavinaka, kau na vakabibitaka ena yalo-vakavinavinaka.⁸

Eda na raica ni kena vakamuri na lawa ni tiko bulabula ena vaqaqacotaka na yago ka ituvaki vinaka kina na vakasama, ka da na raica talega ni na kena sega ni vakamuri, ena torosobu sara ga na ituvaki ni yago vakakina na vakasama. O Koya ga na noda Dauniveibuli, na Tama ni Yaloda, o Koya ka solia vei keda na madigi meda mai bula kina e vuravura, e tukuna ni so na ka e tukuni tiko ena ivakatakila o ya ena sega ni vinaka vei keda. Sa yalataka vei keda kevaka meda talairawarawa ki na lawa oqo,—na yalayala ni vuku, bulabula kei na kaukauwa ni yago, ka na lako siviti keda na agilosi dau veivakarusai ka ra na sega ni vakarusai keda me vakataki ira na luve i Isireli [raica na V&V 89:18–21].⁹ [Raica na vakatutu 3 ena tabana e 228.]

Na talairawarawa ki na Vosa ni Vuku ena vaqaqacotaka na noda vakabauta kei na bula vakayalo.

Au sa vakadeitaka oqo ni Turaga ena Nona lomani keda, a sa solia kina vei keda na Vosa ni Vuku, e sega ni solia vei keda me baleta walega na tiko bulabula ni da se bula tiko e vuravura, ia e baleta na kena vaqaqacotaki na noda vakabauta, kei na kena vakalevutaki na noda vakadinadinataka na inaki ni Nona lako mai na Turaga ka iVakavuvuli, ka me rawa talega ni vakarautaki keda vakavinaka ni sa cava na noda itavi eke ka lesu yani Vua. Au ririkotaka ni so na gauna eda dau sega soti ni vakila na bibi ni itukutuku levu oqo ki vuravura.¹⁰

Au vinakata meu tukuna vei kemuni, ena noqu vakatulewa, ni vakayagataki ni tavako, e ka lailai tu ga vei ira eso na tamata, sa vakarusa sara tikoga na nodra bula vakayalo, sa waqawaqa tiko ni kena kau laivi mai vei ira na Yalo i Tamada, sa kauti ira tani mai na vakaitokani kei ira na turaga kei na marama vivinaka, ka sa vakavuna nodra sega ni taleitaki mai vei ira na luvedra, ia na vuni ca ena tukuna tikoga ki na tamata yadua, sobo, oqori e dua na ka lailai wale sara!¹¹

Eda sa bula tiko ena gauna ka sa vosa lesu mai kina na Kalou vei ira na Nona tamata. O keda eda lewe ni Lotu eda sa vakamuria na ka e vinakata na Tamada mai Lomalagi, eda sa kila deivaki tu ni bula tiko na Kalou, ka sa dau vakalougatataki ira era qaravi Koya ena yalodina. Eda sa kila tiko ni sa solia mai o Koya eso na ivakaro kei na ivakasala me liutaki keda ena bula oqo, kei na talairawarawa ki na lawa oqori ena vakadeitaka na kalougata e yalataka ena muria mai na noda talairawarawa, ia kevaka meda talaidredre ki na nona ivakavuvuli, kevaka meda beca na nona ivakasala, eda na sega ga ni vakalougatataki mai vua, ka sa vakamaumautaka wale tu ga na madigi e dodonu me noda ka sa na sega ni lesuvi keda tale mai. Au vakila na bibi ni nodra na talairawarawa na Yalododonu ki na ivunau ni [Vosa ni Vuku]. Au vakabauta ni talairawarawa ki na ivunau oqo, era na marautaka na Yalododonu Edaidai na toso cake ni nodra vakabauta. Eda wilika mai na ivakavuvuli nei Momani ni kevaka sa sega na cakamana mai vei ira na tamata oqo, sa baleta ga ni sa sega na nodra vakabauta, ka sa qai tukuna vei ira, ni sega na vakabauta, “ia ena ca vei ira ni sa tawa yaga na ka kecega.” [Raica na Moronai 7:37–38.] Kevaka meda na vakacacana na ka eda kila ni loma ni Turaga, sa na torosobu ga na noda vakabauta, ni sa na sega ni rawa me tiko vata ga kei keda na Yalotabu. …

…Au vakabauta ni kena sa sega ni muri na veika e rawarawa, sa torosobu na vakabauta vei ira eso na noda—ka ni kena sa vakamuri na Vosa ni Vuku, sa na torocake na nodra vakabauta na Yalododonu Edaidai, ka sa na tasoro mai vei keda na veivakavukui ena kena vakamuri, sa na lako talega mai na yalo ni talairawarawa ki na so tale na lawa ni Tamada kei na kena vakamuri, sa na kauta mai na veivakalougatataki.¹² [Raica na vakatutu 3 and 4 ena tabana e 228.]

Ni vakamuri na Vosa ni Vuku, eda sa vakavakarau tiko yani ki na bula tawamudu.

Au dau vakananuma ena so na gauna, se era kila tiko na Yalododonu Edaidai ni [Vosa ni Vuku] e soli vei keda me baleta na noda rawa ni laki bula vakacerecerei; sega walega ni baleta na kalougata ni bula vakayago, ia me vakarautaki keda baleta na noda bula vakayalo. …

Tukuni vei keda ni lagilagi ni Kalou na vuku [raica na V&V 93:36], ka da dau dokai ira na turaga kei na marama vuku, ka sa dodonu kina vei keda meda navuca na yavu ni torocake ni kaukauwa vakavuli ka sega ni kena veibasai. Sa vakadinadinataki tiko ena nodra bula eso ni ra sega ni rawata tiko na kaukauwa vakavuku oqo baleta na nodra vakatara tiko na veika sa vakatabuya na Tamada Vakalomalagi ka tukuna ni na ca vei keda, ka sa vakalailaitaka na nodra vakavukui, ka ra sa sega ni rawa ni vakavakarau ki na bula tawamudu ka a dodonu me nodra inaki taumada.¹³

Kevaka meda vakabauta me vaka eda tukuna tiko, ni Karisito o Jisu, ka da luvena na Tamada Vakalomalagi, sa dodonu kina meda bulataka na mataqali bula e ganita ni da ivakatawa ni nona valetabu ka a buli me vaka na irairai ni Kalou. E vica vei keda e kila tiko ni da sa vakacuruma ki yagoda e dua na ka e vakatabuya na Tamada, eda sa vakarusa tiko na nona vale na yalo? E vica vei keda e nanuma ni da sa soro ki na gagano vakayago, eda sa vakuwai keda tiko mai na veika vinaka e waraki keda tu mai liu, ka sa na sega talega ni noda na veivakalougatataki e vakarautaka na Turaga me baleti ira era vakabauta?¹⁴

Kevaka me na vakamuri na lawa oqo ka a soli me baleti ira era malumalumu sara, sa na yavu sara ga ni nona na solia mai na Tamada e levu sara na veivakalougatataki, ka a dau sega tu ni soli ena veigauna yani ki liu. Ena rawa vakacava me dua vei keda ena lecava tiko na lawa rawarawa oqo ka sa solia mai na Kalou ena voqa sara ga ni domona, ni tukuna ni rawa ni dua ga vei keda me na talairawarawa kina? Ena rawa beka ni da nanamaki meda vakamuria e dua na lawa e cecere cake ka da na rawa li ni rawata na veivakacerecerei e cecere cake, kevaka meda sega tikoga ni muria na veika rawarawa vakaoqo?¹⁵ [Raica na vakatutu 3 ena tabana e 228.]

Na ivakavuvuli vinaka duadua e rawa ni da solia vei ira na noda matavuvale me ra muria na Vosa ni Vuku sa ikoya meda na talairawarawa kina o keda.

Kevaka me ra maroroya na Vosa ni Vuku na tama kei na tina, sa na rawa ni ra vakadewataka tiko vei ira na luvedra na itovo savasava kei na kaukauwa ka na sega ni rawa me ra solia vei ira. Au vakabauta ni veitokoni ni Yalo ni Tamada ena tiko ena yalodra o ira era talairawarawa ki na lawa oqo, ka na vakadewataki vei ira na luvedra me ra na talairawarawa talega vakakina. … Sa kilai levu tu ni tavako ena vakacacana na nodra vakasama na gone ka na vakamalumalumutaka na ivakarau ni nodra vakatulewa, vakatalega ki na na yaqona ni valagi ena vakacacana na nodra vakasama, ena veituyaki ki na nodra vakatulewa ka na vakalailaitaka na nodra gadreva me ra na vinaka cake ka ra na liutaki ki na caka ca kei na basulawa. … Sa solia vei keda na Turaga na lawa oqo baleta ni lomani keda, ka yalataka na veivakalougatataki kevaka meda na talairawarawa ki na Nona ivakasala. Au vakila ni dodonu meu vakauqeti kemuni na taciqu kei na ganequ mo ni vakavulica na ivakavuvuli oqo ena nomuni matavuvale. Vagolea na yalodra na luvemu ki na ivunau oqo, kei na kena veivakalougatataki ena kena vakamuri.

Meu tukuna vei kemuni ni ivakadinadina levu ni noda vakabauta ni soli dina mai vua na Kalou na ivakaro oqo sa ikoya na kena vakamuri vakadodonu. Ena rawa beka meda vunautaka tiko ena veisiga, ia kevaka meda sa na vakacacana ena kena vakamuri, ena vakaleqai ira eda liutaki ira tiko baleta ni ra na muria ga na noda ivakaraitaki.¹⁶

Au sa kerei kemuni mo ni yalovinaka ka masulaka na nomuni vulica na Vosa ni Vuku. Kakua ni wilika walega; masulaka na nomu sa vulica tiko. Saga mo kila na vuni Nona solia mai na Tamada Vakalomalagi. E a solia mai o Koya kei na kena yalayala ni bula balavu kei na bula mamarau, sega ni kevaka eda voroka na lawa, ia kevaka ga eda talairawarawa kina. Wilika na Vosa ni Vuku e matadra na nomu matavuvale ka qai bulataka. Kevaka meda cakava o ya ena tubucake o Saioni. Kevaka meda cakava o ya sa na rawa ni ivurevure ni kaukauwa e vuravura na Lotu ni Lami ni Kalou.¹⁷ [Raica na vakatutu 5 ena tabana e 228.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Ena tabana e 221, e a vakaraitaka tiko kina o Peresitedi Smith na italanoa kei Taniela ena nona sega ni viakania na kena kakana ka gunuva na mena waini na tui. Wilika na Taniela wase 1, ka qai vakasamataka na gauna o a sotava kina na kena namaki mo vakayagataka e dua na ka e vakatabuya na Vosa ni Vuku. Na cava eso na sala ka rawa ni vakamuri tikoga kina na Vosa niVuku ena kena sotavi na veika vakaoqori ka da vakaraitaka tale tikoga kina na noda rokovi ira na tani?
Taleva na imatai ni iwase ni ivakavuvuli (tabana e 221). Ko na vakayagataka vakacava na ivakavuvuli oqo mo vukei ira kina e se dredre tikoga na nodra talairawarawa ki na Vosa ni Vuku?
Taleva vakacaca na tabana e 223–224, ka vakavulica tiko kina o Peresitedi Smith eso na veivakalougatataki ena soli ni da talairawarawa ki na Vosa ni Vuku (raica talega na V&V 89:18–21). Sa vakavatukana vakacava na yalayala oqo ena nomu bula? Na veivakalougatataki cava tale o sa ciqoma ena nomu talairawarawa ki na ivunau oqo?
Ena tabana e 224–225, e yalataka tiko kina o Peresitedi Smith ni kena vakamuri na Vosa ni Vuku ena kauta mai na “guta na talairawarawa.” Na cava na ibalebale ni mala ni vosa oqo?
Na sala cava o nanuma, ni na vukea kina na Lotu na noda talairawarawa ki na Vosa ni Vuku “ena ivurevure ni kaukauwa me vinaka kina o vuravura ”? (tabana e 226). Masulaka nomu vulica na wase 89 ni Vunau kei na Veiyalayalati, me vaka e vakatura o Peresitedi Smith, ka vakasamataka na ka o rawa ni cakava mo talairawarawa kina vakalevu ki na Vosa ni Vuku .

iVolanikalou Veisemati: 1 Korinica 6:19–20; Alama 34:36; Vunau kei na Veiyalayalati 29:34; 130:20–21

Veivuke ni Veivakavulici: “sa na rawa ni ko vakaraitaka na nomu loloma vei ira o vakavulici ira tiko ena nomu vakarogoci ira vakavinaka ka semati iko vakavoleka sara ki na nodra bula. Na loloma va-Karisito e tiko kina na kaukauwa me vakayalomalumalumutaka na tamata ka me ra na vakarorogo ki na vakasolokakana ni Yalotabu” (Veituberi, Me iLutua ni Bula, 46).

A vakatavuvulitaka o Peresitedi Smith ni vakamuria o Taniela na lawa ni tiko bulabula ena gauna o ya ka sa bula kilikili kina me “ciqoma kina na veivakauqeti mai vua na Kalou sa Kaukauwa.”

“E sega walega ni tukuna vei keda na Tamada Vakalomalagi na veika meda levea, ia e tukuna talega na veika ena vinaka vei keda kevaka meda vakayagataka vakavuku.”