Wase 20

Na Veivakabulai Vakayago Vei Keda kei Ira Tale Eso

Kevaka meda vakamuria na ivakaro ni Turaga, eda na sotava rawa kina na veika eda na gadreva vakayago ka vukei ira era bula vakavolivoliti keda.

Na Bula nei George Albert Smith

A Peresitedi ni Lotu o George Albert Smith ena gauna sa mai cava kina na iKarua ni iValu Levu. Sa mai cava na ivalu ka ra sa vakacacani e levu na matanitu, ka levu na tamata sa sega tu na kakana me ra kania, kei na veika tale eso e sa sega. Ena dua na nona vosa ena koniferedi raraba e a tukuna kina o Peresitedi Smith na dredre era sotava tu, ka uqeti ira na yalododonu me ra vukei ira ena nodra leqa: “ O ira era luvena na [Kalou]. Era na gadrevi keda era sega walega ni gadreva na noda veitokoni kei na noda ivakavuvuli, ia era gadreva na kakana kei na isulu vakakina na iyaya ni moce kei na veivuke cava ga e rawa ni soli, baleta ni voleka ni o ira kece sa sega sara ga ni dua tale na ka e vo tu vei ira. Kevaka mo ni na raica eso na ivola ka lako mai vei ira era tu mai kea ena sokonu kina na yalomuni. O ira na tamata era sa kau laivi mai na nodra vale dina ka kau yani ki na dua tale na vanua ka ra nanuma ni ra na laki vakaitikotiko tudei kina, qai vakasauri era sa tu duadua voli ga, ia ni ra qai lesu yani ki na nodra vale, era qai raica ni sa yanaraki ena kena butakoci na veika kecega e tu kina—veika taucoko—ka sa sega na ka e vo, sega tale na vanua na vanua me ra lako kina.”¹

Me vaka ni sa vakayacora tiko mai na Lotu na kena dau maroroi na kakana ena vica vata na yabaki, sa tu vakarau me veivuke. Tekivu na veivuke oqo ena mua ni yabaki 1945, ena gauna e a lako kina o Peresitedi Smith ki Washington, D.C., me laki veivosaki kei na peresitedi kei Amerika o, Harry S Truman, me sa vakau kakana kei na sulu na Lotu ki Iurope. Ena nodrau a veivosaki e kaya vakaoqo o Peresitedi Truman, “Keitou sa tu vakarau me keitou na vukei kemuni ena dua ga na sala sa rawa. … Ena vakacava na dede ni gauna me na vakarautaki kina na veika oqo?”

E vakidacalataki koya o Peresitedi Smith ni kaya yani: “Sa vakarau kece tu. … Keimami [sa vakarautaka tu] na veivale lelevu ka vakasinaita tu ena sila ka sa vakalevutaka tu na neimami qele ni manumanu kei na bulumakau, ia, ena gauna oqo na ka keimami gadreva na lori kei na waqa me keimami vakauta yani na kakana, isulu, kei na iyaya ni moce vei ira mai Iurope ka ni ra sa sotava tu na leqa. E tiko e dua na iSoqosoqo ena Lotu [na iSoqosoqo ni Veivukei] ka ra sa vakarautaka tu e sivia ni rua na udolu na lacadrau ka cula ga e vale.”

Sa qai tukuna vei ira na Yalododonu o Peresitedi Smith ni nodra ka ni veivuke ka a vakau o ya, “e lewe levu sara na tamata era a vakaisulu, era a vakani, ka vakaiyaya ni moce vinaka kina, ena dua na gauna totolo sara. Na kena totolo ga mai ni lori kei na waqa, sa vakarau rawa tu na iyaya ni veivukei me ra vakauti yani ki Iurope.”²

Rauta ni 15 na yabaki yani ki liu, ni a se lewe tu kina ni Kuoramu ni iApositolo Le Tinikarua o Elder Smith, e a vosa kina vei ira na iSoqosoqo ni Veivukei ena dua talega na gauna dredre ni rawa-ka vakailavo—na Gauna ni Vakaloloma Levu. E vakavulica ni nodra vukei na leqa tu na nodra rawa-ka vakailavo ena gadrevi talega kina na yalovinaka kei na loloma cecere:

“E se bera mada ni dua na gauna, ena noqu vakatulewa, me na gadrevi kina na cecere ni yalovinaka me vakataka ena gauna sara ga oqo. Oqo na gauna e vakatovolei sara ga kina na yalo ni tamata, ka sa vuiraki sara ga kina na yalodra. Oqo na gauna sa sotava tu kina e levu sara na tamata na viakana kei na leqa, vakauasivi ena nodra bula sara ga na Yalododonu Edaidai. …

“… Au vakabauta ni Tamada Vakalomalagi e solia tiko vei keda na gauna meda vakatorocaketaki. … Eda na raica se sa tiko vei keda na loloma ka tukuna tiko na iVakabula ni sa dodonu me sa tiko vei keda.”³ [Raica na vakatutu 1 ena tabana e 241.]

iVakavuvuli nei George Albert Smith

Kevaka meda na yalomatuataka na noda iyau, eda na vakavakarau vinaka ki na veigauna dredre.

O ya na ivakasala mai vei ira [na] ivuvu taumada ena veiliutaki nei Peresitedi [Brigham] Young me dau maroroi kakana ni dua na yabaki, baleta ni kevaka me dua e vakarusai na nona iteitei, ena rawa vua me bula tiko me yacova na gauna ni tatamusuki e tarava. …

Eda na sotava na veigauna dredre, kemuni na taciqu kei na ganequ, ia eda na vakavakarau yani meda sotava, kevaka meda na vakasamataka na vitu na yabaki ni sautu kei na vitu na yabaki ni lauqa ena gauna i Fero vakakina na lalawa era a biuta vata me ra sotava kina [raica na Vakatekivu 41]. Ena rawa ni lesu tale mai na gauna vakaoqori. Eda sega ni kila, ia eda kila ni ena gauna e tekivu kina na Lotu, era sa dau veivakasalataki na Mataveiliutaki kei na iliuliu ni Lotu vei ira na lewenilotu me ra dau mamaroroi kakana me baleta na gauna ni leqa tubukoso. Na vua ni ivakasala oqori sa ikoya na gauna era mai tekivu tauyavu kina na tamata ena buca oqo ka tekivu me vuataka na iteitei na kena vuata kei na qele ni manumanu sa tosocake sara, sa sega tale ni qai dua na vuna meda raica kina ni so era se sotava tikoga na leqa ena veika me laukana.⁴

Eda sa bula tiko oqo ena dua na gauna dredre sara. Sa vakavatukana mai na veika e tukuna na ivolanikalou, ka vaka me kena irairai vei au ni oqo na gauna, mera na rawai kina o ira sara ga era sa digitaki. Sa laurai ni o ira era sa vinakata me ra sa toso mada ga ena nodra sasaga vakai ira baleta na veika era gadreva, ka biuta vakatikitiki na ivakavuvuli ni Turaga, ni vakatauvatataki kei na noda bula. Sa matalia sara ga vei au o ira era sa lutu ena nodra dau vakarogoca na ka era tukuna o ira e veisaqasaqa kei na veika e sa vaka na loma vakatakilai ni Tamada Vakalomalagi. …

… Era sa vakasalataki na tamata oqo me ra maroroya na nodra iyau kei na nodra bula. Eda sa vakavulici tiko mai vei ira sa kaciva na Turaga me ra veivakaroti vei keda meda bula ga ena veika eda sa rawata tiko, ka sega ni dodonu meda vakamuria na iwalewale kei vuravura ka toso yani vakatotolo ka lailai tiko na veika eda rawata, me rawa kina ni da qaravi keda kei ira na noda matavuvale.

Au leqataka ni o ira na Yalododonu Edaidai, ena levu sara na gauna era sa mataboko ena nodra kocokoco, mai na nodra vinakata me ra bula me vaka o ira e vuravura; ka da sa vakaroti sara vakamatata mai vua na Tamada Vakalomalagi, ni sa sega ni rawa meda bula vakavuravura ka qai marautaka tiko na veitokani ni nona Yalotabu.⁵

Eso na tamata … era sa volitaka tiko na nodra iyau ka vakayagataka na nodra ilavo me baleta na veika cacawale, ka kevaka me yaco mai na veigauna dredre, sa na dredre toka me ra sotava na veika era gadreva.

Meda na vulica mada e dua na lesoni mai na qasikalolo. E tatamusuki o koya ena kena gauna ka maroroya me baleta na gauna ena yaco mai kina na leqa. Na vuana, o ya na nona lololo e tawa tu ga. Na vodre, e manumanu levu cake, e sega ni vaka o ya na nona ivakarau ni bula. O koya e sega ni dau maroroya na ka me baleta na gauna dredre, ia sa dau vakararavi tu ga o koya ena veika me sotava me rawa ni bula tiko kina, ka sa ikoya na vuna era dau mate kina na vodre ena viakana.

Au leqataka ni levu na tamata ena vaka na vodre, ka ra sega ni dau cakava na veika me rawa ni ra na vakarautaki ira vinaka cake kina. Kevaka me ra na vulica e dua na lesoni mai na qasikalolo, era na dau maroroi kakana ka na tu ga vei ira na kakana ena veigauna kece me ra na bula toka kina.⁶ [Raica na vakatutu 2 ena tabana e 241.]

Sa vakaroti keda na Turaga meda cakacaka me rawa ni da bula-rawati keda.

Na dina ni sa levu tu na ilavo ka sa vakarautaki vei ira e levu sara na tamata, sa vaka me ra kila kina na itabagone ni vaka me sa rawarawa tu ga na ilavo, sa sega kina ni yaga me ra cakacaka vakaukauwa. Ia au sa nuidei ni sega ni dua na tamata me mai bula e vuravura ka sega ni rawa-ka vakalevu ena nona yalodina, me na vakatawayagataki wale tu ga na nona yalodina kei na nona daucakacaka.

Kevaka me ra tubu cake na luveda ena vucesa, eda kila ni oqo e sega ni vinaka vua na Turaga.⁷

Eda na vinaka cake sara kevaka meda vakaogai keda ena cakacaka vinaka.⁸

Na Tamada Vakalomalagi … e a se tukuna makawa sara vei keda ni sa bini na tamata vucesa e Saioni, … ka kaya talega, “Raica ko koya sa vucesa ena sega ni kania na kena kakana se tokara na nona isulu na daucakacaka.” [V&V 42:42] Au nanuma ni oqo e sega ni baleti ira era sega ni kunea rawa e dua na cakacaka, ka ra sa tovolea tiko me ra bula rawati ira. Au nanuma ni oqo e baleti ira era sa vakamatautaka me ra sa dau vakararavi tu ga vei ira na wekadra. … Au vakila ni se bera vakadua ni dua na gauna me vakadonui kina me dua me na vakararavitaka tikoga na nona vakacakacakataki vua e duatani tale. Au sega ni vakila niu a se gone ni dua ena vakaitavitaki koya me vakacakacakataki au. Sa solia vei au na Turaga na vuku. Sa vakaroti au o koya meu cakacaka kau sa qai cakacaka niu se qai yabaki tinikarua, kau vakila kina na marau, kau sa bula-rawati au tiko kina, ka vukei ira vakakina eso ka sa sivia oqo e limasagavulu na yabaki.

Au vakavinavinaka vua na Kalou ena vuku ni cakacaka, na marau e kauta mai na cakacaka e vuravura. Au sega ni dusia tiko oqo e dua na taba ni cakacaka. Me cakacaka vakadodonu ga. Ia sa vakarota ga na Turaga meda dau cakacaka vagumatua. Mai liu sara e a tukuna meda kana mai na buno ni yadreda. [raica na Vakatekivu 3:19].⁹ [Raica na vakatutu 3 ena tabana e 241.]

Sa sega ni dodonu me ra vakararavi na vutuniyau kei na dravudravua ki na iyau.

“Ena ca vei kemudou na tamata vutuniyau ni dou sa sega ni solia na nomudou iyau vei ira sa dravudravua, ia na nomudou iyau ena veveka kina na lomamudou, raica na ka oqo dou na tarogi kina ena siga ni veitarogi, ni veilewai, kei na veicudruvi ka vaka: sa oti yani na vula imatua ka sa oti na vula ikatakata, ia koi au, au sa sega ni vakabulai!” (V&V 56:16).

O ya na ka ena tukuna na Turaga baleti ira na tamata vutuniyau ka ra sega ni wasea na nodra iyau vei ira sa dravudravua. Ia, e tukuna talega e dua na ka bibi vei ira na dravudravua ka ra sega tiko ni cakacaka vagumatua. E kaya:

“Ena ca vei kemudou na dravudravua ka sa sega ni yalomalumalumu se yaloraramusumusu, ia koi kemudou sa sega ni mamau rawa na ketemudou dou sa kovea na ka e nodra na tani, ia dou sa kocova na ka dou sa raica ka dou sa sega ni cakacakataka ga e ligamudou!” (V&V 56:17,)…

… A kuria ka kaya, “Ia, era sa kalougata ko ira sa dravudravua ka ra yalosavasava.” E dua na duidui e tiko eke, “… kalougata ko ira sa dravudravua ka ra yalosavasava, ia ko ira sa yalomalumalumu ka yaloraramusumusu ni ra na raica ni sa yaco mai na matanitu ni Kalou, ena kaukauwa levu kei na iukuuku me vakabulai ira; raica era na taukena na ka kecega e vuravura.” (V&V 56:18)

O ya o ira e sega ni ra vutuniyau ena veika vakavuravura ia era bula vinaka tu ga ka yalomatua, ka ra sasagataka me ra cakava na ka e vinakata vei ira na Turaga me ra cakava. …

Oqo kemuni na taciqu kei na ganequ, sa tiko vei keda o ira era vutuniyau kei ira sa dravudravua. Kevaka meda dravudravua ka da bula kilikili eda na vakataki ira sa tukuna oqo na Turaga. E rawa ni da yalosavasava ka da tovolea tiko na noda igu, ka na sega ni rawa ni vakatara o koya me ra rarawa o ira era tovolea tiko ena nodra igu me ra vinaka cake ena nodra lewe tiko ni Lotu i Jisu Karisito ni Yalododonu Edaidai. …

Au nuitaka ni da na sega ni yalo ca baleta ni so na tamata era na rawa-ka vakalevu cake. Kevaka meda sa rawa-ka vakalevu, au nuitaka ni da na sega ni nanumi keda ga ka guilecavi ira na vo ni luvena na Tamada. Kevaka meda na vinaka cake mai vei ira eso, e dodonu meda tacidra ka ganedra dina ka kakua ni yacana walega. Me noda gagadre e vuravura oqo meda tauyavutaka e dua na isoqosoqo, me ra raica o ira eso na vinaka ni veika eda cakava tiko me ra na vakalesui ka vakalagilagia na yaca ni Tamada Vakalomalagi. …

Meda kakua ni lutu ki na veika ca era cakava tiko eso na tamata. Me kakua ni yaco mai vei keda na ivakarau ni vakasama meda na vinakata na ka e nona e duatani tale. Nanuma lesu na ivunau e tini ko na raica e dua na parakaravu lekaleka ni kaya, “ Kakua ni dau kocokoco.” [Lako Yani 20:17.] …

Me kakua ni vaka o ya na noda vakasama. Eso era na cakava vaka o ya, ia o keda e tiko vei keda na yalo ni kosipeli i Jisu Karisito ena vuni yaloda, ka da na sega ni sikalutu ki na veika vakaoqori.

E tukuni vei keda ni sega ni rawa meda qarava na Turaga kei na veika tale eso [raica na Maciu 6:24]. Meda na digidigi, kevaka meda sa na qarava na Kalou, kei ira na luvena na Tamada Vakalomalagi ka rawata na kena kalougata, meda sa na vakaliuci koya ka muria na nona ivakaro. Na veika eda vakila, kei na noda loloma, kevaka meu na vakayagataka na toma ni vosa o ya, me sa na tete yani ki vuravura raraba me rawa ni ra na ciqoma kece sara.¹⁰ [Raica na vakatutu 4 ena tabana e 241.]

Eda na vukea na cakacaka ni Lotu ka vakalougatataka na nodra bula o ira era leqa tu ena noda ikatini kei na isolisoli tale eso.

Sa solia vei keda na Turaga na galala meda sauma na noda ikatini ki na Lotu me baleta na kena vakatorocaketaki na nona cakacaka e veiyasai vuravura. O ira era sauma na nodra ikatini era sa vakalougatataki. … E sega ni rawa ni da vakalougatataki kevaka meda sega ni sasagataka. Meda na cakava na ka e rairai vei ira eso me vaka na solibula. Au kila ni so e nanuma ni ra sauma na nodra ikatini era sa solibula tiko, e sega ni vakakina; era sa cakava tiko e dua na vakavakarau ni veivakalougatataki ena tawamudu. Ia na Tamada Vakalomalagi sa solia vei keda na veika kece e tu vei keda. Sa solia tu o koya ki ligada na veika kece, ia meda vakayagataka e ciwa na ikatini ka sa qai vakarota meda biuta e dua na ikatini ki na vanua e kila o koya ni na yaga sara kina vakalevu ena Nona Lotu.

Ni da rogoca ena mataka nikua na ka me baleta na Lotu totoka oqo, [ena dua na soqoni ni koniferedi raraba], au sa qoroya sara ga na kena ripote vakailavo,—meu kila ni dua na isoqosoqo levu vakaoqo, ena kena lewe levu na lewena, vakaitavitaki ena levu sara na vanua, ena loma ni dredre e sotava tiko o vuravura me qai tucake e dua na lewe ni Mataveiliutaki ni Lotu ka tukuna ni sa galala na Lotu mai na dinau. Ni tu na dinau ni veimatanitu kei na tamata yadua, ia na Lotu me cicivaki tu vaka o ya ka sega na kena dinau. Meda vakasamataka mada na ka oqo. Meda sa tokona na Lotu. Meda sa vakamuria na veiliutaki totoka ni Lotu. Meda sa bula me vaka o ya me rawa ni vakalougatataki keda na Turaga me vaka sa vakalougatataka na Lotu.¹¹

Kevaka mo sa sauma tiko vakadodonu na nomu ikatini, sa rawa meu doudou na tukuna, ni ciwa na ikatini sa veivakalougatataki sara vakalevu vei ira era sauma, mai vei ira era sega ni sauma ena duanadrau na pasede. Oqo na cakacaka ni Turaga. … Oqo e sega ni rawa ni cakava na tamata. Mai na nomuni yalololoma kei na yalo ni soli-ka, na nomuni dau qarava na cakacaka ni kaulotu, na nomuni dau qaravi ira na dravudravua, … na veika kece o ni sa solia tiko ena nomuni itutu vakalewenilotu, au vakadinadinataka ni veika sa vo vei kemuni ena kauta yani e dua na marau levu, na vakacegu, na veivakacegui, kei na veivakadeitaki ni bula tawamudu mai vei ira e lewe levu sara na tamata era marautaka e vuravura nikua.¹²

Au vakadeitaka ni Turaga ena lomani ira o ira era sa yalomalumalumu ka vakabauta me ra veivuke vei ira era leqa tu, ena soli ni kakana, isulu, iyaya ni moce, se dua na ivakaraitaki ni yalovinaka, baleta ni o ya e dua na tiki ni kosipeli i Jisu Karisito.¹³ [Raica na vakatutu 5 ena tabana e 241.]

Kevaka meda sa na dau solia na noda iyau sa sega ni dodonu me dua e leqa.

Sa sega ni dodonu me dua na turaga, marama se gone ena Lotu i Jisu Karisito ni Yalododonu Edaidai me sega vua na ka, ni sa tauyavu na Lotu me vukei ira era leqa. Sa levu na ka e tu me veiwaseitaki. … Sa vakadonuya na Kalou ki na tamata me sasaga me rawata na iyau, ia kevaka era sa rawata ena kena sala dodonu, o ya sa nodra, ka sa vakalougatataki ira ena kena vakayagataki, kevaka me ra vakayagataka vakavuku.¹⁴

Eda sa vesuki ena veika vakavuravura ka da sa guilecavi ira kina o ira era sotava tu na leqa ka rawa ni da vukei ira ena levu sara na ka.¹⁵

Vakasamataki ira era sa sega tu ni cakacaka. … Vakasamataki ira na luvena na Tamada ka lomani ira me vakataki keda ka ra na sotava na leqa. Vakasamataka na leqa ena sotavi kevaka meda sega ni veivuke o keda e tu vei keda na ka—sega walega ena ka me soli, ia kevaka meda na sega ni solia na veivuke vei ira era gadreva dina tiko na veivuke meda sikovi ira ena nodra loma ni vale me ra vukei yani ena veika e rawa ni da solia sara ga vakaikeda. Kemuni na taciqu kei na ganequ, sa soli tu mai vei keda na galala meda vakavutuniyautaki keda ki na veika sa tu mai lomalagi na vanua ena sega ni vakacacana na sarasara se na veveka ka ra na sega ni butakoca na daubutako[raica na Maciu 6:20]. Na veika oqo e solia vei keda na Tamada ka sa kila na ka kecega, ka kila na kena itekivu mai na kena itinitini, ka sa kaya, “Oqo na sala, mo mai muria.”

Meda … vakararai mada ena vanua eda vakaitikotiko kina—kakua ni laiva vei rau o bisopi se peresitedi ni iSoqosoqo ni Veivukei, ia o keda meda sa ivakaraitaki ni loloma vei ira ka ra gadrevi keda sara vakalevu. Na ka kecega eda cakava meda kakua ni wiliki ira eda vukei ira me ra vaka na daukerekere. Meda solia na ka eda solia me vaka ni nodra. E solia vakadinau vei keda na Kalou. Ena so na gauna o keda eda sa rawa-ka vakalevu eda [vakaraitaka] ni veika oqori e noda. Na veika kece e tu vei keda, na keda kakana, na noda isulu, na noda vale, na noda itikotiko, kei na noda madigi, e solia kece vei keda meda kena ivakatawa ena Lotu kei na matanitu ni Tamada Vakalomalagi, ka kevaka meda qai … solia na ka e noda ena kena ka lailai sara me vaka na isolisoli ni yada, eda na rawata mai vei koya mai cake na veivakalougataki eda gadreva ena gauna oqo e vuravura, ka kevaka sa na yaco mai na gauna meda toki yani eda na raica ni sa waraki keda tu mai na veivakalougatataki mai vua na Tamada ka sa vakavinavinakataka na veika eda sa vakayacora rawa.¹⁶

Kevaka meda gadreva meda wili vata kei na matanitu ni noda Turaga, na matanitu vakasilesitieli, sa noda madigi oqo meda vakavakarau kina,—ena loloma sega ni veivakadirideini, ena cakacaka vagumatua, ena yalo solisoli, ena vosota, kei na gagadre meda cakavinaka kecega e rawa ni da cakava me ra kalougata kina na tani, meda solia—me kakua ni tiko na yalo ni via ciqoma lesu tale mai, ia na gagadre ni via solia dina, niu sa kaya vei kemudou: “sa kalougatata vakalevu o koya sa solia mai vei koya sa ciqoma.” [Cakacaka 20:35.] Na kosipeli i Jisu Karisito na kosipeli ni solisoli, sega walega ni noda iyau, ia o keda sara ga kau sa vakavinavinaka vua na Tamada Vakalomalagi niu sa lewena tiko e dua na isoqosoqo ka sa vakavulici me veivuke vaka oqori.¹⁷ [Raica na vakatutu 6 ena tabana e 241.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Tukuna o George Albert Smith vei ira na Yalododonu ena Gauna ni Vakaloloma Levu, “Au vakabauta ni Tamada Vakalomalagi e solia tiko vei keda e dua na gauna meda vakatorocaketaki kina” (tabana e 231). Cava na kena ibalebale vei iko oqo? Eda “vakatorocaketaki” vakacava ena noda veiqaravi tiko vei ira era leqa tu?
Ni o wilika na imatai ni iwase ni ivakavuvuli (tabana e 233), vakasamataka na ka mo cakava me vakatorocaketaki kina na nomu maroroi kakana e vale. Cava so na leqa tubukoso mo vakarautaki iko kina? Cava so e rawa ni cakava na koramu ni matabete kei na iSoqosoqo ni Veivukei me ra vukei kina na lewenilotu me ra vakavakarau ki na leqa tubukoso?
Taleva na iwase ka tekivu ena tabana e 235 ka wilika na Vunau kei na Veiyalayalati 68:31. Na cava o nanuma ni gadreva kina na Turaga meda cakacakataka na noda bula? Na cava so e rawa ni vakavulici vei ira na luveda me baleta na bibi ni cakacaka?
Wilika na ivakaro nei Peresitedi Smith vei ira na vutuniyau kei na dravudravua ena tabana e 236–237. Na cava so ena yaco ena noda dau vakararavi ki na iyau? Na cava e rawa ni da cakava meda dro tani mai kina ena ka oqo?
Wilika na iwase ka tekivu ena tabana e 237, na vanua ka vakamacalataka kina o Peresitedi Smith na veivakalougatataki ni kena dau saumi na ikatini kei na isolisoli tale eso. Na veivakalougatataki cava so e rawa ni da vakavulica vei ira na itabagone kei ira na lewenilotu vou?
Ni ko vulica tiko na iotioti ni iwasewase ni ivakavuvuli (tabana e 239–241), vakasamataka na veika e rawa ni ko cakava mo vukei bisopi kina se o ira na iliuliu ena tabanalevu me sotavi kina na nodra gagadre na lewe ni tabanalevu se o ira ena nomu itikotiko. Cava na kena ibalebale vei iko mo solia “sega walega ni ka o taukena ia meda soli keda sara ga”?

iVolanikalou Veisemati: Efeso 4:28; Jemesa 1:27; 2 Nifai 5:17; Jekope 2:17–19; Mosaia 4:22–25; Vunau kei na Veiyalayalati 104:13–18

Veivuke ni Veivakavulici: “Kevaka me na levu sara na tamata o vakavulica ena duavata ga na gauna o se rawa ga ni veitaratara kei ira yadudua. Oqo e dua na kena ivakaraitaki o rawa ni veitaratara yadudua kei ira na lewe ni kalasi ena gauna o kidavaki ira kina ena nodra lako mai ki na kalasi… . E rawa talega mo vakauqeta na vakaitavi me taleitaki ka bulabula” (Veituberi, Me iLutua ni Noda Bula, 39).

A sikova tiko o George Albert Smith kei na so na iliuliu ni Lotu e dua na lololo ni bisopi. Me vaka ni sa maroroi kakana tu mai na Lotu, sa tu vakarau kina me veivuke vei ira era gadreva na veivuke ni sa vakacaca oti na iKarua ni iValu Levu e Vuravura.

“Eda na sotava na gauna dredre, ia kemuni na taciqu kei na ganequ`, e dodonu ga meda vakavakarau yani kina.”

“Sa solia vei keda na Turaga na galala meda solia e dua na ikatini ni noda rawa-ka me baleta na Nona Lotu me vakatorocaketaki kina na Nona cakacaka.”