Wase 7

Na Tawamate Rawa ni Yalo

E tawamudu na noda bula, na kila ka oqori ena vukei keda meda digitaka na veika dodonu ka vakacegui keda ena gauna ni noda tagi.

Na Bula nei George Albert Smith

A vakalougatataki o George Albert Smith ena dua na kila ka tudei me baleta na inaki ni bula, oqori a rawa kina vua me vakayaloqaqataki ira na tani ena nodra sotava na veitemaki. Sa dau vakananuma tiko vei ira na Yalododonu ni da “bulataka tiko na bula e tawamudu”—na gauna tawamudu e sega ni qai tekivu ni sa oti na bula oqo ia na bula oqo sa dua na tiki bibi sara ni gauna tawamudu. “Ena so na gauna au dau tukuna vei ira na noqu itokani ena gauna era yacova kina e dua na ilesu ni sala, ka ra sega ni kila se evei me ra gole kina, ‘Nikua na itekivu ni marau tawamudu se rarawa tawamudu vei iko.’”¹

A vakadinadinataka o Peresitedi Smith na dina eso oqo ena lotu ni veibulu nei Hyrum G. Smith, na Peteriaki ni Lotu, ka a takali yani ni se tamata gone sara, ka biuta tu mai na watina kei na walu na luvena:

“Au a vakila tiko, me tekivu mai na gauna au kerei kina meu vosa ena veibulu oqo, de na rairai au na sega ni rawa ni kitaka vakakina. Sa luvuci na lomaqu, kau vakila niu na sega ni rawa ni vakatulewataka vakavinaka, ia niu curu mai sa buroro mai e yaloqu e dua na veivakayarayarataki kamica ni vakacegu. …

“Au sega ni via tagi kau vinakata meu vakavinavinaka vei Tamada mai lomalagi me baleta na nona Kosipeli na Luvena Lomani ka sa vakatakilai vou tale mai ena noda gauna. … Meda kila ni tawamudu na bula sa dua na veivakalougatataki vakasakiti,—meda kila ni ena tawamudu taucoko ena nona na turaga vinaka oqo na veivakalougatataki taucoko a bula me rawata. Sa mai yalani na nona bula oqo ia oqo e dua walega na tiki ni bula tawamudu. Sa vakotora vakatitobu ka tudei ko koya na kena yavu me tara cake kina ka na dau tara cake tikoga ena tawamudu taucoko. Na reki sa sotava e vuravura oqo ena vakaikuritaki. …

“Niu vakasamataka na veika era sa sotava na tamata e vuravura, ena veigauna vakaoqo, au qoroya na ivakarau eda sa vakalougatataki kina. Au sa sega tale ni qai vakatitiqataka na bula tawamudu kei na tawamate rawa ni yalo me vaka na noqu sega ni vakatitiqataka ni na cila tu na siga ena sigalevututu. … Sa dua na ka rarawataki meda veitalatala kei ira na noda daulomani, ke vakawawa wale mada ga. Eda vakauti ira yani ki na kaulotu, se ra lako yani ki na veiyasai vuravura me ra laki vakaitikotiko kina ka da dau nanumi ira. Ni yaco eso na ka vakaoqo e vaka ni ra sa rui yawa sara, ia na ka dina ni sega, kevaka walega meda kila. … Meda kua ni vakauta na noda lolosi baleta ni na dau lako ena so na gauna vei ira era vakaloloku tiko, au vakila ni dodonu meu reki ena siga oqo niu kila ni sega ni kena icavacava oqo. …

“… Ia nikua, niu tu ena kemuni iserau, e dodonu beka me drodro tu na wainimata, sa vakasinaiti tu na yaloqu ena vakacegu kei na marau. Au masuta me na tiko talega na vakacegu oqori ena nodra bula o ira yadua era lolosi voli.”² [Raica na vakatutu 1 ena tabana e 83.]

iVakavuvuli nei George Albert Smith

Eda a bula tu vakayalo ni bera ni da lako mai ki vuravura, ka na bula tikoga na yaloda ni da sa mate.

Na noda kila na bula oqo sai koya ni bula tawamudu—ni da sa bula tiko nikua ena tawamudu ena kena levu e rawa ni da na bula kina ena tawamudu. Na noda vakabauta sai koya ni da a bula tu ni se bera ni da lako mai eke; o ira na agilosi, o ira na yalo, era a sega ni qai mai tekivu ena bula oqo. Eda vakabauta ni da a sa rawata e dua na vale vakayalo ni bera ni da lako mai ki vuravura. Na yago vakayalo oqori a talai mai ki na vuravura oqo, a mai ciqoma eke e dua na vale vakayago, na yago eda raica tu oqo. Na tikina vakayago eda raica e ka ni vuravura, baleta na vuravura [raica na 1 Korinica 15:47], ia na tikina o ya ka na biuta na yago ni sa lako yani ki tuba na noda bula sai koya na ka e vakayalo, ka na sega ni mate rawa. Na vale vakayago ena laki davo tu ena ibulubulu—ni oqori e dua ga na tiki ni vuravura me na lesu tale vei vuravura—ia na agilosi vakayalo sa biuta tu kina na Kalou, ka tu kina na kaukauwa me vakaibalebaletaka na veika ka vakasama, ka tu kina na kaukauwa me lagasere ka vosa, e sega ni kila na mate; e lako ga yani mai na iwase oqo ni bula tawamudu, ka laki waraka mai kea na vakasavasavataki ni vale vakayago, me yacova na gauna me na vakaduavatatataki tale kina kei na vale oqo, ka na vakalagilagi, me vaka na kena vakalagilagi na yagona na noda Turaga sa vakaturi cake tale, kevaka eda a bula meda kilikili kaya.³

Ena vosa ni serekali, “Life is real, Life is earnest,” kei na “the grave is not its goal.” [Henry Wadsworth Longfellow, “A Psalm of Life.”] Na yalo e vakatawana voli na vale e tawamate rawa. Ena bula sivita yani na ibulubulu. Ena vuca na yago ka lesu tale ki vuravura ia na yalo ena bula tikoga.⁴

Au vakavinavinaka ni sa vakatakilai mai vei keda ka vakamatatataki mai ena gauna oqo ni sega ni kena icavacava na bula oqo, ni oqo e dua ga na tiki ni tawamudu, ia kevaka eda na vakayagataka vakavinaka na galala e noda eke, oqo na idewadewa ga ki na veivakatagedegede e cecere ka uasivi cake.⁵ [Raica na vakatutu 2 ena tabana e 83.]

Na noda inaki e vuravura oqo meda vakarautaki keda meda laki bula vata kei na Tamada Vakalomalagi.

Eso era vakabauta ni da sa takali yani mai na iwase ni bula oqo, sa na cava e kea. E dredre niu vakabauta, ni da raica na cakacaka ni veibuli vakalou, ni da vakadikeva na veitikilalai ni yago ni tamata, na taucoko ni yagona, na tatuki ni nona uto, na nona tarai cake kei na nona vaqaqacotaki tiko mai na gauna ni gone ki na uabula, kei na kena siro sobu me yacova ni sa cava na bula oqo—ena rawa kina ni vakabauta e dua vei ira na luvena na Tamada Vakalomalagi ni a sucu ga mai ki vuravura na tamata me mai bula me yacova ni sa uabula, qase, ka mate yani, ka sega ni vakainaki na nodra mai bula eke.⁶

E sega ni soli mai vei keda na bula oqo meda mai vakaoti gauna ga. A tiko e dua na inaki cecere ni noda buli, ena bula sa solia mai vei keda na Kalou. Meda vulica mada na cava na inaki oqori, me rawa ni da tubu ka rawata na bula tawamudu.⁷

E sega ni dua na vakataratutu ena nona vakasama e dua na Yalododonu Edaidai ena inaki ni bula vakavuravura oqo. Eda lako mai ke meda vakarautaki keda ka vakatorocaketaki keda meda rawata meda kilikili kaya meda laki bula ena nona iserau na Tamada Vakalomalagi.⁸

Eda vakabauta ni da mai tu eke baleta ni da a yalodina ena noda bula taumada ka da rawata kina na galala meda lako mai ki vuravura. Eda vakabauta ni noda mai bula tu oqo e icocovi ni noda yalodina ni da se bera ni lako mai ke, ka ni da marautaka tiko e vuravura oqo na vua ni noda sasaga mai na vuravura ni yalo. Eda vakabauta talega ni da sa kaburaka tiko ena gauna oqo na sore ni itei eda na qai tamusuka ni da sa takali tani yani mai ke. Na bula tawamudu vei keda na isoqoni ni bula taumada, bula oqo, kei na tomani ni bula ena tawamate rawa, ka soli tu kina vei keda na kaukauwa ni toso kei na tubu e sega ni vakaiyalayala. Ena yalo kei na veivakadeitaki o ya, eda vakabauta ni “Me vaka na tamata ena gauna oqo, a vaka tu kina na Kalou, ia na ituvaki ni Kalou ena gauna oqo, ena rawa ni yaco me vakakina na tamata.” [Raica na Lorenzo Snow, “The Grand Destiny of Man,” Deseret Evening News, 20 ni Julai 20, 1901, 22.] Ni da a buli ena ivatuka ni Kalou, eda vakabauta ni sega ni cala, ni sega ni tawadodonu, meda nuitaka me vakatarai vei keda meda vakaivotavota ena ivalavala vakalou ia, kevaka eda sa yalodina, meda vaka na Kalou; ni kevaka eda sa ciqoma ka talairawarawa na nona lawa na Tamada ka lewai kina na bula oqo, eda na yaco meda vakataki Koya vakalevu cake; ia ni da vakayagataka na madigi e soli tu meda yacova yani, eda sa vakarau kina meda ciqoma na veimadigi cecere cake ena bula oqo kei na bula ena qai muri mai. …

Sa dodonu meda tamata mamarau ena noda sa kila ni bula vakavakarau oqo e sega ni da vakarautaki kina ki na mate, ia meda bula; na nona gagadre vei keda na Tamada sai koya meda levea na cala kecega ka ciqoma na dina kece sara, ia ni da vakayagataka ena noda bula na dina meda yaco meda vakataki Koya vakalevu cake, ka da kilikili meda laki tiko vata Kaya.⁹

Kemuni na taciqu kei na ganequ, oqo e dua na tikina bibi. Sa dodonu meda vakasamataka sara vakabibi. Sa dodonu meda raica na noda dui bula ka kila kevaka eda sa vakarautaki tu ki na bula cecere o ya ena gauna mai muri, kevaka eda sa kacivi yani ni mataka eda sa vakarau tu beka meda laki tukunikataka na noda ivalavala e vuravura; se da sa vakila beka ni da na ciqoma mai vei Tamada Vakalomalagi na veikidavaki kei na veivakacaucautaki “E vinaka, a tamata vinaka ka dina.”¹⁰ [Raica na vakatutu 3 ena tabana e 83.]

Ena gauna ni bula oqo sa dodonu meda segata na veika e tawamudu na kena yaga.

Eda sa solia beka vei keda ena bula oqo, e vica na ka, ka na solia vei keda na vakacegu, vakayago; ia na veika e tawamudu, na veika e “vakaibalebale,” sai koya na veika tawamudu eda dau dolele meda yacova, ka vakarautaki keda meda ciqoma, ka da na taura rawa ena noda dui sasaga yadua.¹¹

E sega beka ni dua na ka vakasakiti ni veika a dau vakasaqara tu ko vuravura mai na ivakatekivu, na iyau, na kaukauwa, na veika kece e dau logaloga vinaka kina na tamata, sa tu vakalevu ena gauna oqo—na isulu vinaka cake sa tu vakalevu, levu cake na kakana mai na ka e rawa ni laukana, levu cake na iyau ena kena veimataqali me vaka e se bera ni bau tu vakadua e vuravura. Era sa logaloga vinaka na noda veivale. Na veika yaga ni bula era sa levu cake tikoga me tekivu mai na gauna e yaco mai kina ki vuravura na Kosipeli, nikua na veika kecega eda a sasagataka tu sa tu vei keda. Na vuli sa yaco mai ena kena ivakatagedegede duadua e cake. Sa levu cake na kila ka ni veika ni vuravura oqo sa tu vei ira na tamata me vakatauvatani mai na veigauna kecega sa oti yani. Na veika kecega eda dau segata vakaukauwa na tamata mai na ivakatekivu ni gauna ka dau nanumi ni gadrevi vakalevu sa tu e vuravura oqo; ia mai na veika oqori, e tu ga na vakatitiqa kei na rere me baleta na veika e tu mai liu.

Na cava na noda leqa? Sai koya na noda vakasaqara na veika logavinaka vakayago, eda vakasaqara na nodra veidokai na tamata, eda vakasaqara na veika e kauta mai ki yaloda na yalokocokoco. Eda sa segata meda kauti keda cake ka da taleitaki keda vakalevu cake mai vei ira na vo ni luvena na Tamada.¹²

Meda kakua ni vakamoceri, meda kakua ni cavilaki ena levu ni veika vinaka ni vuravura oqo; na cava na betena vua na tamata me rawata na vuravura ka qai vakayalia kina na yalona? [Raica na Marika 8:36.] Me kakua ni raibaleta na inaki ni noda buli; ia meda cakacakataka na vakabulai ni yaloda.¹³

E dua na ka rarawataki duadua ena bula meda raica e dua na turaga se dua na marama ni rau vakadavori yani ki na qele ni da kila tu ni rau a besetaka na veivakalougatataki cecere cake ka solia tu vei rau na Tamada, ia erau qai guta tikoga na kena vure ka sa yali talega. Niu vakasamataki ira na milioni na luve ni Kalou e vuravura, ka raica na lailai ni nodra guta tiko na veika e vakaibalebale dina, au rarawa.¹⁴

Nanuma tiko ni vuku o na rawata sai koya ena tawamudu, na dina o na vulica eke ka vakayagataka ena nomu bula, na vuku kei na kila ka o na rawata ka tubu mai kina—oqori o na kauta vata kei iko ena nomu sa lesu ki vale.¹⁵

Na iyautalei eda na raica ni da sa lako yani ki yasana kadua sai koya na kena eda na binia vata mai kea ena noda veiqaravi ena vukudra na vo ni luvena tagane kei na yalewa na Tamada eda a dau veimaliwai vata eke. Sa vakarautaka tu vei keda o Koya na veika kece oqo, ia ena noda tiko e kea eda na kune marau vakalevu cake ena noda veiqaravi voli vei ira na wekada mai na veisala kece tale e tu.¹⁶

E sega soti ni bibi na levu ni veika talei e tu vei iko, e vica na levu ni iyauqaqa o rawata, kei na levu ni nomu dokai mai vei ira na tamata, kei na veika kece e dau gadrevi vakalevu ena vuravura. Na ka e solia vei iko na Kalou ka levu duadua na kena yaga mai vei ira kece na kena vo sai koya na madigi mo rawata na bula tawamudu ena matanitu vakasilesitieli ka me ra nomu itokani, ena veiitabayabaki kece ni tawamudu, na luvemu tagane kei na yalewa, kei na watida eda a dau tiko vata kaya e vuravura.¹⁷ [Raica na vakatutu 4 ena tabana e 83.]

Ena vukui Jisu Karisito, eda na tucake tale.

Na nona bula dodonu na iVakabula sa ivakaraitaki uasivi vei keda kece, kei na Nona tucake tale sa imatai ni ivakadei ki na kawatamata ni o keda, talega, eda na tucake mai na ibulubulu.¹⁸

Ni sa vakaturi cake tale mai na mate ko Jisu sa yaco ko Koya me isevu ni tucake tale. Na yalo ka luvena na Tamana (na tiki vuku ni Yalona) sa tawana tale na Nona vale vakayago sa vakasavasavataki, ka sa yaco ko Koya me dua na ka bula vakasilesitieli sa vakalagilagi, ka dabe ena Nona idabedabe, ena liga imatau i Tamana, ni sa dua ko koya ena Lewe Tolu Vakalou. Sa tu Vua na kaukauwa me vakamalumalumutaka na mate ni sa muria na lawa kece i Tamana e lewai kina na mate; ia ni sa vakadruka na mate sa vakayagataka kina na ki me ra tucake kece kina na kawatamata, ka me vakalagilagi talega kina na tamata kecega ena nodra talairawarawa ki na Nona ivakavuvuli ka sa rui rawarawa sara ka na rawa vei keda kece meda vakamuria kevaka eda vinakata.¹⁹

O Jisu Karisito e sega na nona ivalavala ca. Ena vuku ni Nona sa savasava sara, na Nona dodonu kei na Nona bula savasava, sa rawa kina Vua me dolava na katuba ni valeniveivesu, me vakadruka na mate kei na ibulubulu, ka tauyavutaka na sala … ki na lomalagi ko ya eda sa nanamaki tiko meda lako kina.²⁰

Meda cega na wase 88 ena Vunau kei na Veiyalayalati ka raica na veika sa tukuna na Turaga me baleta na noda tucake tale, sega walega ni nona tucake tale na iVakabula, ia e tukuna na veika e rawa ni yaco vei keda. … E tukuni vei keda ena iwase oqo ni na vakaturi cake mai na ibulubulu na yagoda, e sega ni dua tale na yago, ia na yalo era tawana tiko na yago oqori ena gauna oqo era na tawana tale na yago vata ga oqori ni ra sa savai ka vakasavasavataki ka sega tale ni mate rawa. [Raica na V&V 88:14–17, 28–33.]²¹

E vuqa sara na tamata e vuravura era sega tu ni kila se cava na tucake tale. O sa dau vakavulica beka vei ira na luvemu kei ira na nomu itokani na kena ibalebale? … Na Nona tucake tale [na iVakabula] e matata tu vei ira na Yalododonu Edaidai era kila na kosipeli, ia e vuqa sara era sega tu ni kila na kena ibalebale. … Na inaki ni Kosipeli i Jisu Karisito me vakarautaki ira na turaga, marama kei na gone kecega ki na gauna era na vakaturi cake kina mai na nodra ibulubulu, kei na gauna ena tauyavutaka kina na nona matanitu ena vuravura oqo na Tamada Vakalomalagi ka ra na tiko kina na buladodonu ka na nodra Tui ka Daunilawa o Jisu Karisito.²² [Raica na vakatutu 5 ena tabana e 84.]

Na noda kila na tawamate rawa ni yalo e vakauqeti keda, vakayaloqaqataki keda, ka vakacegui keda.

Eda wilika ena Jope, “Ia ka sa tiko e dua na yalo ena loma ni tamata; a sa solia vei ira na vuku na icegu i Koya sa Kaukauwa.” [Jope 32:8.] O ira era se bera ni ciqoma na veivakauqeti oqori era na sega ni kila rawa na ibalebale ni tucake tale mai na mate, ia ni sega ni kilai tu oqori e vaka vei au ni na lailai sara na marau vei ira era sa qase, ena nodra waraka na gauna sa na biuta kina na yago na yalo ka lako ki na vanua era sega tu ni kila.²³

Isa, sa na ka ni rarawa vei keda kevaka eda nanuma ni sa mai cava na noda cakacaka ena vuku ni mate. Kevaka sa oti na noda cakacaka ni bula ena vuravura, sa sega vei keda na madigi meda toso tikoga, sa na lailai sara na ka me vakauqeti keda meda bula tiko me vaka na kena dodonu eke. Na noda kila ni veika kece eda sa rawata eke, kei na veivakatorocaketaki eda sa cakava, ena vakavinakataka cake na noda marau ena tawamudu, ena vakayaloqaqataki keda meda solia na noda vinaka duadua.²⁴

Eda sa rorova tiko yani vakatotolo sara oi keda kece na gauna eda sa na kacivi yani kina ki kea. Kevaka eda sega ni kila ni dua tiko na bula sa bera mai, kevaka eda sega ni kila ni tiko tale eso na ka mai na veivakayarayarataki eda sa ciqoma me yacova mai oqo, kevaka a sega tale ni dua na ka ia na veika walega kei na ka ni oca wale ni bula eda bula kina, e vuqa tu, e vaka vei au, o cei beka ena vakatubu oca vua na cakacaka ena vakayacori me baleta na noda mai tiko eke. Ena nona loloma veivueti na Tamada Vakalomalagi sa soli kina vei keda na isolisoli vakasakiti duadua e rawa ni yaco ki na kawatamata.²⁵

Sa vakalougatataki keda na Turaga meda kila ni bula tiko o koya, ka taukena e dua na yago, ka ni da sa buli ena kena ivatuka. Eda sega ni vakabauta ni o koya e dua ga na tiki ni dua na ka, se e dua na ka sega ni vakavatukana. Kevaka o sa ciqoma na ivakadinadina sa yaco mai vei au ka kila me vaka na noqu kila ni sa vakatakilai koya mai na Tamada Vakalomalagi vei ira na luve ni tamata, ni o koya na Kalou vakataki koya, ni da a buli ena kena ivatuka, ni o koya na Tama ni yaloda, ni sa solia vei keda o koya na madigi meda mai bula e vuravura meda mai taukena e dua na yago, me rawa kina ni da vakarautaki keda meda lesu tale ki na kena iserau ka bula tawamudu vata kaya, au kaya, kevaka o sa ciqoma na veivakadeitaki o ya, sa tiko kina e dua na yavu e rawa ni o tara cake kina na nomu vakabauta. Kevaka ena tauri mai vei iko, na kila ni bula dina tiko na Kalou, na veivakadeitaki ni o Jisu Karisito na ivakaraitaki ni Kalou ena yago, kevaka ena tauri mai vei iko, na veivakadeitaki ni na yaco dina na tucaketale mai na mate, o na kunei iko ena ituvaki era sa tu kina na luvena na Tamada e vuravura raraba, kau na tarogi iko kina, na vakacegu cava sa na qai vo kina vei iko? Oqo na dina bibi sara.²⁶

E vuqa cake vei ira na noqu daulomani era sa tu ena yasana kadua ka lailai eke, ka na sega ni dede me vaka na kena ivakarau, sa na yaco talega mai na noqu gauna meu sa gole yani. Au sega ni lomaleqa se nuiqawaqawa kina, ia ena inuinui kei na yalodei, na veisau, ni sa yaco mai, ena basika kina na yalomarau e vakaikuri kei na veika vinaka eda na sega ni kila rawa ena bula oqo.²⁷

Ena gauna eda sa kila kina ni mate e dua ga vei ira na ikalawa eda na lakova na luve ni Kalou ena tawamudu taucoko, me vaka na nona ituvatuva, ena butakoca vei mate na nona batigaga ka kauti keda yani meda raica e matanavotu na bula tawamudu. E vuqa na matavuvale era sa kacivi me ra vakamoce vakalekaleka vei ira era dau lomana. Ni yaco na mataqali veibiu vakaoqori, eda dau sosa, kevaka eda vakalaiva, ka da kauta mai na rarawa ki na noda bula. Ia kevaka e rawa ni rai na matada vakayalo meda raica, e rawa ni da vakacegui, au vakadeitaka, na veika eda na rawa ni raica. Ena sega ni biuti keda tu na Turaga me sega na noda inuinui. Ena kena veibasai sa solia vei keda o koya na veivakadeitaki ni marau tawamudu, kevaka eda na ciqoma na nona ivakasala kei na veidusimaki ena noda bula oqo.

Oqo e sega ni dua na tadra walega. Oqo na veika dina. Vei kemuni na lewe ni lotu i Jisu Karisito, na italanoa oqo e rawarawa wale, ia e dina. Era sa tu na veivola tabu ni ivolanikalou sa vakarautaka tu vei keda na Tamada Vakalomalagi, ka vakavulica vei keda ni da na bula me tawamudu. … Sa solia mai vei keda vakarawarawa sara na Turaga na itukutuku oqo, kau vakavinavinaka vua mai na boto ni yaloqu ena kila ka sa solia vei keda, me ra na vakacegui o ira sa tagi ka meda kila o keda na inaki ni noda mai tiko eke. Kevaka e rawa ni ra vosa mai vei keda o ira era sa takali yani, era na kaya, “Dou toso tikoga ki liu, ki na sasaga ena kauta vata mai vei keda na marau tawamudu.” Cakava na veika ena vinakata na Turaga mo cakava, o na sega ni calata e dua na ka yaga; ia na kena veibasai ni o na kumuna cake tikoga na iyautalei mai lomalagi ka na sega ni kania na sarasara se ra butakoca na daubutako. [Raica na Maciu 6:19–20.]

Au laiva vei kemuni na noqu ivakadinadina niu kila ni da bulataka tiko na bula tawamudu, ka ni veitawasei lekaleka ena mate … e dua ga vei ira na ikalawa ena salatu ni itosotoso tawamudu ka na laki cava ena marau kevaka eda yalodina kina.²⁸ [Raica na vakatutu 6 ena tabana e 84.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Ni o wilika “Na Bula nei George Albert Smith” (tabana e 73–74), vakasamataka mada e dua na gauna o tovolea kina mo vakaceguya e dua ni mate na nona daulomani. Na cava a kauta mai vei Peresitedi Smith na vakacegu?
E vakavuvulitaka o Peresitedi Smith ni “bula oqo e dua walega na tiki ni gauna tawamudu” (tabana e 74–75). Na cava na kena ibalebale vei iko oqo? Ena dau veivakayarayarataki vakacava ki na digidigi eda vakayacora na noda kila na ivakavuvuli oqo?
Vulica na iwase ka tekivu ena tabana e 75–77. E duidui vakacava na ivakavuvuli oqo ena iwasewase oqo mai na veika e vakavuvulitaka o vuravura me baleta na inaki ni bula? Na cava soti eda sa sotava ena bula oqo ena rawa ni vukei keda meda “vakaivotavota ena ivakarau ni bula vakalou”?
Taleva na iwase ka tekivu ena tabana e 77–78, vakauasivi na iotioti ni va na parakaravu ena iwasewase. Na cava na vuna e vaka kina na “guta tikoga na kena vure ka sa yali talega” na noda dau segata na veika ni vuravura”?
Ena tabana e 80, e goleva kina o Peresitedi Smith na itukutuku me baleta na tucake tale enaVunau kei na Veiyalayalati 88. Na cava e vakavuvulitaka vei iko na tikina e 14–17 kei na 28–33 ena iwasewase oqo me baleta na tucake tale? Na cava beka eso na iwalewale mana meda vakavuvulitaka kina vei ira na gone na tucake tale?
Wilika na iwase ka tekivu ena tabana e 81. Na cava eso na veivakatovolei ni bula oqo ena rawarawa cake na nomu sotava baleta ni tiko na nomu ivakadinadina ni ivakavuvuli e vakavuvulitaki ena iwasewase oqo?

iVolanikalou Veisemati: 1 Korinica 15:12–26, 35–42, 53–58; 2 Nifai 9:6–13; Alama 12:24; 28:12; Vunau kei na Veiyalayalati 93:19–20, 29–34; 130:18–19; Eparaama 3:24–26

Veivuke ni Veivakavulici: “Kerei ira na vakaitavi me ra digitaka e dua na iwasewase era taleitaka ka wilika lo. Sureti ira me ra kumuni ya rua se ya tolu o ira era digitaka na iwasewase vata ka veitalanoataka na veika era vulica” (mai na tabana e viii ni ivola oqo).

“Au vakavinavinaka ni sa vakatakilai mai vei keda ka vakamatatataki mai ena gauna oqo ni sega ni kena icavacava na bula oqo, ni oqo e dua ga na tiki ni tawamudu.”

“Na ka … e levu duadua na kena yaga mai vei ira kece na kena vo sai koya na madigi mo rawata na bula tawamudu [vata kei ira na luvemu] tagane kei na yalewa, kei na watimu.”

“Na Nona tucake tale na iVakabula sa imatai ni veivakadeitaki vei keda na kawatamata ni o keda, talega, eda na tucake mai na ibulubulu.”