Wase 4

Na Parofita o Josefa Simici, na iYaya ni Cakacaka ni Kalou ena Vakalesui Mai ni Dina

Mai vua na Parofita o Josefa Simici, sa vakalesuya tale mai na Kalou na kosipeli i Jisu Karisito ena kena savasava taucoko.

Na Bula nei George Albert Smith

Ni voleka na ika 100 ni ivakananumi ni nona a sucu na Parofita o Josefa Simici, a lako vata kei Peresitedi Joseph F. Smith o Elder George Albert Smith kei ira tale eso me ra laki sikova na veivanua bibi ki na nona bula na Parofita. Ena mataka ni ika 23 ni Tiseba, 1905, a vakatabui kina e dua na kena ivakananumi o Josefa Simici ena vanua a sucu kina e Vermont. A dua na gauna bibi dina vei George Albert Smith kei ira era a tiko vata kaya me ra tiko ena dua na vanua bibi ni kena Vakalesumai na kosipeli. “A drodro vakayauyau na wainimatai keimami,” e nanuma lesu o koya. “Ena veivakauqeti ni Yalotabu, a vakamalumalumutaki na yalo kecega, e waicala na uto, ka keimami reki ena nona veivakalougatataki na Tamada Vakalomalagi.”¹ A kerei o George Albert Smith me cabora na masu isogo ni soqoni ena lotu ni vakatatabu. Ni oti na nona vakalekalekataka na veika a yaco ena siga ko ya ena nona ivolaniveisiga, a qai vola vakaoqo: “Sa mai cava e dua na siga osooso duadua ena noqu bula. Au vakavinavinaka niu dua vei ira na lewe vica na noda me veivuke ena cakacaka se qai vakacavari.”²

E nanuma lesu o Elder Smith: ni ratou a qai lako ki na vanua a yaco kina na iMatai ni Raivotu, e Palmyra, Niu Ioka. “Keitou lako ki na veikau a tekiduru kina o Josefa ka kerea na Turaga me tukuna vua se o cei vei ira na lotu me na lewena. Keimami a vakauqeti me keimami lagasere, ena vanua tabu ko ya, na sere totoka, ‘Matai ni Masu nei Josefa Simici.’”³

Ni oti na neitou sikova na Delana o Kumora, na Valetabu e Kirtland, kei na veivanua tale eso ka semati ki na nona ilesilesi na Parofita, era a kacivi vata na lewe ni ilawalawa mai vei Peresitedi Joseph F. Smith ena iotioti ni bogi ni ilakolako o ya. “Ni oti na nodratou lagata vata e vica na sere kei Saioni, a soli na gauna vei ira yadua na lewe ni ilakolako me ra vakadinadinataka na Nona vinaka kei na Nona loloma veivueti na Tamada vei keda. A sovaraki vei keitou na Yalo ni Turaga, ka keimami dui sovaraka na wainimata ni reki kei na marau.”⁴ [Raica na vakatutu 1 ena tabana e 46–47.]

Ena vica vata na yabaki ki muri, ni veiqaravi voli vaka-Peresitedi ni Lotu o George Albert Smith, a tabaki eso na ivola ka segati kina me vakarogorogocataki o Josefa Simici. Ena dua na koniferedi raraba ni Lotu, a taqomaka kina ena yaloqaqa o Peresitedi Smith na Parofita, e wasea kina na ivakadinadina me baleta na nona ilesilesi ena veimalanivosa oqo:

“E vuqa na veika vinaka kei na veivakalougatataki sa yaco mai vei au a yaco mai ena vukuna na tamata o ya ka a solia na nona bula ena vuku ni kosipeli i Jisu Karisito. Eso era vosa beci koya, ia au vinakata meu tukuna ni o ira era a vakayacora vakakina era na guilecavi yani ka na lesu tale na kedra ivovo ki vuravura, kevaka era se bera ni gole yani, ka na sega ni seyavu rawa na iboi ca ni nodra veivakacacani, ia na kena lagilagi kei na rokovi kei na vakaturaga kei na nona yaloqaqa na Parofita o Josefa Simici ena dau sala vata tiko kei na yacana me tawamudu.”⁵

O Elder Harold B. Lee, ka lewena voli ena gauna ko ya na Kuoramu ni iApositolo Le Tinikarua, a vakauqeti sara vakalevu mai na malanivosa o ya ka maroroya voli kina e dua na kena ikotikoti ena nona pausi ka dau cavuta tiko ena vuqa na gauna, ka gadreva kevaka e rawa ni rogoci e vuravura raraba na vosa nei Peresitedi Smith.”⁶

iVakavuvuli nei George Albert Smith

Na iMatai ni Raivotu nei Josefa Simici e vakaraitaka ni sega tu ni tabogo na lomalagi.

Eda vakabauta ni sa vosa ena noda gauna oqo na Tamada Vakalomalagi … , ni a rogoca na nona masu ena yalomalumalumu e dua na itabagone e Palmyra, ka sauma na nona masu ka vakalougatataki koya ena dua na kila ka me baleta na nona ivakarau, me ra kila na Turaga na tamata kecega, kevaka e lomadra.

E sega ni ka vakacala ka na nona vakasaqara na Turaga o Josefa Simici. E vu mai vei ira e dua na matatamata ka ra vakabauta na Tamada Vakalomalagi, na nona ilesilesi vakalou na iVakabula, na mana ni masu, ka ni na dau rogoca ka sauma mai na nodra masu na nona tamata na Kalou kevaka era lako yani Vua ena kena yalo dodonu. A rawarawa vua na cauravou oqo me vakabauta, baleta ni a sucu ka susugi cake ena dua na matavuvale vakabauta; ia ni lako yani ki na veikau me isau ni nona vakatataro ki na ivolanikalou (Jemesa 1:5): “Ia kevaka sa lailai na vuku vua e dua vei kemudou, me kerea vua na Kalou, o Koya sa solia vakalevu vei ira kecega na tamata, a sa sega ni dauveivakadirideini, ka na soli ga vua,” a vakabauta ni na saumi mai na nona masu, ka ni sa yalataka tu vei ira na luvena na Tamada Vakalomalagi mai na ivakatekivu, ni, “ena vakabauta ga dou na kila kina na ka kecega.”⁷

Na nona vakabauta na Kalou e kauti koya tani mai na vakabauta, ka dau matau tu ena nona gauna, ni tu ena iVolatabu na ivakatakila kece sara e rawa ni ciqoma na tamata, ka ni a dregati e uluna na lomalagi. A masuta na Turaga, ka saumi mai na nona masu. A raica na Tamana kei na Luvena ni rau siro mai ki vuravura ka rau vakavolivoliti ena rarama lagilagi. A ciqoma e dua na kila ka sega ni veibataki rawa ni rau vakayago tu me vaka na tamata, ka ni rau tamata vakayago ka rawa ni rairai; erau a vosa ka rawa ni rogoca na domodrau.⁸

Na isau [ni masu nei Josefa Simici] sai koya na veivakatakilai vakasakiti o ya, ka sega ni tautauvata kei na dua eda sa rogoca oti ena itukutuku ni vuravura. Eda sa rogoca oti na veigauna eso e vakatakilai Koya kina na Tamada Vakalomalagi; eda sa wilika oti na veigauna eso ka sa vakatakilai koya kina na Dauveivueti ni kawatamata; ia eda se bera ni wilika e dua na gauna me rau rairai kina na Tamana kei na Luvena ki vua e dua na ka bula ka vosa vua.

Era sega ni vakabauta na tamata e vuravura. Era sa vakavulici na turaga kei na marama ni sa dregati tu na lomalagi … , ia ena gauna e kacivaka kina na itabagone oqo ena noda gauna, ena gauna sara ga eda gadreva vakalevu duadua kina na rarama, ena gauna era veiciciyaki voli kina na turaga kei na marama me baleta na vosa ni Kalou ka ra sega ni rawa ni kunea, me vaka era a yalataka na parofita makawa [raica na Emosi 8:11–12], sa vakaraitaki Koya na Turaga, a vakalialiai ko koya [Josefa]. … A sega ni ciqomi na nona itukutuku, ka ra vuki tani mai vua o ira e dodonu me ra nona itokani ka ra kaya ni sa mai vua na tevoro. E a cava na nona ivakadinadina na gonetagane?

“… Au a raica dina e dua na rarama ka rau sikavotu mai kina e rua na tamata, io erau a vosa vakaidina vei au. E dina niu sa mai sevaki ka vosa vakacacani ena noqu tukuna na kena itukutuku, ena sega ga ni vakalasui kina na ka au a raica; era a cudruvi au vosa vakacacani au ka vakalialiai au ka vakaucacataki au vakailasu ena vuku ni ka oqori, ia au a yalo vakacegu ga ka kaya lo e lomaqu: A cava meu vosa vakacacani kina niu sa tukuna na ka dina? Au a raica dina e dua na raivotu, ko cei koi au meu cakitaka na Kalou, a cava era sa vinakata kina na kai vuravura meu cakitaka na ka a vakatakilai vei au? Io au a raica dina e dua na raivotu, au sa kila na ka oqori, kau kila ni sa kila talega na Kalou, sa dredre sara meu cakitaka, au sega mada ga ni doudou meu kitaka vakakina, ia kevaka au sa cakitaka na ka oqori, au sa kila ni na cudruvi au vakaidina kina na Kalou.” [Raica na Josefa Simici—A iTukutuku 1:25]⁹

Ena yabaki 1830, ena gauna e tauyavu kina na Lotu oqo, a sega ni tiko kina e vuravura e dua na isoqosoqo lotu era kacivaka ni ra vakabauta ni na vakatakilai koya na Kalou vei ira na luve ni tamata. Na ivakavuvuli ni veimatalotu era saqata kece oqori, ka sa raica na Tamada na kena dredre me tovolei na nodra vakabulai na luvena tagane kei na yalewa me yacova na gauna sa rawa kina me ra vakauqeti me ra lako mai vua ena nodra vakabauta ni na rogoca ka sauma ko koya na nodra masu. Ena gauna e raica kina na parofita gonetagane, ena loma ni veikau kei Palmyra, na Tamana kei na Luvena, ka kila ni rau sa vaka dina ga na tamata, ni rawa me rau rogoca ka sauma mai na veika e tukuna yani, sa tekivu kina e dua na itabagauna vou ena vuravura, ka vakotora e dua na yavudei ni nodra vakabauta na luve ni tamata. Sa rawa ena gauna oqo me ra masu vei Tamada mai lomalagi ka na rawa vua me rogoca ka sauma mai na nodra masu, ni sa tiko e dua na isema e vuravura kei lomalagi.¹⁰ [Raica na vakatutu 2 ena tabana e 46.]

E dina ni se gone ka sega sara ni levu na ka e kila, a kacivi ko Josefa Simici me vakalesuya mai na Lotu dina i Jisu Karisito.

Na vakabauta a vakauqeti Josefa me vakasaqara na Kalou ena masu ka taroga se lotu cava me lewena. Na cava na kena isau mai? A kaya beka mai na Turaga, “Noqu gonetagane, era vinaka kece, era tovolea kece tiko me ra muria na noqu ivakaro, o ira kece na turaga era iliuliu tu ena veimatalotu oqo au sa vakadonui ira, era vinaka kece na veimatalotu oqori, era na tuberi iko lesu yani ki na iserau ni Tamada Vakalomalagi?” E rairai a namaka tiko beka yani e dua na isaunitaro vakaoqo na gonetagane oqo me vaka na ituvaki a donumaka tiko ena gauna o ya. Ia a vinakata me kila na cava me cakava, ka nona vakabauta taucoko tu ni na tukuna vua na Turaga. Ni masu, a taroga se lotu cava me lewena, kau vakabauta ni a kurabui ni [tukuni vua] me, “Kakua ni curu ki na dua vei ira; ni ra sa toro voleka vei au ko ira na tamata oqo ena gusudra; io na yalodra sa yawa tani vei au. Era sa vakatavulica na ivunau vakatamata me ivakavuvuli va-Kalou; ia sa sega vei ira na kena kaukauwa.” [Raica Josefa Simici—A iTukutuku 1:19–19] Vakasamataka mada e dua na gonetagane yabaki tinikava ni tucake mai ena nona tekiduru voli ena dua na veikau volekata nodratou vale ka kacivaka e dua na itukutuku vaka ko ya! E rawa beka ni o raitayaloyalotaka e dua na itabagone me cakava e dua na ka vakaoqori? Ia mai na ivakadinadina sa solia vua na Tamana Vakalomalagi, vata kei na ivakaro ni Turaga, ena rawa beka vua me tukuna e dua tale na ka mai na nona tukuna ni sa vosa vua na Turaga?¹¹

A se gonetagane voli ga o Josefa Simici ena gauna a vakotori kina e uluna na ligai Pita, Jemesa kei Joni ka tabaki ki na Matabete i Melikiseteki,—o koya kei Oliver Cowdery. Ena dua na gauna lekaleka e muri a vakaroti o Josefa Simici me tauyavutaka e dua na Lotu. E se cauravou voli ga kina, ia a tauyavutaka ena nona veidusimaki na Dauveivueti ni kawatamata. A caka me vaka na Lotu a tauyavutaka na iVakabula ena gauna a tiko kina e vuravura. Au sega ni vakabekataka ni ra a tu e lewevuqa era na raica na cauravou oqo me dua a vakairogorogo mai vakasauri, ka ra veiwalitaka ni dua e sega ni vuli me mai veiliutaki. Ia a tautauvata o koya kei ira tale eso na nona italai na Tamada Vakalomalagi ka ra bula tiko e vuravura, ka a kacivi ira na Turaga me ra cakava e dua na cakacaka digitaki, ka sega ni tarova na nona solia vua na Turaga na itukutuku eso me rawa kina vua me tautauvata se uasivi cake vakalevu sara mai vei ira ka tu vei ira na kila ka vakavuravura e sega vua, ia a lecaika o koya ena veika ni vuravura vakaoqo.¹²

E dina ni a vakalolomataki ka tukuni vakailasu na veika e baleti koya, ka beci mai vei ira a dodonu me ra nona itokani, saqati mai vei ira na vuli kei ira na tamata vuku ni gauna ko ya, a qaqa ena nona vakalesuya mai na Kosipeli ni bula kei na veivakabulai ka tauyavutaka na Lotu i Jisu Karisito ni Yalododonu Edaidai.

Ni sasaga tiko na kaukauwa ni tevoro me vakarusai, a taqomaki koya tiko na Turaga me yacova ni sa oti na nona cakacaka ka vakalesui tale vua na tamata na idola kei na cakacaka vakalotu e gadrevi me baleta na nodra vakabulai na kawatamata.¹³ [Raica na vakatutu 3 ena tabana e 46.]

Na dina a vakalesui mai ena vukui Josefa Simici sa kauta mai na sautu kei na marau vei ira era ciqoma.

Mai vua na gonetagane ko ya, ni se yabaki tinikava, a raica na Tamana kei na Luvena, a yaco mai kina na itukutuku vakasakiti o ya ni o Tamada Vakalomalagi kei na Luvena o Jisu Karisito erau tamata vakalagilagi; ni o koya na iVakabula kei vuravura sa tucake tale mai na mate. A raica na itabagone o ya na veika sa kila tu o vuravura, ia sa guilecava ena vuku ni veika eso sa yaco, ka sa tekivu me vakadinadinataka vei ira na luve ni tamata.¹⁴

[Ena itekivu ni 1800] era lewe lailai sara na tamata e vuravura era vakabauta e dua na Kalou ka tiko na yagona. Ia a yaco mai ena gauna ko ya e dua na veivakatakilai vua na Parofita ko Josefa Simici, ni se gonetagane voli ga, se bera mada ga ni yabaki tinikalima, a raica na Tamana kei na Luvena ka vakadinadinataka. A sikovi talega mai vei ira na veika bula vakalomalagi, kei na Turaga, era mai solia vua na ikuri ni itukutuku me baleti ira na luve ni tamata, ia o koya, ena nona sala vakataki koya, a solia vei keda, se vei ira era a liu vei keda ena Lotu, meda kila na inaki ni bula. … Na nona ivakamacala me baleta na lomalagi sa vakauqeti keda ena gagadre meda kilikili kaya e dua na noda itikotiko mai kea ni sa oti na noda bula vakavuravura. E dua na tucaketale kei na ivakamacala kei lomalagi kei eli era sa vakamacalataki vakamatata sara, me vakayagataka na ivolanikalou, “kei ira sa muria na sala, ia ko ira na tamata sesewa era na sega ni lakosese kina.” [Raica na Aisea 35:8.]¹⁵

Mai vua a vakatakilai mai kina na tara valetabu, na tawamudu ni veiyalayalati ni vakamau, kei na nodra vakabulai na mate, sa kauta mai na reki e sega ni vakamacalataki rawa vei ira e udolu na luvena na Tamada.

Na dina tawamudu era a tukuni vakamatata mai vua era sa kunea tiko na nodra sala ena kedra maliwa na tamata e vuravura, ka kauta yani na sautu kei na vakacegu vei ira era ciqoma.¹⁶

Sa kila tiko na Tamada Vakalomalagi na veika ena yaco mai ena nona sa vakalesuya mai na kosipeli ena kena savasava taucoko ena veigauna e muri oqo. Sa kila o Koya na vukitani ena yaco e vuravura ena kedra maliwa na luvena, ka ni ra sa lako tani mai na dina matata, ia ena nona loloma veivueti cecere, a vakatakila mai kina na cakacaka ni gauna oqo. A digia e dua na gonetagane ena kedra maliwa na tamata mai na dua na lomanivanua, ka vakauqeti koya me tekivuna na cakacaka ka kena inaki me na yavalata na vuravura vakalotu. E kila o koya ni vakayayamo voli ena butobuto ko vuravura, ia ena nona loloma veivueti a vakalaesuya mai na rarama. E sega tale ni dua na sala era na marau kina na luve ni tamata ia ena bula ga e dodonu, ka ra na sega ni rawa ni bulataka na bula e dodonu na tamata ni ra sega tu ni kila na dina. A levu tu na dina e vuravura ia sa rui veiwaki vakalevu kei na cala o koya a kaya kina na Turaga sara ga vakataki Koya vua na Parofita o Josefa Simici, ni o ira na tamata era a veivakavulici ka veidusimaki ena lotu era sa vakavulica tiko me ivunau na ivakaro ni tamata, ka vakasalataka kina na gonetagane o ya me qarauna me kakua ni lewena e dua vei ira. A qai vakalesuya mai o koya na kosipeli, na kaukauwa ni Kalou me ia kina na veivakabulai, vei ira kece era na vakabauta ka talairawarawa kina.¹⁷

Au kaya vei ira na tamata kecega ena veivanua kecega, ni vakadikeva na ivakavuvuli ni Kosipeli ni noda Turaga me vaka sa vakatakilai vua na Parofita ko Josefa Simici, vakasaqarai ira ena masumasu, ko na kunea na iwali ni tauvimate e vuravura oqo, ena sega ni kunei ena dua tale na sala.¹⁸ [Raica na vakatutu 4 ena tabana e 47.]

A lomasoli o Josefa Simici me solia na nona bula ena vuku ni nona ivakadinadina.

Me vaka ga na kena ivakarau vei ira na parofita a vakatubura na Turaga ena gauna e liu, ena yaga ena gauna oqo me na dregati na nona ivakadinadina na nona italai ena Nona dra. E sega tale ni dua na tabana [vakaciriloloma] me na kune ena itukutuku ni vuravura mai na kena e volai koto kina na iotioti ni nona veimalanivosa na noda Parofita daulomani o Josefa Simici. E kila o koya ni sa voleka mai na nona gauna; e kila o koya ni sa qaravi rawa na ilesilesi a lesi mai kina. … Ia ni yaco mai na gauna sa tu kina e matana na mate, a kaya, “Au sa lako me vaka na lami sa laki vakamatei, ia au sa sega ni taqaya se yalolailai kina. Au sa kila ena vu ni yaloqu, niu sa sega ni cala vua na Kalou se vei ira na tamata. Au sa mate ena noqu dodonu, ia ena qai tukuni vakaoqo ena vukuqu, ‘A laulaba bulabula ko koya.’” [Raica na V&V 135:4.]

A sega ni rere ko koya me tu ena mata ni itikotiko ni veilewai … ka saumitaro ena ivalavala ni yagona. A sega ni rere me sotava na veika a beitaki kina, ni cavilaki ira tiko na tamata ka sega ni dodonu ena nona veiqaravi ena vukudra. A sega ni rerevaka na vua ni nona ilesilesi, kei na kena na qaqa e muri na cakacaka e kila tu ni vu mai vua na Kalou, ka a solia kina na nona bula. Ia o ira na tamata e vuravura, me vaka e liu, era a vakalewa na cakacaka oqo ena yalo vakatamata. E sega vei ira na Yalo ni Kalou, ka na rawa kina vei ira me ra kila ni vu mai vei Tamada mai lomalagi.¹⁹

Na itabagone oqo sa vakadeitaka na ivakatakila a ciqoma, ka gadreva dina sara me ra kila na dina o ira na luvena na Tamada, o ira kece sara, mai na gauna ga e ciqoma kina na peleti ni iVola i Momani mai vei Moronai na agilosi sa solia sara ga vakatabakidua na nona bula ki na kena tauyavutaki na Lotu kei na kena tukuni yani na dina. … Sa raragi tiko e yalona e dua na kila ka me vakataki Sitiveni [raica na Cakacaka 7:54–60], me vaka na Dauveivueti, ni tu ena kena iuli na Tamada Vakalomalagi, ni sai koya oqo na nona cakacaka ka tu oqo e vuravura, ni nona kaukauwa ena qai vakatulewa, ni bula oqo e dua ga na tiki ni gauna tawamudu. A sa vakarau tu o koya me solia e dua na tiki ni nona bula e vuravura, kevaka e gadrevi me vakakina, me rawa kina ni na marautaka me tawamudu na veitokani a dau lomana vakalevu, kei na nodra veitokani na turaga kei na marama vinaka era sa mai bula oti ka ra bula tiko ena gauna oqo e vuravura, ka ra na qai mai bula tale e vuravura ni sa yaco me matanitu vakasilesitieli.²⁰

A vakavuvulitaka o Josefa Simici ni kila tiko, ni tiko e dua na bula ni oti eke, ka ni kila ni bula na Kalou, ka ni kila na Kalou ni kila o koya ni bula tiko na Kalou. A lomasoli me solia na nona bula me rawa kina, vei kemuni na taciqu kei na ganequ, me vaqaqacotaki na nomuni vakabauta ka me kakua ni yavalati na nomuni yalodei ena vukuna. E kila o koya na ibalebale ni bula oqo. E kila tu o koya ni da mai tiko eke meda vakarautaki keda ena veigauna sa bera mai kei na dua na bula lagilagi cake sara. Ka sa lomasoli tu kina o koya, kevaka ena gadrevi me vakakina, me solia na nona bula, sega walega me vakayalia kina, ena vukuda, ia e baleta ni kila o koya ni a kaya na Tamada ni o koya sa maroroya na nona bula ena vakayalia, ia ko koya ena vakayalia na nona bula ena Vukuna ena maroroya, io na bula tawamudu [raica na Maciu 16:25]. Na kila ka oqori a rawa kina vua na Parofita kei [na] Peteriaki ni Lotu [o Hyrum Smith] ena veisiga taumada [me rau biuti ira tu mai] na nodrau daulomani, me rau laki vakamatei ena valeniveivesu, ka me rau solia kina na veika kece e tu vei rau ena vuravura oqo, me rawa kina vei ira na tamata me ra solia ena vuku ni wekadra—na nodra bula oqo.²¹

Ena yabaki 1830, a tauyavutaki kina na Lotu ka lewe ono na lewena. Na meca ni ka dodonu kecega sa segata tiko me tekivu mai na gauna ko ya me yacova nikua me vakataotaka na kena toso ka vakarusa. Au vakataroga kevaka e rawa vua na turaga cecere ko ya, o Josefa Simici, o koya a solia na nona bula me rawa ni tauyavu kina na Lotu ka tomani tiko me vaka na nona inaki na Turaga, me raica na Lotu ena kena itutu nikua, ena kena veitabana sa tauyavu ena veiyasai vuravura, ka me rawa ni kila me tekivu mai na gauna a vakamatei kina ena vuku ni nona vakabauta, me tekivu mai na gauna a solia kina na nona bula ka dregata na nona ivakadinadina ena nona dra, sa yaco me kaukauwa cake na Lotu mai na siga sa oti.²² [Raica na vakatutu 5 ena tabana e 47.]

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Vakasamataka na veika e vakamacalataka o Peresitedi Smith ena imatai ni tolu na parakaravu ena “Na Bula nei George Albert Smith” (tabana e 35–37). Na veika cava soti ena nomu bula sa vaqaqacotaka na nomu ivakadinadina me baleta na Parofita o Josefa Simici? Ni o wilika na iwase oqo, vakatakilakilataka na veimalanivosa mai na ivakavuvuli nei Peresitedi Smith e vaqaqacotaka na nomu ivakadinadina, ka vakasamataka mo wasea vata kei ira na lewe ni nomu matavuvale, ena kuoramu ni matabete, se iSoqosoqo ni Veivukei.
Taleva na imatai ni iwase ni ivakavuvuli (tabana e 37–39) ka railesuva na nona itukutuku o Josefa Simici me baleta na iMatai ni Raivotu (raica na Josefa Simici—Ai Tukutuku 1:10–19). Sa vakayarayarataka vakacava na nomu vakabauta na Kalou na iMatai ni Raivotu? Na sala cava beka o raica ni vakayarayarataka kina na nodra vakabauta na tani?
Vulica na iwase ka tekivu ena tabana e 35 ka wilika naVunau kei na Veiyalayalati 1:17–19. Na cava eda rawa ni vulica me baleta na veiqaravi ena Lotu mai na ivakaraitaki nei Josefa Simici? Vakasamataka mada e dua na gauna a soli kina vei iko e dua na ilesilesi mai vua na Turaga o qai vakila ni sega ni ganiti iko. A vukei iko vakacava na Turaga?
Na cava beka eso na dina a vakatakila na Turaga mai vei Josefa Simici? (Me ivakaraitaki ni so na dina oqo, raica na iwase ka tekivu ena tabana e 40.) Sa vakalougatataki beka vakacava na nomu bula ena nomu kila na dina oqo?
Ni ko vakasamataka tiko na iotioti ni parakaravu ni veivakavulici (tabana e 44), vakasamataka na veika e rawa ni o cakava mo vukea na kena vakaukauwataki cake tikoga na Lotu.

iVolanikalou Veisemati: Aisea 29:13–14; 1 Korinica 1:26–27; 2 Nifai 3:5–9, 11–15; Vunau kei na Veiyalayalati 135

Veivuke ni Veivakavulici: “Mo vakauqeta na veivosaki, vakayagataka na taro ena mua ni iwase. … E rawa talega ni o bulia ga na nomu taro vakauasivi me baleti ira o vakavulica tiko. Me vaka beka oqo, e rawa ni o taroga vei ira era vakaitavi tiko na sala e rawa ni ra vakayagataka kina na ivakavuvuli nei Peresitedi Smith ena nodra itavi vakaitubutubu se dauveituberi ni matavuvale se dauveisiko” (mai na tabana e viii ni ivola oqo).

Ena ika 23 ni Tiseba, 1905, a vakaitavi kina o George Albert Smith kei ira eso tale na iliuliu ni Lotu ena kena vakatabui e dua na ivakananumi ena vanua a sucu kina na Parofita o Josefa Simici.

Na iMatai ni Raivotu nei Josefa Simici “sa tekivu kina e dua na itabagauna vou ena vuravura oqo, ka vakotori kina e dua na yavu me baleta na nodra vakabauta na luve ni tamata.”

“Au kaya vei ira na tamata kecega ena veivanua kecega, ni vakadikeva na ivakavuvuli ni Kosipeli ni noda Turaga me vaka sa vakatakilai vua na Parofita o Josefa Simici, vakasaqarai ira ena masumasu.”