Wase 18

Tiko ena Nona Yasana na Turaga

Sa solia vei keda na Turaga na ivakaro me rawa kina ni da vorata na ca ka kunea na marau.

Na Bula nei George Albert Smith

Na tukai George Albert Smith o George A. Smith, e a veiqaravi tu mai ena Kuoramu ni iApositolo Le Tinikarua; vakakina ena Mataveiliutaki Taumada me daunivakasala vei Brigham Young ena vica vata na yabaki. E dau vakayagataka vakawasoma o George Albert Smith na ivakasala nei tukana vei iratou na nona matavuvale. “E tiko e dua na laini ka vakamatatataka tiko na iyala e wasea na yasana e nona na Turaga mai vua na vuni ca. Kevaka mo na tiko ena nona yasana na Turaga, ko na sotava tiko na nona veivakayarayarataki, ka o na sega ni vinakata mo cakacala; ia kevaka mo sa na toki ki na nona yasana na vuni ca ena dua mada ga na idi, ko sa lewai sara ga mai na nona kaukauwa, ka kevaka me sa na rawai iko ko koya, ko sa na sega ni rawa ni vakasama vakadodonu se vakatulewa vakavinaka baleta ni ko sa na vakayalia na Yalo ni Turaga.”

E kaya o George Albert Smith ni dau vakayagataka tu na ivakasala oqo ena nona bula taucoko me vukea na nona vakatulewa: “Niu sa dau temaki meu cakava e dua na ka, au dau taroga, ‘Na yasa ni laini cava au tiko kina?’ Kevaka meu sa vakadeitaka meu sa na tiko ena nona yasana na Turaga, ena dodonu na veika au cakava ena veigauna kece sara. Sa dodonu kina ni sa yaco mai na veitemaki mo na masulaka na nomu leqa ka na vukei iko na Turaga mo vakatulewa vakadodonu. Eda na dau maroroi tu ga ena veigauna kece ni da tiko ena nona yasana na Turaga.”¹ [Raica na vakatutu 1 ena tabana e 216.]

iVakavuvuli nei George Albert Smith

Ni da tiko ena nona yasana na Turaga ena gadrevi kina na talairawarawa ki na ivakaro.

E tiko ena nona yasana na Turaga na veitaqomaki, na yalododonu kei na yalomamarau. Kevaka mo sa talairawarawa tiko ena ivakaro ni Kalou ena maroroi ni Siga ni Vakacecegu, ko sa tiko sara ga ena nona yasana na Turaga. Kevaka mo sa cabora tiko na nomu masu vuni vakataki iko kei na nomu masu vakamatavuvale, ko sa tiko ena nona yasana na Turaga. Kevaka mo dau vakavinavinakataka na kakana ka vakaraitaka na vakavinavinaka o ya vua na Kalou ko sa tiko ena nona yasana na Turaga. Kevaka mo sa lomana tiko na kainomu me vakataki iko ko sa tiko ena nona yasana na Turaga. Kevaka mo sa yalodina tiko vei ira na nomu itokani ko sa tiko ena nona yasana na Turaga. Kevaka mo sa vakamuria tiko na Vosa ni Vuku ko sa tiko ena nona yasana na Turaga. Kevaka meu na wilika yani na iVunau e Tini, vakakina na ivunau tale eso sa solia mai na Kalou me vukei keda ka qai tukuna tale, na veika oqori me na vakaiyautaki keda, sa na tuberi keda yani ki na bula tawamudu meda na tiko kina ena nona yasana na Turaga. Na vaqarai ni malumalumu ena veika sa solia mai vei keda na Kalou me vukei keda e sega ni o koya na tiko ena nona yasana na Turaga.² [Raica na vakatutu 2 ena tabana e 217.]

[Sa tukuna na Turaga]: “Au sa sega sara ni vakadonuya na ivalavala ca;” sega ni vakadonui na ivalavala ca [V&V 1:31]. Na cava na vuna? Baleta o koya e kila ni kevaka meda vakadonuya na ivalavala ca eda sa na vakayalia na veivakalougatataki meda na ciqoma kevaka meda a sega ni biuta na sala ena veimuataki yani ki na veivakalougagataki o ya.³

Ena veigauna eso eda na rogoca ni dua ena kaya, “Oi, vei au oqori e sega ni dua na ka. Na Turaga ena sega soti ni cudru kevaka me vakatikina ga na kena caka.” O koya e vosa vakaoqori sa tiko rawa ena nona yasana na vuni ca, ka na sega kina ni vinaka mo rogoci koya baleta ni kevaka mo na rogoci koya ko sa na vakacalai. Ena sega ni rawa ni dua me tiko vua na Yalo ni Turaga qai vosa tiko vaka o ya. Na Turaga sara mada ga e tukuna ni dodonu meda talairawarawa ki na nona ivakaro: “Raica sa virikotori tu mai lomalagi na ivakaro ni se bera ni buli na vuravura oqo, ia sa vakayavutaki kina na veivakalougatataki kece sara.” V&V 130:20. E vakavulica vei keda na kosipeli i Jisu Karisito na ka meda cakava meda na rawata kina na veivakalougagataki o ya.⁴

Sa solia vei keda na Tamada Vakalomalagi na ivakaro meda kunea kina na marau.

Ena Nona sa rui dauloloma na Turaga, ni raica na nodra ivakarau na luvena, ka kila ni ra na gadreva na veituberi, e a solia mai kina na iVunau e Tini, kei na ivunau era qai soli tiko mai ena veigauna me rawa kina vei keda meda kunea kina na bula marau. Ko na raici ira na tamata ena nodra veiciciyaki me ra vaqara na marau ka qai sega ni sotava. Kevaka walega me ra cegu vakalailai ka ciqoma na ivakasala ni Turaga, era na sotava na marau, ka ra na sega ni sotava ena dua tale na vanua.⁵

Niu a se gone au dau vakananuma ni ivakaro ni Turaga e Nona lawa ka ituvatuva me baleta na noqu tuberi. Au nanuma niu a sa kila ni talaidredre ki na lawa oqori ena muria mai na kena itotogi, ia me vaka niu a se gone au dau nanuma ni sa vakadeitaka oti tu na Turaga na veika me na yaco ni sa vakamuri e dua na lawa se na itotogi me na muria mai ni sa vakacalai e dua vei ira. Ia, niu sa qase cake mai au qai vulica mai na dua tale na rai, ni lawa ni Kalou ena gauna oqo, ka vakatokai me veivunauci mai na iVolanikalou Tabu, na ivakatakila ni Turaga vei keda nikua ena gauna oqo e vuravura, sa vaka e dua na ivakatagi rogo kamica ni Tamada mai lomalagi ena Nona loloma veivueti vei keda. Ena wili me ivakasala mai vua e dua na itubutubu dauloloma, ka sa dau qarauna sara na noda taqomaki, ka sa dau vakatokai tu me lawa, ka sa yaco ena gauna oqo me nona ivakasala ni loloma e dua na Tamada Vakalomalagi yaloyalo vinaka. Kau sa na tukuna kina oqo, ni sa sega ni dredre vei au me vakabauta ia sa bibi cake vei au meu talairawarawa ki na ivakaro ni Kalou.⁶

Na yalomamarau ka sa yaco mai vei au niu dau talairawarawa ki na ivakaro ni Kalou, ka bula meu ciqoma kina na kena veivakalougagataki, ka sa yalataki vei ira era na dina vua ka talairawarawa ki na nona ivakaro.⁷

Kevaka meda muria na ivakavuvuli kei na ivakasala e solia na Turaga, ena sinai ena noda salatu na marau. Ena sega beka ni rawarawa se marautaki tu ga, ia mai muri ena tini ena mata ni Tamada Vakalomalagi ka da na vakaivotavota ena lagilagi, tawamate rawa kei na bula tawamudu.⁸ [raica na vakatutu 3 ena tabana e 199.]

Ena tovolea na vuni ca me muataki keda yani ena nona ilawaki kei na veirawai.

E rua tiko na ka e dau veirawai e vuravura ena guna oqo ka sa vakatu ko ya mai liu. Dua na veivakayarayarataki ka na veivukei, ena vakaiyaloyalotaka na marau kei na vakaitovo. Na kena ikarua e dau vei vakacacani, ena vukica na tamata me tevoro, ka na vakarusa ka veivakayalolailaitaki. O keda kece e rawa ni da na rawai vei rau ruarua oqori. E dua e lako mai vua na Tamada Vakalomalagi kei na kena ikarua mai vua na vuni ca, ka sa tu e vuravura mai na ivakatekivu, me sasagataka me vakarusa na matavuvale ni kawatamata.⁹

Eda na vakatovolei taucoko sara, sega ni dua na tamata ena galala mai na veitemaki. Na vuni ca ena saga vakaukauwa me veivakacalai; me vaka e a saga vua ana iVakabula kei vuravura qai sega ni rawata. Sa tovolea talega o koya vei ira e lewe levu sara na tamata ka ra vakaitutu lelevu ka so na gauna ena raica eso na vanua era malumalumu kina ka na vakavuna vei koya ka temaki me calata eso na veivakalougatataki kevaka me a yalododonu tikoga.¹⁰

Kaya vei au e dua na tamata—se tukuna ena dua na vanua au a tu kina—“Na cava beka era tukuna kina na tamata era tu eke ni sa sinai tu vei au na tevoro, ia au sega ni duavata kina.” Au qai kaya vua, “Taciqu, o kila tiko beka e dua na tamata e kila tiko ni sinai tu vua na tevoro?” O ya e dua na nona ilawaki na tevoro: me rawai iko ko qai sega tiko ni kila ni ko sa rawai. O ya e dua na ka dredre eda sotava tiko.¹¹

O Nifai na Profita, ena drau na yabaki sa oti, e a raica na ka ena yaco, ni ra na veicacati na tamata era na cakitaka na kaukauwa ni Yalo Tabu kei na Yalosavasava ni Isireli ka ra na vakavulica na ivunau kei na ivakaro ni tamata. Dua na ka sa veirawai tiko kina o vuravura ena gauna oqo sai koya nona saga me ra vakabauta na tamata ni rawa ni ra rawata na bula tawamudu mai na nodra vuku vakatamata kei na nodra kaukauwa ga vakaira. Meu wilika mada … na Nifai:

“Ia, e vuqa talega era na kaya, dou kana, ka gunu, ka ia na marau, ia mo rerevaka na Kalou ena sega ni cudruvaka ko koya ke vakalailai ga na ivalavala ca.”

Au vinakata mo na kila ni: “Ena sega ni cudruvaka ko Koya ke vakalailai ga na ivalavala ca.” Na nona sa rui matai na vuni ca ni kevaka walega me rawata e dua na tamata me caka ca ga vakalailai sa tiko sara ga ena nona yasayasa, kena ibalebale ni ra sa na vakarorogo sara tu ga vua.

“Ia mo rerevaka na Kalou, ena sega ni cudruvaka ko Koya ke vakalailai ga na ivalavala ca, io ke vakalailai na lasu, ka rawai e dua ena vuku ni nona vosa, kelia na ikeli me lutu kina na wekamu oqori e sega ni ca, kitaka kece oqo, ni da na mate ena mataka, ia kevaka eda sa cala kina, ena vakanakuitataki keda vakalailai ga na Kalou ka da na vakabulai ki na matanitu ni Kalou.” 2 Nifai 28:30

Sega li ni o koya o ya na ka ena tukuna na vuni ca vei keda nikua me vaka sara ga e volai tu eke? Sobo, vakalilai ga na cala, ena sega soti ni dua na ka, lasu ga vakalailai ena sega ni veivakaleqai, ena vosota na Turaga na cala o ya ka o na vakanakuitataki ga vakalailai, ko sa na vakabulai ki na matanitu ni Kalou. O ya na ka ena tukuna vua na turaga se marama ka sa vakavulici vua na Vosa ni Vuku ni na tukuna, sobo, gunu ti ga vakalailai ena sega ni lako vakaca vei iko; vakatavako yani ena sega ni dua na kena duidui, vakalailai ga na yaqona ni valagi ena sega ni vakaleqai iko. Oqo na veika lalai sara, ka dau cakava tu ga vakalalai ka vagauna, sega ni veigauna taucoko. O ya sara ga na ka au vinakata meda na dau nanuma … oqo sara ga na veika lalai e dau vakayacora lo voli ena veigauna me temaka na kawatamata ka biuti keda yani ki na kaukauwa ni vuni ca. …

Ni tomana na nona itukutuku o Nifai:

“Ia, ena vakauqeti ira eso tale me ra tiko vakacegu ka wele voli ga era na kaya, Sa vinaka tu ko Saioni; io sa sautu ka vinaka tu ko Saioni a sa vakaisini ira vakaoqo na tevoro.”

Ena gauna oqo, au na vinakata mo ni kila ni: “Sa vakaisini ira vakaoqo ko koya na tevoro ka tuberi ira sobu ki eli.” [2 Nifai 28:21] o ya na kena icakacaka e dau cakava, koya sara ga o ya. Ena sega ni lako mai me dreti iko vakasausa ki na nona yasana, ia e vakasolokakanataka ga mai, “cakava ga vakalailai na ka ca oqo,” ni sa rawata na ka oqori, sa na muria sara ga mai e dua tale na ka lailai ka ra sa na tekivu veimuri mai na kena vo ka na qai basika mai na vosa ka cavuti toka oqo, “sa na vakaisini ira vakaoqo.” O ya na ka ena cakava. Ena moica na nomu vakasama mo kila ni ko sa rawata tiko e dua na ka, ia o iko o sa vakalusia tiko e dua na ka o vakamareqeta. Ena vaka o ya ena veigauna kece eda sega ni muria kina e dua na lawa ni Kalou se ivakaro, eda sa vakaisini, baleta ni da na sega ni rawata e dua na ka e vuravura oqo se na vuravura sa bera mai, ia ena talairawarawa ga ki na ivakaro ni Tamada Vakalomalagi.

… Na vakatutu matalia o ya, “Sa tuberi ira sobu yani vakamalua ki eli” e duatani toka, o ya na nona iwalewale. O ira na turaga kei na marama ena veiyasai vuravura era sa vesuki tu ena veirawai o ya, ka ra sa dreti eke vakakina ki kea ka sa toso tikoga na vakasolokakana o ya, ia era lecava tiko na ka e gadreva vei ira na Turaga me ra cakava, era se toso ga yani ki na nona yasana na vuni ca, me ra sa lewai mai vua ka sa sega ni rawa vua na Yalo ni Turaga me lako yani kina.

Tomana o koya ka kaya: …

“Ia sa vosa veicavilaki vei ira eso tale ka tukuna ni sega ni dua na eli; a sa kaya vei ira. Au sega ni tevoro, ka ni sa sega na tevoro ka sa vosa lo e daligadra me yacova ni sa vesuki ira ena nona sinucodo rerevaki ka ra na sega ni sereki mai kina.” 2 Nifai 28:22

Oqo kemuni na taciqu kei na ganequ na ituvaki kei vuravura nikua. Na ka oqo e kaya o Nifai e ka dina sara me vaka ni bula sara tikoga e vuravura ena gauna oqo. Sa cakacaka tiko na vuni ca ena gauna sara ga oqo, ka sa tovolea tiko na Tamada Vakalomalagi e gadreva me maroroi keda na luvena mai na ca ni veivakavulici vaka o ya, sa tala mai kina na luvena o Josefa Simici ki vuravura ka soli vua na kaukauwa vakalou me tauyavutaka na Nona Lotu ka tekivu vakavulica na dina vei ira na luve ni tamata me rawa ni ra vagolei tani mai na cala ni nodra ilakolako.¹²

Meda vulica meda valuta na noda gagano kei na veika ca eda dau via vakayacora. Meda vulica meda vorata na veitemaki. O ya na vuna eda tiko kina eke, ka kevaka meda na saga meda vakayacora vakavinaka, sa vakalesui mai na kosipeli ki vuravura, ka da sa mai ciqoma, ka sa tiko vei keda na kaukauwa baleta na mana ni Yalo Tabu. Sega walega ni tiko vei keda na isasabai ni dua ga na tamata, e dua ka sega ni tu vua na kila na dina—e tiko vei keda na isasabai vata ga kei na kila na dina kei na kila na inaki ni noda mai tiko eke.¹³ [Raica na vakatutu 4 ena tabana e 217.]

Eda rawa ni vorata na ca ena noda digia meda soli keda ki na veivakayarayarataki ni Turaga.

Au nanuma ena vica na yabaki sa oti e dua na tamata vinaka e a jeameni tu ni matabose vakatulewa ni Universalist Church ni America. E a gade mai ki [Salt Lake City] ka mai donumaka sara e rua na soqoni ni wilivola ni Sigatabu. E a taleitaka sara o koya e dua na kalasi ni gone. Na gauna sa voleka kina ni oti na kalasi e kaya sara na kena peresitedi, “ko na via tukuna li e dua na ka vei ira na lewe ni kalasi?” … Kaya sara o koya, “Au na via vosa vakalailai.” Kaya sara o koya, “Kevaka walega meu na rawa ni bula tiko ena vanua kau sotava ena loma ni kalasi ni wilivola ni Siga ni Vakacecegu ena mataka nikua, au na sasaga sara vakaukauwa meu tamata vinaka tikoga.” [Raica na vakatutu 5 ena tabana e 217.]

Au sa dau nanuma tiko ena levu na gauna na ka o ya. Eda na digitaka vinaka na cagi eda na ceguva, meda na bulabula vinaka tu kina. Ia, ena so na gauna ena noda sega ni dau qaqarauni, eda sa dau sotava kina na veivakacacani ni vuravura oqo ena noda sega ni qarauna ka vakavuna na noda cakava eso na ka ka na sega ni rawa me a caka kevaka me tiko vata kei keda na Turaga. Kevaka walega meda yalomalua, kevaka walega meda dau masu wasoma, kevaka walega meda na bula tiko ena veiauwa ka rawa vei keda meda na kaya tiko kina vakadodonu, “Tamaqu mai lomalagi, au sa tu vakarau meu cakava na lomamuni,” na noda bula ena veisiga sa na vakacokotaki ni da lako curuma tiko na bula e vuravura nikua.¹⁴

Eda na digitaka na vanua meda na tiko kina. Sa solia vei keda na Kalou na galala ni digidigi. Ena sega ni kauta tani mai vei keda o Koya, ia kevaka meu cakacala ka toki yani ki na nona yasana na tevoro, au cakava o ya baleta ni sa tiko vei au na kaukauwa kei na yalo ni kena caka. Sega ni rawa meu beitaka e duatani tale, ka kevaka meu sa dina ki na kena muri na ivakaro ni Kalou ka bula me vaka e gadrevi vei au, kau tiko ena nona yasana na Turaga, au na cakava baleta ni dodonu meu cakava, kau na ciqoma na kena veivakalougatataki. E sega ni baleta ni a cakava e duatani tale.¹⁵

Sa dodonu vei keda na Yalododonu Edaidai meda bula ena veisiga ka me rawa ni da vukei mai na kaukauwa ni Turaga, ka na rawa meda na dro mai na veika ena rawa ni voroka na kaukauwa ka na solia vei keda na dodonu meda rawata na matanitu vakasilesitieli.¹⁶

Raica me tudei na vanua o buli yavu toka kina. Yadrava na nomu vulica na loma ni iVakavuvuli ena vukumu, ka kila na gagadre o ya mo maroroya na Nona lawa kei na ivakaro. Raica me na nomu tikoga na veitokani ni Yalo Tabu ena savasava na ituvaki ni nomu bula, baleta ni ko sa savasava ka buladodonu ena daro kecega na sasaga ni vuni ca me vakarusai iko.¹⁷

Au masulaka meda dau qarauna se na yasa ni laini cava eda na tiko kina; kevaka eda sa tiko ena nona yasana na Turaga, tiko kina vakadua, baleta ni oqori ena sotavi kina na vakailawalawa vata kei ira na tamata vinaka duadua ka ra na mai bula e vuravura.

Kevaka meda sa lako sese, kevaka meda sa vakasavuliga, kevaka meda sa vakarorogo vei vuni ca ka sisi yani ki tai kadua ni laini ka vakayacora na veika e vakayarayarataka mai o vuravura ka sa tukuna na Turaga ni na sega ni vinaka vei keda, meda vakusakusa lesu tale ki na tai kadua ni laini, kerea Vua na Turaga me vosoti keda, ka qai vakamuria na ivakarau ni bula ka na vukei keda meda bulataka na kena na rawati na marau tawamudu.¹⁸

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x.

Wilika “Na Bula nei George Albert Smith” (tabana 207) kei na Moronai 7:10–19. Ko na kila vakacava ni ko sa tiko ena nona yasana na Turaga”? Na cava o rawa ni cakava mo vukea e dua me tiko ena nona yasana na Turaga?
Ena imatai ni parakaravu ena tabana e 209, cavuta kina o Peresitedi Smith e vuqa na ivakaro meda na muria me rawa ni da tiko ena nona yasana na Turaga. Na ivakatagedegede cava tale sa solia na Turaga me vukea na noda rawa ni tikoga ena Nona yasana?
Ni o wilika na iwase ka tekivu ena tabana e 210, vakasamataka na nomu rawa ni vukea e dua ka nanuma ni veitarovi tiko na ivakaro.
Ni ko taleva tiko na tabana e 211, vakaraica na iwalewale nei Setani ka vakamacalataka tiko o Peresitedi Smith, ka qai nanuma na veigauna o sa raica oti kina na ivakadinadina ni veika oqo. E rawa vakacava meda vukei ira na itabagone me ra liaca ka vorata na veika oqori? E rawa vakacava me vukei keda meda na rawa ni vorata na veitemaki (tabana e 212) “na kila na inaki ni bula”?
Vakasamataka se na rawa vakacava me baleti iko na italanoa e tiko ena tabana e 212–214. Na veivanua cava so, se cava e dau yaco ka na sega ni rawa ni lako mai vei iko na vinakata mo cakacala? Na cava e rawa ni da cakava me rawa ni yaco na ka oqo ena noda loma ni vale? ena vanua ni cakacaka? ena vanua eda vakaitikotiko kina? ena noda bula yadua?

iVolanikalou Veisemati: Maciu 4:1–11 (wili kina na vosa cavuti mai vei ivakamacala e ra ni Vakadewa nei Josefa Simici); Jemesa 4:7; 1 Joni 5:3–4; Alama 13:27–28; Ilamani 5:12; Vunau kei na Veiyalayalati 82:8–10

Veivuke ni Veivakavulici: “Na taro e dau volai tu ena vavaloaloa ena dau vukei ira na lewenikalasi me ra vakasamataka na ulutaga ena vulici tiko ni se bera ni tekivu na vuli” (Veituberi, Me iLutua ni Bula, 93).

“Kevaka meda na muria na ivakavuvuli kei na ivakasala sa solia mai na Turaga, ena sinai noda salatu ena marau.”

“Na ivakatakila ni Turaga vei keda nikua ena gauna oqo e vuravura, sa vaka e dua na ivakatagi rogo kamica ni Tamada mai lomalagi ena Nona loloma veivueti vei keda.”

“Sa dodonu kina vei keda na Yalododonu Edaidai meda bula ena veisiga me rawa ni da na vakayarayarataki ena kaukauwa ni Turaga.”