Wase 6

Nodra Tokoni o Ira Era sa Tokoni Mai Vua na Turaga

O ira na noda iliuliu era digitaki mai vua na Turaga, ka sa namaka vei keda o Koya meda tokoni ira ena noda vosa kei na noda ivalavala.

Na Bula nei George Albert Smith

A tokoni o George Albert Smith me Peresitedi ni Lotu ena koniferedi raraba ni Okotova 1945. Ni voleka ni tini na koniferedi, a vakaraitaka o Peresitedi Smith na nona vakavinavinaka ena vuku ni nodra laveliga ni veitokoni na Yalododonu: “Au vakavinavinaka vei kemuni ena vuku ni yalodei sa vakaraitaki, kemuni na taciqu kei na ganequ, ena noqu vakanuinui meu qaqa, baleta niu tamata ga, e dua ka yalomalumalumu duadua ena kemuni maliwa, ia au sa kacivi ki na veiqaravi oqo—kau na sega ni mai tu eke kevaka au sega ni kila niu sa kacivi—ena nona veivakadonui na Tamada Vakalomalagi.”

A qai vakuria ena kerekere oqo: “Au na gadreva na nomuni veivuke na turaga yadua kei na marama yadua kei na gone yadua, sega me baleta na noqu vakalougatataki, ia me baleta na nomuni vakalougatataki, kei na nodra vakalougatataki na luve ni tamata ena vanua cava ga era tu kina. E sega ni noqu itavi oqori, oqori na noda itavi.”¹

Me vaka e vakaraitaki ena ivakavuvuli ena iwase oqo, e kila vinaka tu o George Albert Smith na bibi ni icolacola eratou colata voli na Mataveiliutaki Taumada, ni se bera mada ni yaco me Peresitedi ni Lotu. E vakavuvulitaka vei ira na yalododonu ni nodra yalodina kei na tudei ni nodra vakabauta ena rawa ni vukea na kena vakamamadataki na icolacola oqori, ka vakavotukanataka na ivakavuvuli oqo ena gauna ni nona veiqaravi ena Kuoramu ni iApositolo Le Tinikarua.

Ena 1946, ni liutaka e dua na soqoni ena koniferedi raraba, a vakamacalataka kina o Peresitedi Smith na nodra tokoni na vakailesilesi ni Lotu ena nona vakamacalataka ni oqo e sega ni dua walega na ivalavala: “Sa dua na noda ivakarau ni bisinisi oqo ka dau vakayacori ena Veikoniferedi; sai koya na kena kacivaki na yacadra na Vakaitutu ni Lotu me tokoni ena nodra laveliga na tamata. Au nuitaka ni o ni na vakila, oi kemuni kece, ni oqo e dua na galala tabu. … Ena sega ni ivakatakarakara walega ia ena dua na ivakatakilakila ni, ena nona veivuke na Turaga, o ni na vakayacora na nomuni itavi ni cakacaka.”² [Raica na vakatutu 1 ena tabana e 70.]

iVakavuvuli nei George Albert Smith

O ira era vakatulewa ena Lotu era sa vakarautaki, digitaki, ka vakauqeti mai vua na Turaga.

Na Lotu cecere oqo sa vakatulewataki mai vei ira na turaga era vakarautaki vakavinaka, vakavulici vakavinaka, ka vakaiyaragitaki vakavinaka me baleta na veidokai cecere o ya ka sa soli vei ira yadua ena nodra mai taura na nodra itutu. Na Tamada Vakalomalagi ena nona yalomatua sa vakavolivoliti ira na iliuliu oqo kei Isireli mai vei ira eso vakataki ira ga era vakabauta ka ra sega ni dau cuva vua me baleta na kena ituvaki yadua ni peresitedi ni Lotu, ia baleta ni kila ni o koya na gusuna na Tamada Vakalomalagi ka tokoni koya ka dau tutaki koya ka dau masulaki koya, ka lomani koya, me rawa kina vei ira talega me ra rawata na nona veivakalougatataki na Tamada Vakalomalagi.

E sega tale ni dua na isoqosoqo vakaoqo e vuravura. E sega tale ni dua na umatamata era liutaki me vaka na nodra liutaki na tamata oqo. Sa tukuni vakaidina ni o ira era vakatulewa tiko oqo era turaga dodonu. Mai vei ira ena cakava kina na Tamada Vakalomalagi na nona cakacaka. Mai vei ira me na vakavulici kina na kosipeli. … Na turaga e vakatulewa tiko vei keda nikua e sega ni vakatulewa tiko baleta na nona rawa ka vakataki koya. E sega ni vakatulewa tiko o koya baleta ni luvena e dua na iliuliu levu, ia e tu ena itutu e tu kina baleta ni kila na Tamada mai lomalagi na savasava ni yalona. Ena nona vakila na ivakarau ni yalo e dodonu me tu vua me kauta rawa kina na itukutuku oqo ki vuravura raraba, sa vakarautaki koya kina ki na veikacivi cecere sa soli vua. E vakatulewa o koya me vaka ni matataka na Tamada Vakalomalagi.³

Au vakasamataka tiko nikua na turaga yalomalumalumu ka cecere ka a liutaka na Lotu oqo mai na gauna e tauyavu kina. … Au a veikilai vinaka vata kei ira [e vuqa na] Peresitedi [ni Lotu] kau vakabauta ni ra turaga kacivi mai vua na Kalou. Ena sega ni vakabauti rawa me na digitaka e dua tale na mataqali na Tamada Vakalomalagi me vakatulewa ena noda Lotu.⁴

Na cava a yaco ena gauna sa mate kina o [Josefa Simici]? … [O ira na Yalododonu] era a sega ni soqoni vata, digitaka e dua na jeameni ka ra digia e dua na iliuliu vou. Sa digitaka oti tu na Turaga na iliuliu. O koya sa dede duadua na nona lewena na Kuoramu ni Le Tinikarua, o Brigham Young. … Na Lotu taucoko ena kena veisoqoni kece ena tokoni koya ni Peresitedi. Ni sa mate, erau na sega ni tukuna na nona daunivakasala ni o rau na Peresitedi, ia a vakatulewa tiko me dua na gauna balavu na Kuoramu ni Le Tinikarua, oti sa qai tokoni o koya na lewena qase duadua me Peresitedi ni Lotu. A basika na kena ivakarau uasivi duadua. …

Au sa vakadikeva mai eso na veika oqo me kakua kina ni dua na cala. O Josefa Simici a sega ni digitaki koya me Peresitedi ni Lotu. E sega talega vakakina o ira era a taravi koya mai. … Na ilesilesi e lako mai vei Tamada Vakalomalagi ena Nona veivakauqeti, ka ra ciqoma na turaga na kaukauwa kece sara e sala vata mai kei na ilesilesi.⁵

Sa dodonu meda vakavinavinaka vakalevu ena noda kila ni cakacaka oqo e sega ni cakacaka ni tamata, ia na cakacaka ni Turaga; ni Lotu oqo, ka vakatokai ena yaca i Jisu Karisito, e liutaki mai vua, ka na sega ni vakatara o koya e dua na tamata se dua na ilawalawa tamata me vakarusa. Ena sega ni vakatara o koya vua na turaga e vakatulewa ena nona Lotu me liutaki ira cala na tamata, ia ena tokoni ira ena nona kaukauwa cecere sara. Ena vakalevulevui ira e matadra na turaga kei na marama vinaka ka cecere. Ena vakalougatataka ko koya na nodra ilesilesi ka na vakasinaiti ena qaqa. O ira era veisaqasaqa ka dau vakaraica ga na cala era na sega ni marau ena nodra veisaqasaqa. O ira era dau veivakacacani ka dau segata me ra vakarusa na nona veivakayarayarataki na iliuliu ni Lotu era na sotava na isau ni nodra cakacala.⁶

Sa gadrevi vei keda meda dau vakavinavinaka e yaloda ni da liutaki tiko mai vei ira na turaga savasava ka ra vakauqeti tiko mai vei Tamada mai lomalagi me ra vakavulici keda ena veisiga yadua.⁷ [Raica na vakatutu 2 ena tabana e 70.]

Mai vei ira na Nona italai, sa vakavulica tiko vei keda na Turaga na sala ni marau kei na taqomaki vinaka.

Mai na gauna nei Tamada ko Atama me yacova mai na gauna oqo sa vakasalataki ira tiko na tamata mai vei ira na nona italai na Turaga. Sa vakauqeti ira ko Koya ki na ivakarau ni bula vinaka ni ra dau vakarorogo vua, ia ena veitabayabaki, ni ra gadreva vakakina na luvena, sa tala mai ko koya na tamata savasava ki vuravura, me ra mai solia na idusidusi ki na bula marau, sa vakauqeti ira me ra vakavuvulitaka na dina lagilagi ka na vakaturagataki ira ka vakavutuniyautaki ira na kawatamata.⁸

Au sega mada ni se bau kila e dua na ka bibi me yaco e vuravura me a sega ni veivakasalataki taumada mai kina na Turaga mai vei ira na nona parofita ki vei ira na tamata, ka ra a sega kina ni tu ga ena butobuto ena vuku ni veika sa vakarau yaco, ia me ra vakarautaka na nodra bula, kevaka era gadreva vakakina, me ra vinaka kina. …

Me vakataki Noa. A vakaroti koya na Turaga me taya e dua na waqa me ra vakabulai kina na buladodonu mai na waluvu sa vakarau yaco. A taya o Noa na waqa ka vunautaka na veivutuni vei ira na nona itabatamata me rauta ni duanadrau ruasagavulu na yabaki, sa vakasalataki ira kina vakavinaka sara me ra qaqarauni. Ia era sa rui dau caka ca na tamata ka ra sega kina ni rogoca na ivakasala ni qaqarauni. Ni tu vei ira na galala ni digidigi, era digitaka na ca mai na buladodonu. A tau mai na uca, ka coka mai na dobui, ka ratou vakabulai ga na matavuvale nei Noa e lewe walu. Era a sa vakasalataki kece vakavinaka sara me ra qaqarauni, ia ena nodra yalokaukauwa kei na nodra sega ni via veivutuni era sa luvu kina. [raica na Mosese 8:13–30.]⁹

E vinakata na Turaga meda marau. Oqori na vuna e solia kina vei keda na kosipeli i Jisu Karisito. Oqori na vuna e solia kina vei keda na matabete. Eda vinakata meda reki. Oqori na vuna e tauyavutaka kina na lotu ka vakatikora kina na veitutu eso, ka ra sa tu ena kena ivakarau na veika kece oqo. … Kevaka o na muria na nona veiliutaki na Turaga, kei ira e tokoni ira na Turaga, o na sega ni lutu tani ki na butobuto, vakayalia na rarama, talaidredre ena lawa ni Kalou, ka cakitaka na galala sa vinakata vakalevu o koya meda rawata.¹⁰

E dua ga na sala meu taqomaki vinaka kina ena gauna oqo sai koya meu muri ira sa lesi ira mai na Turaga me ra veiliutaki. Ena tu beka na noqu vakasama kei na veika au nanuma, ena tu beka na noqu vakatulewa ena vuku ni veika eso. Ia au kila ni ena gauna e veisaqasaqa kina na noqu vakatulewa kei na nodra ivakavuvuli o ira sa soli ira mai na Turaga me ra dusimaka na sala, sa dodonu meu veisautaka na noqu mua. Kevaka au vinakata na veivakabulai au na muri ira na iliuliu sa solia mai vei keda na Tamada Vakalomalagi, kevaka e tokoni ira tiko o koya.¹¹ [Raica na vakatutu 3 ena tabana e 70.]

O ira era yalomalumalumu ka yalodina era na tokoni ira ka dau taqomaki ira na italai ni Turaga.

Au kilai ira e udolu vakaudolu na lewe ni Lotu cecere oqo, o ira na turaga kei na marama ni veivanua o ira era sa ciqoma na kosipeli ena yalomalumalumu kei na yalodina me ra lewena kina na Lotu i Jisu Karisito ni Yalododonu Edaidai. … [Era] sa masulaki ira ka tokoni ira na nodra iliuliu … , ia ena noqu gauna ena loma ni Lotu au se bera mada ni bau kila e dua na tamata ka dau rokova tiko na ivakaro ni Turaga me laveta cake na domona me saqati ira kina o ira era kacivi me ra vakatulewa ena vuku ni Lotu oqo. Sa dua na ka vakasakiti. …

E dua na ivakadinadina cecere duadua vei au me baleta na vakalou ni cakacaka oqo sai koya e dua na umatamata … ka tu vei ira na madigi ena Koniferedi ni iTeki … me ra vakaraitaka na lomadra ena nodra laveliga me ra tokoni koya se me ra kakua ni tokoni koya e vakatulewa tiko vei ira (ni ra vakayagataka tiko na nodra galala ni digidigi) era dau tutaki ira tikoga na nodra iliuliu. E sega ni rawa ni cala na Yalo ga ni Turaga e dau vakauqeti ira na tamata yalodina, ka yalomalumalumu me tokoni ira na nona italai yalodina.¹²

Ni liutaki ira na Isireli mai Ijipita ko Mosese ena loma ni lekutu ki na vanua yalataki, a ravuti ira na Isireli mai Refitimi ko Amaleki. A dusimaki Josua ko Mosese me digitaki ira na tamata ivalu me ra taqomaki Isireli. Eratou a lako cake ko Mosese, Eroni, kei Uri ki na dela ni ulunivanua ka raica sobu tu na buca ni ivalu. Ni taura cake tu na ititoko ni Kalou ki uluna ko Mosese era qaqa na Isireli, ia ni biuta sobu ga na ligana ni sa malumalumu mai, sa qaqa ko Amaleki. A vakarautaki e dua na idabedabe vatu ka rau taura cake tu na ligana o Eroni kei Uri me rawa ni drodro tiko vei ira na Isireli na veivakalougatataki ni Kalou me ra gumatua tiko na nodra sotia me ra qaqa kina ena ivalu. A tiko vei Mosese na kaukauwa ni Kalou ka tikoga vata kei koya me yacova ni sa oti na nona cakacaka. [Raica na Lako Yani 17:8–13.] Ni ra tokoni koya tiko na tamata era sa vakalougatataki kina, ka sa vaka tiko kina vei ira kece na italai ni Turaga ka ra sa dau vakatulewa ena vukui Isireli. …

… Ni sa vakatulewa tiko na [Peresitedi] ena Lotu oqo, veitalia na levu ni yabaki, ena solia tiko vua na Tamada Vakalomalagi na igu, na kaukauwa, na vuku, na vakatulewa, kei na veivakauqeti me vosa tiko vei Isireli, me vaka ni gadrevi me ra vosataki tiko. O keda, ena noda muria tiko na nona veiliutaki, sa dodonu meda vakataki rau o Eroni kei Uri ena gauna makawa; meda taura cake tu na ligana, me rawa kina ni laiva na Turaga me drodro mai vua na veivakalougatataki ni lomalagi ki vei keda kei ira na tamata oqo.¹³

Au kila ni o ira na turaga oqo [na Vakaitutu Raraba] era italai ni Turaga, kau kila ni ra vinakata me ra vakalougatataka na kawatamata. Au nuitaka ni sega ni dua vei kemuni … ena sega ni tokoni ira, sega walega ena nomuni vakabauta kei na masu ia kevaka era sega ni ciqomi se sega ni ciqomi na nodra ivakarau, mo vakarau tu mo taqomaki ira, kevaka e gadrevi me vakakina, baleta ni na yaco mai na gauna era na gadreva kina na nomu veitaqomaki. E sega ni sa guilecavi ira na Meca, ka ni dua na ivakadinadina vei au ni kena vakalou na veikacivi era kacivi kina na turaga oqo o ya ni ra na vosacataki ira o ira na tamata ca, ka ra vosavinakataki ira na turaga kei na marama vinaka.¹⁴ [Raica na vakatutu 4 ena tabana e 70.]

Ni da vosacataki ira na noda iliuliu se sega ni kauwaitaka na nodra ivakasala, eda sa vakatara tiko vua na meca me kauti keda vakatani.

Era tu eso ena keda maliwa … era sa vakamatabokotaki tu ena nodra ivakavuvuli kei na nodra yalowai na tamata. Era tu eso era sega ni ciqoma na ivakasala kei na nona veivakauqeti o koya na turaga sa biuta na Kalou ena ulu ni Lotu oqo. …

Era lako mai vakasauri na tamata ka sega ni levu na ka era kila tu kei na so na vakasama vivinaka, ka ra mai vakatura “oqo na sala” se “o ya na sala,” ka dina ga ni veisaqasaqa kei na ivakasala ni Turaga eso era vakauqeti me ra tovolea. Sa solia mai na Turaga na ivakasala vinaka ka lesia na Peresitedi ni Lotu me vakadewataka na ivakasala oqori. Kevaka eda sega ni kauwaitaka na veika e veivakasalataki kina, ni Peresitedi ni Lotu, eda na qai kila ni da sa cakava e dua na cala levu sara.¹⁵

Na Mataveiliutaki ni Lotu … eratou matataka na Tamada Vakalomalagi, sega walega vei ira na tamata oqo, ia eratou matataki koya vei ira kece na tamata e vuravura. Eda na vinaka kevaka eda vakalevulevui ira na turaga sa biuti ira mera veiliutaki. Era turaga, ka tu na nodra dui malumalumu vakatamata, era na cala, ia kevaka eda na raica na nodra cala ena mataqali loloma vata ga eda dau raica kina na noda cala kei na noda malumalumu, eda na raica na nodra ivakarau ni bula savasava me vaka na noda dau raica na noda.

Au tu oqo meu vakatakekere vei kemuni, kemuni na taciqu kei na ganequ, mo ni kakua ni vakatara me cavuka mai na tebenigusumuni na vosa ni veivakacacani se yaloca me baleti ira sa kaciva na Turaga me ra liutaki keda. Mo ni kakua ni laurai ena nodra veitokani o ira era dau vosabeci ira se vakamalumalumutaka na nodra veivakayarayarataki vei ira na luve ni tamata. Kevaka o na vakayacora vakakina, sa rawa niu kaya vei iko ni o na raici iko ena nona loma ni nona kaukauwa na meca. O na vakayarayarataki mai vua mo lako tani vakayawa sara mai na salatu ni dina, ia kevaka o sega ni veivutuni o na qai raica ni sa bera ni o sa vakayalia na “mataniciva talei.” Ena nomu dau nanumi iko ga kei na nomu mataboko o sa na vagolei tani kina, ia ko ira na nomu daulomani … era na laki rarawa voli ena tai kadua ni ilati ena vuku ni nomu malumalumu kei na nomu lakosese.¹⁶ [Raica na vakatutu 5 ena tabana e 71.]

E sega ni moce tiko na meca. Sa rawai ira tiko e lewevuqa ka kauti ira tiko ki na ivalavala ca. … Eso era vakavuvulitaka tiko na ivakavuvuli lasu; ka so era segata tiko me ra vakauqeti ira na turaga kei na marama me ra voroka na nona ivakaro na Tamada Vakalomalagi. … Kevaka e rawa vei ira na lewe ni Lotu oqo o ira era dau dusia na nodra cala na iliuliu ka vakacacani ira era solia tiko na nodra bula meda kalougata ka vinaka kina, me ra tu vakadua vakalailai ka taroga ena yalomasumasu, “O cei vei ira na qasenivuli oqo ena vinaka meda muria?” ena sega ni dredre na nodra kunea na sala e dodonu me ra muria ka ra na tokoni ira e tokona na Turaga.¹⁷

Ni da tokoni ira na noda iliuliu, eda yalataka meda muria na nodra ivakasala ka gumatuataka na noda ilesilesi.

Sa dua na ivurevure ni kaukauwa vua na Peresitedi ni Lotu oqo me raica na matadra e udolu vakaudolu na turaga kei na marama dina ka saravi ira ni ra laveta na ligadra ena nodra veiyalayalati kei Tamada mai lomalagi, ka tokoni koya ki na itutu sa lesi kina me peresitedi ni Lotu cecere oqo. Na yalayala eda vakayacora ena noda laveta na ligada ena gauna ko ya, sa ka tabu ka bibi duadua sara. E sega ni kena ibalebale ni da na lako galugalu yani ena noda sala ka lomada me na liutaka na parofita ni Turaga na cakacaka oqo, ia e kena ibalebale,—kevaka au kila na ibalebale ni yalayala au sa cakava ena noqu laveta na ligaqu—ni da na tu e dakuna; eda na masulaki koya; eda na taqomaka na yacana vinaka, ka da na segata meda vakayacora na nona ivakasala me vaka ena dusimaki koya kina na Turaga me solia vei keda ena gauna e taura tu kina na itutu ko ya.¹⁸

Niu vakasamataka na icolacola eratou colata tu na Peresitedi ni Lotu oqo kei na nona daunivakasala, ka raica na itavi sa toka ena usouso ni domodratou, au gadreva sara mai vu ni yaloqu meu vukei iratou, meu kakua kina ni icolacola, ia ena itutu au sa kacivi kina, vata kei kemuni, na taciqu kei na ganequ, meda na dui tu ena noda itutu “kauta na noda iwasewase ni icolacola ka gumatuataka na noda veikacivi me rokovi ka vakalagilagi kina na Kalou.”.¹⁹ [Raica na vakatutu 4 ena tabana e 70.]

Na Kalou sa lewa vei keda eda sa vakalougatataki vakalevu sara meda na laveta cake tu na ligana na italai ni Turaga ka vakatulewa tiko vei keda; meda vukei koya sega walega ena noda vakabauta kei na masu ia ena yalovinaka kei na loloma me vaka sa soli vei keda mai na noda dui madigi; me rawa kina ni da tayabe voli ena ruku ni drotini sa dulaka cake tu ko koya ni tomana tiko na Kalou na nona tokoni Koya me vaka ni Peresitedi ni Lotu, ni parofita ni Turaga ena veisiga e muri oqo.²⁰

Meda tokoni ira na turaga oqo sa tuberi ira cake na Kalou me ra vakatulewa vei keda ena gauna oqo. Meda vakalougatataki ira, sega walega ena tebenigusuda, ia ena noda veivuke ena veisala kecega e rawa meda colata na icolacola sa taqa toka vakabibi sara e domodra. … Masulaki ira ka vakalougatataki ira ka vukei ira.²¹

Vakatutu ni Vuli kei na Veivakavulici

Taurivaka na veivakasama oqo ni ko vulica na iwase oqo se ni ko vakavakarau mo veivakavulici. Me ikuri ni veivuke, raica na tabana e viii–x .

Wilika na iotioti ni parakaravu ena “Na Bula nei George Albert Smith” (tabana e 61–62). Na cava “na nomuni itavi ni cakacaka”? Ni ko vulica tiko na iwase oqo, vakasamataka na sala e rawa ni o vakaraitaka kina ena nomu vosa kei na nomu ivalavala ni o tokoni ira na iliuliu ni Lotu.
Taleva na imatai ni iwase ni ivakavuvuli (tabana e 62–64), vakauasivi na ikarua kei na ikava ni parakaravu. E duidui vakacava mai na ivakarau ni vuravura na nona ivakarau ni digitaki ira na iliuliu na Turaga? Na cava soti o a sa sotava ka vakavuna na nomu vakabauta matua ni sa digitaki ira dina na noda iliuliu na Turaga?
Vulica na iwase ka tekivu ena tabana e 63 ka wilika na Vunau kei na Veiyalayalati 21:4–7. Na cava beka na ivakasala bibi sa solia mai na Turaga mai vua na Peresitedi ni Lotu ena gauna oqo? Mai vua na nomu peresitedi ni iteki se tikina? Mai vua na nomu bisopi se peresitedi ni tabana? Na veivakalougatataki cava beka o sa rawata ena nomu muria na ivakasala oqo?
Taleva na iwase ka tekivu ena tabana e 65 ka wilika na imatai ni rua na parakaravu taucoko ena tabana e 64. Na cava na kena ibalebale vei iko mo tokoni ira na iliuliu ni Lotu? E vaqaqacotaka vakacava na noda matavuvale kei na noda vuvale na noda tokoni ira na iliuliu ni Lotu?
Wilika na iotioti ni parakaravu taucoko ena tabana e 67. Na cava sa rui rerevaki kina na noda vakacacani ira na iliuliu ni Lotu? Na cava beka na ka dodonu mo vakayacora kevaka e dua e dusia e dua na cala mai vua e dua na noda iliuliu ena noda vanua?

iVolanikalou Veisemati: Emosi 3:7; Efeso 4:11–14; Iperiu 5:4; Vunau kei na Veiyalayalati 84:109–10; 107:22; 112:20

Veivuke ni Veivakavulici: E dua na sala meda vakayaloqaqataka kina na vuli vagumatua sai koya meda vakarorogo vakavinaka ni dua e taro se tukuna e dua na ka. “Na vakarorogo e dua na ivakaraitaki ni loloma. E dau gadrevi kina ena veigauna eso na solibula. Ni da vakarorogo vakavinaka sara vei ira eso, eda dau vakanadakuya na veika eda via tukuna me rawa ni ra vakamacalataki ira kina” (Na Veituberi, Me iLutua ni Noda Bula, 66).

“Baleta niu tamata ga, e dua ka yalomalumalumu duadua ena kemuni maliwa, ia au sa kacivi ki na veiqaravi oqo …ena nona veivakadonui na Tamada Vakalomalagi.”

“Sa dodonu meda vakataki rau o Eroni kei Uri ena gauna makawa; meda taura cake tu na ligana [na parofita].”

Eda tokoni ira na noda iliuliu ena noda “kauta na noda iwasewase ni icolacola ka gumatuataka na noda veikacivi me rokovi ka vakalagilagi kina na Kalou.”