Миний суурь зарчим: Үнэнч шударга байдлаа харуул

Дээд талын хугацаа: 20 минут

Тунгаан бод:

Яагаад Их Эзэн “зүрх сэтгэлдээ үнэнч шударга” хүмүүсийг хайрладаг вэ?

Үз:

“Амиа сольж авахын тулд хүн юугаа өгөх юм бэ?” видео бичлэг srs.lds.org/videos дээр байгаа. (Видео бичлэг байхгүй бол? Энэ бүлгийн төгсгөл дэх эх бичвэрийг уншина уу.)

Ярилц:

Үнэнч шударга байна гэдэг нь юу гэсэн утгатай вэ? Энэ амьдралд эд баялаг олж авахын тулд хүмүүс бодгалиа хэрхэн бага багаар худалддаг вэ?

Унш:

Итгэлийн тунхаг 1:13 ба Иов 27:5.

Итгэлийн тунхаг 1:13

“Шударга, үнэнч … байхад … бид итгэдэг.”

Иов 27:5

“Үхэн үхтлээ би хоёргүй үнэнчээ Өөрөөсөө үл холдуулна.”

Үйл ажиллагаа (5 минут)

Та нар дараах хэсэгт өөрсдийгөө дүгнэнэ үү.

Та дараах байдлаар хэр олон удаа үйлддэгээ харахын тулд хэсэг бүрийн өмнө тоо тавь. 1 = хэзээ ч үгүй, 2 = заримдаа, 3 = ихэвчлэн, 4 = үргэлж
1. Би бүх амлалт, үүрэг, гэрээгээ сахидаг.
2. Би хэлж, бичиж байгаа бүх зүйлдээ бүрэн дүүрэн үнэнч ханддаг.
3. Би аливаа зүйлийг харагдаж байгаагаас нь илүү сайн болгон хэтрүүлж ярьдаггүй.
4. Би зээлсэн бүхнээ эргүүлж өгдөг бөгөөд өөрийн биш зүйлийг авдаггүй.
5. Би ханьдаа үг, үйлдэл гээд бүх байдлаараа үнэнч байдаг.
6. Би баригдахгүй гэдгийг мэдэж байсан ч хуурч мэхэлдэггүй.
7. Би ямар нэгэн зүйлийг минийх биш гэдгийг мэдмэгцээ эзэнд нь эргүүлж өгдөг.
8. Би зээлсэн мөнгөө буцааж төлдөг.

Ярилц:

Мозая 4:28 болон ахлагч Жозеф Б.Вөртлиний хэлсэн үгийг унш. Өр болон бизнесийн юм уу оюутны зээлээ (ТБС-ийн зээл) эргүүлэн төлөх нь яагаад хувь хүний үнэнч шударга байдлын асуудал болдог вэ?

Moзая 4:28

“Мөн та нарын дунд хөршөөсөө зээлсэн хэн боловч зээлсэн тэр зүйлээ тохирсны дагуу эргүүлж өгөх ёстой, эсвээс та нүгэл үйлдэх болно; мөн магад та өөрийн хөршийг түүнчлэн нүгэл үйлдэхэд хүргэх вий гэдгийг та нар санаасай хэмээнэ би.”

Ахлагч Жозеф Б.Вөртлин

“Үнэнч шударга зан нь шууд үр дүнгээс үл хамааран үргэлж зөв болон сайн зүйлийг хийх гэсэн үг юм. Энэ нь бид зөвхөн үйлдлүүддээ төдийгүй хамгийн чухал нь бодол, зүрх сэтгэлдээ чин сэтгэлээсээ зөв шударга байна гэсэн утгатай. Бага зэрэг худал хэлэх, багахан хуурч мэхлэх эсвэл бага зэрэг шударга бус зүйлийг давуу тал болгон ашиглахыг Их Эзэн хүлээн зөвшөөрдөггүй. Үнэнч шударга байдлын бүрэн төгс шагнал нь хийж буй бүх зүйлд маань удирдан чиглүүлэх Ариун Сүнс байнга бидэнтэй хамт байх явдал юм.”

“Personal Integrity,” Ensign, May 1990, 30, 32, 33

Амлалт өг:

Долоо хоногийн турш дараах үйлдлүүдийг хийх амлалт өг.

• Үнэлгээ өгсөн дээрх найман хэсгийн нэгэн дээр нь ажиллаж сайжруул.

• Өнөөдөр үнэнч шударга байдлын талаар мэдсэн зүйлээ гэр бүл, найзуудтайгаа хуваалц.

Амиа сольж авахын тулд хүн юугаа өгөх юм бэ?

Хэрэв видео бичлэгийг үзэх боломжгүй бол бүлгээс нэг хүнийг сонгож дараах эх бичвэрийг уншуулна уу.

Ахлагч Робэрт С.Гэй: Аврагч Өөрийн шавь нараас “Амиа сольж авахын тулд хүн юугаа өгөх юм бэ?” хэмээн асуусан байдаг. [Матай 16:26].

Энэ бол аавын маань олон жилийн өмнө надад анхааралтайгаар тунгаан бодохыг заасан асуулт юм. Намайг бага байхад аав, ээж хоёр маань надад гэрийн ажил даалгаж, хариуд нь надад багахан хэмжээний мөнгө өгдөг байлаа. Би долоо хоногт 50 центээс арай илүү их мөнгө авдаг байсан бөгөөд тэрхүү мөнгөөрөө ихэнхдээ кино театрт кино үздэг байсан юм. Тэр үед 11 настай хүүхдийн тасалбар 25 цент байсан болохоор надад 25 цент үлддэг байв. Би үлдсэн мөнгөөрөө нэг ширхэг нь 5 центийн үнэтэй чихрийн цуглуулгааас авдаг байсан. 5 чихрийн цуглуулгатай кино! Надад үүнээс илүү сайхан зүйл гэж байх уу даа.

Намайг 12 нас хүртэл бүх зүйл ийм сайхан хэвээрээ байлаа. Нэгэн өдөр би киноны тасалбар авахаар зогсож байхдаа 12 настай хүүхдийн тасалбар 35 цент болохыг анзаарлаа. Энэ нь хоёр чихрийн цуглуулгын мөнгийг хасна гэсэн үг. Би энэхүү золиосыг хийхэд бэлэн биш байсан учраас “Чи долоо хоногийн өмнөх шигээ л харагдана шүү дээ” гэж өөртөө шалтаг олсон юм. Би урагшилж, 25 центийн тасалбар өгөхийг хүслээ. Тасалбар зардаг хүн анзаарсангүй, би ч гурав биш, урьдын адил таван чихрийн цуглуулга худалдан авлаа.

Өөрийнхөө хийсэн зүйлд баяртай байсан болохоор би өөрийнхөө том амжилтыг аавдаа хэлэхээр гэр рүүгээ яарч билээ. Намайг бүх зүйлийн талаар нэг бүрчлэн хэлэхэд аав маань юу ч хэлээгүй юм. Намайг ярьж дууссаны дараа тэр над руу хараад, “Хүү минь, чи өөрийнхөө амийг таван центийн зоосоор солих байсан уу?” гэж асуув. Түүний үгс миний зүрх сэтгэлд дэндүү хүчтэй нөлөөлж, хэзээ ч мартахааргүй сургамж болж билээ.

(“Амиа сольж авахын тулд хүн юугаа өгөх юм бэ?” Ensign эсвэл 2012 оны 10-р сарын Ерөнхий чуулган, 42)