Feem ntau cov neeg no xav paub lub ntsiab hauv lub neej no yog dab tsi. Lawv txhawj txog yav tom ntej thiab txog lawv tsev neeg. Lawv yeej xav tau kev koom siab los ntawm qhov uas lawv paub tias lawv yog Vajtswv cov me nyuam thiab cov neeg hauv Nws tsev neeg uas nyob mus ib txhis li. Lawv xav nyob kaj siab lug hauv ib lub ntiaj teb uas hloov tej ntsiab cai ntau heev. Lawv xav “txais txoj kev kaj siab nyob hauv sim neej no, thiab txoj sia nyob mus ib txhis nyob hauv sim neej yuav los” (Lus Qhuab Qhia thiab Kev Khi Lus 59:23).
Lawv feem coob “tsis paub qhov tseeb tsuas yog vim lawv tsis paub mus nrhiav qhov tseeb nyob rau qhov twg” (Lus Qhuab Qhia thiab Kev Khi Lus 123:12). Yexus Khetos txoj moo zoo, raws li tus Yaj Saub Joseph Smith muab txum tim rov qab los, qhia txog qhov tseeb uas nyob mus ib txhis li. Qhov tseeb no pab tib neeg sab ntsuj plig thiab pab lawv kom muaj raws li tej uas lawv xav tau tiag tiag.
Vim koj yog ib tug uas tau txais txoj cai sawv Yexus Khetos cev, koj qhia tias “txoj kev txhiv dim los ntawm tus Mexiyas uas Dawb Huv” (2 Nifais 2:6). Koj caw tib neeg los cuag Khetos kom hloov siab los ntseeg Nws thiab ntseeg Nws txoj moo zoo uas tau muab txum tim rov qab los. Thaum lawv ua raws li koj caw lawv ua, lawv yuav zoo siab, muaj kev cia siab, kev kaj siab thiab muaj lub ntsiab hauv lawv lub neej.
Xwv kom los cuag tus Cawm Seej, tib neeg yuav ntseeg Nws. Koj pab tau lawv muaj kev ntseeg zoo li no thaum koj:
Qhia lawv txog Yexus Khetos txoj moo zoo thiab ua tim khawv tias Nws txoj moo zoo muaj tseeb.
Caw lawv cog lus ua raws li Nws tej lus qhia.
Rov qab ua ntxiv thiab pab lawv ua raws li lawv tej lus cog tseg.
Pab lawv muaj tej lub sij hawm thaum lawv hnov tau tus Vaj Ntsuj Plig Dawb Huv lub hwj huam (saib 1 Nifais 10:17–19).
Kev hloov siab lees txim npaj tib neeg kom khi lus thaum lawv ua kev cai raus dej thiab txais lub txiaj ntsim Vaj Ntsuj Plig Dawb Huv. Tus Cawm Seej hais tias, “Los cuag kuv thiab ua kev cai raus dej los ntawm kuv lub npe, xwv kom qhov uas nej tau txais tus Vaj Ntsuj Plig Dawb Huv yuav muab nej hloov ua neeg dawb huv, xwv kom nej yuav sawv tsis muaj qhov ceb rau ntawm kuv xub ntiag thaum txog hnub kawg” (3 Nifais 27:20).
Thaum koj to taub ntxiv thiab koj zaj lus tim khawv txog tus Cawm Seej thiab Nws txoj Kev Theej Txhoj loj tuaj, koj haj yam yuav xav qhia txoj moo zoo rau lwm tus. Koj yuav xav ib yam Lihais xav hais tias, “yog ib qho uas tseem ceeb kawg nkaus kom muab tej xwm txheej no qhia rau tej neeg uas nyob hauv ntiaj teb no paub” (2 Nifais 2:8).
Daim Duab
ua yog toog pom tus Ntoo uas Cawm txoj Sia
Tus Ntoo Cawm txoj Sia, los ntawm Damir Krivenko.
Kev Kawm Koj tus Kheej Los Sis Nrog tus Khub
Saib daim duab no thaum koj kawm txog kev ua yog toog pom tus ntoo uas cawm txoj sia nyob hauv 1 Nifais 8 thiab 11.
Kev ua yog toog pom tus ntoo uas cawm txoj sia yog ib lub cim txog dab tsi? (Saib 1 Nifais 11:21–23.)
Lihais xav ua dab tsi tom qab nws noj lub txiv? (Saib 1 Nifais 8:10–18.)
Nyob hauv txoj kev ua yog toog no, tib neeg yuav tsum ua dab tsi kom thiaj tau cov txiv noj? Peb yuav tsum ua dab tsi kom txais tau tag nrho cov koob hmoov los ntawm tus Cawm Seej txoj Kev Theej Txhoj? Tej kev cog lus thiab tej kev khi lus ua li cas pab peb txais tau cov koob hmoov ntawd?
Koj muaj peev xwm ua li cas kom lwm tus los noj cov txiv ntawm txoj moo zoo?
Txoj Cai thiab lub Hwj Chim ntawm Koj txoj Kev Hu
Vajtswv tau hu koj thiab tsa koj “[tshaj tawm] tej moo zoo siab ntawm kev xyiv fab heev, uas twb yog txoj moo zoo uas kav ib txhis” (Lus Qhuab Qhia thiab Kev Khi Lus 79:1) Ib yam li Mauxiyas cov tub, koj muaj cai siv Vajtswv txoj cai thiab lub hwj chim qhia lawv (saib Amas 17:2–3).
Raws li Yexus Khetos qhia, tus Yaj Saub Joseph Smith tau muab txoj cai tshaj tawm txoj moo zoo txum tim rov qab los. Thaum uas tau muab koj tsa ua ib tug tub txib, koj tau txais txoj cai no. Yog li ntawd kuj muaj cai, cib fim, thiab kev lav ris sawv tus Tswv cev thiab qhia txog Nws txoj moo zoo.
Txoj cai no muaj ib txoj kev lav ris kom ua neej tsim nyog raws li koj txoj kev hu. Cia li paub tias Vajtswv tau muab koj tsa ua li no tiag tiag. Tsis txhob ua txhaum thiab tsis txhob ua tej yam uas qias los sis phem. Tsis txhob ua thiab xav raws li neeg ntiaj teb xav thiab ua. Cia li ua raws li tej kev cai nyob hauv Kev Cai Ua Tub Txib ntawm Yexus Khetos cov Thwj Tim. Vim koj sawv tus Tswv cev, ua koj “lub neej rau cov ntseeg xyaum” (1 Timautes 4:12). Hwm Yexus Khetos lub npe los ntawm tej yam koj ua thiab hais.
Xwv kom ua raws li qhov uas Vajtswv hu koj ua ces yuav tsum muaj lub hwj chim ntawm sab ntsuj plig thiab txoj cai. Vajtswv muab lub hwj chim ntawm sab ntsuj plig rau koj thaum koj siv zog ua hauj lwm tsis tu tsis tseg kom koj zaj lus tim khawv muaj zog thaum ua tim khawv txog Nws, Yexus Khetos, thiab tej lus tseeb txog txoj moo zoo uas koj qhia. Nws muab lub hwj chim ntawm sab ntsuj plig rau koj thaum koj thov Vajtswv, kawm vaj lug kub, thiab nrhiav kom ua raws li koj lub hom phiaj ua tub txib. Nws muab lub hwj chim ntawm sab ntsuj plig rau koj thaum koj siv zog ua raws li Nws cov lus txib thiab koj tej kev khi lus uas koj khi thaum koj txais cov kab ke cawm seej (saib Lus Qhuab Qhia thiab Kev Khi Lus 35:24).
Koj yuav txais lub hwj chim ntawm sab ntsuj plig thaum koj:
Siv cov vaj lug kub kom qhia neeg, pab lawv to taub ntxiv txog txoj moo zoo, thiab pab lawv paub tias yuav siv tej lus tseeb no li cas hauv lawv lub neej (saib 1 Nifais 19:23; Amas 26:13; 31:5).
Rov qab xyuas thiab xav txog tej kev khi lus uas koj tau nrog Vajtswv khi no. Kawm txog cov koob hmoov uas Vajtswv tau cog lus tias cov uas ua raws li tej kev khi lus no yuav txais. Xav txog cov koob hmoov uas koj tau txais lawm. Sau ntawv txog koj tej kev tshoov siab hauv koj phau ntawv ceev txog kev kawm.
Ua raws li txoj kev cai ntawm Yexus Khetos txoj moo zoo.
Ua raws li txoj kev cai coj dawb huv.
Ua raws li txoj kev cai fij siab.
(Saib Phau Qhia Kev Coj lub Koom Txoos, 27.2.)
Kev Kawm Koj tus Kheej Los Sis Nrog tus Khub
Nyeem Yauhas 15:1–16. Vim li cas Yexus Khetos yog tsob hmab? Vim li cas koj yog ib ceg ntawm tsob hmab ntawd? Qhov uas tau muab koj tsa los ua txoj hauj lwm no piv rau qhov no li cas?
Cia li nyeem koj daim ntawv pov thawj ua xib hwb. Sau ntawv txog koj tej kev xav txog tej yam uas koj tau nyeem. Txhua zaus koj kawm tshooj no, xav seb koj puas rov qab ua li no. Xav seb koj tej kev xav tau hloov li cas.
Cia li sau cov koob hmoov uas Joseph Smith tau thov Vajtswv muab rau cov neeg rau siab ntseeg uas tau txais lub vaj txiaj ntsim nyob hauv tus Tswv lub tsev dawb huv. Koj xav li cas txog cov koob hmoov no?
Nrhiav Kev Kom Muaj tus Vaj Ntsuj Plig Dawb Huv Nrog Nraim Koj Nyob
Koj tau txais lub txiaj ntsim Vaj Ntsuj Plig Dawb Huv thaum uas tau pom zoo rau koj ua ib tug mej zeej hauv lub Koom Txoos. Thaum koj yog ib tug tub txib—thiab nyob tas koj lub neej—koj yeej yuav xav muaj tus Vaj Ntsuj Plig Dawb Huv nrog nraim koj nyob (saib 1 Nifais 10:17; 3 Nifais 19:9). Tus Vaj Ntsuj Plig Dawb Huv yog tus thib peb hauv Pawg Vajtswv.
Tus Vaj Ntsuj Plig Dawb Huv coj, qhia, thiab nplij koj lub siab. Nws ntxuav koj huv thiab ua kom koj hloov ua neeg dawb huv. Nws ua tim khawv txog qhov tseeb thiab ua tim khawv txog Leej Txiv thiab Leej Tub. Nws ua rau koj hloov siab los ntseeg thiab pab cov neeg uas koj qhia hloov siab los ntseeg. (Saib 3 Nifais 27:20; 28:11; Ethaws 12:41; Maulaunais 8:26; 10:5; Yauhas 15:26.)
tus Vaj Ntsuj Plig Dawb Huv “yuav qhia rau nej txhua yam uas nej yuav tsum ua” (2 Nifais 32:5). Nws yuav ua kom koj muaj txuj ci thiab muaj zog kom pab lwm tus tshaj qhov uas koj ua tau koj tus kheej xwb.
“Kuv taij thov kom nej sab ntsuj plig yuav haj yam muaj cuab kav txais kev tshwm sim. … Xaiv los ua tej hauj lwm ntawm sab ntsuj plig uas nej yuav tsum ua kom thiaj txais tau lub txiaj ntsim ntawm tus Ntsuj Plig Dawb Huv thiab haj yam hnov tus Ntsuj Plig lub suab kom meej zog” (Russell M. Nelson, “Tshwm Sim rau lub Koom Txoos, Tshwm Sim rau Peb lub Neej,” Liyahaunas, Tsib Hlis Ntuj 2018, 96).
Kawm Kom Paub tus Ntsuj Plig
Koj yuav haj yam txawj ua raws li koj lub hom phiaj ua tub txib thaum koj kawm paub thiab coj raws li tus Vaj Ntsuj Plig Dawb Huv tej lus qhia. Tus Ntsuj Plig yeej ib txwm hais lus ntsiag to qhia koj hauv koj lub siab thiab tej kev xav. Muab siab rau kev nrhiav, kev paub, thiab kev ua raws li tej kev tshoov siab ntsiag to no. Muaj ntau txoj kev rau koj txais tau tej kev tshoov siab no (saib chapter 4; kuj saib Lus Qhuab Qhia thiab Kev Khi Lus 8:2–3; 11:12–14; Kalatias 5:22–23).
Qhia nrog tus Ntsuj Plig
Yexus Khetos txoj moo zoo yog “Vajtswv lub hwj chim uas cawm tau txhua tus uas ntseeg dim” (Loos 1:16). Vim li ntawd, yuav tsum muaj lub hwj chim uas los saum ntuj los kom qhia txog txoj Kev Muab Txoj Moo Zoo Txum Tim Rov Qab Los—yog tus Vaj Ntsuj Plig Dawb Huv lub hwj chim.
Tus Tswv hais tias, “Tus Tswv yuav muab tus Ntsuj Plig rau nej los ntawm txoj kev thov Vajtswv nrog kev ntseeg; thiab yog nej tsis muaj tus Ntsuj Plig nej yuav tsum tsis txhob qhia.” (Lus Qhuab Qhia thiab Kev Khi Lus 42:14; kuj saib 50:13–14, 17–22). Thaum koj qhia nrog tus Vaj Ntsuj Plig Dawb Huv lub hwj chim, Nws yuav:
Phau Ntawv Maumoos lub Hwj Chim Pab Neeg Hloov Siab Los Ntseeg, los ntawm Ben Sowards
Kev Ntseeg Yexus Khetos
Kev ntseeg yog lub hauv paus rau txhua yam ntsiab cai ntawm txoj moo zoo. Kev ntseeg yog ib lub ntsiab cai ntawm kev muaj peev xwm thiab hwj chim.
Peb yuav tsum muab siab rau ntseeg Yexus Khetos vim kev ntseeg no yuav ua rau peb txais tau kev cawm seej. Tus Cawm Seej qhia hais tias, “Rau qhov Vajtswv hlub neeg ntiaj teb kawg li, nws thiaj txib nws tib Leeg Tub los rau hauv ntiaj teb. Tus uas ntseeg nws Leej Tub, tus ntawd yuav tsis tuag, tiam sis yuav tau txoj sia ntev dhawv mus ib txhis” (Yauhas 3:16).
Kev ntseeg Yexus Khetos yog kev ntseeg tias Nws yog Vajtswv Tib Leeg Tub. Yog kev tso siab rau Nws vim Nws yog peb tus Cawm Seej thiab tus Txhiv Dim (saib Mauxiyas 3:17; 4:6–10; Amas 5:7–15). Yog kev cia siab rau Nws tag nrho thiab Nws txoj lus, tej lus qhia, thiab tej lus cog tseg. Peb txoj kev ntseeg Khetos yuav loj tuaj thaum peb coj raws li Nws tej lus qhia thiab tus yam ntxwv kawg siab kawg ntsws (saib 2 Nifais 31:6–13; 3 Nifais 27:21–22).
Thaum koj ua ib tug tub txib, cia li pab neeg ua raws li lawv tej kev khi lus kom txhawb lawv txoj kev ntseeg Yexus Khetos. Tej lus cog tseg no yuav npaj lawv lub siab kom txais tau cov kab ke thiab nrog Vajtswv khi lus.
Hloov Siab Lees Txim
Kev ntseeg Yexus Khetos ua rau peb hloov siab lees txim (saib Hilamas 14:13). Kev hloov siab lees txim yog kev tig mus rau Vajtswv thiab kev tso kev txhaum tseg. Thaum peb hloov siab lees txim, ces tej yam peb ua thiab xav hloov kom haum Vajtswv lub siab nyiam.
Los ntawm Nws txoj kev theej txhoj, tus Cawm Seej tau them tus nqi rau peb tej kev txhaum (saib Mauxiyas 15:9; Amas 34:15–17). Thaum peb hloov siab lees txim, peb txais tau kev zam txim vim muaj Yexus Khetos thiab Nws txoj kev theej txhoj, vim Nws muaj cai muab siab hlub rau cov neeg uas lees txim (saib Maulaunais 7:27–28). Los yog raws li tus yaj saub Lihais hais tias, peb “txoj kev txhiv dim … los ntawm tus Mexiyas uas Dawb Huv txoj hauj lwm zoo, txoj kev hlub tshua, thiab txoj kev tshav ntuj” (2 Nifais 2:6, 8).
Kev hloov siab lees txim tsis yog kev siv zog kom hloov cwj pwm los sis tso kev qaug zog tseg xwb. Kev hloov siab lees txim yog kev tso siab rau Yexus Khetos tiag tiag, tus uas muab hwj chim rau peb lub siab “hloov loj heev” (saib Amas 5:12–14). Yog kev txo hwj chim ywj rau tus Ntsuj Plig thiab ua raws li Vajtswv lub siab nyiam. Thaum peb hloov siab lees txim, peb cog lus rau Vajtswv thiab ua raws li Nws cov lus txib. Peb yug dua tshiab dhau los ntawm Khetos.
Kev hloov siab lees txim yog ib lub ntsiab cai zoo uas ua rau peb xyiv fab thiab nyob kaj siab lug. Kev hloov siab lees txim ua rau peb “los rau tus Txhiv Dim lub hwj chim, mus rau txoj kev cawm seej ntawm [peb] tus ntsuj plig” (Hilamas 5:11).
Cia li ua siab loj thiab hlub tib neeg thaum koj pab lawv to taub vim li cas lawv yuav tsum hloov siab lees txim. Thaum koj caw tib neeg uas koj qhia kom lawv cog lus, koj caw lawv hloov siab lees txim thiab koj ua rau lawv muaj kev cia siab.
Kev Kawm Vaj Lug Kub
Koj kawm dab tsi los ntawm tej nqe vaj lug kub no txog kev tshaj tawm txog kev hloov siab lees txim?
Kev ntseeg Yexus Khetos thiab kev hloov siab lees txim npaj peb txais cov kab ke ntawm kev cai raus dej. “Thiab thawj thawj cov txiv ntoo ntawm kev hloov siab lees txim yog kev cai raus dej; thiab kev cai raus dej twb yog los ntawm kev ntseeg kom ua raws li tej lus txib; thiab txoj kev ua raws li tej lus txib coj tau kev zam txim rau tej kev txhaum los” (Maulaunais 8:25) Peb nkag hauv lub rooj vag mus rau txoj sia nyob mus ib txhis thaum tus uas muaj txoj cai los ntawm Vajtswv muab peb ua kev cai raus dej.
Thaum peb ua kev cai raus dej, peb nrog Vajtswv khi lus. Thaum peb ua raws li txoj kev khi lus no, Vajtswv cog lus rau peb hais tias yuav muab tus Vaj Ntsuj Plig Dawb Huv nrog nraim peb nyob, yuav zam txim pub rau peb, thiab pub peb ua mej zeej hauv Yexus Khetos lub Koom Txoos (saib Lus Qhuab Qhia thiab Kev Khi Lus 20:77, 79; Maulaunais 6:4). Thaum peb ua txoj kab ke uas muaj kev xyiv fab thiab kev cia siab no ces tus Tswv muab peb sau los ua ke thiab peb sab ntsuj plig yug dua tshiab.
Kev muab neeg uas koj qhia ua kev cai raus dej thiab ua kev cai pom zoo yeej yog lub ntsiab ntawm koj lub hom phiaj. Pab lawv to taub tias kom tsim nyog ua kev cai raus dej, lawv yuav tsum ua raws li tej kev cai nyob hauv Lus Qhuab Qhia thiab Kev Khi Lus 20:37.
Muaj ob hom kev cai raus: kev cai raus dej thiab kev cai raus ntawm tus Ntsuj Plig. Tom qab peb ua kev cai raus dej, peb ua txoj kab ke ntawd tiav lawm thaum peb txais kev pom zoo los ntawm ib tug uas muaj Vajtswv txoj cai tso tes saum peb taub hau. Dhau los ntawm kev pom zoo peb txais lub txiaj ntsim Vaj Ntsuj Plig Dawb Huv thiab txais kev zam txim rau peb tej kev txhaum.
Tus Yaj Saub Joseph Smith qhia tias, “Txoj kev cai raus dej tsuas yog ib nrab ntawm txoj kab ke ntawd, thiab yuav tsis muaj qab hau dab tsi li yog tias tsis ua lwm qhov ntawd—uas yog kev cai raus los ntawm tus Vaj Ntsuj Plig Dawb Huv” (Teachings of Presidents of the Church: Joseph Smith [2007], 95).
Amas qhia hais tias, “Tib neeg sawv daws … yuav tsum yug dua tshiab; muaj tseeb tiag, yug los ntawm Vajtswv, hloov ntawm lawv lub siab nyiam sab cev nqaij daim tawv thiab txoj kev poob, mus rau kev ncaj ncees, uas Vajtswv tau muab lawv txhiv dim, los ua nws cov tub thiab cov ntxhais; thiab zoo li no lawv los ua neeg tshiab” (Mauxiyas 27:25–26).
Rau cov neeg uas lees txim, kev cai raus dej thiab kev cai raus ntawm tus Ntsuj Plig yog kev yug dua tshiab ntawm yus sab ntsuj plig.
Kev Kawm Vaj Lug Kub
Muaj cov koob hmoov twg uas los ntawm kev txais lub txiaj ntsim Vaj Ntsuj Plig Dawb Huv?
Kev coj raws li Yexus Khetos yog ib yam peb cog lus tias yuav ua kom tas mus peb lub neej. Peb nyiaj mus kom txog thaum kawg thaum peb muab siab rau ntseeg Khetos, hloov siab lees txim txhua hnub, txais tag nrho cov kab ke thiab khi lus ntawm txoj moo zoo, ua raws li tej kev khi lus ntawd, thiab muaj tus Vaj Ntsuj Plig Dawb Huv nrog nraim peb nyob tas mus li. Ua li no los suav qhov uas peb rov qab khi lus uas tau khi lawm thaum peb txais lub cim nco txog.
Daim Duab
Tus Tswv Yog Kuv tus Tswv Yug Yaj, los ntawm Yongsung Kim
Tus Tswv Yog Kuv tus Tswv Yug Yaj, los ntawm Yongsung Kim Havenlight tau pub siv daim duab no.
Txoj Moo Zoo—Peb Leej Txiv Saum Ntuj Ceeb Tsheej txoj Kev Kom Rov Qab Los Cuag Nws
Yexus Khetos txoj moo zoo hloov taus peb lub neej thiab peb txoj kev hloov los ua neeg zoo li cas. Tej ntsiab cai ntawm txoj moo zoo tsis yog tej yam uas peb kawm ib zaug hauv peb lub neej xwb. Thaum peb rov qab ua tej no tas peb lub neej, ces ua rau peb sib raug zoo nrog Vajtswv thiab tau nqi zog zuj zus tuaj. Ua rau peb muaj kev kaj saib lug, kev kho mob, thiab kev zam txim. Tej no kuj pab peb paub txoj kev uas Leej Txiv Saum Ntuj Ceeb Tsheej tau muab rau peb kom peb muaj txoj sia nyob mus ib txhis nrog Nws.
Yexus Khetos txoj moo zoo yuav coj koj txoj kev ua hauj lwm thaum koj yog ib tug tub txib. Yuav pab koj siv zog ua hauj lwm thiab. Cia li pab tib neeg ntseeg Yexus Khetos kom los hloov siab lees txim (saib Amas 34:15–17). Qhia thiab ua tim khawv tias twb tau muab Yexus Khetos txoj moo zoo tag nrho thiab txoj cai pov thawj hwj txum tim rov qab los. Caw tib neeg ua kev cai raus dej thiab ua raws li tus Cawm Seej tej lus qhia.
Yexus Khetos txoj Moo Zoo Foom Koob Hmoov rau Tag Nrho Vajtswv cov Me Nyuam
Yexus Khetos txoj moo zoo yeej pub rau tag nrho Vajtswv cov me nyuam. Cov vaj lug kub qhia tias “txhua tus yeej zoo tib yam” rau Vajtswv. Nws caw “txhua tus kom los cuag nws thiab los txais yuav nws txoj kev tshav ntuj; thiab nws tsis txwv leej twg ntawm cov uas los cuag nws” (2 Nifais 26:33).
Txoj moo zoo foom koob hmoov rau peb tas peb lub neej thiab nyob mus ib txhis li. Peb yuav zoo siab tshaj plaws—tsis hais peb ib leeg thiab nyob hauv peb tsev neeg los yog—thaum peb ua neej raws li Yexus Khetos tej lus qhia (saib Mauxiyas 2:41; “Tsev Neeg: Ib zaj Lus Tshaj Tawm rau lub Ntiaj Teb,” ChurchofJesusChrist.org). Kev ua raws li txoj moo zoo ua rau peb haj yam xyiv fab, ua rau peb xav ua zoo, thiab pab peb nrog lwm tus sib raug zoo.
Ib zaj lus zoo tshaj plaws los ntawm txoj moo zoo uas tau muab txum tim rov qab los yog qhov uas peb txhua tus yog Vajtswv tsev neeg. Peb yog Nws cov tub thiab cov ntxhais uas Nws hlub. Txawm peb tsev neeg zoo li cas nyob hauv lub ntiaj teb los, peb txhua tus yog ib tug hauv Vajtswv tsev neeg.
Ib yam zoo ntawm peb zaj lus kuj yog qhov uas peb tsev neeg nyob tau ua ke mus ib txhis li. Vajtswv tau pom zoo rau tsev neeg. Cov yaj saub hauv hnub nyoog no tau qhia tias:
“[Leej Txiv Saum Ntuj Ceeb Tsheej] txoj hau kev zoo siab los saum ntuj los ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa. Tej kab ke tseem ceeb dawb ceev thiab tej kev cog lus uas muaj hauv tej tuam tsev dawb huv ua rau tib neeg rov qab mus nyob tau ntawm Vajtswv lub xub ntiag thiab ua rau tsev neeg nyob tau ua ke mus ib txhis li” (“Tsev Neeg: Ib zaj Lus Tshaj Tawm rau lub Ntiaj Teb”).
Neeg coob tsis tshua muaj cib fim sib yuav los sis tsis muaj ib tsev neeg uas sib hlub. Neeg coob twb sib nrauj lawm thiab muaj tej xwm txheej nyuaj hauv lawv tsev neeg. Tiam sis, txoj moo zoo foom koob hmoov rau peb txhua tus txawm yog peb tsev neeg raug dab tsi los xij. Thaum peb rau siab ntseeg, Vajtswv yuav npaj ib txoj kev rau peb kom peb tau koob hmoov uas yog ib tsev neeg uas sib hlub, txawm yog nyob hauv lub neej no los sis hauv lub neej tom ntej (saib Mauxiyas 2:41).
Txoj Kev Muab Txoj Moo Zoo Txum Tim Rov Qab Los: Lub Hauv Paus ntawm Kev Ntseeg
Txawm yog koj ua hauj lwm qhov twg los sis koj qhia leej twg los, cia li tsom ntsoov rau kev qhia txog Yexus Khetos thiab kev muab Nws txoj moo zoo Txum Tim Rov Qab Los. Thaum koj kawm txog cov lus qhuab qhia hauv cov tub txib tej zaj lus qhia, koj yuav pom tias tsuas muaj ib zaj lus xwb: Yexus yog tus Khetos, peb tus Cawm Seej thiab tus Txhiv Dim. Dhau los ntawm ib tug yaj saub, Leej Txiv Saum Ntuj Ceeb Tsheej tau muab kev txawj ntse txog Nws txoj hau kev cawm seej txum tim rov qab los. Yexus Khetos yog lub ntsiab ntawm txoj hau kev no. Los ntawm Nws txoj kev theej txhoj, tus Cawm Seej qhib kev rau peb dim tau kev txhaum thiab kev tuag thiab rov qab mus cuag Leej Txiv Saum Ntuj Ceeb Tsheej.
Cia li pab tib neeg uas koj qhia kom to taub tej yam no:
Vajtswv yog peb Leej Txiv Saum Ntuj tiag. Nws hlub peb zoo tag nrho. Txhua tus neeg nyob hauv lub ntiaj teb yog Vajtswv tus me nyuam thiab ib tug hauv Nws tsev neeg.
Leej Txiv Saum Ntuj Ceeb Tsheej tau npaj ib txoj hau kev rau peb txais kev tsis txawj tuag thiab txoj sia nyob mus ib txhis, uas yog Nws ob txoj koob hmoov zoo tshaj plaws (saib Mauxes 1:39). Peb tau los rau hauv lub ntiaj teb no kom kawm, loj hlob tuaj, thiab npaj kom txais tau tag nrho Nws cov koob hmoov.
Nyob hauv Nws txoj hau kev, Leej Txiv Saum Ntuj Ceeb Tsheej tau muab cov lus txib rau peb kom coj peb lub neej thiab pab peb rov qab mus cuag Nws (saib, ua piv txwv, Khiav Dim 20:3–17).
Nyob hauv lub neej no, peb txhua tus ua txhaum, thiab peb txhua tus yuav tuag. Vim Leej Txiv Saum Ntuj Ceeb Tsheej hlub peb, Nws tau txib Nws Leej Tub, Yexus Khetos, los txhiv peb dim kev txhaum thiab kev tuag.
Vim Yexus tau theej peb lub txhoj, ces Nws ntxuav peb tej kev txhaum mus thaum peb hloov siab lees txim thiab ua kev cai raus dej thiab txais kev pom zoo. Qhov no ua rau peb nyob kaj siab lug thiab qhib kev rau peb rov qab mus cuag Vajtswv thiab txais kev xyiv fab tag nrho.
Vim Yexus tau Sawv Rov Los, peb txhua tus yuav sawv rov los tom qab peb tuag. Qhov no txhais tias txhua tus neeg tus ntsuj plig thiab lub cev yuav rov qab koom ua ke thiab nyob mus ib txhis.
Nyob hauv phau Npaivnpaum, tus Tswv tau qhia Nws txoj moo zoo thiab txhim tsa Nws lub Koom Txoos dhau los ntawm cov yaj saub. Neeg feem coob tau xyeej Nws txoj moo zoo tas li. Nyob hauv lub caij nyoog hauv Phau Qub tib neeg twb pib tso txoj moo zoo tseg thiaj li yuav tsum muab txum tim rov qab los.
Tom qab tus Cawm Seej tuag thiab Sawv Rov Los, Nws cov Thwj Tim tau coj lub Koom Txoos tau ib caij. Tiam sis, thaum kawg, twb poob txoj cai pov thawj hwj lawm, thiab tib neeg tau rov qab tso tus Cawm Seej tej lus qhia tseg lawm. Tib neeg tau hloov cov lus qhuab qhia thiab cov kab ke.
Leej Txiv Saum Ntuj Ceeb Tsheej tau muab Yexus Khetos txoj moo zoo txum tim rov qab los dhau los ntawm tus Yaj Saub Joseph Smith. Leej Txiv Saum Ntuj Ceeb Tsheej thiab Yexus Khetos tau tshwm sim rau Joseph pom nyob hauv lub caij nplooj ntoos hlav nyob rau xyoo 1820. Tom qab ntawd Joseph tau txais txoj cai pov thawj hwj thiab tus Tswv tau qhia kom nws rov qab txhim tsa Yexus Khetos lub Koom Txoos hauv lub ntiaj teb no.
Cia li qhia tias Yexus Khetos lub Koom Txoos tsis yog ib txoj kev teev ntuj zoo li lwm yam xwb. Tsis yog ib lub koom txoos Amelikas thiab. Tiam sis yog ib txoj kev muab Yexus Khetos “txoj moo zoo uas muaj txhij txhua” txum tim rov qab los (Lus Qhuab Qhia thiab Kev Khi Lus 1:23). Yeej yuav tsis raug tshem tawm ntawm lub ntiaj teb no dua ntxiv.
Phau Ntawv Maumoos: Ib zaj Tim Khawv Ntxiv txog Yexus Khetos yeej ua tim khawv txog Yexus Khetos thiab Nws ntiag tug hauj lwm ua tus Cawm Seej rau lub ntiaj teb. Phau no kuj ua tim khawv tias Yexus Khetos tau muab Nws txoj moo zoo thiab lub Koom Txoos txum tim rov qab los dhau los ntawm tus Yaj Saub Joseph Smith. Cia li caw thiab pab tib neeg nyeem Phau Ntawv Maumoos thiab thov Vajtswv txog tej lus qhia nyob haud.
Tso siab rau txoj lus cog tseg nyob hauv Maulaunais 10:3–5. Pab tib neeg thov Vajtswv vim lawv mob siab tiag xav paub seb Phau Ntawv Maumoos puas yog Vajtswv txoj lus. Kev mob siab thov Vajtswv tiag tiag txhais tias koj txaus siab ua raws li tej lus teb uas los ntawm tus Vaj Ntsuj Plig Dawb Huv cov lus tim khawv. Cov lus tim khawv ntawd yeej yog lub hauv paus ntawm ib tug neeg txoj kev ntseeg tias Yexus Khetos tau muab Nws lub Koom Txoos txum tim rov qab los. Cia li pab cov neeg uas koj qhia kom nrhiav kev pom zoo ntawd rau lawv sab ntsuj plig.
Kev Kawm Vaj Lug Kub
Koj yuav tsum siv Phau Ntawv Maumoos li cas thaum koj ua cov tub txib txoj hauj lwm?
Xav seb yuav zoo li cas yog koj yuav sau ib zaj lus txog Kev Muab Txoj Moo Zoo Txum Tim Rov Qab Los nyob hauv kev sib tham saum huab cua los sis rau ib lub koom haum tshaj tawm xov xwm. Nyob hauv koj phau ntawv ceev txog kev kawm, sau ib lub npe uas qhia lub ntsiab ntawm zaj ntawd. Ces tom qab ntawd sau ntawv txog koj tej kev xav txog zaj lus no. Sau ntawv txog qhov uas koj tau hloov koj lub neej thiab koj txoj kev xav txog lub ntiaj teb thaum koj tau to taub zaj lus no zoo dua.
Txhim Tsa lub Koom Txoos
Thaum Yexus Khetos muab Nws lub Koom Txoos txum tim rov qab los, Nws tau qhia kom tus Yaj Saub Joseph Smith thiab lwm tus kom muab “txhim tsa” (Lus Qhuab Qhia thiab Kev Khi Lus 31:7; 39:13). Tib neeg uas muaj ib zaj lus tim khawv txhim tsa lub Koom Txoos thaum lawv ua kev cai raus dej, ua raws li lawv tej kev khi lus, npaj mus rau lub tuam tsev, thiab txhawb nqa lawv pawg ntseeg los sis ceg ntseeg.
Daim Duab
tus txiv neej thov Vajtswv
Vim koj yog ib tug tub txib, koj tab tom pab txhim tsa thiab txhawb nqa tus Cawm Seej lub Koom Txoos. Muaj ntau yam uas koj ua taus kom ua li no. Koj muaj peev xwm txhawb nqa cov mej zeej thaum lawv qhia txoj moo zoo los ntawm tej ntsiab cai txog kev hlub, kev qhia, thiab kev caw (saib Phau Qhia Kev Coj lub Koom Txoos, 23.1). Koj pab taus tib neeg ua kev cai raus dej thiab pab lawv txoj kev ntseeg loj tuaj. Koj pab tau cov mej zeej tshiab ua lawv lub neej tshiab thiab pab lawv sab ntsuj plig loj tuaj. Koj kuj pab tau cov mej zeej uas rov qab los kom txhawb nqa lawv txoj kev ntseeg Yexus Khetos.
Cov mej zeej tshiab thiab cov mej zeej uas rov qab los mas lawv zaj lus tim khawv thiab txoj kev ntseeg yuav loj tuaj thaum lawv ua raws li txoj moo zoo hauv lawv lub neej. Xwv kom muaj li no, lawv yeej yuav tsum:
(Saib Gordon B. Hinckley, “Converts and Young Men,” Ensign, Tsib Hlis Ntuj 1997, 47.)
Cov tub txib, cov thawj coj hauv pawg ntseeg, thiab lwm tus mej zeej yuav tsum zoo siab lav ris lub cib fim kom txhawb nqa cov mej zeej tshiab thiab cov uas rov qab los. Txoj kev pab no yuav “ceev tau lawv taug txoj kev yog” (Maulaunais 6:4).
Mus Thoob Plaws Ua Hauj Lwm Zoo
Thaum Nws ua Nws txoj hauj lwm qhuab qhia hauv lub ntiaj teb no, tus Cawm Seej tau pab lwm tus. Nws tau “mus thoob plaws … ua hauj lwm zoo” thiab “qhia txoj moo zoo” (Tes Hauj Lwm 10:38; Mathais 4:23). Thaum koj coj raws li Nws tus yam ntxwv, koj yuav nrhiav neeg uas koj pab tau thiab cov uas yuav txais koj.
Thaum koj ua hauj lwm pab lwm tus, koj ua raws li ob txoj lus txib tseem ceeb tshaj plaws kom hlub Vajtswv thiab hlub koj cov kwv tij zej zog (saib Mathais 22:36–40; 25:40; Mauxiyas 2:17). Thaum koj pab lwm tus, koj thiab lawv yuav koom siab ua ke raws li ib txoj kev uas tshoov tib neeg lub siab.
Thaum koj ua ib tug tub txib, koj yuav npaj pab lwm tus txhua lub lim tiam (saib Kev Cai Ua Tub Txib, 2.7 thiab 7.2, kom tau xov xwm thiab tej lus coj qhia). Raws li koj qhov chaw tshaj tawm txoj moo zoo tus thawj tswj hwm coj, tej zaum koj yuav nrhiav cib fim ua hauj lwm pab hauv zej zog thaum siv JustServe (hauv tej qhov chaw uas pom zoo siv) thiab tej hauj lwm pab neeg txom nyem thiab pab neeg uas raug xwm txheej ceev.
Tas ib hnub, cia li thov Vajtswv thiab nrhiav seb puas muaj cib fim uas tsis tau npaj ua ntej kom ua zoo. Mloog tus Ntsuj Plig lus kom thiaj li pom thaum muaj cib fim ua tej yam zoo me me.
Daim Duab
Thawj Tswj Hwm Gordon B. Hinckley
“Koj puas xav zoo siab? Tsis txhob xav txog koj tus kheej thiab ua txoj hauj lwm tseem ceeb kawg siab kawg ntsws xwb. Siv zog pab tib neeg. … Ua tej yam siab dua, cev tes pab cov uas qaug zog, txhawb nqa cov neeg uas nyuaj siab. Ua raws li Yexus Khetos txoj moo zoo” (Gordon B. Hinckley, Teachings of Presidents of the Church: Gordon B. Hinckley [2016], 209).
Kev Kawm Vaj Lug Kub
Tus Cawm Seej tau pab neeg li cas hauv Nws lub neej?
Qhov uas koj ua ib tug tub txib zoo nyob ntawm seb koj txoj kev rau siab thiab xav nrhiav, qhia, muab neeg ua kev cai raus dej, thiab muab kev pom zoo rau cov neeg hloov siab los ntseeg thiab pab lawv ua Yexus Khetos cov thwj tim rau siab ntseeg thiab cov mej zeej hauv Nws lub Koom Txoos (saib Amas 41:3).
Qhov uas koj ua ib tug tub txib zoo tsis nyob ntawm seb koj qhia pes tsawg tus neeg los sis muab pes tsawg tus neeg ua kev cai raus dej. Tsis nyob ntawm koj txoj kev ua ib tug thawj coj.
Qhov uas koj ua zoo tsis nyob ntawm lwm tus ua li cas rau koj, xav li cas txog koj tej lus caw lawv, los sis lawv ua li cas thaum koj ua zoo rau lawv. Tib neeg yeej muaj kev ywj siab xaiv lawv puas xav lees yuav txoj moo zoo los sis tsis lees yuav. Koj txoj kev lav ris yog kev siv hwj chim qhia meej rau lawv kom lawv thiaj li yuav paub xaiv tej yam kom lawv tau koob hmoov.
Cia li xav txog tus Cawm Seej zaj lus piv txwv txog tej choj nyiaj nyob hauv Mathais 25:14–28. Tus xib hwb, uas piv txog tus Tswv, tau qhuas Nws ob tug tub qhe zoo txawm yog tej choj nyiaj uas nkawd muab rau nws tsis zoo ib yam (saib Mathais 25:21, 23). Nws kuj muab nqi zog rau nkawd zoo ib yam, caw nkawd cia li los nrog nws “nyob kaj siab lug” vim nkawd twb siv tej yam uas nws muab rau nkawd.
Vajtswv tau muab tej txuj ci thiab tej txiaj ntsim rau koj siv thaum koj ua hauj lwm rau Nws. Koj muaj tej txuj ci thiab tej txiaj ntsim uas tsis zoo ib yam li lwm tus. Cia li paub tias txhua yam no yeej tseem ceeb, tsis hais tej uas neeg tsis tshua pom. Thaum koj muab koj tej txuj ci thiab tej txiaj ntsim fij tseg rau Nws, Nws yuav ua kom tej ntawd loj tuaj thiab ua tej txuj ci tseem ceeb los ntawm tej yam uas koj foom pub rau Nws.
Tsis txhob muab koj tus kheej piv rau lwm tus tub txib thiab ntsuas seb lawv tau ua li cas. Kev muab koj tus kheej piv rau lwm tus ntshe tsis zoo rau koj, ua rau koj poob siab los sis muab hlob. Thiab kev sib piv li no yeej ua rau yus xav ua yuam kev. Tus Tswv xav kom koj ua zoo npaum li koj ua tau—xav kom koj “ua hauj lwm rau nws kawg [koj] lub siab lub ntsws thiab lub dag lub zog” (Lus Qhuab Qhia thiab Kev Khi Lus 4:2; ntxiv qhov uas ntawv qaij).
Tej zaum koj yuav tu siab yog tias tib neeg tsis lees yuav txoj moo zoo. Tej lub sij hawm koj yuav poob siab. Txawm yog cov tub txib thiab cov yaj saub hauv cov vaj lug kub los lawv twb poob siab lawm thiab (saib 2 Nifais 4:17–19; Amas 26:27). Thaum tej lub sij hawm zoo li no, cia li ua raws li Nifais tus yam ntxwv thiab thov Vajtswv, tso siab rau Nws, thov kom koj yuav muaj zog, thiab nco ntsoov txog tej yam zoo uas Nws tau ua rau koj lawm (saib 2 Nifais 4:16–35).
Daim Duab
ob tug tub txib thov Vajtswv
Thaum koj tig mus rau tus Tswv thaum raug xwm txheej nyuaj, Nws tau cog lus rau koj tias, “Kuv yuav pab [koj] thiab txhawb kom [koj] muaj zog” (Yaxayas 41:10). Thaum koj muab siab rau ntseeg Yexus Khetos, koj yuav nyob kaj siab lug thiab txais kev nplij siab txog koj tej hauj lwm. Kev ntseeg yuav pab koj mus tom ntej thiab xav ua ncaj ncees ntxiv.
Cia li tsom ntsoov rau koj txoj kev cog lus rau Yexus Khetos thiab koj lub hom phiaj ua tub txib—tsis txhob tsom ntsoov rau qhov uas tib neeg xaiv dab tsi. Ntau lub sij hawm yuav tsis pom tam sim ntawd. Tiam sis, koj tseem yuav tsum xav sim ua zoo tsis hais koj raug tej xwm txheej dab tsi los yog. Kev xav ua zoo li no yuav pab koj ua tau hauj lwm zoo dua, ua rau koj xav zoo, thiab pab koj txawj ua raws li tus Ntsuj Plig qhia.
Muaj tej yam uas koj ua tau kom ntsuas seb koj puas rau siab ua hauj lwm rau tus Tswv thiab ua ib tug tub txib zoo nyob nram qab no.
Rau siab nrhiav kev kom ua Yexus Khetos ib tug thwj tim, kawm txog Nws thiab ua zoo zuj zus tuaj (saib Yauhas 8:31; 2 Nifais 28:30).
Ua zoo thiab pab tib neeg txhua lub sij hawm, tsis hais thaum lawv lees yuav koj zaj lus los tsis tsis lees yuav los yog (saib Tes Hauj Lwm 10:38).
Thaum koj tau ua zoo npaum li koj ua tau, tej zaum koj tseem yuav poob siab txog tej yam, tiam sis koj yuav tsis poob siab txog koj tus kheej. Koj yuav paub tias tus Tswv zoo siab thaum koj hnov tus Ntsuj Plig ua hauj lwm dhau los ntawm koj.
Kev Kawm Vaj Lug Kub
Tus Tswv cov tub qhe xav li cas txog txoj hauj lwm no? Tus Tswv cov tub qhe ua li cas kom cov neeg uas lawv pab hloov siab? Koj xav li cas txog txoj hauj lwm no?
Cia li nyeem Hilamas 10:1–5 thiab 3 Nifais 7:17–18. Tus Tswv tau xav li cas txog cov tub txib no thiab lawv tej hauj lwm?
Cia li xav txog Anpinadais thiab Amoos tej hauj lwm ua tub txib (saib Mauxiyas 11–18; Amas 17–20; 23–24). Vim li cas tus Tswv tau lees yuav ob tug tub txib no txawm yog qhov kawg ntawm nkawd tej hauj lwm yeej tsis zoo ib yam los?
Sau ntawv txog tej yam uas koj tau kawm nyob hauv koj phau ntawv ceev txog kev kawm.
Xav txog tej xwm txheej hauv koj lub neej uas tau txhawb nqa koj zaj lus tim khawv txog Joseph Smith thiab Kev Muab Txum Tim Rov Qab Los. Sau ntawv txog koj tej kev tshoov siab.
Xaiv ib tug tub txib zoo no, thiab nyeem tej nqe vaj lug kub uas hais txog tus ntawd. Thaum koj nyeem, sib tham seb tus tub txib no (1) to taub thiab rau siab ua raws li nws txoj kev hu, (2) qhia tias nws xav li cas txog txoj hauj lwm no, thiab (3) tau pab lwm tus lees yuav txoj moo zoo.
Xaiv ob zaj nkauj txog kev muab txoj moo zoo Txum Tim Rov Qab Los. Nyeem los sis hu ob zaj nkauj no. Cia li sib tham txog lub ntsiab ntawm cov lus.
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Caw ob los sis peb tus neeg uas nyuam qhuav hloov siab los ntseeg kom qhia tias vim li cas lawv hloov siab los ntseeg lawm. Lawv xav li cas txog cov tub txib? Lawv xav li cas txog tej yam uas cov tub txib qhia? Muaj dab tsi uas pab lawv ua raws li lawv tau cog lus? Muaj dab tsi uas pab lawv hloov siab los ntseeg ntau tshaj?
Ob peb hnub ua ntej kev sib ntsib, hais kom ob peb tug tub txib xaiv tej lus nug los ntawm nqe lus “Xav txog Qhov No” nyob ntawm qhov pib ntawm tshooj no. Hais kom txhua tus tub txib no npaj ib zaj lus hais txog txoj lus nug no rau ob los sis peb feeb. Nyob hauv koog chaw pawg sab laj los sis thaj caw tej rooj sab laj, caw cov tub txib hais tej zaj lus uas lawv tau npaj lawm. Tom qab lawv hais tas lawm, sib tham txog tej yam uas nej tau kawm thiab yuav ua li cas kom siv thaum lawv ua hauj lwm.
Muab cov tub txib faib ua plaub pawg. Thov kom txhua pawg sau ntawv txog tej lus tseeb, tej kev khi lus, thiab cov kab ke uas lawv nco qab txog tej uas tus Yaj Saub Joseph Smith tau muab txum tim rov qab los thiab tshwm sim. Cia txhua pawg qhia lawv sau ntawv li cas. Caw cov tub txib qhia tias tej lus tseeb twg pab lawv lub neej vim tau muab tej ntawd tshwm sim thaum muab txoj moo zoo txum tim rov qab los.
Sib tham txog qhov uas kev ua ib tug tub txib zoo txhais li cas. Caw cov tub txib qhia ob peb yam ntxwv rau nej.
Thaum koj xam phaj cov tub txib los sis nrog lawv sib tham, thov kom lawv qhia tej yam no rau koj:
Lawv zaj lus tim khawv txog Yexus Khetos.
Lawv zaj lus tim khawv txog kev muab txoj moo zoo txum tim rov qab los thiab Joseph Smith ntiag tug hauj lwm.
Lawv zaj lus tim khawv txog Phau Ntawv Maumoos.
Lawv xav li cas txog lawv lub hom phiaj ua ib tug tub txib.
Caw cov tub txib sau ntawv hauv lawv phau ntawv ceev txog kev kawm txog tej lub hom phiaj ntawm lawv txoj kev ua tub txib. Thaum ua kev xam phaj los sis nrog lawv sib tham, thov kom lawv qhia tias lawv tau sau dab tsi.