Tshooj 4
Kev tshwm sim uas tus Yaj Saub Joseph Smith tau txais kom qhia nws txiv, Joseph Smith tus Laus, nyob hauv Harmony, Pennsylvania, lub Ob Hlis Ntuj xyoo 1829.
1–4, Kev ua siab loj ua hauj lwm cawm tau cov uas ua tus Tswv txoj hauj lwm; 5–6, Tej cwj pwm ncaj ncees ua rau lawv tsim nyog ua txoj hauj lwm qhuab qhia; 7, Yuav tsum nrhiav kom tau tej yam ntawm Vajtswv.
1 Nim no saib seb, ib txoj hauj lwm zoo kawg nkaus tab tom yuav tawm los rau noob neej.
2 Yog li ntawd, auj nej cov uas mus ua hauj lwm rau Vajtswv, xyuas kom nej ua hauj lwm rau nws kawg nej lub siab lub ntsws thiab lub dag lub zog, xwv kom nej yuav sawv tsis muaj txim rau Vajtswv pom thaum txog hnub kawg.
3 Yog li ntawd, yog nej muaj tej kev xav ua hauj lwm rau Vajtswv ces Vajtswv hu nej mus ua txoj hauj lwm no;
4 Vim saib seb thaj teb twb daj rhuv zoo sau qoob loo lawm; thiab xyuas seb, tus uas cev nws rab liag sib zog mus hlais, tus ntawd yuav tau coj los khaws cia rau hauv txhab xwv kom nws yuav tsis piam sij, tiam sis yuav coj tau kev cawm seej los rau nws tus ntsuj plig;
5 Thiab kev ntseeg, kev cia siab, kev siab hlub thiab kev hlub, nrog lub qhov muag uas ntsia ntsoov rau Vajtswv lub yeeb koob, ua rau nws tsim nyog ua txoj hauj lwm no.
6 Nco ntsoov txoj kev ntseeg, kev tsim txiaj, kev txawj ntse, kev xyuam xim, kev siab ntev, kev siab zoo li kwv tij ua rau kwv tij, kev coj ncaj li Vajtswv, kev siab hlub, kev txo hwj chim, kev rau siab.
7 Thov, ces nej yuav tau txais; khob, ces yuav qhib rau nej. Amees.