Thaum xub thawj kev to taub cov vaj lug kub yog ib qho nyuaj thiab. Tiam sis, thaum koj ua sib ntev kawm Vajtswv txoj lus, koj yuav to taub ntxiv. Koj yuav nyiam lub sij hawm uas koj kawm tau cov vaj lug kub. Koj yuav zoo siab xav txog tej yam uas koj yuav kawm.
Qhov uas koj paub thiab nyiam cov vaj lug kub yog ib txoj koob hmoov los ntawm koj txoj kev ua tub txib uas kav mus ib sim neej. Thaum koj tau cov koob hmoov los ntawm kev kawm vaj lug kub thaum koj ua tub txib, koj yuav xav kawm kom mus tas koj lub neej.
Daim Duab
Txwj Laug D. Todd Christofferson
“Lub hom phiaj ntawm tag nrho cov vaj lug kub yog kom ua rau peb muaj lub siab ntseeg Vajtswv tus uas yog Leej Txiv thiab Nws Leej Tub, Yexus Khetos—kev ntseeg tias Nkawd muaj txoj sia nyob tiag; kev ntseeg Leej Txiv txoj hau kev kom peb tsis txawj tuag thiab tau txoj sia nyob mus ib txhis; kev ntseeg Yexus Khetos txoj Kev Theej Txhoj thiab Kev Sawv Rov Los, uas txhawb nqa txoj hau kev zoo siab no; kev ntseeg kom ua raws li Yexus Khetos txoj moo zoo; thiab kev ntseeg kom peb los paub ‘Vajtswv thiab paub Yexus Khetos tus uas [Nws tau] txib los.’ (Yauhas 17:3)” (D. Todd Christofferson, “The Blessing of Scripture,” Liahona, Tsib Hlis Ntuj 2010, 34).
Kev Kawm Ntawv Koj tus Kheej
Saib daim duab txog Joseph Smith thaum pib tshooj no. Nyeem Joseph Smith—Keeb Kwm 1:11–13. Teb tej lus nug no nyob hauv koj phau ntawv ceev txog kev kawm.
Vim li cas Joseph Smith txoj kev nyeem thiab xav txog Yakaunpaus 1:5 ua rau nws txais kev tshwm sim?
Nws txoj kev kawm puas tau pab tej tiam neeg nyob rau yav tom ntej?
Nws txoj kev txiav txim siab tias nws yuav kawm cov vaj lug kub tau pab koj lub neej li cas?
Koj txoj kev kawm txoj moo zoo tau pab koj thiab lwm tus lub neej li cas?
Kev Kawm Vaj Lug Kub
Koj kawm dab tsi los ntawm tej nqe vaj lug kub no txog kev kawm txoj moo zoo.
Kev kawm txoj moo zoo tsis yog kev kawm kev txawj ntse xwb. Kuj yog tus txheej txheem ntawm sab ntsuj plig kom ua raws li tej lus tseeb mus ib txhis li raws li tus Vaj Ntsuj Plig Dawb Huv coj (saib Yakhauj 4:8; Lus Qhuab Qhia thiab Kev Khi Lus 50:19–25). Cia li nrhiav thiab tso siab rau tus Ntsuj Plig kom qhia koj thaum koj kawm cov vaj lug kub. Nws yuav ua li no thaum koj muab cov vaj lug kub piv rau koj tus kheej thiab muaj ib lub siab uas xav ua raws li tej yam uas koj kawm (saib 1 Nifais 19:23; Maulaunais 10:4; Joseph Smith—Keeb Kwm 1:18).
Kev thov Vajtswv thaum koj kawm vaj lug kub yuav qhib kev rau koj txais tau kev tshwm sim thiab tus Ntsuj Plig yuav hais lus rau koj lub siab. Nws yuav foom koob hmoov rau koj kom coj koj kev, tshoov koj lub siab, thiab teb koj tej lus nug. Vim koj kawm vaj lug kub, tus Vaj Ntsuj Plig Dawb Huv yuav txhawb nqa thiab nplij koj lub siab. Nws yuav muab kev txawj ntse thiab lub siab loj rau koj kom foom koob hmoov rau koj thiab pab koj foom koob hmoov rau lwm tus mus ib txhis li.
Kev Kawm Vaj Lug Kub
Tus Vaj Ntsuj Plig Dawb Huv ua txoj hauj lwm twg kom pab ib tug neeg kawm txoj moo zoo?
“Ib yam uas kuv tau kawm hauv lub neej no yog qhov uas muaj ntau lub sij hawm uas tus Tswv teb peb tej lus nug thiab qhia peb kom paub ua li cas dhau los ntawm cov vaj lug kub. … Yog li ntawd thov kom peb yuav thov tus Tswv, thov kom pab los sis teb peb: ces peb yuav txais tej lus nug ntawd thaum peb qhib ib phau vaj lug kub thiab pib kawm. Tej lub sij hawm zoo li twb tau sau ib nqe vaj lug kub ib puas los sis ob peb txhiab xyoos tas los kom teb peb tej lus nug xwb” (M. Russell Ballard, “Be Strong in the Lord, and in the Power of His Might” [Brigham Young University kev sib ntsib hawm Vajtswv, Peb Hlis Ntuj 3, 2002], 5, speeches.byu.edu).
Ua Neej Raws Li tej Yam uas Koj Kawm
Thaum koj muaj kev xyiv fab uas los ntawm kev to taub txoj moo zoo, koj yuav xav ua raws li koj kawm. Siv zog kom ua neej raws li tej yam uas koj kawm. Yog koj ua li ntawd ces koj txoj kev ntseeg, txoj kev txawj ntse, thiab zaj lus tim khawv yuav muaj zog ntxiv. Qhov uas koj ua raws li tej yam uas koj kawm yuav ua rau koj to taub ntxiv. (Saib Yauhas 7:17.)
Daim Duab
Thawj Tswj Hwm Boyd K. Packer
“Cov lus qhuab qhia tseeb, thaum neeg to taub, ua rau lawv tej cwj pwm thiab xeeb ceem hloov. Kev kawm cov lus qhuab qhia ntawm txoj moo zoo yuav ua rau tib neeg coj cwj pwm zoo dua li kev kawm txog kev coj cwj pwm yuav ua rau lawv hloov” (Boyd K. Packer, “Little Children,” Ensign, Kaum Ib Hlis Ntuj 1986, 17).
Kev Kawm Ntawv Koj tus Kheej
Cov vaj lug kub no qhia dab tsi txog kev kawm txoj moo zoo?
Txoj Moo Zoo cov Ntawv yog ib yam nyob online uas pab tau koj kawm thiab qhia zoo. Cia li kawm seb yuav siv li cas. Tej yam uas pab tau koj thaum koj siv Txoj Moo Zoo cov Ntawv thaum koj kawm thiab qhia los twb sau nram qab no.
Koj muaj cov vaj lug kub, cov yaj saub tej lus, thiab lwm yam ntaub ntawv los ntawm lub Koom Txoos uas siv ntawv, kev kaw suab, thiab vidi-aus ua ntau yam lus.
Yog koj sau ntawv hauv Txoj Moo Zoo cov Ntawv txog tej yam uas koj kawm thiab tej kev tshoov siab uas koj txais, ces tseem muaj tej ntawd kom pab thiab txhawb nqa koj tom qab koj ua tub txib tas lawm.
Tej no yuav ua yooj yim rau koj siv cov vaj lug kub, cov yaj saub tej lus, thiab tej vidi-aus kom pab cov neeg uas koj qhia.
Tib neeg coob uas koj qhia thiab muab ua kev cai raus dej yuav siv Txoj Moo Zoo cov Ntawv kom siv tej yam los ntawm lub Koom Txoos. Cia li kawm seb yuav siv Txoj Moo Zoo cov Ntawv li cas koj thiaj pab tau lawv kawm siv thiab.
Kev Kawm Ntawv Koj tus Kheej
Cia li nyeem “Zaj Lus Piav rau tus uas Siv Txoj Moo Zoo cov Ntawv.” Xaiv ib yam uas siv tau hauv Txoj Moo Zoo cov Ntawv kom sim seb zoo li cas thaum koj kawm koj tus kheej thiab kawm nrog koj tus khub. Qhov ntawd tau pab koj li cas thaum koj kawm? Lwm zaus koj yuav sim ua dab tsi? Qhia lwm tus tub txib txog tej yam uas koj kawm.
Siv Txuj Ci Technology Raws Li Kev Ncaj Ncees
Tus Tswv thiab Nws cov yaj saub tau tso siab rau koj siv tej txuj ci technology kom pab ua Nws txoj hauj lwm. Technology yeej pab tau koj kawm cov vaj lug kub thiab Qhia Kuv txoj Moo Zoo. Tej yam pab hom digital kuj pab tau koj npaj qhia. Tej ntawd yuav pab koj thaum koj tab tom qhia neeg thiab thaum koj siv zog nrhiav neeg rau koj qhia.
Kev siv technology raws li laj lim tswv yim thiab raws li kev ncaj ncees yuav pab koj ua raws li koj lub hom phiaj ua tub txib thiab siv sij hawm zoo. Kuj yuav pab koj tsis txhob saib tej yam uas tsis tsim txiaj.
Ua raws li tus Ntsuj Plig qhia txog qhov uas koj yuav siv technology thaum twg thiab siv li cas kom pab txhawb nqa koj txoj kev ntseeg Yexus Khetos thiab txoj kev ntseeg ntawm cov neeg uas koj pab thiab qhia.
Ua Raws Li tej Kev Cai Pov Hwm Thaum Siv Technology
Plaub yam kev cai pov hwm uas qhia no yuav pab koj siv technology raws li kev tsim nyog. Qhov uas koj ua raws li tej kev cai pov hwm no yeej yog ib qho tseem ceeb kom pab koj “muab tej cuab yeej uas Vajtswv pub rau [koj] lawm los hnav [ces] thaum Dab Ntxwg Nyoog tuaj ntxias [koj], [koj] thiaj yuav kov yeej.” (Efexus 6:11).
Mloog tej Kev Tshoov Siab ntawm Sab Ntsuj Plig
Nifais tau cog lus tias, “Yog [koj] yuav nkag mus rau hauv txoj kev, thiab txais yuav tus Vaj Ntsuj Plig Dawb Huv, nws yuav qhia rau [koj] txhua yam uas [koj] yuav tsum ua” (2 Nifais 32:5). Koj Leej Txiv Saum Ntuj Ceeb Tsheej tau muab ob lub txiaj ntsim rau koj kom pab koj: kwv ywj siab xaiv kev ncaj ncees thiab lub txiaj ntsim Vaj Ntsuj Plig Dawb Huv. Koj muaj hwj chim xaiv kom ua raws li tus Vaj Ntsuj Plig Dawb Huv qhia koj ua. Nws txoj kev coj koj mus yeej tseem ceeb rau koj kom pab koj ua zoo thaum siv technology. Nws kuj yuav pov hwm koj kom tsis txhob raug kev phem.
Tsom Ntsoov rau txoj Kev Ua Raws Li Koj lub Hom Phiaj Ua Tub Txib
Tus Tswv hais tias, “Yog hais tias [koj] lub qhov muag tsuas ntsia ntsoov rau kuv lub yeeb koob xwb, tag nrho [koj] lub cev yuav kaj nrig, thiab yuav tsis muaj qhov tsaus ntuj nyob hauv [koj]; thiab lub cev uas kaj nrig ntawd to taub txhua yam” (Lus Qhuab Qhia thiab Kev Khi Lus 88:67). Qhov uas koj qhov muag tsuas ntsia ntsoov rau Vajtswv lub yeeb koob txhais hais tias koj tsom ntsoov rau Vajtswv lub hom phiaj xwb, uas kuj yog koj lub hom phiaj ua ib tug tub txib.
Koj txoj kev siv technology los yuav tsum tsom ntsoov rau koj lub hom phiaj thiab. Qhib koj qhov device tsuas yog tom qab koj to taub koj lub hom phiaj ua tub txib uas koj yuav siv. Ces cia li muab tua tom qab koj ua lub hom phiaj ntawd tiav lawm.
Haj yam yuav pom tau tej yam tsis tsim txiaj thaum koj lam saib tej yam hauv internet thiab tsis muaj ib lub hom phiaj hlo li.
Daim Duab
cov tub txib saib lub xov tooj
Tswj Hwm tus Kheej
Maumoos sau hais tias: “Saib seb, kuv yog ib tug thwj tim ntawm Yexus Khetos, uas yog Vajtswv Leej Tub. Nws tau hu kuv mus tshaj tawm nws txoj lus rau nws cov neeg, xwv kom lawv yuav muaj txoj sia uas kav ib txhis” (3 Nifais 5:13). Ib yam li Maumoos, koj yog Yexus Khetos ib tug thwj tim. Qhov uas koj yog ib tug tub txib yog ib lub cib fim tshwj xeeb kom koj ua ib tug thwj tim zoo dua.
Ob lo lus disciple uas txhais tias thwj tim thiab discipline uas txhais tias tswj hwm los lub hauv paus yog tib lo lus uas txhais tias “tus tub kawm ntawv.” Kev ua Yexus Khetos ib tug thwj tim txhais tias koj xav coj raws li Nws thiab ua raws li Nws cov lus txib. Ua rau koj xav kawm thiab qhia txog Yexus Khetos txhua lub sij hawm.
Cia li tswj hwm koj tus kheej thiab xaiv ua ncaj ncees thaum koj siv txuj ci technology. Cia li xaiv kom coj raws li tej kev cai pov hwm. Thaum koj nrog tib neeg sib tham tim ntsej tim muag, tsis txhob saib koj lub xov tooj los sis teb xov tooj. Tswj hwm koj txoj kev siv cov tshuab no. Tsis txhob cia tej ntawd tswj hwm koj.
Tus Tswv hais tias, “Tus uas txais thiab ua raws li kuv txoj kev cai, tus ntawd yog kuv tus thwj tim; thiab tus uas hais tias nws txais tiam sis tsis ua raws li kuv txoj kev cai, tus ntawd tsis yog kuv tus thwj tim” (Lus Qhuab Qhia thiab Kev Khi Lus 41:5). Tsis muaj leej twg uas zoo tag nrho, tiam sis tus tswv xav tias cov uas coj raws li Nws yuav siv zog tsis tu tsis tseg.
Qhov zoo txog txoj moo zoo yog qhov uas peb yuav txais kev zam txim thaum peb hloov siab lees txim—thiab tus Tswv xav kom peb hloov siab lees txim tsis txhob sej (saib Lus Qhuab Qhia thiab Kev Khi Lus 109:21). Yog koj ua yuam kev, tsis hais kev siv txuj ci technology ua tej yam tsis tsim txiaj, cia li hloov siab lees txim tam sim ntawd thiab sim ua raws li Nws txoj kev cai. Nov yog ib feem ntawm kev ua Yexus Khetos ib tug thwj tim.
Koom Siab
Tus Tswv hais tias, “Cia li ua ib lub siab; thiab yog nej tsis ua ib lub siab ces nej tsis yog kuv li” (Lus Qhuab Qhia thiab Kev Khi Lus 38:27). Pab koj qhov chaw tshaj tawm txoj moo zoo muaj kab lig kev cai txog kev koom siab, kev tso siab, kev lav ris, thiab kev khuv leej kom sawv daws ib leeg yuav txhawb nqa ib leeg.
Txhua tus tub txib yuav tsum tsis txhob xav li cas thaum lawv xav tau kev pab. Ib tug tub txib uas muaj zog thaum mloog tus Ntsuj Plig lus yeej pab tau ib tug uas qaug zog (saib Lus Qhuab Qhia thiab Kev Khi Lus 84:106). Yog koj raug kev ntxias, thov koj tus khub los yog qhov chaw tshaj tawm txoj moo zoo tus thawj coj pab koj.
Yuav luag txhua yam teeb meem thaum siv internet los yog saib duab liab qab yog thaum yus nyob yus ib leeg. Siv tej tshuab tsuas yog thaum koj thiab koj tus khub neb ib leeg pom tau ib leeg. Ua siab loj thiab ua siab ncaj ib leeg rau ib leeg.
Tus Tswv yeej tso siab rau txhua tus tub txib uas Nws tau hu, tsis hais koj los yog. Nws tau muab cov khub thiab cov thawj coj kom pab pov hwm koj thiab txhawb nqa koj. Ib yam li Amas txhawb nqa nws tus khub Amulej, nrhiav kev kom ib leeg txhawb nqa ib leeg (saib Amas 15:18).
Koj Yuav Tsum Ua Li Cas Yog Koj Xav tias Koj Tsis Khov Los Sis Yuav Yooj Yim Ua Txhaum?
Yuav tsum siv zog, tswj hwm koj tus kheej, thiab xyaum kom kawm coj raws li plaub txoj kev cai pov hwm no. Txawm yog yooj yim rau koj xav txog thiab ua raws tej kev cai pov hwm no, yuav muaj tej lub sij hawm thaum koj tsis khov los sis yooj yim rau koj ua txhaum. Tej zaum koj tsis tau muaj tej cwj pwm zoo thaum koj siv txuj ci technology ua ntej koj ua tub txib es ua nyuaj rau koj kov yeej qhov no. Cov tub txib ib txhia twb saib duab liab qab ua ntej tau hu lawv ua tub txib thiab tej zaum lawv yuav raug kev ntxias kom rov qab ua zoo li qub.
Cov ntsiab cai nram qab no yuav pab koj ua raws li tej kev cai pov hwm thiab txhawb koj lub zog kom tsis txhob raug ntxias.
Ua tib zoo paub tias koj xav li cas thiab ua li cas. Cia li to taub tias tej no yuav ua li cas kom koj tsis khov thiaj li siv technology raws li qhov tsis zoo.
Xaiv ua tej yam zoo. Ua tej yam ncaj ncees uas pab tau koj tsis txhob xav li koj xav.
Kawm, hloov siab lees txim, thiab ua neeg zoo dua. Siv tej yam los ntawm koj lub neej tas los kom kawm thiab ua zoo dua ntxiv.
Koj tsis tas kov yeej koj tej teeb meem nyob koj tus kheej xwb. Cia li tso siab rau lub zog uas los ntawm tus Cawm Seej txoj Kev Theej Txhoj thiab tej kev khi lus uas koj tau khi nrog Nws. Tus Tswv paub txog koj tej teeb meem, thiab Nws yuav pab koj ua txoj hauj lwm zoo kawg no.
Koj yuav txawj siv technology raws li kev ncaj ncees thaum koj nco ntsoov tus Caw Seej. Ua raws nraim li Nws txoj kev tso siab rau koj. Txiav txim siab tias koj yuav “taug kev ncaj ncees rau nws” (Amas 53:21; kuj saib nqe 20). Qhov uas koj ris Nws txiaj rau tag nrho tej yam uas Nws thiab Leej Txiv tau ua rau koj yuav pab koj xaiv ua tej yam zoo thaum koj siv tej yam digital.
Koj txoj kev ua tub txib yog ib lub sij hawm zoo rau koj kawm kev siv technology raws li laj lim tswv yim. Tej cwj pwm zoo thiab tej yam uas koj rau siab ua thaum koj ua tub txib yuav pab koj mus tas koj lub neej.
Muab Vajtswv tej Cuab Yeej Ua Rog Los Coj
Koj txoj kev txawj tiv tau kev ntxias yuav loj tuaj thaum koj kawm thiab ua raws li cov vaj lug kub, cov yaj saub tej lus, Qhia Kuv txoj Moo Zoo, Tej Kev Cai Ua Tub Txib rau Yexus Khetos cov Thwj Tim, thiab tej kev cai pov hwm uas qhia hauv tshooj no.
Daim Duab
cov tub txib ntsib ib tug txiv neej
Thaum koj “muab tej cuab yeej uas Vajtswv pub rau [koj] lawm los hnav,” koj yuav txawj paub qhov tseeb thiab qhov txhaum. Koj yuav “mus qhia txoj moo zoo uas hais txog txoj kev kaj siab” los ua khau rau. “Muab kev ncaj ncees los ua daim hlau thaiv hauv siab” yuav pov hwm koj. Yog muaj “txoj kev ntseeg thaiv” koj, ces koj yuav “tua tau Dab Ntxwg Nyoog xib xub hluav taws uas nws tua tuaj.” Koj yuav muab “Vajtswv tus Ntsuj Plig pub rau [koj] coj los ua rab ntaj” kom qhia qhov tseeb nrog lub hwj chim thiab txoj cai. Koj yuav txais kev txhawb nqa kom tawm tsam tej lub hwj huam hauv lub ntiaj teb uas xav kom koj tsis muaj hom phiaj, nyob ib leeg, thiab nyob tsis muaj nqis. (Saib Efexus 6:10–18; kuj saib 1 Nifais 8:20, 30; 15:24–25; Hilamas 3:29–30; Lus Qhuab Qhia thiab Kev Khi Lus 27:15–18; Joseph Smith—Mathais 1:37; 2 Timautes 3:15–17.)
Kev Kawm Ntawv Koj tus Kheej
Thov Vajtswv kom pab koj tsom ntsoov rau ib txoj kev cai pov hwm lub lim tiam no. Nrhiav tus Tswv txoj kev pab. Sau ntawv txog koj tej kev xav thiab tej yam uas koj kawm.
Tej lub Tswv Yim rau Kev Kawm Ntawv thiab Kev Siv
Kev Kawm Ntawv Koj tus Kheej
Sim ua tej yam no kom pab koj kawm tau zoo:
Cia li xav txog tej lus nug thiab tej yam uas koj txhawj txog thaum koj nyeem cov vaj lug kub.
Qhia txog tej yam uas koj tau kawm rau lwm tus tub txib thiab cov neeg uas koj qhia. Kev piav txog cov lus qhuab qhia los sis ib lub ntsiab cai yuav pab koj nco txog thiab paub meej txog qhov ntawd.
Nug koj tus kheej tias, “Tus uas sau qhov no hais dab tsi? Lub ntsiab yog dab tsi? Qhov no nruab li cas rau kuv? Qhov no yuav ua li cas pab ib tug neeg uas kuv qhia?”
Xav txog los sis kos duab txog tej yam uas koj kawm. Piv txwv hais tias, cia li xav seb yuav zoo li cas thaum Amoos tau qhia tus vaj ntxwv ntawm cov Neeg Lamas.
Sau ib kab lus los sis ib nqe lus txog lub ntsiab ntawm ib zaj lus.
Cim tej nqe vaj lug kub uas piav txog thiab txhawb nqa tej ntsiab cai uas koj qhia.
Ntsuam xyuas koj tus kheej txog tej yam no (1=tsis ua hlo li, 3=tej lub sij hawm ua, thiab 5=ua yuav luag txhua zaus).
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Thov kom cov tub txib sau ib los sis ob lo lus nug txog txoj moo zoo los ntawm ib zaj lus hauv tshooj 3. Tej lus nug no yuav los ntawm lawv tus kheej los sis los ntawm tib neeg uas lawv qhia. Caw cov tub txib qhia lawv tej lus nug. Rau txhua lo lus nug, sib tham txog tej yam no:
Kev teb lo lus nug no yuav ua li cas kom foom koob hmoov rau tus tub txib ntawd?
Yuav ua li cas foom koob hmoov rau tib neeg uas nws qhia lub neej?
Tus tub txib yuav ua li cas kom nrhiav lus teb?
Muab cov tub txib faib ua ob peb pawg, thiab txib kom txhua pawg kawm ib txoj kev cai pov hwm thiab tej nqe vaj lug kub uas qhia txog txoj kev cai ntawd. Caw cov tub txib qhia tias lawv tau kawm dab tsi thiab tej kev cai pov hwm tau pab lawv li cas.
Tej tshooj twg hauv Qhia Kuv txoj Moo Zoo tau pab koj ntau nyob rau ob lub lim tiam tas los no? Twb tau pab koj li cas?
Koj ua dab tsi thaum koj kawm ntawm koj tus kheej uas pab koj kawm?
Thaum xam phaj lawv, xav seb koj puas yuav nrog lawv sib tham txog tej kev cai pov hwm kev siv technology thiab nug lawv cov tub txib seb lawv kawm dab tsi thaum lawv ua raws li tej kev cai ntawd.
Qhia txog tej lub tswv yim los ntawm koj txoj kev kawm ntawm koj tus kheej. Qhia txog tej yam uas koj sau hauv koj phau ntawv ceev txog kev kawm thiab koj zaj lus tim khawv txog kev kawm txoj moo zoo tseem ceeb npaum li cas.