Yauhas Muab Yexus Ua Kev Cai Raus Dej, los ntawm Greg K. Olsen
Tshooj 12
Pab Tib Neeg Npaj Ua Kev Cai Raus Dej thiab Txais Kev Pom Zoo
Xav Txog Qhov No
Kuv yuav ua li cas kom pab tib neeg npaj ua kev cai raus dej thiab ua kev pom zoo?
Kuv yuav tsum ua kev xam phaj rau kev cai raus dej li cas?
Yuav ua li cas kom npaj ib txoj kev sib ntsib ua kev cai raus dej thiab coj kev sib ntsib ntawd kom tshoov neeg lub siab?
Vim li cas txoj kev sau thiab xa Daim Ntawv rau Kev Cai Raus Dej thiab Kev Pom Zoo li cas?
Kuv yuav ua li cas kom txhawb nqa cov mej zeej tshiab?
Kev cai raus dej yog ib txoj kab ke ntawm kev cia siab uas ua rau ib tug neeg muaj Vajtswv lub hwj chim hauv nws lub neej. Lub hwj chim ntawd los ntawm kev txais lub txiaj ntsim Vaj Ntsuj Plig Dawb Huv. Yuav muaj lub hwj chim ntxiv mus thaum ib tug neeg nyiaj mus kom txog thaum kawg ua raws li nws txoj kev khi lus thaum ua kev cai raus dej.
Lub hom phiaj ntawm koj tej lus qhia yog kom pab lwm tus ntseeg Yexus Khetos zuj zus, hloov siab lees txim rau lawv tej kev txhaum, thiab ua kev cai raus dej nrog kev mob siab xav coj raws li Yexus Khetos. Raws li Maumoos qhia, “thawj thawj cov txiv ntoo ntawm kev hloov siab lees txim yog kev cai raus dej” (Maulaunais 8:25). Thaum cov neeg uas koj qhia ua raws li tej yam uas koj caw lawv cog lus, lawv yuav npaj siab ua raws li tej kev khi lus uas lawv nrog Vajtswv khi thiab txais tau cov koob hmoov.
Kev cai raus dej thiab kev pom zoo yeej tsis yog qhov kawg. Tiam sis, cov kab ke yog lub qhov rooj uas Vajtswv cov me nyuam nkag hauv kom taug txoj kev ua raws li lawv tej kev khi lus. Txoj kev taug no yuav coj neeg mus rau cov kab ke, tej kev khi lus, thiab cov koob hmoov ntawm lub tuam tsev—thiab thaum kawg yog txoj sia nyob mus ib txhis li (saib 3 Nifais 11:20–40).
Tej Yam uas Yuav Tsum Ua Tau Kev Cai Raus Dej thiab Kev Pom Zoo
Vajtswv caw tag nrho Nws cov me nyuam los cuag Nws dhau los ntawm kev cai raus dej thiab kev pom zoo (saib 2 Nifais 26:33; 3 Nifais 27:20). Tej yam yuav tsum ua kom ua tau kev cai raus dej
Hloov siab lees txim tiag tiag rau tag nrho yus tej kev txhaum
Txaus siab ris Yexus Khetos lub npe.
Txiav txim siab yuav ua hauj lwm Yexus Khetos kom txog thaum kawg.
Qhia los ntawm tej uas yus ua hais tias yus twb tau txais los ntawm Khetos tus Ntsuj Plig los ua rau yus txais kev zam txim rau yus tej kev txhaum.
Los ntawm Thawj Pawg Thawj Tswj Hwm thiab Pawg Kaum Ob tug Thwj Tim:
Teb zoo rau tej lus nug ntawm kev xam phaj rau kev cai raus dej.
Txais tag nrho cov tub txib tej zaj lus qhia.
Ntsib pawg txwj laug tus thawj tswj hwm, Koom Haum Niam Tsev tus thawj tswj hwm, thiab tus npisov.
Koom ob peb txoj kev sib ntsib txais lub cim nco txog.
Tej yam uas yuav tsum ua no yog tej lub cim txog tus txheej txheem ntawm ib tug neeg txoj kev hloov siab los ntseeg. Thaum tib neeg ua raws li tej yam no, ces lawv npaj siab txais cov kab ke dawb ceev uas yog kev cai raus dej thiab kev pom zoo.
Thaum ib tug neeg tau teem sij hawm khov kho ua kev cai raus dej:
Cia li tsim ib daim teem sij hawm rau tej yam uas yuav tsum ua kom npaj ua kev cai raus dej thiab ua kev pom zoo. Nrog tus neeg saib kev teem sij hawm no.
Yog tias ua tau, caw tus neeg mus saib kev sib ntsib ua kev cai raus dej ua ntej nws yuav ua kev cai raus dej.
Kev Kawm Vaj Lug Kub
Kawm tej nqe vaj lug kub no. Koj yuav ua li cas kom pab cov uas koj qhia npaj ua kev cai raus dej thiab ua kev pom zoo? Sau ntawv txog tej yam uas koj kawm.
Kev xam phaj rau kev cai raus dej yog ib qho tseem ceeb kom paub tseeb tias ib tug neeg tau ua tej yam uas tus Tswv kom nws ua kom tsim nyog ua kev cai raus dej. Teem kev xam phaj rau kev cai raus dej tsuas yog thaum ib tug neeg npaj siab.
Pab tib neeg npaj rau kev xam phaj no lawv thiaj li yuav tsis txhawj xeeb. Piav tias yuav zoo li cas. Qhia lawv tias lawv yuav ntsib lwm tus tub txib uas zoo li koj.
Piav tias vim li cas muaj kev xam phaj no. Yeej yog ib lub cib fim rau lawv ua tim khawv tias lawv twb “hloov siab lees txim tiag tiag rau tag nrho lawv tej kev txhaum [thiab] qhia los ntawm tej uas lawv ua hais tias lawv twb tau txais los ntawm Khetos tus Ntsuj Plig los ua rau lawv txais kev zam txim rau lawv tej kev txhaum” (Lus Qhuab Qhia thiab Kev Khi Lus 20:37).
Muab tej lus nug uas tus uas xam phaj yuav nug rau lawv (saib nram qab no). Qhov no yuav pab tus neeg npaj teb.
Ua tib zoo seb tus neeg puas to taub tej yam uas koj tau qhia thiab txoj kev khi lus uas nws yuav khi thaum ua kev cai raus dej. Txoj kev khi lus yog kev cog lus tias nws:
Cia li ua tim khawv txog cov koob hmoov zoo kawg uas los ntawm txoj kev ua kev cai raus dej thiab kev pom zoo thiab ua raws li txoj kev khi lus thaum ua kev cai raus dej. Kev txais kev zam txim rau tej kev txhaum thiab lub txiaj ntsim Vaj Ntsuj Plig Dawb Huv yog ob txoj koob hmoov uas lawv yuav txais.
Kev Xam Phaj rau Kev Cai Raus Dej
Tus neeg uas xav ua kev cai raus dej los ib tug thawj coj pov thawj hwj uas muaj cai yuav xam phaj tus ntawd. Nyob hauv qhov chaw tshaj tawm txoj moo zoo, tus neeg uas ua xam phaj yog tus thawj coj rau koog chaw los yog thaj chaw. Nws xam phaj:
Cov neeg uas muaj 9 xyoos rov saud uas yeej tsis tau ua kev cai raus dej thiab ua kev pom zoo ua ntej.
Cov me nyuam uas muaj 8 xyoos rov saud uas lawv niam lawv txiv tsis yog mej zeej ntawm lub Koom Txoos
Cov me nyuam uas muaj 8 xyoos rov saud uas muaj niam muaj txiv uas kuj ua kev cai raus dej thiab kev pom zoo.
Muaj tej lus qhia rau tus uas xam phaj nyob nram qab no.
Ua kev xam phaj hauv ib qhov chaw uas xis nyob thiab ntsiag to kom hnov tau tus Ntsuj Plig.
Thaum xam phaj ib tug me nyuam, tub hluas ntxhais hluas, los sis ib tug poj niam, tus tub txib uas xam phaj tus khub yuav tsum nyob ze hauv ib chav los yog chaw nkag hauv tsev uas txuas nkaus. Yog tus neeg xav tau, ces caw tau ib tug neeg laus nrog nws koom ua ke hauv kev xam phaj. Cov tub txib yuav tsum dim tej xwm txheej uas ntshe tib neeg yuav xav ua yuam kev.
Thov Vajtswv kom qhib kev xam phaj.
Pab kom nplij tus neeg lub siab.
Ua kom kev xam phaj txhawb pab nws sab ntsuj plig.
Ua tib zoo kom tus neeg to taub vim li cas yuav tsum ua kev xam phaj.
Nug tej lus nug ntawm kev xam phaj rau kev cai raus dej nram qab no. Hloov tej lus nug nyob ntawm seb tus neeg laus li cas, paub tab npaum li cas, thiab muaj xwm txheej dab tsi.
Teb tus neeg tej lus nug.
Rov qab nyeem cov xov xwm nyob hauv daim Ntawv rau Kev Cai Raus Dej thiab Kev Pom Zoo seb puas raug. Yog tias tus neeg yog ib tug me nyuam, nws niam nws txiv los sis tus saib xyuas yuav tsum sau npe ua ntej yuav muab nws ua kev cai raus dej (saib “Kev Cai Raus Dej thiab Kev Pom Zoo: Tej Lus Nug thiab tej Lus Teb” nyob hauv tshooj no).
Caw tus neeg ua tim khawv los yog qhia tias nws xav li cas.
Qhia tus neeg tias koj zoo siab vim koj tau ntsib nws.
Tej Lus Nug ntawm Kev Xam Phaj rau Kev Cai Raus Dej
Tej lus nug ntawm kev xam phaj rau kev cai raus dej los muaj zoo li no:
Koj puas ntseeg tias Vajtswv yog peb Leej Txiv tus uas Muaj txoj Sia Nyob Mus Ib Txhis? Koj puas ntseeg tias Yexus Khetos yog Vajtswv Leej Tub, thiab tus Cawm Seej thiab tus Txhiv Dim rau lub ntiaj teb?
Koj puas ntseeg tias tus Tswv tau muab lub Koom Txoos thiab Yexus Khetos txoj moo zoo txum tim rov qab los dhau los ntawm tus Yaj Saub Joseph Smith? Koj puas ntseeg tias [lub Koom Txoos tus Thawj Tswj Hwm tam sim no] yog Vajtswv ib tug yaj saub? Koj xav tias qhov no txhais li cas?
Lub ntsiab ntawm kev hloov siab lees txim yog dab tsi? Koj puas xav tias koj twb hloov siab lees txim rau koj tej kev txhaum dhau los?
Cov tub txib tau qhia koj tias yuav tsum ua raws li tej kev cai ntawm txoj moo zoo thaum ua mej zeej hauv Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg. Koj to taub dab tsi txog tej kev cai no? Koj puas kam ua raws li tej kev cai no?
Kev cai coj dawb huv, uas txwv tsis pub kev pw ua ke yog ib tug poj niam thiab ib tug txiv neej tsis tau sib yuav raws li txoj kev cai
Kev cai them ib feem kaum
Txoj Lus Txawj Ntse
Kev hwm Hnub Caiv kom dab huv, tsis hais kev txais lub cim nco txog txhua lub lim tiam thiab kev pab lwm tus
Koj puas tau ua txhaum kev cai loj heev? Yog koj tau ua, tam sim no puas yog ceev xwm saib xyuas koj los sis twb tawm tsev kaw?
Koj puas tau koom ua ke rho me nyuam tawm? (Saib Phau Qhia Kev Coj lub Koom Txoos, 38.6.1.)
Thaum koj ua kev cai raus dej, koj nrog Vajtswv khi lus tias koj txaus siab ris Yexus Khetos lub npe, pab lwm tus, ua tim khawv txog Vajtswv txhua lub sij hawm, thiab coj raws li Nws cov lus txib mus tas koj lub neej. Koj puas npaj siab khi lus li no thiab siv zog rau siab ntseeg ua raws li koj tau khi lus?
Yog xav saib yuav tsum ua li cas yog tus neeg teb yog rau tej lus nug 5 los sis 6, saib Phau Qhia Kev Coj lub Koom Txoos, 38.2.8.7 thiab 38.2.8.8.
Cia li kawm txog cov tsab cai thiab tej lus qhia txog kev cai raus dej thiab kev pom zoo nyob hauv Phau Qhia Kev Coj lub Koom Txoos, 38.2.8. Ib txhia ntawm tej tsab cai no los muaj tej xwm txheej tshwj xeeb uas tej zaum koj yuav raug.
Tom qab xam phaj tas, tus tub txib thiab tus neeg rov qab koom ua ke nrog lwm tus tub txib. Yog tias tus neeg npaj ua kev cai raus dej lawm, cov tub txib piav tias yuav ua li cas thaum muaj kev sib ntsib ua kev cai raus dej. Lawv kuj piav tias yuav ua kev pom zoo nyob hauv kev sib ntsib txais lub cim nco txog nyob hauv pawg ntseeg uas tus neeg nyob.
Thaum Twg Yuav Tsum Tos Ib Ntus Ua Ntej Ua Kev Cai Raus Dej
Tej lub sij hawm yuav tsum tos ib ntus vim tias ib tug neeg tseem tsis tshua muaj ib zaj lus tim khawv los yog tsis tsim nyog ua tam sim no. Thaum twg muaj li no, cia li ua tib zoo thiab tsis qhia neeg coob. Pab tug neeg to taub yuav tsum ua li cas kom npaj ua kev cai raus dej thaum yav tom ntej.
Txhawb nqa tus neeg thiab qhia tias muaj kev cia siab rau Yexus Khetos thiab Nws txoj Kev Theej Txhoj. Thov pawg ntseeg cov mej zeej nrog nws ua phooj ywg. Qhia nws txog tej lub ntsiab cai ntawm txoj moo zoo mus txog thaum tus neeg npaj siab ua kev cai raus dej thiab kev pom zoo. Tos mus txog lub sij hawm ntawd kom teem sij hawm tshiab ua kev cai raus dej.
Kev Cai Raus Dej thiab Kev Pom Zoo: Tej Lus Nug thiab tej Lus Teb
Kuv puas xav tau kev tso cai kom muab ib tug me nyuam ua kev cai raus dej? Lub Koom Txoos txawj txog qhov uas cov me nyuam nyob zoo li cas thiab puas sib haum xeeb nyob hauv tsev. Yuav pub ib tug me nyuam ua kev cai raus dej, raws li tej kev cai ntawm ib lub zej zog, thaum muaj tej yam zoo li no:
Nws niam nws txiv los sis (cov) neeg saib xyuas raws li kev cai sau ntawv tso cai. Nkawd yuav tsum to taub me ntsis txog qhov uas yuav qhia nkawd tus me nyuam txog cov lus qhuab qhia twg thaum nws yog ib tug mej zeej hauv lub Koom Txoos. Lawv kuj yuav tsum txaus siab txhawb nqa tus me nyuam khi lus thiab ua raws li txoj kev khi lus ntawm txoj kev cai raus dej.
Tus neeg uas coj kev xam phaj xav seb tus me nyuam puas to taub txoj kev khi lus ntawm txoj kev cai raus dej. Nws yuav tsum ntseeg tias tus me nyuam yuav siv zog ua raws li txoj kev khi lus no los ntawm kev ua raws li cov lus txib, tsis hais kev mus rau kev sib ntsib hauv lub Koom Txoos.
Kuv puas xav tau ib tug khub txoj kev pom zoo kom muab ib tug txiv tsev los sis tus niam tsev ua kev cai raus dej? Xav tau. Ib tug uas twb sib yuav los nws tus khub yuav tsum pom zoo ua ntej nws ua kev cai raus dej.
Yog tias ib tug niam tsev los yog txiv tsev tsis tau npaj ua kev cai raus dej, puas tsim nyog kuv muab lwm tus hauv tsev neeg ua kev cai raus dej los yog tos mus txog thaum tus niam tsev los txiv tsev npaj ua lawm? Yeej zoo dua yog ib tsev neeg ua kev cai raus dej ua ke. Tiam sis, yog tias ib txhia tsis npaj siab, ces muab ib txhia hauv ib tsev neeg ua kev cai raus dej los tau tsuas yog koj tau txais kev pom zoo ua ntej xwb.
Puas tsim nyog cia tsev neeg ib txhia tos ua kev cai raus dej mus txog thaum tus txiv tsev txais tau lub Pov Thawj Hwj Aloos thiab ua tau cov kab ke muab lawv ua kev cai raus dej? Tsis tsim nyog ua li ntawd. Cov kwv tij uas ua kev cai raus dej tsis txais lub Pov Thawj Hwj Aloos nyob rau hnub uas tau muab lawv ua kev cai raus dej. Tus npisov yuav tsum xam phaj lawv ua ntej thiab cia pawg ntseeg cov mej zeej pom zoo txhawb nqa lawv.
Kuv puas muaj cai qhia thiab muab ib tug neeg ua kev cai raus dej yog tias nws twb tshem kev ua mej zeej hauv lub Koom Txoos los yog twb rho npe? Tib neeg uas rho npe tsis ua mej zeej hauv lub Koom Txoos los yog tau tshem kev ua mej zeej ces yeej pub lawv rov qab ua kev cai raus dej thiab ua kev pom zoo. Yog tias lawv xav kom koj qhia lawv, nrog cov thawj coj pov thawj hwj hauv zej zog thiab koj qhov chaw tshaj tawm txoj moo zoo tus thawj tswj hwm txog tej yam uas koj ua tau.
Nyob hauv ib ceg txheem ntseeg, tus npisov los yog ceg txheem ntseeg tus thawj tswj hwm yog tus uas muaj cai rov qab pub nws ua kev cai raus dej. Nyob hauv qhov chaw tshaj tawm txoj moo zoo, qhov chaw tshaj tawm txoj moo zoo tus thawj tswj hwm yog tus uas muaj cai rov qab pub nws ua mej zeej. Thaum twg yuav tsum paub ua li cas Thawj Pawg Thawj Tswj Hwm yuav qhia cov thawj coj no. Cov tub txib tsis xam phaj rau kev cai raus dej rau cov neeg no thiab tsis sau Daim Ntawv rau Kev Cai Raus Dej thiab Kev Pom Zoo. Tiam sis, yeej thov tau ib tug tub txib kom muab tus neeg ntawd ua kev cai raus dej.
Cov uas yog mej zeej dhau los uas rov qab koom lub Koom Txoos tsis yog cov neeg hloov siab los ntseeg. Txawm li ntawd los, tej lub sij hawm cov tub txib muaj ib lub luag hauj lwm tseem ceeb kom pab lawv rov los muaj cov koob hmoov los ntawm kev ua mej zeej hauv lub Koom Txoos dua.
Yog tias ib tug neeg tau teem sij hawm ua kev cai raus dej tiam sis nws tsis ua raws li tag nrho tej lus cog tseg? Tos kom teem sij hawm rau kev xam phaj rau kev cai raus dej mus txog thaum tus neeg ua raws li tej yam uas nws cog lus thiab ua raws li tej yam uas yuav tsum ua kom ua kev cai raus dej. Saib “Thaum Twg Yuav Tsum Tos Ib Ntus Ua Ntej Ua Kev Cai Raus Dej” nyob hauv tshooj no.
Yog tias ib khub niam txiv xav ua kev cai raus dej tiam sis nkawd nyob ua ke tsis tau sib yuav? Ib khub niam txiv uas nyob ua ke thaum tsis tau sib yuav raws li txoj kev cai los tsis pub ua kev cai raus dej mus txog thaum nkawd ua raws li txoj kev cai coj dawb huv lawm. Qhov no txhais tias nkawd yuav tsum tsis txhob nyob ua ke—tsis hais ib tug poj niam thiab ib tug txiv neej los sis ib khub uas yog poj niam nyiam poj niam los sis txiv neej nyiam txiv neej—los sis, yog tias yog poj niam thiab txiv neej, nkawd yuav tsum sib yuav. Yuav tsum muab siab rau ntseeg kom hloov siab lees txim raws li qhia nyob hauv Lus Qhuab Qhia thiab Kev Khi Lus 20:37. Txoj kev sib yuav ntawm ib tug txiv neej thiab ib tug poj niam tseem ceeb heev rau Vajtswv txoj hau kev.
Ob lo lus nug 5 thiab 6 nyob hauv kev xam phaj rau kev cai raus dej nug seb ib tug neeg puas tau ua txhaum kev cai loj heev los yog pab kom rho me nyuam. Kuv yuav tsum ua li cas yog tias ib tug neeg teb tias nws twb ua ib qho no? Yog tias koj kawm txog ib yam xwm txheej li no nyob hauv kev xam phaj rau kev cai raus dej, tsis txhob nug kom paub ntxiv. Tsis txhob cog lus tias yuav pom zoo rau tus neeg ntawd ua kev cai raus dej. Tiam sis, qhia tias koj hlub nws thiab ua siab zoo piav tias ib tug uas laus zog thiab muaj tswv yim ntxiv yuav nrog tus neeg ntawd tham thiab pab nws.
Xa ib txoj kev thov xam phaj rau kev cai raus dej rau koj qhov chaw tshaj tawm txoj moo zoo tus thawj tswj hwm. Nws los sis nws ib tug pab cuam yuav nrog tus neeg ntawd sib ntsib. Saib Phau Qhia Kev Coj lub Koom Txoos, 38.2.8.7 thiab 38.2.8.8.
Kuv yuav tsum ua li cas yog tias tau tsim ntaub ntawv ua mej zeej ua ntej kuv tau xa daim Ntawv rau Kev Cai Raus Dej thiab Kev Pom Zoo mus? Hu koj qhov chaw tshaj tawm txoj moo zoo tus thawj tswj hwm kom paub ua li cas.
Kev Kawm Ntawv Koj tus Kheej
Cia li xav seb koj yuav xav li cas yog tias lwm tus xam phaj koj. Xav txog tej lus nug no thiab sau ntawv txog koj tej kev tshoov siab.
Kev xam phaj yuav ua li cas ua rau koj tsis tshua txaus siab? Tus uas ua kev xam phaj ua los sis hais tau dab tsi kom nplij koj lub siab?
Koj xav kom tus uas ua kev xam phaj hais zoo li cas rau koj?
Koj yuav xav kom tus uas ua kev xam phaj teb li cas yog tias koj hais txog koj tej kev ua xyem xyav los sis koj tsis to taub los yog koj lees tias koj twb ua txhaum loj heev?
Daim Duab
kev cai raus dej
Kev Sib Ntsib Ua Kev Cai Raus Dej
Kev sib ntsib ua kev cai raus dej thiab kev pom zoo yuav tsum txhawb nqa ib tug mej zeej tshiab sab ntsuj plig uas lawv nco ntsoov. Yuav tsum teem sij hawm rau kev sib ntsib ua kev cai raus dej tib lub sij hawm thaum tus neeg tau ua tej yam kom ua tau kev cai raus dej tag nrho lawm. Cia li piav tias yuav npaj ua dab tsi thiab vim li cas. Sib tham txog kev hnav khaub ncaws zoo, tsis hais qhov uas yuav muab khaub ncaws dawb rau tus neeg ntawd hnav ua kev cai raus dej.
Tus npisov pab npaj kev sib ntsib ua kev cai raus dej rau cov neeg hloov siab los ntseeg. Pawg ntseeg qhov chaw tshaj tawm txoj moo zoo tus thawj coj (yog tias tau hu ib tug) los sis ib tug hauv pawg txwj laug pawg thawj tswj hwm uas coj cov tub txib txoj hauj lwm npaj thiab coj tej kev sib ntsib no. Nws koom tes ua nrog ob tug tub txib. Xav kom ua kev sib ntsib ua kev cai raus dej tsis ntev, yuav tsum yooj yim ua, thiab txhawb nqa sawv daws sab ntsuj plig.
Caw ib tug hauv pawg npisov, ib tug hauv Koom Haum Niam Tsev pawg thawj tswj hwm, thiab ib tug hauv pawg txwj laug pawg thawj tswj hwm (yog tias nws tsis coj kev sib ntsib) kom tuaj rau kev sib ntsib ua kev cai raus dej. Thaum tsim nyog ua, caw lwm lub koom haum cov thawj coj, tej pawg tub hluas ntxhais hluas cov thawj coj, thiab cov kwv tij thiab cov viv ncaus uas txhawb pab (yog tias muaj). Nrog tus neeg uas ua kev cai raus dej tham kom seb yuav caw cov phooj ywg thiab cov txheeb ze twg tuaj saib kev sib ntsib ua kev cai raus dej thiab kev pom zoo.
Xav seb puas caw lwm tus neeg uas koj qhia. Tej yam no yuav pab lawv hnov tus Ntsuj Plig thiab kawm ntxiv txog txoj moo zoo. Tom qab kev sib ntsib, rov qab xyuas kom sib tham txog tej yam uas lawv xav thiab caw lawv kom koj qhia lawv ntxiv.
Kev sib ntsib ua kev cai raus dej los tej zaum muaj li no:
Ib los ob zaj lus tsis ntev txog tej lub ntsiab ntawm txoj moo zoo, xws li txoj kev cai raus dej thiab lub txiaj ntsim Vaj Ntsuj Plig Dawb Huv
Ib zaj nkauj
Kev cai raus dej
Ib lub sij hawm nyob ntsiag to thaum cov uas tau ua kev cai raus dej hloov khaub ncaws. (Hu nkauj los sis ntaus cov nkauj qhuas Vajtswv los yog cov nkauj los ntawm lub Koom Haum Me Nyuam Yaus thaum lub sij hawm no los tau. Los yog cov tub txib qhia tau txog txoj moo zoo me ntsis.)
Sij hawm rau cov mej zeej tshiab ua tim khawv, yog xav ua
Zaj nkauj qhuas Vajtswv thiab thov Vajtswv kaw
Cov nkauj kaw kev sib ntsib
Yog tias koj teem sij hawm muab neeg ua kev cai raus dej nyob rau Hnub Caiv, xaiv ib lub sij hawm uas tsis tab kaum tej kev sib ntsib thaum Hnub Caiv uas ib txwm muaj.
Daim Duab
kev pom zoo
Kev Pom Zoo
Ib tug neeg uas txais txoj kab ke pom zoo tom qab nws tau ua kev cai raus dej (saib Lus Qhuab Qhia thiab Kev Khi Lus 20:41). Ib tug neeg hloov siab los ntseeg tshiab yog ib tug mej zeej ntawm lub Koom Txoos tom qab tau ua kev cai raus dej thiab kev pom zoo tas lawm thiab tau sau ceev xwm txheej tas lawm.
Tus npisov yog tus uas coj kev pom zoo. Tiam sis, nws tsis xam phaj ib zaug ntxiv rau txoj kev pom zoo.
Nrog tus npisov thiab pawg ntseeg qhov chaw tshaj tawm txoj moo zoo tus thawj coj tham (yog tias muaj ib tug) kom paub tseeb tias tau muab cov neeg hloov siab los ntseeg tshiab tau ua kev pom zoo. Yuav tsum ua kev pom zoo sai li sai tau tom qab ua kev cai raus dej, zoo tshaj yuav ua thaum hnub Sunday tom qab. Tiam sis, tus npisov muaj cai coj txoj kev pom zoo nyob hauv kev sib ntsib ua kev cai raus dej yog tsis ua li no pes tsawg (saib Phau Qhia Coj lub Koom Txoos, 18.8).
Feem ntau cov neeg hloov siab los ntseeg yuav txais kev cai pom zoo hauv kev sib ntsib txais lub cim nco txog hauv pawg ntseeg uas lawv nyob. Feem ntau tus npisov caw cov txwj laug uas yog cov tub txib ua hauj lwm hauv pawg ntseeg kom koom tes pab ua kev pom zoo. Yog ib tug tub txib ua kev pom zoo, nws kuj yuav tsum tau kev tso cai los ntawm qhov chaw tshaj tawm txoj moo zoo tus thawj tswj hwm (saib Phau Qhia Kev Coj lub Koom Txoos, 18.8.1). Tsawg kawg nkaus ib tug ntawm pawg npisov yuav tsum koom tes pab ua.
Sau daim Ntawv rau Kev Cai Raus Dej thiab Kev Pom Zoo Kom Tiav
Yeej yuav tsum tsim ib daim ntaub ntawv ua mej zeej tom qab ib tug neeg ua kev cai raus dej thiab kev pom zoo. Hais txog cov ceev xwm txheej hauv nws lub caij nyoog, Maulaunais sau tias cov mej zeej tshiab los “cov ntseeg yuav suav lawv nrog cov neeg ntawm Khetos lub koom txoos; thiab cov ntseeg muab lawv lub npe sau cia, xwv kom yuav nco qab lawv thiab Vajtswv txoj lus zoo yuav los yug lawv, kom ceev tau lawv taug txoj kev yog” (Maulaunais 6:4).
Thaum koj qhia ib tug neeg uas tab tom npaj ua kev cai raus dej, pib sau Daim Ntawv rau Kev Cai Raus Dej thiab Kev Pom Zoo nyob hauv qhov app Qhia Kuv txoj Moo Zoo. Piav tias yuav siv daim ntawv no kom tsim ntaub ntawv ua mej zeej. Daim ntaub ntawv no yuav muaj xov xwm tseem ceeb txog cov kab ke uas tus neeg txais. Thaum lub Koom Txoos cov mej zeej tsiv tsev, yuav xav lawv cov ntaub ntawv ua mej zeej mus rau lawv pawg ntseeg tshiab kom cov thawj coj thiab cov mej zeej nyob ntawd yuav paub txhawb nqa lawv.
Thaum twg tus mej zeej tshiab ua kev cai raus dej thiab kev pom zoo, sau daim ntawv tiav sau cov xov xwm txog txhua txoj kab ke, xws li leej twg yog tus uas ua txoj kab ke ntawd. Thaum koj sau daim ntawv no tiav, sau cov xov xwm nyob hauv qhov app Qhia Kuv txoj Moo Zoo thiab xa mus rau pawg ntseeg tus teev ntawv. Thaum uas tus teev ntawv txais daim ntawv lawm kiag, nws saib zoo thiab tsim ntaub ntawv ua mej zeej.
Tom qab nws tsim ntaub ntawv ua mej zeej lawm, ces ib tug teev ntawv npaj Daim Ntawv Ua Pov Thawj txog Kev Cai Raus Dej thiab Kev Pom Zoo. Tus npisov sau npe rau daim ntawv pov thawj no thiab muab rau tus neeg.
Yuav tsum sau tus neeg lub npe thiab qhov uas nws yog ib tug tub los yog tus ntxhais rau daim ntaub ntawv ua mej zeej thiab daim ntawv pov thawj kom muaj raws li tus neeg daim ntawv pov thawj txog kev yug los, ntaub ntawv khaws cov pej xeem tej npe uas yug los (civil birth registry), los yog lub npe raug cai tam sim no.
Kev Kawm Koj tus Kheej Los Sis Nrog tus Khub
Cia li kawm Mauxiyas 6:1–3 thiab Maulaunais 6:1–4. Tej nqe no hais dab tsi txog kev ceev ntawv txog cov neeg uas ua kev cai raus dej thiab kev pom zoo?
Tom Qab Ua Kev Cai Raus Dej thiab Kev Pom Zoo
Tseem Txhawb Pab Mus Ntxiv
Tseem yuav tsum ntaus phooj ywg thiab txhawb nqa cov mej zeej tshiab tom qab lawv ua kev cai raus dej thiab ua kev pom zoo. Pab lawv koom lub koom txoos thiab sib raug zoo nrog cov mej zeej. Nrog lawv nyeem Phau Ntawv Maumoos, thiab pab lawv qhia txoj moo zoo rau tsev neeg thiab phooj ywg. Muab ib me nyuam phau ntawv Kuv txoj Kev Ua Raws Li Kev Khi Lus rau lawv. Siv qhov app Qhia Kuv txoj Moo Zoo mus ntxiv kom sau ntawv txog lawv txoj kev ua tau zoo zuj zus, xws li lawv txoj kev koom kev sib ntsib txais lub cim nco txog thiab tej zaj lus qhia uas lawv tau kawm
Daim Duab
ob tug txiv neej sib khawm
Tom qab ua kev cai pom zoo, cia li rov qab qhia cov tub txib tej zaj lus qhia dua. Koj yog tus coj tau kev qhia. Tiam sis, cia li nrog pawg ntseeg cov thawj coj sib tham kom pawg ntseeg qhov chaw tshaj tawm txoj moo zoo cov tub txib los yog lwm tus mej zeej yuav los pab. Thaum koj qhia, yaum cov mej zeej tshiab ua raws li tag nrho cov lus cog tseg hauv tej zaj lus qhia.
Nyob hauv kev sib ntsib koom tes txhua lub lim tiam, sib tham seb cov mej zeej yuav ua li cas kom txhawb nqa cov neeg hloov siab los ntseeg tshiab thiab pab lawv muaj siab ntseeg ua tej yam hauv lub Koom Txoos. Cia li npaj seb leej twg yuav qhia lawv rau tej pawg cov thawj coj. Cia li coj lwm tus mej zeej txoj kev koom tes pab thaum koj rov qab qhia tej lus qhia ib zaug ntxiv. Cia li thov kom muaj cov kwv tij uas txhawb pab (thiab cov viv ncaus uas txhawb pab rau cov poj niam).
Tom qab ib tug tub hluas ua kev pom zoo, nws tsim nyog txais lub Pov Thawj Hwj Aloos yog tias nws yuav muaj 12 xyoos ua ntej xyoo no kawg. Kev tsa ib tug rau lub Pov Thawj Hwj Aloos yog ib qho uas tus npisov coj (saib Phau Qhia Kev Coj lub Koom Txoos, 38.2.9.1).
Yog tsim nyog ua, sib txuas lus nrog cov neeg uas koj tau qhia kom mus tas koj lub neej. Txhawb nqa lawv kom txais tau tag nrho cov koob hmoov ntawm Yexus Khetos txoj moo zoo.
Daim Duab
Txwj Laug Gerrit W. Gong
“Thaum peb los nrog lub siab mob thiab lub siab xav ua zoo, ces peb Yexus Khetos yuav ua peb lub suab, thiab puag peb nyob rau hauv Nws txhais tes uas nyab xeeb. Cov kab ke dawb huv ua rau peb koom siab koom ntsws los ntawm peb tej kev khi lus thiab ‘lub hwj chim ua zoo li Vajtswv’ kom pab peb muaj lub siab xav ua ncaj thiab xav ua zoo. [Lus Qhuab Qhia thiab Kev Khi Lus 84:20]. Nrog Nws txoj kev siab zoo thiab txoj kev ua siab ntev, Nws lub Koom Txoos yuav los ua peb lub Tsev So” (Gerrit W. Gong, “Muaj Chaw hauv lub Tsev So,” Liahona, Tsib Hlis Ntuj 2021, 27).
Pab cov Mej Zeej Tshiab Txais Tau cov Koob Hmoov Los ntawm lub Tuam Tsev
Cov mej zeej tshiab uas laus txaus yeej txais tau ib daim ntawv tso cai nkag tuam tsev uas cia lawv mus ua kev cai raus dej rau cov neeg tuag los ntawm lawv poj koob yawm txwv (saib Phau Qhia Kev Coj lub Koom Txoos, 26.4.2). Lawv txais daim ntawv tso cai no los ntawm tus npisov. Txhawb nqa thiab pab cov mej zeej tshiab kom txais tau ib daim ntawv tso cai nkag tuam tsev sai li sai tau. Yog tias ib lub tuam tsev nyob ze, cia li xav seb koj puas xav caw cov mej zeej tshiab teem ib lub sij hawm kom ua kev cai raus dej rau cov poj koob yawm txwv uas tuag lawm.
Nyob hauv kev sib ntsib koom tes txhua lub lim tiam, npaj seb leej twg yuav coj cov mej zeej tshiab kom ntsib pawg ntseeg tus coj kev ua hauj lwm hauv lub tuam thiab tsev neeg zaj keeb kwm. Tus thawj coj no pab tau lawv npaj txais cov koob hmoov ntawm lub tuam tsev kom khi lus hauv lub tuam tsev rau lawv tus kheej.
Tej lub Tswv Yim rau Kev Kawm Ntawv thiab Kev Siv
Kev Kawm Ntawv Koj tus Kheej
Cia li sau tej teeb meem uas ib tug yuav ua kev cai raus dej yuav raug. Vim li cas ib tug neeg yuav tsum paub tias lub Koom Txoos cov mej zeej hlub nws thiab xav nrog nws ua phooj ywg?
Cia li kawm Maulaunais 6 thiab Lus Qhuab Qhia thiab Kev Khi Lus 20:68–69. Koj kawm tau dab tsi los ntawm tej nqe no txog kev pab neeg npaj ua kev cai raus dej thiab kev pom zoo? Sau tej yam uas koj kawm. Qhia koj tej kev xav rau koj tus khub thaum nrog tus khub kawm ua ke.
Thawj Tswj Hwm Henry B. Eyring piav tias vim li cas txoj moo zoo tej kev cai tseem ceeb heev. Cia li sib tham txog cov lus ntuas no. Neb yuav ua li cas kom yaum tib neeg xav ua raws li tej kev cai no?
“Tus Tswv tau tsa Nws tej kev cai kom Nws thiaj li foom tau koob hmoov rau peb. Cia li xav txog cov koob hmoov ntawd: Nws cog lus tias cov uas ua raws li tej kev cai no yuav txais tus Vaj Ntsuj Plig Dawb Huv txoj kev pab. Nws cog lus tias lawv yuav muaj kev nyab xeeb. Nws cog lus tias lawv yuav txais cov kab ke dawb huv nyob hauv Nws lub tsev. Thiab Nws cog lus tias cov uas ua raws li Nws tej kev cai tas mus li yuav muaj txoj sia nyob mus ib txhis. …
“Vim peb hlub cov neeg uas peb pab, peb txhua tus xav ua zoo dua kom txhawb nqa peb Leej Txiv Saum Ntuj Ceeb Tsheej cov me nyuam kom lawv rau siab ntseeg thiab ua neeg dawb huv lawv thiaj li yuav muaj tag nrho cov koob hmoov ntawm tus Tswv. …
“… Yus pib ua li no thaum yus ua raws nraim li tus Tswv tej kev cai thiab tsis thov lwm tus zam txim. Thiab neeg ntiaj teb yim tso tej kev cai ntawd tseg thiab thuam tej ntawd, los peb yim yuav tsum ua siab loj ua raws li tej kev cai ntawd” (“Standards of Worthiness,” First Worldwide Leadership Training Meeting, Ib Hlis Ntuj 2003, 10–11).
Rov qab nyeem tej lus nug ntawm kev xam phaj rau kev cai raus dej. Cia li xav seb koj yuav ua li cas kom yog muaj xwm txheej zoo li no:
Tus neeg tsis tau qhia koj tias nws ncua caij nyoog rau ib txoj kev txhaum cai.
Tus neeg tsis tau txais kev teb rau nws zaj lus thov Vajtswv kom paub tias Joseph Smith yog ib tug yaj saub.
Tus neeg tau haus luam yeeb ob hnub tas los.
Tus neeg tsis paub tseeb nws puas tau txais kev teb nws tej lus thov.
Tsev neeg xav tias cov phooj ywg yuam me ntsis thiab tsis paub tseeb tias lawv puas npaj siab ua kev cai raus dej.
Rov qab saib daim Ntawv rau Kev Cai Raus Dej thiab Kev Pom Zoo. Vim li cas koj yuav tsum sau cov xov xwm tag nrho thiab sau kom raug?
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Qhia txog qhov uas kev xam phaj rau kev cai raus dej tseem ceeb npaum li cas. Sib tham txog qhov uas cov tub txib muaj peev xwm ua dab tsi kom pab tib neeg npaj rau kev xam phaj rau kev cai raus dej.
Sib tham txog qhov uas yuav ua li cas kom siv tej kev sib ntsib ua kev cai raus dej thiab thaum ua kev pom zoo kom nrhiav neeg.
Nrog cov thawj coj pov thawj hwj thiab tej koom haum cov thawj coj sib tham seb lawv puas siv daim ntawv ceeb toom Kev Taug Mus Zoo Li Cas ntawm Txoj Kev Ua Raws Li Kev Khi Lus.
Cia li qhia koog chaw, thaj chaw, thiab cov viv ncaus kev cob qhia cov thawj coj kom paub npaj cov neeg ua kev xam phaj rau kev cai raus dej. Caw lawv qhia lwm tus tub txib kom npaj neeg rau kev xam phaj no.
Cia li qhia koog chaw thiab thaj chaw cov thawj coj kom paub coj tej kev xam phaj rau kev cai raus dej.
Qhia kom paub teb thaum ua kev xam phaj rau kev cai raus dej thiab ib tug neeg qhia tias nws twb ua txhaum loj heev.
Thaum ua taus, koom tej kev sib ntsib ua kev cai raus dej rau cov mej zeej tshiab. Nrog cov mej zeej sib tham thiab kawm txog lawv txoj kev hloov siab los ntseeg. Qhia txog tej yam uas koj tau kawm nrog koj tus khub thiab cov tub txib.