Xwv kom qhia Yexus Khetos txoj moo zoo, koj yuav tsum paub cov lus qhuab qhia thiab cov ntsiab cai tseem ceeb. Koj kuj yuav tsum paub qhov tseeb ntawm txoj moo zoo los ntawm sab ntsuj plig. Tus Tswv hais tias, “Tsis txhob nrhiav kev mus tshaj tawm kuv txoj lus, tiam sis xub nrhiav kom tau kuv txoj lus tso.”
“Tau” tus Tswv txoj lus txhais tias koj kawm thiab cia txoj lus ntawd yuav nkag tob hauv koj lub siab. Thaum koj ua li no, Nws cog lus tias, “Koj tus nplaig yuav npliag; tom qab ntawd, yog koj xav tau, ces koj yuav tau kuv tus Ntsuj Plig thiab kuv txoj lus, muaj tseeb tiag, tau Vajtswv lub hwj chim los mus yaum neeg” (Lus Qhuab Qhia thiab Kev Khi Lus 11:21).
Daim Duab
tus neeg uas cim tej lus hauv cov vaj lug kub
Tus Tswv kuj hais tias “khaws tej lus uas cawm neeg txoj sia cia rau hauv nej lub cim xeeb tsis tu ncua” (Lus Qhuab Qhia thiab Kev Khi Lus 84:85). Kev khaws tus Tswv tej lus yuav ua rau koj muaj kev txawj ntse ntxiv thiab ua rau koj zaj lus tim khawv muaj zog. Koj txoj kev xav thiab txoj kev txawj qhia txoj moo zoo yuav loj tuaj ntxiv thiab. (Saib Yakhauj 4:6–7; Amas 32:27–42; 36:26; 37:8–9.)
Thov Vajtswv kom tau thiab khaws tus Tswv txoj lus los ntawm kev kawm vaj lug kub, cov yaj saub tej lus, thiab tej zaj lus qhia nyob hauv tshooj 3.
Qhia nrog tus Ntsuj Plig
Yexus Khetos txoj moo zoo yog “Vajtswv lub hwj chim uas cawm tau txhua tus uas ntseeg dim” (Loos 1:16). Vim li ntawd, yuav tsum muaj lub hwj chim uas los saum ntuj los kom qhia txog txoj Kev Muab Txoj Moo Zoo Txum Tim Rov Qab Los—yog tus Vaj Ntsuj Plig Dawb Huv lub hwj chim.
Yeej yog ib qho tseem ceeb uas koj muaj txuj ci qhia lwm tus. Yeej tseem ceeb uas koj kawm cov lus qhuab qhia thiab cov ntsiab cai uas koj qhia thiab. Tiam sis, thaum koj qhia tej lus tseeb los ntawm sab ntsuj plig, tsis yog koj tso siab rau koj tej txuj ci thiab kev txawj ntse xwb.
Koj qhia tej lus tseeb ntawm sab ntsuj plig los ntawm tus Vaj Ntsuj Plig Dawb Huv lub hwj chim. Tus Tswv hais tias, “Thiab tus Tswv yuav muab tus Ntsuj Plig rau nej los ntawm txoj kev thov Vajtswv nrog kev ntseeg; thiab yog nej tsis muaj tus Ntsuj Plig nej yuav tsum tsis txhob qhia” (Lus Qhuab Qhia thiab Kev Khi Lus 42:14; kuj saib Lus Qhuab Qhia thiab Kev Khi Lus 50:13–14, 17–22).
Kev Qhia Raws Li tus Ntsuj Plig Txhais Li Cas
Thaum koj qhia nrog tus Ntsuj Plig, koj thov Vajtswv kom muaj tus Vaj Ntsuj Plig Dawb Huv lub hwj chim thaum koj qhia. Koj kuj thov Vajtswv kom tib neeg yuav txais tau tej lus tseeb los ntawm tus Ntsuj Plig. Koj yaum tau tib neeg ntseeg ib feem lus tseeb, tiam sis xwv kom lawv hloov siab los ntseeg, lawv yuav tsum muaj sij hawm thaum lawv hnov tus Ntsuj Plig (saib Lus Qhuab Qhia thiab Kev Khi Lus 8:2–3).
Npaj koj tus kheej los ua ib lub cuab yeej uas tus Ntsuj Plig siv tau kom qhia lwm tus. Cia li xav tias tus Vaj Ntsuj Plig Dawb Huv yog koj tus khub thaum koj qhia.
Tso siab rau tus Ntsuj Plig kom pab koj paub hais dab tsi. Nws yuav ua rau koj nco ntsoov cov lus qhuab qhia uas koj twb kawm lawm. Nws yuav pab koj npaj thiab hloov tej yam uas koj qhia raws li ib tug neeg xav tau.
Thaum koj qhia raws li tus Ntsuj Plig, Nws yuav muab koj zaj lus coj mus nkag hauv tib neeg lub siab. Nws yuav pom zoo rau koj zaj lus thaum koj ua tim khawv. Koj thiab cov uas txais tej yam uas koj qhia los ntawm tus Ntsuj Plig yuav kawm tau, ib leeg yuav to taub ib leeg, thiab yuav xyiv fab ua ke. (Saib 2 Nifais 33:1; Lus Qhuab Qhia thiab Kev Khi Lus 50:13–22.)
Daim Duab
Thawj Tswj Hwm Ezra Taft Benson
“Tus Ntsuj Plig yog tib qho tseem ceeb nyob hauv txoj hauj lwm no. Thaum tus Ntsuj Plig txhawb nqa koj txoj kev hu, koj ua tau tej txuj ci tseem ceeb kom ua tus Tswv tej hauj lwm hauv qhov chaw tshaj tawm txoj moo zoo. Yog tsis muaj tus Ntsuj Plig, koj yeej yuav ua tsis taus tsis hais koj muaj txuj ci thiab peev xwm npaum li cas los yog” (Exalas Taft Benson, zaj lus rau tej qhov chaw tshaj tawm txoj moo zoo cov thawj tswj hwm tshiab, Rau Hli Ntuj 25, 1986).
Kev Cog Lus ntawm Koj txoj Kev Hu
Vajtswv tau hu koj thiab muab koj tsa kom “mus tshaj tawm kuv txoj moo zoo los ntawm tus Ntsuj Plig, uas yog tus Nplij Siab uas tus Tswv xa los mus qhia qhov tseeb” (Lus Qhuab Qhia thiab Kev Khi Lus 50:14). Muaj tej lub sij hawm thaum koj yuav ntshai los sis xav tias koj tsis txaus. Tej zaum koj txhawj tias koj tsis paub txaus los sis koj tseem tsis tau ua neej ntev txaus.
Koj Leej Txiv Saum Ntuj Ceeb Tsheej, tus uas paub koj zoo tag nrho, tau hu koj rau qhov koj muab taus ntau yam vim koj yog ib tug uas rau siab coj raws li Yexus Khetos. Nws yuav tsis tso nej tseg hlo li. Cia li ntseeg tias tus Ntsuj Plig yuav ntxiv dag zog rau koj txoj kev muaj peev xwm thiab yuav qhia qhov tseeb rau cov uas txais yuav.
Daim Duab
Txwj Laug Neil L. Andersen
Txwj Laug Neil L. Andersen hais tias: “Thaum kuv xav txog qhov uas kev ua tub txib nyuaj npaum li cas, ua rau kuv xav tias kuv tsis tau npaj zoo thiab kuv zoo tsis txaus. Kuv nco qab thaum kuv thov hais tias, ‘Leej Txiv Saum Ntuj Ceeb Tsheej, kuv yuav ua tub txib li cas thaum kuv paub tej yam tsawg tsawg xwb?’ Kuv ntseeg lub Koom Txoos, tiam sis kuv xav tias kuv txoj kev txawj ntse ntawm sab ntsuj plig los muaj tsawg. Thaum kuv thov Vajtswv, ua rau kuv xav tias: ‘Koj tsis paub txhua yam, tiam sis koj paub txaus!’ Qhov uas tau nplij kuv lub siab ntawd ua rau kuv ua siab loj kom mus tom ntej ntxiv nyob hauv qhov chaw tshaj tawm txoj moo zoo” (“Koj Paub Txaus,” Liyahaunas, Kaum Ib Hlis Ntuj 2008, 13).
Caw tus Ntsuj Plig Los Thaum Koj Pib Qhia
Thawj ob peb feeb uas koj nrog tib neeg tham yeej tseem ceeb. Ua ncaj thiab saib taus lawv. Muaj siab xav paub txog lawv thiab hlub lawv. Nrhiav kom lawv tso siab rau koj. Ib yam uas ua rau tib neeg tso siab rau koj yog thaum lawv hnov tus Ntsuj Plig nrog koj.
Cia li nug ob peb yam yooj yim kom pab koj to taub lawv keeb kwm zoo li cas thiab lawv xav tau dab tsi los ntawm nej tej kev sib ntsib. Mloog zoo.
Ua ntej koj pib, caw txhua tus uas nyob kom koom ua ke mloog zaj lus qhia. Yaum kom lawv tshem tej yam uas meem txom kom hnov taus tus Tswv tus Ntsuj Plig.
Ntseeg txog tus Vaj Ntsuj Plig Dawb Huv lub hwj chim muab neeg hloov siab los ntseeg. Raws li tus Ntsuj Plig coj koj ua, koj hais tau txog koj tej kev xav zoo li tej yam uas muaj nram qab no thaum koj pib qhia:
Vajtswv yog peb Leej Txiv Saum Ntuj Ceeb Tsheej uas hlub peb. Peb txhua tus yog cov kwv tij thiab cov muam. Nws xav kom peb muaj kev xyiv fab.
Peb txhua tus muaj teeb meem thiab tej kev sim siab. Txawm yog koj raug dab tsi los xij, Yexus Khetos thiab Nws tej lus qhia yeej pab tau koj. Nws yuav pab koj nrhiav tau kev kaj siab lug, kev cia siab, kev kho mob, thiab kev zoo siab. Yexus yuav pab koj muaj zog ntxiv kom kov yeej tej teeb meem hauv lub neej no.
Peb txhua tus ua yuam kev, uas ua rau peb muaj txim, txaj muag, thiab khuv xim peb lub neej. Tej kev xav no yuav ploj mus tsuas yog peb hloov siab lees txim thiab thov Vajtswv zam txim xwb. Tsuas yog dhau los ntawm Yexus Khetos txoj Kev Theej Txhoj xwb peb tej kev txhaum thiaj li yuav ploj mus.
Wb yuav coj koj koj thiaj li kawm tau qhov tseeb ntawm wb zaj lus. Wb yuav caw koj ua tej yam, xws li nyeem ntawv, thov Vajtswv, thiab koom lub koom txoos. Wb lub luag hauj lwm yog pab koj ua raws li tej kev caw no thiab piav txog cov koob hmoov uas koj txais tau. Thov nug wb yog muaj tej lus nug.
Vajtswv tus yaj saub tau hu wb kom qhia tej yam uas wb paub. Wb paub tias wb zaj lus muaj tseeb.
Wb yuav qhia koj kom paub nrog Vajtswv khi lus, los yog cog lus txog tej yam tshwj xeeb. Tej kev khi lus no yuav muab koj txuas rau Vajtswv thiab cia koj txais kev xyiv fab, lub dag zog, thiab tej lus cog tseg tshwj xeeb los ntawm Nws.
Koj yuav kawm hloov koj lub neej thiab coj raws li Yexus Khetos thiab Nws tej lus qhia. Ib yam tseem ceeb uas Yexus Khetos qhia, thiab txoj kev khi lus thib ib, yog kev coj raws li Nws tus yam ntxwv thiab ua kev cai raus dej los ntawm ib tug uas muaj txoj cai yog (saib Yauhas 3:5; Lus Qhuab Qhia thiab Kev Khi Lus 22).
Daim Duab
ob tug tub txib thov Vajtswv
Ua ntej koj qhia ib zaj lus, cia li hais lub ntsiab txog tej yam uas koj yuav qhia. Pab tib neeg to taub tias lawv yuav siv li cas. Piv txwv hais tias, tej zaum koj yuav xav hais tias, “Wb nyob no kom qhia zaj lus uas hais tias Yexus Khetos tau txhim tsa Nws lub Koom Txoos hauv lub ntiaj teb hauv lub caij nyoog no thiab tau hu cov yaj saub kom coj peb mus.” Los yog koj hais tias, “wb nyob no kom pab koj paub tias Vajtswv hlub koj thiab muaj ib txoj hau kev kom koj muaj kev zoo siab.”
Txhua tus neeg yuav tau koob hmoov thaum lawv lees yuav thiab ua raws li Yexus Khetos txoj moo zoo. Tej zaum Leej Txiv Saum Ntuj Ceeb Tsheej twb tau foom koob hmoov rau cov neeg uas koj nrhiav tau kom npaj lawv sab ntsuj plig ua ntej lawm (saib Amas 16:16–17).
Kev caw tus Ntsuj Plig thiab kev qhia qhov tseeb thawj zaug uas sib ntsib yuav pab tib neeg paub tias neb yog tus Tswv cov tub qhe.
Kev Kawm Koj tus Kheej Los Sis Nrog tus Khub
Siv tej lub tswv yim hauv feem no kom xyuam tej yam uas ua tau kom pib ib zaj lus qhia.
Siv cov Vaj Lug Kub
Cov txhooj vaj lug kub ntawm lub Koom Txoos yog koj lub hauv paus rau kev qhia Yexus Khetos txoj moo zoo uas tau muab txum tim rov qab los. Muaj ntau yam uas qhia yog vim li cas yuav tsum siv cov vaj lug kub rau lub hauv paus ntawm koj tej lus qhia. Piv txwv hais tias:
Cov vaj lug kub caw tus tus Vaj Ntsuj Plig Dawb Huv los thaum koj qhia (saib Lukas 24:13–32).
Pab tib neeg muaj kev ntseeg Yexus Khetos los ntawm kev kawm vaj lug kub, qhov tseem ceeb yog Phau Ntawv Maumoos. Tej lub tswv yim no los tej zaum yuav pab.
Daim Duab
ib pawg neeg kawm vaj lug kub
Qhia txog Nqe Vaj Lug Kub
Cia li piav me ntsis txog nqe vaj lug kub ntawd. Tej lus piv txwv no qhia txog tej txoj kev uas koj siv tau kom piav txog ib nqe vaj lug kub:
“Nyob hauv Joseph Smith zaj keeb kwm, Joseph qhia peb txog nws tej kev xav thaum nws mus rau hauv koog ntoo thov Vajtswv. Nws hais tias, ‘Kuv pom ib tug duab ci nyob kiag ntawm kuv taub hau lawm saud …’”
“Nyob hauv zaj no, tus yaj saub Amas qhia cov neeg pluag kom lawv muab siab rau ntseeg Vajtswv txoj lus. Nws muab Vajtswv txoj lus piv rau ib lub noob uas cog tau hauv peb lub siab. Koj puas kam pib nyeem nqe … ?”
Nyeem Nqe Vaj Lug Kub
Nyeem tej nqe nrov los sis thov kom tus neeg uas koj qhia kom nyeem nrov. Cia li xyuam xim xav txog cov uas tsis tshua txawj nyeem. Yog tias ib nqe nyuaj rau lawv to taub, nrog lawv nyeem ntawv thiab piav raws li yuav tsum piav. Cia li txhais tej lo lus los yog kab lus uas nyuaj to taub. Los sis muab ib nqe lus uas yooj yim dua rau lawv nyeem. Caw lawv nrhiav tej lub ntsiab nyob hauv nqe ntawd.
Siv cov Vaj Lug Kub
Nifais hais tias, “Kuv tau muab tag nrho tej vaj lug kub coj los piv rau peb, kom thiaj muaj nqis rau peb thiab kom peb kawm tau” (1 Nifais 19:23). “Piv” txhais tias yus siv cov vaj lug kub hauv yus lub neej.
Cia li muab cov vaj lug kub piv rau cov neeg uas koj qhia thaum koj qhia lawv tias tej zej lus thiab tej lub ntsiab cai muaj nqis rau lawv tus kheej. Piv txwv hais tias:
“Ib yam li koj, Amas cov neeg ris tej nra hnyav, yuav luag hnyav tshaj lawv ris taus. Tiam sis thaum lawv muab siab rau ntseeg thiab thov Vajtswv, Nws tau txhawb lawv dag zog kom lawv nyiaj tau lawv tej teeb meem. Ces Nws muab lawv dim lawv tej kev sim siab. Ib yam li Nws ua rau cov neeg no, kuv paub tias Vajtswv yuav pab koj kov yeej koj tej kev sim siab thaum koj …” (Saib Mauxiyas 24.)
Txhua zaus tom qab nej sib tham, cia li hais kom lawv nyeem tej tshooj los sis tej nqe. Cia li hais kom lawv xav txog tej lus nug thaum lawv nyeem. Yaum kom lawv kawm cov vaj lug kub txhua hnub lawv tus kheej thiab nrog lawv tsev neeg. Tej zaum koj yuav xav thov cov mej zeej nrog lawv nyeem ntawv ua ntej rov qab los qhia.
Ua ntej pib zaj lus qhia tom ntej, cia li rov qab xyuas thiab sib tham txog tej yam uas koj caw cov neeg nyeem. Yog tias lawv xav tau, pab lawv to taub thiab muab cov vaj lug kub “piv” rau lawv lub neej. Yaum kom lawv sau ntawv txog lawv tej kev xav thiab tej lus nug.
Cov nyuaj rau lawv nyeem ntawv, los sis nyuaj rau lawv to taub tej yam uas lawv nyeem, los tej zaum lawv yuav xav nyeem nrov ua ke los sis mloog tej kev kaw suab. Muaj tej no nyob hauv lub Koom Txoos tej qhov app thiab tej website.
Yog tias siv cov ntawv, kev sib tham, los sis email, ces cia li xa tej kev txuas los sis daim duab txog cov vaj lug kub. Thaum siv kev sib tham hauv vidi-aus ces cia li muab koj qhov screen rau lawv saib koj thiaj li yuav nyeem tau tej nqe vaj lug kub ua ke.
Ib zaj lus tim khawv yog kev ua tim khawv dhau los ntawm tus Vaj Ntsuj Plig Dawb Huv. Kev hais koj zaj lus tim khawv yog kev hais meej thiab siv tej lus yooj yim txog tej yam uas koj paub los sis ntseeg txog ib yam tseeb ntawm txoj moo zoo. Kev hais koj zaj lus tim khawv yog koj txoj kev ua tim khawv ntxiv txog tej lus tseeb uas koj tau qhia los ntawm cov vaj lug kub.
Kev hais koj zaj lus tim khawv yog ib txoj kev uas muaj hwj chim kom caw tus Ntsuj Plig los thiab pab lwm tus hnov Nws lub hwj huam. Tus Vaj Ntsuj Plig Dawb Huv ntiag tug hauj lwm ib qho yog kev ua tim khawv txog Leej Txiv Saum Ntuj Ceeb Tsheej thiab Yexus Khetos. Feem ntau nws nrog koj koom ua ke ua li no thaum koj ua tim khawv.
Ib zaj lus tim khawv uas muaj hwj chim yeej tsis nyob ntawm qhov uas koj muaj kuab npaum li cas los sis koj hais nrov npaum li cas—tiam sis nyob ntawm koj muaj siab ntseeg thiab muaj lub siab ncaj npaum li cas. Ceev faj kom tsis txhob hais lus nrawm los sis hais lus tim khawv zoo li koj ua yeeb yam. Cia tib neeg muaj sij hawm hnov tus Vaj Ntsuj Plig Dawb Huv ua tim khawv rau lawv tias tej yam uas koj qhia muaj tseeb.
Koj zaj lus tim khawv los tej zaum tsuas hais tej yam yooj yim xws li “Yexus Khetos yog peb tus Cawm Seej thiab tus Txhiv Dim” los sis “Kuv tau kawm hais tias Phau Ntawv Maumoos muaj tseeb.” Tej zaum koj kuj yuav xav hais me ntsis txog qhov uas vim li cas koj tau ib zaj lus tim khawv.
Thaum koj qhia, hais koj zaj lus tim khawv thaum koj txais kev tshoov siab, tsis txhob ua thaum kawg xwb. Thaum koj tus khub qhia, hais koj zaj lus tim khawv kom muaj ob tug ua tim khawv txog tej yam uas nws tau qhia.
Hais koj zaj lus tim khawv txog qhov uas lub ntsiab cai uas koj qhia yuav foom koob hmoov rau tus neeg lub neej yog tias nws ua raws li lub ntsiab cai ntawd. Cia li qhia tias qhov uas koj ua raws li lub ntsiab cai ntawd tau foom koob hmoov rau koj lub neej. Thaum koj muaj lub siab ncaj hais lus tim khawv ces yuav pab tib neeg hnov tus Vaj Ntsuj Plig Dawb Huv pom zoo rau qhov tseeb.
Kev Kawm Ntawv Koj tus Kheej
Tej nqe vaj lug kub no yog yam ntxwv txog kev ua tim khawv. Cia li xav txog tej lus nug no thaum koj nyeem txhua nqe vaj lug kub. Sau ntawv txog koj tej lus teb hauv koj phau ntawv ceev txog kev kawm.
Nyob hauv tej nqe no, Yexus thiab Nws cov thwj tim thiab cov yaj saub ua tim khawv txog dab tsi?
Vim li cas koj ho paub tias lawv ntseeg tias tej yam uas lawv hais muaj tseeb?
Thaum koj hais, “Kuv paub tias muaj tseeb,” qhov ntawd txhais li cas? Muaj tej lus twg uas koj hais tau ntxiv kom qhia txog tej yam uas koj ntseeg?
Txhua tus neeg uas koj qhia nyias txawv nyias. Nrhiav kev kom to taub nws tej kev xav txog sab ntsuj plig, tej kev xav tau, thiab tej kev txhawj. Nug tej lus nug thiab mloog zoo. Txawm yog koj yuav tsis to taub tag nrho txog tej yam uas tus neeg xav tau, nco ntsoov tias Leej Txiv Saum Ntuj Ceeb Tsheej paub tag nrho. Nws yuav coj koj dhau los ntawm tus Vaj Ntsuj Plig Dawb Huv.
Daim Duab
ob tug tub txib qhia ib khub niam txiv
Cia tus Ntsuj Plig Qhia Yuav Qhia Zaj Lus Twg
Cia tus Ntsuj Plig qhia tias yuav qhia zaj lus twg ua ntej thiab tom qab. Koj muaj cai qhia tau raws li txoj kev zoo rau cov neeg uas koj qhia tej kev xav tau, lawv tej lus nug, thiab lawv tej xwm txheej.
Tej lub sij hawm koj yuav xav muab tej lub ntsiab cai hauv ob peb zaj lus qhia koom ua ke kom teb ib tug neeg tej kev xav tau thiab kom muaj raws li tej yam uas nws xav paub txog. Saib peb zag lus nram qab no.
Yuki twb nrhiav tau neb online thiab nug seb vim li cas nws cov phooj ywg hauv lub Koom Txoos tsis haus luam yeeb thiab tsis haus cawv. Tej zaum koj yuav xav qhia nws txog cov koob hmoov uas los ntawm kev ua raws li cov lus txib thaum siv tej zaj no los ntawm tshooj 3:
Leej Txiv Saum Ntuj Ceeb Tsheej paub Nws cov me nyuam, yog li ntawd nrhiav kev tshoov siab kom txiav txim txog tej no thaum koj npaj qhia. Thov Vajtswv kom txais tau lub txiaj ntsim to taub thaum koj txiav txim yuav qhia dab tsi. Tsom ntsoov rau tej kev xav uas los rau koj.
Daim Duab
tsev neeg uas nyeem vaj lug kub
Cia Tib Neeg Muaj Sij Hawm Siv tej Yam uas Lawv Kawm
Thaum koj qhia, cia tib neeg muaj sij hawm siv tej yam uas lawv tau kawm (saib 3 Nifais 17:2–3). Nrhiav tej kev tsim nyog kom txhawb nqa lawv ua raws li lawv tau cog lus. Tsom ntsoov rau kev pab lawv ua tej yam uas yuav tsim ib lub hauv paus ntawm kev ntseeg, xws li kev thov Vajtswv, kev nyeem ntawv, thiab kev koom lub koom txoos. Qhov no yuav pab lawv muaj peev xwm ua raws li tej kev cog lus ntxiv.
Thaum koj npaj kev thiab qhia, ua tib zoo xav tias koj yuav qhia tej yam tshiab npaum li cas. Ib lub hom phiaj tseem ceeb ntawm koj txoj kev qhia yog kom pab ib tug neeg txhawb kev ntseeg Yexus Khetos thiaj li yuav hloov siab lees txim. Koj lub hom phiaj tsis yog kom qhia seb koj hais tau npaum li cas.
Cia li qhia nrawm npaum li uas tsim nyog rau tus neeg uas koj qhia. Nug tej yam thiab mloog zoo kom thiaj li to taub nws kawm zoo npaum li cas thiab puas ua raws li koj qhia.
Tej lus tseeb uas koj qhia, nrog tus Vaj Ntsuj Plig Dawb Huv lub hwj chim, yuav pab tib neeg siv lawv txoj kev ywj xaiv kom txhawb lawv txoj kev ntseeg Khetos. Thaum lawv muab siab rau ntseeg tus Tswv ua raws li tej yam uas lawv tau kawm, ces tus Ntsuj Plig yuav qhia lawv tias txoj moo zoo muaj tseeb.
Siv Ntau Yam Cib Fim Kom Qhia Neeg
Tej cib fim qhia neeg los muaj ntau hom, xws li mus xyuas ib tug neeg, sib tham hauv vidi-aus, tham xov tooj, ntaus ntawv, thiab kev sib tham saum huab cua.
Saib Tib Neeg lub Sij Hawm Rau Nqi
Siv tej lus yooj yim qhia thiab tsis txhob siv sij hawm ntev. Tib neeg yeej yuav xav nrog koj sib ntsib thaum koj saib lawv tej lub sij hawm thiab tej kev xav rau nqi. Nug seb lawv muaj sij hawm ntev li cas rau nej txoj kev sib ntsib. Pib thiab kaw kev sib tham thaum lub sij hawm uas tau pom zoo, tsis hais koj qhia tim ntsej tim muag los sis nyob online los yog. Ceev faj txog qhov uas nyob hauv tej qhov chaw, kev hu xov tooj los sis sib tham hauv vidi-aus kim heev.
Koj yeej yuav sib ntsib ob peb zaug kom qhia tag nrho cov ntsiab cai hauv ib zaj lus qhia. Feem ntau, yuav tsum tsis txhob qhia ntev dhau 30 feeb, thiab koj qhia tau ib tug neeg thaum siv 5 feeb xwb. Hloov koj txoj kev qhia raws li tib neeg muaj sij hawm.
Siv Txuj Ci Technology Raws Li Laj Lim Tswv Yim
Koj muaj ntau lub cib fim kom siv txuj ci technology qhia neeg. Ib txhia neeg nyiam qhov uas yooj yim siv tej lub tshuab uas siv hluav taws xob kom sib tham. Cov neeg uas koj mus xyuas tim ntsej tim muag los kuj yuav txais koob hmoov thaum siv txuj ci technology txhawb nqa lawv ntxiv. Sib tham txog tej kev pab uas muaj kom pab nej sib txuas lus. Ces rov qab xyuas thiab sib txuas lus ntau zaus. Cia tej yam uas txhua tus neeg nyiam hloov nej txoj kev sib tham.
Technology xws li kev siv vidi-aus hu lawv yuav pab heev kom qhia cov neeg uas tsis muaj sij hawm ntau los sis nyob deb heev. Tej lub sij hawm yuav yooj yim dua rau cov mej zeej koom ib zaj lus qhia yog siv txuj ci technology.
Pab cov Me Nyuam Kawm
Thaum tus Cawm Seej tau ua hauj lwm qhuab qhia, Nws qhia Nws cov thwj tim, “Cia li tso cov me nyuam yaus los cuag kuv, tsis txhob txwv lawv, rau qhov Vajtswv lub [nceeg vaj] yog cov neeg uas muaj lub siab zoo li cov me nyuam yaus no tug” (Malakaus 10:14). Thaum koj qhia cov me nyuam yaus, cia li hloov koj tus txheej txheem qhia thiab zaj lus qhia kom muaj raws li lawv xav tau. Pab lawv kawm txog txoj moo zoo thaum sib tham txog tej yam uas lawv paub zoo. Ua tib zoo saib xyuas seb lawv puas to taub tej yam uas koj qhia.
Kev Kawm Vaj Lug Kub
Read Lus Qhuab Qhia thiab Kev Khi Lus 84:85. Qhov uas “yuav muab qhov uas [koj] yuav tsum hais rau txhua tus neeg los rau [koj]” txhais li cas? Koj yuav ua li cas kom ua li no thaum koj qhia?
Tus Tswv tau cog lus dab tsi rau cov tub txib uas rau siab ntseeg txog qhov uas lawv yuav paub hais li cas?
Tus Tswv tau hais tias, “Nej yuav tawm mus los ntawm kuv tus Ntsuj Plig lub hwj chim, tshaj tawm kuv txoj moo zoo, ob tug ua ib khub” (Lus Qhuab Qhia thiab Kev Khi Lus 42:6). Nws kuj txib koj thiab koj tus khub “ua ib lub saib” (Lus Qhuab Qhia thiab Kev Khi Lus 38:27). Koj txoj kev qhia yuav muaj hwj chim ntxiv thiab muaj kuab ntxiv yog tias koj thiab koj tus khub ua ib lub siab koom ua ke ua hauj lwm. Sib pauv qhia ib feem ntawm tej zaj lus qhia.
Thaum kawm nrog tus khub, sib tham thiab xyaum seb neb yuav qhia li cas kom neb ob leeg ua ib lub siab. Npaj seb neb yuav ua li cas kom ua hauj lwm ua ke thaum qhia tib neeg nyob online. Ua raws li tej kev cai pov hwm thaum siv technology raws li qhia hauv tshooj 2.
Daim Duab
ob tug tub txib qhia ib tug txiv neej
Thaum koj tus khub qhia, cia li thov Vajtswv pab nws, mloog nws zoo, thiab saib ntsoov nws. Txhawb nqa koj tus khub los ntawm kev ua tus tim khawv thib ob txog tej yam tseeb uas nws tau qhia (saib Amas 12:1). Ua raws li tej kev tshoov siab uas koj txais thaum tus Ntsuj Plig qhia kom koj hais dab tsi.
Cia li xav paub txog tib neeg uas koj qhia tiag tiag. Mloog lawv zoo. Ntsia ntsoov lawv thaum lawv los sis koj hais lus. Ua tib zoo mloog seb lawv teb li cas, thiab mloog seb puas txais tej kev tshoov siab ntawm sab ntsuj plig.
Caw cov Mej Zeej Koom Tes Pab
Caw cov mej zeej pab koj qhia thiab txhawb nqa cov neeg uas koj qhia. Yuav ua li no tim ntsej tim muag los sis nyob virtual. Nyob hauv kev sib ntsib koom tes txhua lub lim tiam, sib sab laj nrog pawg ntseeg cov thawj coj txog qhov uas leej twg yuav pab tau.
Thaum cov mej zeej koom tes qhia thiab ua phooj ywg, lawv yuav muaj tswv yim thiab sib raug zoo ua phooj ywg zoo. Lawv yuav muaj kev xyiv fab los ntawm kev ua tub txib.
Caw cov Mej Zeej Kom Pab Koj Qhia
Ua ntej muaj ib zaj lus qhia, cia li nrog cov mej zeej npaj kom paub tias yuav ua li cas kom ua hauj lwm ua ke. Koj ntaus ntawv los sis hu xov tooj los tau kom thiaj li pom zoo rau tej yam uas nej yuav qhia, leej twg yuav thov Vajtswv, leej twg yuav ua tus coj kev sib tham, thiab lwm yam ntxiv.
Cov mej zeej txoj hauj lwm tseem ceeb tshaj plaws nyob hauv ib zaj lus qhia yog kom mob siab ua tim khawv. Tej zaum koj yuav xav thov cov mej zeej kom lawv qhia tias lawv tau ua li cas kom kawm, lees yuav, thiab ua raws li ib lub ntsiab cai nyob hauv zaj lus qhia. Yog tias lawv yog cov neeg hloov siab los ntseeg, caw lawv qhia tias lawv tau ua li cas kom txiav txim siab koom lub Koom Txoos.
Thaum cov mej zeej xa ntawv rau koj mus qhia, cia li thov kom lawv koom tes pab qhia. Tej zaum cov mej zeej yuav paub ntxiv txog tej xwm txheej no. Nrog lawv sab laj txog qhov uas lawv xav ua dab tsi kom koom tes pab.
Xav seb puas tsim nyog siv txuj ci technology thaum nrog cov mej zeej qhia. Txuj ci technology cia cov mej zeej nrog koj koom ua ke tiam sis tsis tas siv sij hawm ntev npaum li siv thaum mus xyuas tim ntsej tim muag.
Nyob hauv kev sib ntsib koom tes txhua lub lim tiam, nrog pawg ntseeg cov thawj coj npaj kom ib tug mej zeej koom ua ke pab hauv ntau zaj lus qhia uas nws koom tau (saib tshooj 13). Xav seb puas thov cov mej zeej tshiab pab koj qhia.
Kev Kawm Koj tus Kheej Los Sis Nrog tus Khub
Cia li xav seb yog koj tau teem sij hawm qhia ib zaj lus rau ib tsev neeg nyob hauv ib tug mej zeej lub tsev. Sib tham seb koj yuav ua li cas kom cov mej zeej no koom tes pab koj qhia:
Ib pawg ntseeg tus tub txib uas nyuam qhuav ua tub txib rov qab los tsev
Ib tug pov thawj
Ib tug mej zeej tshiab
Pawg txwj laug los sis Koom Haum Niam Tsev tus thawj tswj hwm
Caw cov Mej Zeej Los Txhawb Nqa
Cov mej zeej txawj txhawb nqa cov uas koj qhia ua ntej rov qab mus qhia. Lawv ntaus ntawv, nyeem vaj lug kub ua ke, caw neeg los rau lawv lub tsev los sis rau tej yam ntxim saib ntxim ua, los caw lawv zaum ua ke thaum koom lub koom txoos los tau. Lawv teb tau tej lus nug thiab qhia tias lawv lub neej zoo li cas vim lawv yog mej zeej ntawm lub Koom Txoos. Lawv lub neej thiab kev xam pom pab tau lawv paub tias tib neeg xav li cas thiab lawv siv tej txoj kev uas yeej txawv ntawm cov tub txib txoj kev xav.
Nrog cov mej zeej sib tham txog tej yam uas nej ua tau kom ua hauj lwm ua ke txhawb nqa cov neeg ua ntej rov qab mus qhia lawv.
Qhia Kom Neeg To Taub
Cia li qhia Yexus Khetos txoj moo zoo kom tib neeg yuav to taub. Kawm cov vaj lug kub thiab tej lus qhia kom koj qhia tau meej txog tej ntawd. Koj yim qhia meej tus Vaj Ntsuj Plig Dawb Huv yim muaj cib fim ua tim khawv txog qhov tseeb.
Cia li nug tej lus nug kom pab tib neeg xav txog tej yam uas koj tau qhia. Ces mloog zoo seb lawv puas to taub thiab lees yuav.
Ib feem ntawm kev qhia kom neeg to taub yog kev piav txog tej lus, tej kab lus, thiab tej lub tswv yim. Koj yuav haj yam txawj qhia txoj moo zoo thaum koj:
To taub tej lus uas koj siv.
Txhais tej lus uas lwm tus tsis tshua to taub.
Nug tib neeg tej lus nug xws li “Koj puas kam qhia wb tias koj to taub dab tsi txog tej yam uas wb hais txog?” los sis “Koj puas kam hais lub ntsiab txog tej yam uas wb hais txog?”
Thaum koj qhia cov lus qhuab qhia nyob hauv tshooj 3, cia li xav txog tej lus, kab lus, thiab tej lub tswv yim uas tib neeg tsis tshua to taub. Muab tej lus no txhais thaum siv cov ntawv pab nyob hauv Txoj Moo Zoo cov Ntawv, xws li Phau Qhia txog Vaj Lug Kub, Phau Piav txog Npaivnpaum, thiab Txoj Moo Zoo tej Ntsiab Lus.
Siv tej lus yooj yim qhia thiab tsis txhob siv sij hawm ntev. Tsom ntsoov rau Yexus Khetos txoj moo zoo, thiab pab lawv to taub ntxiv txog cov lus qhuab qhia thiab tej ntsiab cai tseem ceeb. Pab neeg nrhiav kev to taub uas los ntawm tus Vaj Ntsuj Plig Dawb Huv. Thaum lawv to taub ntxiv, lawv yuav los ntseeg txoj moo zoo.
Kev Kawm Vaj Lug Kub
Vim li cas peb yuav tsum ua tib zoo piav txog cov lus qhuab qhia?
Cia li xav txog ib lo lus nug uas koj yuav nug lawv kom kawm ntxiv txog tej yam no. Cia li sau tej lus nug no nyob hauv koj phau ntawv ceev txog kev kawm. Nrog koj tus khub thaum seb koj yuav hloov koj tej lus nug li cas kom thiaj li zoo dua.
Tsis Txhob Nug tej Yam uas Tsis Zoo Los Sis Tsis Nug Ntau Dhau
Nug tej yam tsis tsim nyog los yog ua rau tib neeg npau taws thiab tu siab.
Nram qab no muaj piv txwv txog tej lus nug uas tsis tshua zoo:
Leej twg yog thawj tus yaj saub? (Tej zaum tus neeg yuav tsis paub qhov no.)
Qhov uas peb ceev peb lub cev kom huv yuav pab li cas kom muaj tus Ntsuj Plig thiab qhia tias peb txaus siab coj raws li Vajtswv ib tug yaj saub? (Tsis yog ib lub tswv yim xwb.)
Kev paub txog Vajtswv cov lus txib puas tseem ceeb? (Yuav teb yog los tsis tsis yog xwb, thiab txhua tus yeej paub lo lus teb.)
Muaj dab tsi uas peb ua tau txhua hnub uas yuav pab peb muab siab npuab Vajtswv? (Nov yog ib lo lus nug uas xav kom tus neeg teb ib yam xwb: thov Vajtswv.)
Leej twg yog tus yaj saub tom qab Nau-as? (Tej zaum tus neeg tsis paub qhov no, thiab lo lus nug no yeej tsis tseem ceeb rau koj zaj lus qhia.)
Koj puas to taub kuv hais dab tsi? (Tej zaum tus neeg yuav xav tias koj saib tsis taus nws.)
Kev Kawm Koj tus Kheej Los Sis Nrog tus Khub
Cia li xav txog tej kev xav tau ntawm ib tug neeg uas koj qhia. Sib tham xav seb nws yuav teb neb tej lus nug li cas. Npaj tej lus nug uas yog raws li tej lus qhia hauv tshooj no. Sib tham seb yog vim li cas tej lus nug no yuav ua rau tus Ntsuj Plig los thiab pab tus neeg kawm txog txoj moo zoo.
Mloog
Thaum koj mloog zoo rau lwm tus, koj haj yam to taub lawv. Thaum lawv paub tias lawv tej kev xav tseem ceeb rau koj, ces lawv yuav haj yam txais tau koj tej lus qhia, hais txog lawv lub neej, thiab cog lus ua tej yam.
Thaum koj mloog zoo, koj yuav paub ntxiv tias yuav tsum hloov koj tej lus qhia kom muaj raws li lawv xav tau thiab tej yam lawv nyiam. Koj yuav to taub zoo ntxiv txog qhov uas tej lus tseeb ntawm txoj moo zoo twg yuav zoo rau lawv kawm.
Qhov tseem ceeb, cia li mloog tus Ntsuj Plig tej lus ntxhi zoo. Thaum lwm tus qhia txog lawv tej kev xav, tej zaum tus Vaj Ntsuj Plig Dawb Huv yuav tshoov koj lub siab kom xav txog dab tsi los sis tawm tswv yim. Tus Ntsuj Plig kuj pab tau koj to taub tias lwm tus xav hais dab tsi.
Daim Duab
ob tug tub txib nrog ib tsev neeg tham
Muaj lub Siab Dawb Siab Zoo Mloog
Yuav tsum siv zog thiab muaj lub siab dawb siab zoo kom mloog zoo. Thaum lwm tus sib tham, ua tib zoo tsom ntsoov rau tej yam uas lawv hais. Tsis txhob npaj tej yam uas koj yuav hais.
Txwj Laug Jeffrey R. Holland qhia hais tias: “Qhov uas tseem ceeb dua li kev hais lus yog kev mloog zoo. Cov neeg no tsis yog tej khoom uas tsis muaj sia xwb kom txhawb nqa kev txheeb suav ntawm cov neeg uas ua kev cai raus dej. … Cia li nug cov phooj ywg no seb tej yam twg muaj nqis tshaj rau lawv. Lawv nyiam dab tsi, thiab lawv hlub leej twg? Ces cia li mloog. Yog tias muaj lub cib fim zoo tej zaum nej kuj yuav xav nug seb lawv ntshai dab tsi, lawv ntshaw dab tsi, los sis muaj dab tsi uas lawv xav tias tsis muaj hauv lawv lub neej. Kuv cog lus rau nej tias yuav muaj ib yam dab tsi hauv tej yam lawv hais uas yeej yuav ua rau nej xav txog ib qho tseeb ntawm txoj moo zoo nej thiaj yuav paub ua tim khawv txog qhov ntawd ces nej qhia tau ntxiv. … Yog tias peb muaj kev hlub mloog lwm tus zoo, ces peb tsis tas xav seb peb yuav hais li cas. Tus Ntsuj Plig thiab peb cov phooj ywg yuav qhia peb txog qhov ntawd” (“Witnesses unto Me,” Ensign, Tsib Hlis Ntuj 2001, 15).
Saib Seb Tib Neeg Xav Li Cas
Tib neeg kuj qhia tias lawv xav li cas los ntawm lawv lub cev. Cia li saib lawv zaum li cas, lawv lub ntsej muag zoo li cas, lawv txhais tes ua dab tsi, lawv lub suab zoo li cas, thiab lawv ntsia qhov twg. Saib seb tej yam uas tsis hais lus no pab tau koj to taub tej kev xav ntawm cov uas koj qhia.
Saib seb koj qhia dab tsi los ntawm koj lub cev thiab. Qhia tias koj nyiam mloog thiab xav nrog lawv tham los ntawm koj txoj kev mloog zoo.
Cia Tib Neeg Muaj Sij Hawm Xav thiab Teb
Tus Cawm Seej nug ntau yam uas tib neeg yuav tsum siv sij hawm kom teb tau. Thaum koj nug ib yam dab tsi, cia li tos kom muab sij hawm rau tus neeg ntawd xav thiab teb. Tsis txhob ntshai kev ntsiag to. Feem ntau tib neeg yuav tsum muaj sij hawm xav txog thib teb tej lus nug los sis qhia tias lawv xav li cas.
Tej zaum koj yuav xav tos tom qab koj nug ib lo lus, tom qab koj qhia txog ib zaug thaum hnov tus Ntsuj Plig, los sis thaum nyuaj rau cov neeg qhia tias lawv xav li cas. Ua tib zoo cia lawv muaj sij hawm qhia tag nrho txog lawv tej kev xav ua ntej koj teb. Tsis txhob cuam tshuam lawv thaum lawv hais lus.
Teb nrog Kev To Taub
Thaum ib tug neeg teb ib lo lus nug, cia li qhia tias koj to taub lawv xav li cas thaum pib teb yog tias tsim nyog hais li ntawd. Qhov uas koj paub lawv xav li cas qhia tias koj muaj lub siab hlub tiag. Tsis txhob xav txog qhov kawg ua ntej, hais lus kom kho teeb meem tam sim ntawd, los sis hais zoo li koj paub teb txhua yam.
Nug Seb Koj Puas To Taub tej Yam uas Tib Neeg Hais
Thaum koj xav to taub ib tug neeg hais li cas, cia li nug seb kom paub tseeb tias koj to taub. Piv txwv hais tias, koj nug tau, “Koj hais tias . Puas yog li ntawd?” los sis “Yog kuv to taub zoo, koj xav tias .” Thaum koj tsis paub tseeb tias koj to taub zoo, cia li thov tus neeg rov qab piav.
Ua Li Cas Thaum Kev Sib Tham Nyuaj
Koj yuav pab tib neeg ntau thaum koj qhia lawv txog Yexus Khetos txoj moo zoo. Cov neeg ib txhia yuav xav hais lus ntau. Cov neeg ib txhia xav kom leej twg ua siab dawb mloog lawv hais txog lawv tej teeb meem thiab tej kev xav. Lwm tus neeg los tej zaum yuav xav tswj kav los sis sib cav.
Cia li kawm kom ua tib zoo tswj tej xwm txheej zoo li no nrog kev hlub. Tej zaum koj yuav txawj hloov koj tej lus qhia kom hais txog ib yam uas tus neeg ntawd hais. Los sis tej zaum koj yuav tsum hais tias koj xav sib tham txog qhov uas nws txhawj txog lwm lub sij hawm. Tus Ntsuj Plig pab tau koj kom paub teb li cas thaum muaj xwm txheej nyuaj heev.
Pab Tib Neeg Txaus Saib Qhia tias Lawv Xav Li Cas Tiag
Xwm kom tsis txhob txaj muag, cov neeg ib txhia yuav teb raws li lawv xav tias koj xav kom lawv teb es lawv tsis qhia tias lawv xav li cas tiag. Cia li sim nrog lawv sib raug zoo ua rau lawv txaus siab qhia tias lawv xav li cas tiag rau koj.
Qhov uas koj to taub thiab sib txuas lus nrog tib neeg yuav cia koj pab lawv, ua raws li lawv nyiam thiab xav tau, thiab qhia txog tus Cawm Seej txoj kev hlub rau lawv. Pab kom lawv tso siab rau koj thaum koj ua siab ncaj rau lawv, coj raws li kev tsim nyog raws li cov tub txib tej kev cai, thiab saib lawv rau nqi.
Kev Kawm Koj tus Kheej Los Sis Nrog tus Khub
Xav txog qhov uas koj txawj mloog lwm tus zoo npaum li cas. Sau tej lus teb rau tej lus nug nram qab no nyob hauv koj phau ntawv ceev txog kev kawm. Los sis nrog koj tus khub tham txog tej ntawd.
A = Yeej tsis tseeb, B = Tej lub sij hawm muaj tseeb, C = Feem ntau muaj tseeb, D = Yeej muaj tseeb
Thaum lwm tus hais lus rau kuv, kuv xav txog tej lub sij hawm dhau los uas kuv qhia tau rau lawv es kuv tsis mloog zoo.
Thaum lwm tus qhia kuv txog lawv tej kev xav, kuv sim xav seb yuav zoo li cas yog kuv yog lawv.
Thaum kuv qhia tib neeg, kuv xav txog tej yam uas kuv yuav hais los sis qhia tom qab.
Nyuaj rau kuv mloog los sis to taub tej yam uas lwm tus sim qhia kuv.
Kuv lub siab xav txog yam ub yam no thaum kuv tus khub qhia.
Kuv chim me ntsis yog leej twg nrog kuv tham thiab lwm tus pib hais lus los sis ua kom kuv tsis nco qab yam kuv ua.
Kuv txais kev tshoov siab ntawm sab ntsuj plig kom hais los sis ua ib yam dab tsi, tiam sis kuv tsis quav ntsej txog tej ntawd.
Pab Neeg Nrhiav tej Lus Teb Lawv tej Lus Nug thiab tej Kev Txhawj Xeeb
Rau siab siv zog teb tib neeg tej lus nug thiab pab lawv kho lawv tej teeb meem. Tiam sis, koj tsis lav ris teb lawv txhua lo lus nug. Thaum kawg, tib neeg yuav teb lawv tej lus nug thiab kho lawv tej kev txhawj xeeb lawv tus kheej.
Nco qab tias teb tsis tau tag nrho tej lus nug thiab tej kev txhawj xeeb. Muaj tej lus teb uas meej zuj zus thaum siv sij hawm xav txog tej ntawd. Lwm yam los Vajtswv tseem tsis tau muab tshwm sim. Tsom ntsoov rau kev tsim ib lub hauv paus khov kho txog tej lus tseeb tseem ceeb ntawm txoj moo zoo. Lub hauv paus no yuav pab koj thiab cov uas koj qhia ua siab ntev thiab muaj kev ntseeg sib zog mus lawm tom ntej thaum muaj tej lus nug uas nyuaj teb los sis teb tsis taus.
Muaj tej lub ntsiab cai rau kev teb tej lus nug nyob hauv tshooj no.
Daim Duab
Yexus thiab tus Poj Niam Xamalis Nyob ntawm lub Qhov Dej
To Taub Tib Neeg Txhawj txog Dab Tsi
Yuav muaj tej yam uas koj qhia rau cov neeg uas nyuaj rau lawv ua los yog lawv tsis paub hlo li. Yog tias tib neeg muaj lus nug los sis tej kev txhawj xeeb, cia li ua tej yam kom to taub lawv meej ua ntej. Tej lub sij hawm tib neeg tej kev txhawj xeeb yeej zoo li cov dej khov hauv hiav txwv. Tsuas pom tau lub ntsis me me nyob saum nplaim dej. Tej kev txhawj xeeb no los ib txhia loj heev. Thov Vajtswv kom txais lub txiaj ntsim to taub, thiab coj raws li tus Ntsuj Plig qhia thaum koj teb. Leej Txiv Saum Ntuj Ceeb Tsheej paub txhua tus neeg lub siab thiab lub neej (dej khov hauv hiav txwv tag nrho). Nws yuav pab koj paub tias qhov zoo tshaj rau txhua tus neeg yog dab tsi.
Nrhiav kom to taub lawv txhawj xeeb los ntawm qhov twg los thaum koj nug tej yam thiab mloog lawv teb li cas. Puas muaj kev txhawj xeeb no vim tus Ntsuj Plig tseem tsis tau pom zoo rau lawv txog tej lus tseeb ntawm Kev Muab txoj Moo Zoo Txum Tim Rov Qab Los? Puas muaj vim tus neeg no tsis xav cog lus tias yuav ua neej raws li txoj moo zoo ib lub ntsiab cai? Qhov uas koj paub lub hauv paus ntawm lawv txoj kev txhawj xeeb yuav pab koj paub tias yuav tsum tsom ntsoov rau lawv zaj lus tim khawv los sis lawv txoj kev cog lus.
Siv cov Vaj Lug Kub, Qhov Tseem Ceeb Siv Phau Ntawv Maumoos, Kom Pab Teb tej Lus Nug
Qhia cov neeg tias tej lus tseeb hauv cov vaj lug kub yuav pab teb lawv tej lus nug thiab kho lawv tej kev txhawj xeeb. (Saib “Phau Ntawv Maumoos Teb tej Lus Nug ntawm Sab Siab Ntsws” nyob hauv tshooj 5.) Thaum tib neeg nrhiav kev tshoov siab los ntawm kev kawm thiab kev ua raws li cov vaj lug kub, lawv yuav haj yam txawj hnov thiab coj raws li tus Tswv. Lawv txoj kev ntseeg Nws yuav loj tuaj. Thaum muaj kev ntseeg loj zog, ces lawv yuav muaj ib zaj lus tim khawv, xav hloov siab lees txim, thiab ua kev cai raus dej.
Daim Duab
Thawj Tswj Hwm Henry B. Eyring
“Tej lub sij hawm kuv nyeem cov vaj lug kub kom kawm cov lus qhuab qhia. Tej lub sij hawm kuv nyeem cov vaj lug kub kom txais tej lus qhia. Kuv muaj ib lo lus nug, thiab feem ntau lo lus nug yog ‘Vajtswv xav kom kuv ua dab tsi?’ los sis ‘Nws xav kom kuv xav li cas?’ Feem ntau kuv nrhiav tau tej tswv yim thiab tej kev xav tshiab uas kuv ib txwm tsis tau xav los, thiab kuv txais kev tshoov siab thiab tej lus qhia thiab tej lus teb kuv tej lus nug (Henry B. Eyring, nyob hauv “A Discussion on Scripture Study,” Ensign, Xya Hli Ntuj 2005, 22).
Ib yam uas pab tau yog qhov uas koj piav tias ntau yam uas peb to taub txog Yexus Khetos txoj moo zoo twb yog los ntawm tej yam uas tau muab tshwm sim rau tus Yaj Saub Joseph Smith thiab cov yaj saub tom qab. Tej lus nug seb txoj moo zoo puas muaj tseeb los yeej teb tau thaum muaj ib zaj lus tim khawv tias Joseph Smith yog Vajtswv ib tug yaj saub. Kev nyeem thiab kev thov Vajtswv txog Phau Ntawv Maumoos yeej yog ib txoj kev tseem ceeb kom txais tau zaj lus tim khawv no.
Xaiv ib yam uas yuav caw lawv ua thaum neb qhia ib zaj lus. Ces xav txog tej kev txhawj xeeb uas yuav ua rau ib tug neeg tsis ua raws li neb caw los yog tsis ua raws li nws tau cog lus. Sib tham thiab xyaum seb neb yuav ua li cas kom pab tib neeg kho lawv tej kev txhawj xeeb.
Kev Kawm Koj tus Kheej Los Sis Nrog tus Khub
Nyob hauv koj phau ntawv ceev txog kev kawm, cia li sau ntawv txog qhov uas koj yuav hais li cas txog Joseph Smith thiab Phau Ntawv Maumoos kom teb tej kev txhawj no:
“Kuv ntseeg tias kuv teev tiam Vajtswv raws li kuv xav los tau kuv tsis tas muaj ib txoj kev teev ntuj.”
“Vim li cas kuv yuav tsum tsis txhob haus cawv thaum kuv noj mov yog kuv koom neb lub koom txoos?”
“Vim li cas kuv yuav tsum muaj ib txoj kev teev ntuj?”
Tso Ib Yam Dab Tsi rau Lawv Thov Vajtswv txog thiab Kawm
Thaum txhua lub sij hawm qhia yuav kawg, cia cov neeg muaj dab tsi rau lawv kawm, xav txog, thiab thov Vajtswv kom npaj rau kev sib ntsib tom ntej. Kev nyeem, kev thov Vajtswv, thiab kev xav xav ua ntej rov qab tuaj qhia yuav cia tus Vaj Ntsuj Plig Dawb Huv lub hwj huam los rau lawv lub neej.
Tej zaum koj yuav xav caw cov neeg nyeem tej tshooj hauv Phau Ntawv Maumoos. Los sis tej zaum koj yuav yaum lawv siv tej kev pab ntawm lub Koom Txoos, xws li Txoj Moo Zoo cov Ntawv, nrhiav lus teb rau lawv tej lus nug, kawm txog ib lub ntsiab cai, los sis saib vidi-aus. Ces lwm zaus uas nej rov qab sib ntsib ces nej tham txog qhov no thaum pib los tau.
Daim Duab
ib tug neeg kawm cov vaj lug kub
Tsis txhob muab ntau dhau rau cov neeg ua, qhov tseem ceeb yog nej txoj kev sib tham tsis tshua ntev thiab nej tham ntau zaus.
Kev Kawm Koj tus Kheej Los Sis Nrog tus Khub
Xav txog txhua tus neeg uas koj yuav mus qhia lub lim tiam no. Tej tshooj twg hauv Phau Ntawv Maumoos yuav pab lawv ntau? Muaj lwm yam ntaub ntawv twg uas yuav pab lawv? Cia li sau ntawv txog tej yam uas koj yuav muab rau txhua tus neeg. Thiab sau ntawv txog tej yam uas koj yuav ua kom rov qab xyuas lwm zaus thiab.
Pab cov Neeg uas Muaj Yees
Koj pab tau cov neeg uas nyuaj rau lawv kov yeej tej kev muaj yees thaum koj muaj lub siab hlub sib tham txog lawv tej teeb meem, txhawb nqa lawv, thiab pab lawv paub txog tej yam uas pab tau. Tej zaum koj yuav xav yaum lawv mus rau lub Koom Txoos pawg txhawb nqa cov neeg kov yeej kev muaj yees. Tej pawg no sib ntsib tim ntsej tim muag los sis nyob online. (Saib AddictionRecovery.ChurchofJesusChrist.org.) Yaum lawv siv tej kev pab nyob hauv “Kev Muaj Yees” ntawm Kev Pab lub Neej nyob hauv Txoj Moo Zoo cov Ntawv.
Qhia lawv txog Yexus Khetos txoj moo zoo mus ntxiv. Qhia lawv tias Leej Txiv Saum Ntuj Ceeb Tsheej, tus Cawm Seej, thiab tus Vaj Ntsuj Plig Dawb Huv hlub lawv thiab xav kom lawv ua zoo.
Yaum kom lawv koom lub koom txoos txhua lub lim tiam thiab nrog cov mej zeej ntaus phooj ywg.
Ua siab zoo thiab txhawb nqa lawv, qhov tseem ceeb yog lawv rov qab ua txhaum.
Daim Duab
Yexus ncav tes pab ib tug poj niam
Kev muaj yeej los yeej nyuaj kov yeej, thiab yooj yim rau lawv rov qab ua txhaum. Lub Koom Txoos cov thawj coj thiab cov mej zeej tsis tas xav tsis thoob txog qhov no. Lawv yuav tsum hlub, thiab tsis txhob txiav txim.
Ib tug mej zeej tshiab uas tsis tuaj koom lub koom txoos los tej zaum twb rov qab muaj yees li qub thiab xav tias nws tsis tsim nyog thiab poob siab. Qhov uas ib tug mus xyuas tam sim ntawd kom txhawb nqa thiab yaum tus ntawd pab tau. Cov mej zeej yuav tsum qhia raws li tej yam lawv hais thiab ua hais tias lub Koom Txoos yog ib qho chaw uas yuav nrhiav tau Yexus Khetos txoj kev hlub (saib 3 Nifais 18:32).
Kev Kawm Koj tus Kheej Los Sis Nrog tus Khub
Cia li xav txog ib tug neeg uas koj qhia los sis ib tug mej zeej tshiab los yog tus uas tab tom rov qab los uas sim kov yeej kev muaj yees. Rov qab nyeem “Kev Ntseeg Yexus Khetos” thiab “Kev Hloov Siab Lees Txim” los ntawm “Yexus Khetos txoj Moo Zoo” nyob hauv tshooj 3.
Koj yuav qhia dab tsi rau tus neeg no los ntawm zaj lus qhia ntawd thiab los ntawm tshooj no uas yuav pab nws?
Npaj ib zaj lus qhia kom pab tug neeg no.
Kev Qhia Tib Neeg uas Tsis Tau Ntseeg Yexus Khetos
Cov neeg uas koj qhia ib txhia yuav tsis muaj keeb kwm ntseeg Yexus Khetos los sis tsis ntseeg Leej Txiv Saum Ntuj Ceeb Tsheej thiab Yexus Khetos. Tiam sis, cov neeg no feem coob muaj tej kev ntseeg, tej kab ke, thiab tej qhov chaw uas lawv xav tias yog tej yam dawb ceev. Koj yeej yuav tsum saib lawv tej kev ntseeg thiab kab lig kev cai teev ntuj rau nqi
Pab Lawv To Taub Vajtswv Yog Leej Twg
Tej zaum koj xav paub tias koj yuav tsum hloov koj tej lus qhia li cas rau cov neeg uas tsis muaj keeb kwm ntseeg Yexus Khetos. Tej lub ntsiab cai uas pab txhawb ib tug neeg txoj kev ntseeg los yeej zoo ib yam rau txhua kab lig kev cai. Cia li pab tib neeg to taub tej yam tseeb txog Vajtswv thiab Yexus Khetos ntiag tug hauj lwm. Txoj kev zoo tshaj plaws rau lawv kawm tej yam tseeb no yog thaum tus Ntsuj Plig qhia lawv tus kheej. Tej yam uas koj ua tau kom pab lawv muaj tej lub sij hawm zoo li no los twb sau nram qab no:
Qhia tias Vajtswv yog peb Leej Txiv Saum Ntuj Ceeb Tsheej, thiab Nws hlub peb. Peb yog Nws cov me nyuam. Caw lawv nrhiav kev ua tim khawv ntawd rau lawv tus kheej.
Qhia txog txoj hau kev cawm seej.
Qhia tias Vajtswv tus uas yog Leej Txiv thiab Yexus Khetos tau tshwm sim rau tus Yaj Saub Joseph Smith.
Mob siab ua tim khawv txog txoj moo zoo, tsis hais qhov uas koj xav li cas txog Leej Txiv Saum Ntuj Ceeb Tsheej txoj kev hlub thiab vim li cas koj tau xaiv coj raws li Yexus Khetos.
Pab lawv ntsib lub Koom Txoos cov mej zeej uas yuav piav tias vim li cas lawv ho ntseeg Leej Txiv Saum Ntuj Ceeb Tsheej thiab Yexus Khetos.
Caw lawv kom ua raws li cov lus txib.
Neeg feem coob xav nrog Vajtswv sib raug zoo dua thiab kawm txog lub ntsiab thiab lub hom phiaj ntawm lub neej no. Pab lawv paub tias lawv yog cov me nyuam ntawm Leej Txiv Saum Ntuj Ceeb Tsheej uas hlub lawv thiab Nws muaj ib txoj hau kev rau lawv. Piv txwv hais tias, tej zaum koj yuav pib hais ib yam zoo li no hais tias:
Vajtswv yog peb Leej Txiv Saum Ntuj Ceeb Tsheej, thiab Nws hlub peb. Peb yog Nws cov me nyuam. Peb tau nrog Nws nyob ua ntej peb yug los. Vim peb txhua tus yog Nws cov me nyuam, peb sawv daws yog kwv tij thiab cov muam. Nws xav kom peb rov qab mus cuag Nws. Vim Nws hlub peb, Nws tau npaj ib txoj kev rau peb rov qab mus cuag Nws dhau los ntawm Nws Leej Tub, Yexus Khetos.
Hloov Koj tej Lus Qhia Thaum Yuav Tsum Hloov
Muaj cov neeg hloov siab los ntseeg coob uas tsis ntseeg Yexus Khetos dhau los es lawv hais tias lawv tsis tau to taub ntau yam uas cov tub txib qhia. Tiam sis, lawv twb hnov tus Ntsuj Plig thiab xav ua raws li tej yam uas cov tub txib qhia. Ua txhua yam koj ua tau kom pab cov neeg to taub cov lus qhuab qhia ntawm txoj moo zoo. Ua siab ntev thiab txhawb nqa lawv. Tej zaum yuav tsum siv sij hawm kom tib neeg kawm txog thiab qhia txog lawv tej kev xav. Tej zaum koj yuav tsum hloov koj txoj kev qhia nrawm npaum li cas los sis npaum li cas kom pab lawv.
Tej lub tswv yim yuav pab koj thaum koj npaj qhia neeg uas ib txwm tsis tau ntseeg Yexus Khetos.
Cia li to taub lawv xav paub dab tsi los sis muaj kev xav tau ntawm sab ntsuj plig twg lawv thiaj li xav ntsib koj.
Qhia tej lub ntsiab yooj yim thiab rov qab qhia me ntsis txog txhua zaj lus qhia.
Thov kom lawv qhia koj tias lawv to taub dab tsi thiab tau muaj li cas rau lawv.
Muab tej lo lus thiab tej lub ntsiab cai tseem ceeb txhais lus rau lawv. Tej zaum cov neeg yuav tsis tshua paub ntau lo lus uas koj siv thaum koj qhia.
Rov qab qhia tej lus qhuab qhia ntawm ib zaj lus uas tau qhia ua ntej kom to taub meej. Ua tau li no thaum twg los tau thaum tseem qhia lawv.
Xaiv tej kev caw uas koj caw tau kom cov neeg paub txog cov koob hmoov ntawm txoj moo zoo.
“Yuav Zoo Li Cas Thaum nrog cov Tub Txib ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg Sib Tham”
“Cov Neeg Muslim thiab Tsoom Haiv Neeg Ntseeg hauv Hnub Nyoog Kawg: Kev Ntseeg, tej Kev Cai, thiab Kev Ua Neej”
Kev Kawm Koj tus Kheej Los Sis Nrog tus Khub
Yog tias ua taus, xaiv ib tug neeg hloov siab los ntseeg uas tsis yog ib tug neeg ntseeg Khetos uas ntej nws pib nrog cov tub txib sib ntsib. Npaj ib lub sij hawm rau nej sib ntsib thiab nug seb nws txoj kev hloov siab los ntseeg zoo li cas. Piv txwv hais tias, tej zaum koj yuav xav nug tus neeg ntawd txog tej no:
Muaj dab tsi uas ua rau nws ntseeg Leej Txiv Saum Ntuj Ceeb Tsheej thiab Yexus Khetos.
Thawj zaug uas nws thov Vajtswv zoo li cas.
Thawj zaug uas nws xav tias Vajtswv tau teb nws tej lus thov zoo li cas.
Cov vaj lug kub tau pab li cas kom nws hloov siab los ntseeg.
Kev koom lub koom txoos zoo li cas.
Sau ntawv txog tej yam uas koj tau kawm nyob hauv koj phau ntawv ceev txog kev kawm.
Xav seb puas caw tus neeg no kom pab koj qhia ib tug uas yeej tsis tau ntseeg Yexus Khetos.
Tej lub Tswv Yim rau Kev Kawm Ntawv thiab Kev Siv
Kev Kawm Ntawv Koj tus Kheej
Cia li xav seb yuav zoo li cas yog koj raug tej xwm txheej zoo li no. Koj yuav ua li cas siv tej ntsiab cai thiab tej txuj ci nyob hauv tshooj no kom pab tib neeg no ua zoo zuj zus? Npaj seb koj yuav ua li cas kom siv tej no thaum raug xwm txheej no.
Ib tug uas tab tom npaj ua kev cai raus dej qhia koj tias nws tsis xav nrog neb sib ntsib lawm ntxiv.
Neb nrog ib tug neeg sib ntsib rau zaum xya es tus neeg ntawd los ob peb khub tub txib twb qhia nws ntev li ob xyoos lawm. Twb tsis muaj tej cim uas qhia tias nws ua zoo zuj zus.
Xaiv cov tub txib ib zaj lus qhia. Cia li xaiv ib los sis ob nqe vaj lug kub los ntawm txhua lub ntsiab cai. Xyaum qhia los ntawm tej nqe raws li muaj nyob hauv feem “Siv cov Vaj Lug Kub” nyob hauv tshooj no.
Coj raws li tus Ntsuj Plig thiab muaj lub siab hlub qhia.
Pib qhia.
Hloov lawv tej lus qhia raws li tib neeg xav tau.
Ua tim khawv.
Siv cov vaj lug kub.
Nug tej lus, mloog zoo, thiab pab cov uas lawv qhia kom kho tau lawv tej kev txhawj xeeb.
Yaum cov uas lawv qhia kom ua raws li lawv tau cog lus.
Sib tham txog qhov uas lawv txoj kev ua hauj lwm thiab tej lus qhia tau ua li cas rau Vaj Ntxwv Lamaunais, nws txiv, thiab Anpis.
Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj
Caw cov mej zeej los sis cov uas cov tub txib tab tom qhia rau nej txoj kev sib ntsib. Piav rau pawg ntawd tias nej xav kom cov tub txib haj yam txawj qhia lawv zaj lus qhia uas tseem ceeb kawg. Xaiv ib zaj lus qhia thiab ib qho txuj ci. Hais kom cov tub txib qhia tus neeg los sis cov neeg txog zaj lus qhia uas nej xaiv rau 20 feeb, tsom ntsoov rau qhov txuj ci uas nej twb xaiv. Cia lawv sib pauv tus uas lawv qhia tom qab 20 feeb. Tom qab cov tub txib qhia, hais kom sawv daws koom ua ke. Hais kom tus neeg los sis cov neeg qhia cov tub txib tias tej yam twg zoo tshaj thiab ib yam uas lawv ua tau zoo dua.
Tso vidi-aus txog cov tub txib qhia los yog ntsib tib neeg rau lawv saib. Xaiv ib qho txuj ci thiab sib tham seb cov tub txib tau ua zoo npaum li cas siv tej ntsiab cai rau qhov txuj ci ntawd.
Xaiv ib qho txuj ci, thiab hais txog cov lus qhuab qhia los sis tej nqe vaj lug kub uas txhawb nqa qhov txuj ci ntawd. Cia li qhia cov lus qhuab qhia uas yog lub hauv paus ntawm qhov txuj ci ntawd rau cov tub txib.
Tej lub sij hawm nrog cov tub txib koom ua ke thaum lawv qhia. Npaj ua ntej kom paub tias koj yuav ua li cas kom koom tes pab lawv qhia.
Yaum cov thawj coj hauv zej zog nrog cov tub txib mus qhia.
Ua yam ntxwv thiab pab cov tub txib xyaum ib qho txuj ci qhi uas piav txog nyob hauv tshooj no, xws li kev nug tej lus nug zoo thiab kev mloog zoo.
Ua yam ntxwv txog kev siv cov vaj lug kub thaum qhia cov tub txib nyob hauv thaj chaw rooj sab laj, qhov chaw tshaj tawm txoj moo zoo cov thawj coj pawg sab laj, thiab kev xam phaj. Ua ib yam li ntawd thaum koj nrog lawv qhia.
Pab cov tub txib to taub cov vaj lug kub thiab nyiam cov vaj lug kub zuj zus. Txwj Laug Jeffrey R. Holland tau ntuas qhov chaw tshaj tawm txoj moo zoo cov thawj coj:
“Tsim ib txoj kab lig kev cai tseem ceeb uas cov tub txib nyiam Vajtswv txoj lus. … Ua kom nej cov tub txib paub txog tej kev tshwm sim thiab siv cov txhooj vaj lug kub kom tas lawv lub neej.
“Thaum nej qhia nej cov tub txib—thiab nej qhia lawv txhua lub sij hawm—qhia lawv los ntawm cov vaj lug kub. Cia lawv saib tias nej txais dag zog thiab kev tshoov siab los ntawm qhov twg los. Cia li qhia lawv kom nyiam thiab tso siab rau tej kev tshwm sim uas tau khaws cia.
“[Kuv] qhov chaw tshaj tawm txoj moo zoo tus thawj tswj hwm tau qhia los ntawm Phau Ntawv Maumoos thiab [lwm] phau vaj lug kub txhua zaus peb nrog nws nyob, los yog peb twb xav li ntawd. Thaum nws nrog peb xam phaj nws hais txog cov vaj lug kub ntau. Tej ntsiab lus rau … tej kev sib ntsib los twb tsim los ntawm cov txhooj vaj lug kub. …
“Peb tsis paub qhov no thaum ntawd, tiam sis peb tus thawj tswj hwm tab tom muab cuab yeej rau peb txhais tes sab xis thiab sab laug, ntuas peb kawg siab kawg ntsws kawg dag kawg zog kom tuav rawv tus nqaj hlau peb thiaj li yuav tsis piam sij [saib 1 Nifais 15:23–25]” (“The Power of the Scriptures” kev sib ntsib rau qhov chaw tshaj tawm txoj moo zoo cov thawj coj tshiab, Rau Hli Ntuj 25, 2022).