“Tshooj 11: Pab Tib Neeg Cog Lus thiab Ua Raws Li Lawv Tau Cog Lus,” Qhia Kuv txoj Moo Zoo: Phau Ntawv Pab Qhia txog Yexus Khetos txoj Moo Zoo (2023)

“Tshooj 11,” Qhia Kuv txoj Moo Zoo

Daim Duab

Kuv Muaj Txhua Yam Txaus, los ntawm Yongsung Kim

Tshooj 11

Pab Tib Neeg Cog Lus thiab Ua Raws Li Lawv Tau Cog Lus

Xav Txog Qhov No

Kev ua raws li tau cog lus piv tau li cas rau kev hloov siab los ntseeg?
Qhov uas yus ua raws li tau cog lus piv tau li cas rau kev ua raws li tej kev khi lus?
Kuv yuav caw cov neeg li cas kom pab lawv sab ntsuj plig thiab ua rau lawv txoj kev ntseeg Yexus Khetos muaj zog zuj zus?
Vim li cas yuav tsum mob siab hais ib zaj lus tim khawv?
Kuv yuav cog lus rau neeg tias lawv yuav txais cov koob hmoov twg?
Kuv yuav ua li cas kom pab tib neeg ua raws li lawv tau cog lus?

Kev Hloov Siab Lees Txim, Kev Cog Lus, thiab Kev Hloov Siab Los Ntseeg

Vim koj yog ib tug tub txib thiab ib tug thwj tim ntawm Yexus Khetos, koj xav kom tib neeg txais kev cawm seej (saib Mauxiyas 28:3). Tus Cawm Seej yog “tus uas muaj hwj chim cawm tau” cov neeg uas ua raws li tej kev khi lus uas lawv txais los ntawm cov kab ke pov thawj hwj tseem ceeb, pib ntawm txoj kev cai raus dej (saib 2 Nifais 31:19). Kev caw thiab kev pab cov neeg ua raws li lawv tau cog lus yuav npaj lawv lub siab xav ua kev cai raus dej.

Tib neeg txais kev cawm seej yog tias lawv hloov siab lees txim (saib Hilamas 5:11). Kev hloov siab lees txim yog kev mob siab tig mus rau Yexus Khetos. Kev cog lus yog ib qho tseem ceeb ntawm kev hloov siab lees txim. Thaum koj qhia neeg thiab koj caw lawv cog lus ua tej yam, koj caw lawv hloov siab lees txim.

Kev cog lus txhais tias yus xaiv ib yam uas mam li ua ces yus ua raws li qhov uas yus tau xaiv lawm. Txoj kev ua raws tej lus tseeb ntawm txoj moo zoo tsis tu tsis tseg ua rau neeg hloov siab los ntseeg.

Kev hloov siab los ntseeg yog ib txoj kev hloov ntawm ib tug neeg txoj kev ntseeg, lub siab, thiab lub neej kom lees yuav thiab ua raws li Vajtswv lub siab nyiam. Yog kev txiav txim siab tias yus yuav los ua Yexus Khetos ib tug thwj tim. Muaj kev hloov siab los ntseeg thaum tib neeg muab siab rau ntseeg Yexus Khetos, hloov siab lees txim rau lawv tej kev txhaum, ua kev cai raus dej, txais lub txiaj ntsim Vaj Ntsuj Plig Dawb Huv, thiab nyiaj mus kom txog thaum kawg. Tus Tswv thiab Nws cov yaj saub hais tias txoj kev hloov siab no yog ib txoj kev yug dua tshiab ntawm yus sab ntsuj plig (saib Yauhas 3:3–5; Mauxiyas 27:25–26).

Tus Cawm Seej txoj Kev Theej Txhoj ua rau peb muaj peev xwm hloov siab los ntseeg, thiab tus Vaj Ntsuj Plig Dawb Huv ua rau peb hloov peb lub siab loj heev li no (saib Mauxiyas 5:2; Amas 5:12–14).

Kev hloov siab los ntseeg yog ib tug txheej txheem, tsis yog ib lub sij hawm xwb. Kev pab tib neeg hloov siab los ntseeg Yexus Khetos yeej yog lub ntsiab ntawm koj lub hom phiaj ua ib tug tub txib. Raws li tus Ntsuj Plig qhia, koj caw neeg cog lus ua tej yam uas yuav pab lawv sab ntsuj plig ua zoo zuj zus thiab hnov tus Vaj Ntsuj Plig Dawb Huv lub hwj huam nyob hauv lawv lub neej. Ces koj txhawb nqa cov neeg no ua raws li tej kev cog lus ntawd. Koj pab lawv ua raws li txoj kev ntseeg tias lawv muaj peev xwm hloov siab uas kav ntev (saib Mauxiyas 6:3).

Tib neeg uas ua raws li lawv cov lus cog tseg ua ntej lawv ua kev cai raus dej yuav haj yam ua raws li lawv tej kev khi lus tom qab ntawd. Thaum koj qhia neeg kom ua raws li lawv tau cog lus lawm, koj qhia lawv ua raws li tej kev khi lus. Kev khi lus thiab ua raws li tej kev khi lus yeej yog ib feem tseem ceeb ntawm Yexus Khetos txoj moo zoo thiab Vajtswv txoj hau kev rau Nws cov me nyuam.

Tshooj no muaj tej lus qhia rau kev caw tib neeg, kev cog lus yuav txais koob hmoov, hais lus tim khawv, thiab kev pab neeg ua raws li lawv tau cog lus lawv thiaj li yuav los cuag tus Cawm Seej thiab txais kev cawm seej.

Daim Duab

cov tub txib qhia ib tug poj niam

Caw Tib Neeg

Vim koj yog ib tug uas sawv Yexus Khetos cev, koj caw neeg coj raws li Nws thiab txais kev xyiv fab uas los ntawm Nws txoj moo zoo. Koj caw lawv ua tej yam uas yuav txhawb lawv txoj kev ntseeg Yexus Khetos. Ces koj txhawb nqa lawv ua raws li lawv tau cog lus lawm.

Kev caw thiab kev cog lus yeej tseem ceeb vim rau qhov:

Tej no pab tib neeg ua raws li tej lub ntsiab cai uas lawv kawm kom lawv hnov tus Ntsuj Plig txoj kev ua tim khawv pom zoo rau tej lub ntsiab cai ntawd.
Txoj kev ua raws li tej lus cog tseg yeej yog ib txoj kev uas tib neeg qhia tias lawv hloov siab lees txim (saib Lus Qhuab Qhia thiab Kev Khi Lus 20:37).
Kev hloov siab lees txim pab tib neeg ua raws li txoj kev kaj siab lug thiab kev xyiv fab uas los ntawm Vajtswv txoj kev zam txim. Lawv kuj yuav txais tau Vajtswv txoj kev pab ntxiv kom kov yeej lawv tej teeb meem.
Thaum tib neeg ua raws li lawv tej lus cog tseg ces lawv npaj siab khi lus thiab ua raws li tej kev khi lus ntawd.
Koj yuav qhia txog koj txoj kev hlub tib neeg thiab koj txoj kev ntseeg tias Vajtswv yuav ua raws li Nws tau cog lus thaum koj pab lawv ua raws li lawv tej kev cog lus.

Ua Raws Li tus Ntsuj Plig Coj Koj Caw Neeg

Nrhiav kev kom tus Ntsuj Plig coj koj kom paub caw tib neeg ua dab tsi thiab thaum twg yuav tsum caw lawv. Xav seb tej lus qhia los sis cov lus qhuab qhia twg, uas to taub zoo, yuav pab ib tug neeg li cas kom lees yuav koj txoj kev caw. Kev caw lawv thaum lub sij hawm yog lawm yuav pab tib neeg ua tej yam kom txhawb lawv txoj kev ntseeg. Tej yam no yuav pab lawv hloov lawv lub siab loj heev (saib Mauxiyas 5:2; Amas 5:12–14).

Tej lub sij hawm koj yuav caw neeg ua tej yam me me, xws li kev nyeem ib tshooj vaj lug kub los sis kev los rau kev sib ntsib txais lub cim nco txog. Los yog koj yuav caw lawv ua tej yam loj heev xws li ua kev cai raus dej. Yuav tsum caw tib neeg ua tej yam kom tsim nyog rau qhov uas ib tug neeg sab ntsuj plig muaj zog npaum li cas.

Tej yam uas tus Ntsuj Plig caw zuj zus yeej pab ib tug neeg sab ntsuj plig ua tau zoo zuj zus (saib 2 Nifais 28:30; Lus Qhuab Qhia thiab Kev Khi Lus 93:12–13). Nug koj tus kheej tias, “Tus neeg no ua raws li tej lus cog tseg twg? Nws yuav tsum ua dab tsi ntxiv kom ua tau zoo zuj zus?”

Cia li mloog zoo rau cov uas nrog koj sib tham los yog cov uas koj qhia. Los ntawm tej yam uas koj hnov, cia li nrhiav tus Ntsuj Plig txoj kev coj kom paub tej kev caw twg yuav pab txhua tus neeg ua tau zoo zuj zus kom khi lus dawb ceev.

Tej lub Ntsiab Cai txog Kev Caw Neeg

Yuav tsum ntseeg Yexus Khetos kom caw tau neeg. Cia li ntseeg tias Nws yuav foom koob hmoov rau cov neeg thaum lawv ua raws li tej yam uas koj caw lawv ua.

Cov neeg yuav haj yam hloov siab thaum koj caw lawv ua raws li ib yam tseeb ntawm txoj moo zoo thiab pab lawv paub tias txoj kev hloov siab ntawd yuav pab lawv tau koob hmoov. Lawv yuav hloov siab npaum li lawv hnov tus Ntsuj Plig thiab muaj kev xyiv fab uas los ntawm kev ua raws li Yexus Khetos txoj moo zoo.

Thaum twg koj nrog tib neeg tham, tim ntsej tim muag los sis nyob online, cia li xav seb tej lus caw twg yuav pab lawv txhawb nqa lawv txoj kev ntseeg Yexus Khetos thiab hnov tus Ntsuj Plig. Tej lub sij hawm koj caw tau lawv ua ib yam yooj yim xws li kev rov qab sib ntsib nrog koj los sis tuaj rau lub Koom Txoos txo kev ua si.

Thaum koj npaj qhia ib zaj lus, cia li xav txog txhua tus neeg tej kev xav tau thiab txoj kev ua tau zoo zuj zus. Ua tib zoo kom muaj ib los sis ob peb lo lus caw uas yuav pab tus neeg ntawd ua tau zoo zuj zus nyob hauv koj txoj kev npaj zaj lus qhia.

Ceev faj kom tsis txhob caw ib tug neeg ntau dhau. Ib tug neeg yuav tsum siv sij hawm kom ua thiab kawm los ntawm txhua lo lus caw.

Ua siab loj tiam sis muab hlob heev thaum koj caw neeg cog lus (saib Amas 38:12). Saib taus tib neeg txoj kev ywj siab xaiv.

Kev Kawm Vaj Lug Kub

Vim li cas tej lus cog tseg tseem ceeb?

Ua Siab Zoo thiab Hais Lus Meej Thaum Caw Neeg Ua tej Yam

Feem ntau, kev caw neeg yog ib lo lus nug xws li “koj puas kam,” uas tus neeg yuav tsum teb tias nws kam los yog nws tsis kam. Thaum caw neeg cia li muaj lub siab zoo hais lus meej thiab ncaj. Yuav tsum caw los yog coj neeg kom cog lus tias lawv yuav ua raws li lawv txoj kev ntseeg Yexus Khetos.

Txawm yog koj tej lus caw yuav txawv ib tug dhau ib tug, cia li xav txog tej yam no:

Thaum koj koom lub koom txoos ces muaj sij hawm thiab muaj chaw rau koj teev tiam Vajtswv thiab hnov Nws tus Ntsuj Plig. Kuj yuav pab koj koom siab nrog ib pawg neeg uas yuav txhawb nqa koj thaum koj hloov siab kom nyob ze dua li tus Cawm Seej. Koj puas kam nrog wb mus rau txoj kev sib ntsib txais lub cim nco txog thaum hnub Sunday no?
Peb tau sib tham txog qhov uas vim li cas kev kawm cov vaj lug kub yog ib qho tseem ceeb, yog li ntawd koj puas kam [tej nqe vaj lug kub]? Koj puas kam sau ntawv txog tej kev tshoov siab uas koj txais los yog tej lus nug uas koj muaj? Ces peb yuav nrog koj sib tham txog koj tej kev xav lwm zaus.
Peb tau sib tham txog tus Cawm Seej lub neej thiab Nws cov lus txib. Koj puas kam coj raws li Nws tus yam ntxwv thiab ua kev cai raus dej nyob hauv Nws lub Koom Txoos thiab cog lus rau Nws? (Saib “Kev Caw Neeg Ua Kev Cai Raus Dej thiab Txais Kev Pom Zoo” nyob hauv tshooj 3.)
Koj hais tias koj xav nrog Vajtswv sib raug zoo dua nyob hauv koj lub neej. Ob peb hnub tom ntej no koj puas kam thov Vajtswv koj thiaj li yuav tau koob hmoov uas los ntawm kev thov Vajtswv?
Wb muaj ib qho vidi-aus uas wb xav tias yuav pab koj. Koj puas kam wb qhib los yog xa tuaj rau koj saib? Koj puas kam saib? Koj puas kam wb hu tuaj rau koj tag kis seb koj xav li cas?

Nrhiav tus Vaj Ntsuj Plig Dawb Huv tej kev tshoov siab thaum koj xav txog tej txoj kev kom muaj lub siab zoo hais lus meej thiab ncaj caw lawv.

Kev Kawm Koj tus Kheej Los Sis Nrog tus Khub

Nyob hauv koj phau ntawv ceev txog kev kawm, sau ntawv txog ib txoj kev caw uas yooj yim, ncaj, thiab meej rau txhua txoj kev cog lus hauv ib zaj lus qhia. Yog tias koj twb ua li no ua ntej, rov qab ua thiab muab koj tej lus caw tshiab piv rau tej uas sau dhau los.

Nrog koj tus khub rov qab nyem tej lus caw uas koj sau lawm. Ces sib tham txog tej lus nug no:

Wb yuav ua li cas kom pab neeg to taub tej koob hmoov uas tus Tswv cog lus tias yuav txais thaum wb caw neeg?
Vim li cas lo lus caw no tseem ceeb rau kuv?
Kuv yuav ua li cas kom pab tib neeg hnov Vajtswv txoj kev hlub lawv thaum kuv caw lawv ua tej yam?
Kuv yuav ua li cas kom ua zoo dua thaum pab lwm tus ua raws li kuv tej lus caw?

Xav txog ib tug neeg uas koj qhia. Xyaum hais tej lus caw no zoo li koj caw tus neeg ntawd. Kho koj tej lus caw yog yuav tsum kho.

Cog Lus rau Neeg tias Lawv Yuav Tau Koob Hmoov

Vajtswv cog lus tias Nws yuav foom koob hmoov rau peb yog peb ua raws li Nws cov lus txib (saib Lus Qhuab Qhia thiab Kev Khi Lus 130:20–21). Cov neeg uas ua raws li cov lus txib thiab rau siab ntseeg tas mus li “lawv tau koob hmoov rau txhua txhia yam”thiab yuav “nrog Vajtswv nyob hauv qhov chaw uas muaj kev zoo siab tsis txawj kawg” (Mauxiyas 2:41).

Thaum koj caw neeg cog lus ua tej yam, cia li cog lus rau lawv tias lawv yuav tau koob hmoov thaum lawv ua raws li lawv tej lus cog tseg. Koj yuav paub txog cov koob hmoov no feem ntau thaum koj kawm cov vaj lug kub, cov yaj saub hauv hnub nyoog kawg no tej lus qhia, thiab tej zaj lus qhia nyob hauv tshooj 3. Cia li xav txog cov koob hmoov nyob hauv koj lub neej. Thov Vajtswv ces txiav txim siab koj yuav cog lus tias txhua tus neeg uas koj caw yuav txais cov koob hmoov twg.

Thaum koj caw neeg ua raws li ib txoj lus txib, cia li qhia tej yam no:

Kev ua raws li cov lus txib qhia tias peb hlub Leej Txiv Saum Ntuj Ceeb Tsheej thiab Nws Leej Tub, Yexus Khetos (saib Yauhas 14:15).
Kev ua raws li cov lus txib qhia Vajtswv tias peb tso siab rau Nws (saib Paj Lug 3:5–6).
Vajtswv cov koob hmoov yog los ntawm sab ntsuj plig thiab sab cev nqaij daim tawv (saib Mauxiyas 2:41).
Vajtswv txoj koob hmoov loj tshaj plaws yog txoj sia nyob mus ib txhis (saib Lus Qhuab Qhia thiab Kev Khi Lus 14:7).
Thaum peb mob siab thov Vajtswv thiab ua raws li kev ntseeg, Vajtswv yuav pab peb ua tej yam uas Nws tau txib peb ua (saib 1 Nifais 3:7).
Vajtswv ua raws li Nws tej lus cog tseg kom foom koob hmoov rau peb raws li Nws txoj kev thiab lub sij hawm Nws teem tseg (saib Lus Qhuab Qhia thiab Kev Khi Lus 88:68).

Ntau zaus tib neeg yuav raug kev tawm tsam kom lawv tsis txhob ua raws li cov lus txib. Cia li txhawb nqa cov neeg uas koj qhia, thiab qhia lawv tias Vajtswv yuav foom koob hmoov rau lawv thaum lawv siv zog ua raws li Nws lub siab nyiam. Pab lawv to taub tias kev raug tawm tsam yog ib lub cib fim rau lawv ua zoo zuj zus thaum lawv xaiv coj raws li Yexus Khetos tsis hais thaum nyuaj ua li ntawd los yog (saib 2 Nifais 2:11, 13–16).

Txwj Laug Jeffrey R. Holland qhia hais tias, “Tej koob hmoov los sai sai, tej koob hmoov los lig, thiab ib txhia tsis los txog thaum peb mus saum ntuj ceeb tsheej; tiam sis rau cov uas ua raws nraim li Yexus Khetos txoj moo zoo, cov koob hmoov yeej yuav los”(“An High Priest of Good Things to Come,” Ensign, Kaum Ib Hlis Ntuj 1999, 38).

Kev Kawm Vaj Lug Kub

Tej nqe vaj lug kub no qhia dab tsi txog tus Tswv txoj kev xav foom koob hmoov rau peb?

Kev Kawm Ntawv Koj tus Kheej

Nyeem Lus Qhuab Qhia thiab Kev Khi Lus 82:10 thiab 130:20–21. Ces kawm tej nqe vaj lug kub no. Kos ib txoj kab kom faib ua ob sab hauv koj phau ntawv ceev txog kev kawm. Rau ib sab, sau txoj lus txib uas koj nrhiav tau hauv txhua nqe. Rau sab tod, cia li sau cov lus cog tseg thaum ua raws li txoj lus txib ntawd.

Hais Koj zaj Lus Tim Khawv

Hais koj zaj lus tim khawv thaum twg koj caw neeg thiab cog lus tias lawv yuav tau koob hmoov. Qhia tias koj tau koob hmoov ntau npaum li cas thaum koj tau ua raws li lub ntsiab cai uas koj qhia. Hais koj zaj lus tim khawv txog qhov uas lub ntsiab cai yuav foom koob hmoov rau tus neeg lub neej yog tias nws ua raws li lub ntsiab cai ntawd.

Thaum koj muaj lub siab ncaj hais lus tim khawv ces yuav pab tib neeg hnov tus Vaj Ntsuj Plig Dawb Huv pom zoo rau qhov tseeb. Yog ua li no ces yuav pab lawv txais koj tej lus caw.

Yog xav kawm ntxiv, saib “Hais Koj zaj Lus Tim Khawv” nyob hauv tshooj 10.

Daim Duab

ib pawg thov Vajtswv

Pab Tib Neeg Ua Raws Li Lawv Tau Cog Lus

Thaum tib neeg ua raws li koj caw lawv ua, cia li rov qab xyuas seb puas pab tau lawv ua raws li lawv tau cog lus. Koj pab tib neeg ntseeg Yexus Khetos zuj zus. Koj lub luag hauj lwm yog kom pab lawv txoj kev ntseeg muaj zog ntxiv thiab pab lawv muaj siab xav ua tau zoo zuj zus mus txog thaum lawv hloov siab los ntseeg tag nrho. Tsis txhob caw tib neeg kom hloov siab xwb; cia li txhawb nqa lawv txoj kev hloov siab.

Tus Ntsuj Plig yuav ua tim khawv rau cov neeg thaum lawv muab siab rau ntseeg mus rau kev hloov siab lees txim los ntawm lawv txoj kev ua raws li lawv tau cog lus lawm. Kev ua tim khawv ntawd feem ntau tsis los mus txog thaum “twb sim [lawv] txoj kev ntseeg lawm tso” (Ethaws 12:6). Tsis txhob xav tsis thoob thaum raug tawm tsam. Npaj kev seb koj yuav pab lawv li cas kom dhau kev sim siab lawv thiaj li yuav txais tau tus Ntsuj Plig txoj kev ua tim khawv. Lwm tus mej zeej hauv lub Koom Txoos yeej txhawb nqa lawv los tau.

Tib neeg yeej hnov tus Ntsuj Plig lub hwj huam thaum koj nrog lawv nyob. Cia li qhia tias kev thov Vajtswv, kev kawm vaj lug kub, thiab kev ua raws li koj tau caw lawv ua tseem ceeb npaum li cas lawv thiaj li yuav hnov tus Ntsuj Plig li no thaum lawv nyob lawv tus kheej xwb.

Kev ua raws li tej kev cog lus yeej npaj neeg lub siab kom ua cov kab ke thiab khi lus thaum hloov siab los ntseeg mus tas ib sim neej. Koj txoj kev siv zog pab tau lawv “qhia los ntawm tej uas lawv ua” hais tias lawv xav coj raws li Yexus Khetos (Lus Qhuab Qhia thiab Kev Khi Lus 20:37).

Daim Duab

ob tug poj niam sib khawm

Npaj Sib Tham Me Ntsis Txhua Hnub

Koj txoj kev pab tib neeg ua raws li lawv tej lus cog tseg pib thawj zaug uas koj mus xyuas thiab qhia lawv. Thov kom lawv sau ntawv txog tej uas lawv tau cog lus hauv lawv xov tooj ntawm tes, daim ntawv qhia hnub, los yog ib yam uas koj muab rau lawv.

Nug seb yog tias lawv puas kam koj, los yog ib tug mej zeej uas koom nrog koj mus xyuas lawv, nrog lawv tham me ntsis txhua hnub ua ntej rov qab tuaj qhia lawv. Cia li piav tias lub hom phiaj ntawm tej kev sib tham no yog kom txhawb nqa lawv, thiab piav txog tej yam uas koj ua tau kom ua li ntawd. Tej kev sib tham no yog ib txoj kev kom ua raws li lub ntsiab cai nyob hauv Lus Qhuab Qhia thiab Kev Khi Lus 84:106.

Txiav txim siab txoj kev sib tham twg yuav zoo tshaj, xws li kev mus xyuas rau ib me ntsis, tham xov tooj, ntaus ntawv, los yog xa ib zaj lus saum huab cua. Technology muaj ntau yam kom pab tau neeg nco qab thiab txhawb nqa lawv.

Yaum thiab Pab Neeg Thaum Sib Tham Txhua Hnub

Txhua zaus koj caw neeg ua tej yam, cia li sau ntawv hauv qhov app Qhia Kuv txoj Moo Zoo txog qhov uas koj yuav kom rov qab xyuas tag kis. Thaum neb npaj rau tag kis, nrhiav tus Ntsuj Plig txoj kev coj neb mus thaum neb sib tham seb yuav ua li cas kom pab tib neeg ua raws li lawv tau cog lus.

Thaum koj nrog cov neeg tham txhua hnub ua kom lawv zoo siab thiab muab tej kev txhawb nqa rau lawv. Thov Vajtswv pab lawv. Qhia tias koj hlub thiab to taub lawv thaum koj pab lawv ua raws li lawv tej lus cog tseg. Teb tej lus nug thiab pab lawv kov yeej teeb meem. Yog tias muaj sij hawm, nyeem Phau Ntawv Maumoos ua ke. Muab lub Koom Txoos tej lus tshaj tawm rau lawv saib thiab mloog, tsis hais cov nkauj uas lub Koom Txoos ua uas yuav txhawb nqa lawv. Hwm lawv lub sij hawm thiab tej kev xav.

Pab lawv ntsib lwm tus mej zeej hauv lub Koom Txoos. Thaum tsim nyog ua, thov cov mej zeej pab tib neeg ua raws li lawv tau cog lus (saib tshooj 10).

Qhuas cov neeg uas ua hauj lwm kom ua raws li lawv tau cog lus. Pab lawv pom tias tus Tswv zoo siab txog tej yam lawv ua. Cov neeg no hloov lawv lub neej, es yuav tsum ua hauj lwm thiab ua siab ntev heev kom ua li ntawd. Pab lawv pom cov koob hmoov uas lawv tab tom txais. Qhia tias koj paub tias lawv muaj peev xwm ua qhov no.

Qhia cov uas tsis tau ua raws li lawv cog lus tias koj hlub lawv thiab. Hais rau lawv tias koj xav txhawb nqa lawv thaum nrog lawv tham txhua hnub. Piv txwv hais tias, yog ib tug tseem tsis tau ua raws li koj caw lawv kom nyeem ib tshooj hauv Phau Ntawv Maumoos, cia li hais tias koj xav nrog nws nyeem ua ke. Pab tus neeg no kawm los ntawm tej yam nws ua hais tias kev ua raws li tej lus cog tseg yuav ua rau nws lub neej tau koob hmoov.

Tej zaum yuav tsum sim ntau zaus kom tib neeg ua raws li lawv tau cog lus, thiab tej zaum koj yuav tsum mus xyuas lawv ob peb zaug kom pab lawv. Sib tham seb lawv yuav ua li cas kom kov yeej tej teeb meem ntawm kev ua raws li lawv tau cog lus. Ua siab ntev thiab txhawb nqa lawv, tsis txhob cem los yog txiav txim.

Muaj tus Vaj Ntsuj Plig Dawb Huv lub Hwj Huam Thaum Sib Tham Txhua Hnub

Thaum koj rov qab xyuas tib neeg, thov lawv qhia tias zoo li cas thaum lawv ua raws li lawv tej lus cog tseg. Nug lawv seb lawv tau kawm thiab hnov dab tsi. Qhov no yuav pab lawv to taub tus Ntsuj Plig lub hwj huam hauv lawv lub neej thiab pab lawv paub yuav tsum ua dab tsi ntxiv.

Thaum koj nrog tib neeg sib tham txhua hnub, ib lub hom phiaj tseem ceeb yog kev caw kom muaj tus Vaj Ntsuj Plig Dawb Huv lub hwj huam hauv lawv lub neej. Pab lawv to taub tias yuav tsum ua li cas kom hnov tus Ntsuj Plig thaum koj tsis nyob. Koj txoj kev nrog lawv sib tham txhua hnub yuav tsum ua rau tej yam uas lawv hnov ntawm sab ntsuj plig thaum koj qhia lawv muaj zog ntxiv. Lawv yuav hloov siab los ntseeg thaum lawv hnov tus Vaj Ntsuj Plig Dawb Huv lub hwj chim thiab lub hwj huam.

Qhia tias Koj Hlub Lawv

Tus txheej txheem hloov siab los ntseeg yeej muaj los ntawm txoj kev hlub zoo li Yexus Khetos (saib 4 Nifais 1:15). Nrhiav lub txiaj ntsim muaj lub siab hlub. Kev qhia tias koj hlub neeg tiag tiag pab tau lawv hnov tus Ntsuj Plig hauv lawv lub neej. Koj tej lus qhia tias koj hlub lawv kuj pab tau lawv ua raws li tej yam koj caw lawv ua thiab ua raws li lawv tej lus cog tseg uas ua rau lawv hloov siab los ntseeg.

Thaum koj hlub thiab qhia lwm tus, koj txoj kev hloov siab los ntseeg tus Cawm Seej yuav muaj zog ntxiv.

Kev pab lwm tus neeg hloov siab los ntseeg yog ib txoj hauj lwm dawb ceev. Koj yuav muaj kev xyiv fab uas kav mus ib txhis thaum koj rau siab plhuav rau txoj hauj lwm no thiab rau kev pab lwm tus (saib Mathais 10:39; Mauxiyas 2:17; Amas 27:17–18; Lus Qhuab Qhia thiab Kev Khi Lus 18:10–16).

Kev Kawm Koj tus Kheej Los Sis Nrog tus Khub

Sau ntawv hauv qhov app Qhia Kuv txoj Moo Zoo txog tej yam uas koj npaj kom nrog tus neeg uas koj qhia sib tham txhua hnub. Npaj ob peb hnub tom ntej hais tias koj yuav ua dab tsi kom rov qab xyuas txhua tus neeg.

Xaiv ib yam uas koj yuav caw txhua tus neeg ua thaum koj qhia lawv. Ces xav txog tej kev txhawj xeeb uas yuav ua rau ib tug neeg tsis ua raws li koj caw los yog tsis ua raws li nws tau cog lus. Sib tham thiab xyaum seb neb yuav ua li cas kom pab tib neeg kho lawv tej kev txhawj xeeb

Tus Tswv Xav Kom Tib Neeg Los Nyob Tas Mus Li

Cov tub txib txoj hauj lwm yeej pab tau neeg zoo tshaj thaum lawv cog lus thiab ua raws li lawv tej lus cog tseg kom ua neej raws li txoj moo zoo thiab muaj siab ntseeg hauv lub Koom Txoos tas lawv lub neej. Tsis yog yus xav kom lawv koom lub Koom Txoos xwb. Tus Tswv xav kom lawv los nyob tas mus li (saib Yauhas 15:16). Cia li tsom ntsoov rau qhov no thaum koj qhia thiab caw lawv ua txhua yam. Xwv kom txais tau tag nrho cov koob hmoov uas Leej Txiv Saum Ntuj Ceeb Tsheej xav foom pub rau lawv, cov mej zeej yuav tsum ua raws li txoj moo zoo tas li thaum lawv ua raws li cov lus txib thiab tej kev khi lus uas lawv tau khi thaum lawv muaj siab ntseeg lub Koom Txoos tsis tu tsis tseg.

Nifais qhia hais tias: “Tom qab nej tau los rau hauv txoj kev ti thiab nqaim no lawm, kuv yuav nug tias saib txhua yam puas tau tiav? Saib seb, kuv hais rau nej tias, tsis tau; … nej yuav tsum sib zog mus lawm tom hauv ntej nrog txoj kev ntseeg Khetos uas khov kho, … [thiab yog tias nej] nyiaj mus kom txog thaum kawg, saib seb, Leej Txiv hais li no tias: Nej yuav tau txoj sia nyob mus ib txhis” (2 Nifais 31:19–20).

Ua zoo npaum li koj ua tau kom pab tib neeg tsim nyog txais tau “txoj sia nyob mus ib txhis, uas yog lub txiaj ntsim zoo tshaj plaws ntawm tag nrho Vajtswv tej txiaj ntsim” (Lus Qhuab Qhia thiab Kev Khi Lus 14:7).

Tej lub Tswv Yim rau Kev Kawm Ntawv thiab Kev Siv

Kev Kawm Ntawv Koj tus Kheej

Xaiv ib txoj lus txib los ntawm zaj 4. Nrhiav thiab sau ntawv txog tej nqe vaj lug kub thiab tej lus los ntawm cov yaj saub hauv hnub nyoog kawg no uas piav txog cov koob hmoov uas Vajtswv cog lus tias yuav txais yog ua raws li txoj lus txib no. Xav txog cov koob hmoov uas koj tau txais los ntawm kev ua raws li txoj lus txib no, thiab sau ntawv txog tej no hauv koj phau ntawv ceev txog kev kawm.
Thaum koj nrog koj tsev neeg los sis lwm tus sib tham, nug seb lawv tau koob hmoov li cas thaum lawv ua raws li ib txoj lus txib (piv txwv hais tias, hwm Hnub Caiv kom dawb huv, ua raws li txoj kev cai them ib feem kaum, los sis ua raws li ib txoj lus txib uas nyuaj rau ib tug uas koj qhia ua).
Teb tej lus nug no kom pab koj xaiv tej yam uas koj ua tau zoo dua thaum koj caw neeg ua tej yam. Npaj kev ua zoo dua.
- Cov neeg puas paub tias kuv hlub lawv?
- Kuv puas ntseeg tias lawv yuav tau koob hmoov yog lawv ua raws li wb caw lawv?
- Kuv puas siv sij hawm thiab tsom ntsoov rau kev nrog cov neeg sib tham txhua hnub kom pab lawv ua raws li lawv tau cog lus?
- Wb tej kev npaj zaj lus qhia puas muaj tej lus caw ua tej yam?

Kev Kawm Ntawv Nrog tus Khub thiab Kev Sib Pauv Khub

Rov qab nyeem tej lus caw nyob hauv cov tub txib ib zaj lus qhia. Rau txhua lo lus caw, teb tej lus nug no:
- Tus Tswv tau cog lus tias cov neeg uas ua raws li lawv cog lus yuav tau koob hmoov twg?
- Qhov uas tib neeg ua raws li lub ntsiab cai no yuav pab lawv li cas kom lawv txoj kev ntseeg thiab zaj lus tim khawv muaj zog ntxiv?
- Kev cog lus no yuav pab neeg li cas kom hloov siab lees txim thiab txawj hnov tus Ntsuj Plig?
Los ntawm neb tej cuab yeej npaj kev, sau ntawv txog cov neeg uas neb tau mus sib tham nrog nyob rau ob hnub dhau los. Suav cov uas neb qhia thiab cov mej zeej.
- Rau txhua tus neeg, sau tej lus uas koj tau caw thiab tej yam uas lawv cog lus tias lawv yuav ua.
- Xav txog lwm yam uas neb caw tau lawv ua.
- Sib tham txog qhov uas vim li cas cov neeg no ib txhia tau cog lus ua tej yam neb caw tiam sis lwm tus tsis tau ua.
- Neb yuav ua li cas kom rov qab xyuas txog tej lus caw no?

Koog Chaw Pawg Sab Laj, Thaj Chaw tej Rooj Sab Laj, thiab Qhov Chaw Tshaj Tawm Txoj Moo Zoo cov Thawj Coj Pawg Sab Laj

Sib tham txog tej lub tswv yim tshiab uas yuav pab nej nrog cov neeg uas nej qhia sib tham txhua hnub. Cov tub txib tau ua dab tsi kom nrog cov mej zeej ua hauj lwm zoo? Cov ntawv uas luam tawm los yog cov ntawv hom digital puas zoo siv? Nej ua tau dab tsi thaum tib neeg tsis nyob hauv tsev los yog tsis khoom nrog nej sib ntsib?
Sib tham txog tej yam uas cov tub tau ua zoo kom qhia cov lus txib nyob hauv tshooj 4.

Qhov Chaw Tshaj Tawm Txoj Moo Zoo cov Thawj Coj thiab Qhov Chaw Tshaj Tawm Txoj Moo Zoo cov Pab Cuam

Thaum twg ua tau, koom nrog cov tub txib mus qhia neeg. Pab lawv tsom ntsoov rau txoj kev pab tib neeg ua raws li lawv tau cog lus.
Yaum kom pawg ntseeg cov thawj coj pov thawj hwj, koom haum cov thawj coj, thiab cov mej zeej nrog cov neeg uas cov tub txib qhia sib tham txhua hnub—yog tias cov neeg pom zoo ua li ntawd.