Tshooj 3: Zaj Lus Qhia 4

Hloov Los Ua Yexus Khetos cov Thwj Tim Tas Ib Sim Neej

Tus Me Nyuam Yaj uas Poob Zoo, los ntawm Del Parson

Kev Qhia Zaj Lus Qhia No

Kev cai raus dej yog ib txoj kab ke uas ua rau tib neeg muaj kev cia siab. Thaum peb ua kev cai raus dej, peb qhia tias peb xav coj raws li Vajtswv thiab taug txoj kev uas mus rau txoj sia nyob mus ib txhis. Peb kuj qhia tias peb yuav mob siab hloov los ua Yexus Khetos cov thwj tim kom tas peb ib sim neej.

Zaj lus qhia no los twb sau kom raws li tej kev khi lus uas peb khi thaum peb ua kev cai raus dej. Zaj lus no muaj tej feem no, es txhua feem muaj tej nqe thiab:

• Peb txoj Kev Khi Lus Kom Txaus Siab Ris Yexus Khetos lub Npe

• Peb tej Kev Khi Lus Coj Raws li Vajtswv cov Lus Txib

• Peb txoj Kev Khi Lus Ua Hauj Lwm rau Vajtswv thiab Pab Lwm Tus

• Peb txoj Kev Khi Lus Nyiaj Mus Kom txog Thaum Kawg

Pab tib neeg to taub tias cov ntsiab cai thiab cov lus txib uas koj qhia yog ib feem ntawm txoj kev khi lus uas lawv yuav khi thaum lawv ua kev cai raus dej. Qhia lawv tias txhua yam hauv zaj lus qhia no yuav pab lawv “los cuag Khetos … thiab los txais nws txoj kev cawm seej” (Oonis 1:26; kuj saib 1 Nifais 15:14).

Koj yuav xav siv ob peb zaug kom qhia zaj lus qhia no. Feem ntau yuav tsum tsis txhob qhia ntev tshaj 30 feeb. Yeej zoo dua yog koj mus xyuas ntau zaus thiab siv sij hawm tsis ntev kom qhia me ntsis txog tej yam no.

Npaj tej yam uas koj yuav qhia, thaum twg koj yuav qhia, thiab koj yuav siv sij hawm ntev li cas. Cia li xav tias tib neeg uas koj qhia xav tau dab tsi thiab nrhiav tus Ntsuj Plig tej lus qhia. Koj qhia tau raws li seb muaj dab tsi uas pab tau tib neeg npaj ua kev cai raus dej thiab kev pom zoo.

Ib feem hauv zaj lus qhia no muaj tej lus caw lawv. Nrhiav kom txais kev tshoov siab kom paub thaum twg thiab yuav ua li cas kom caw lawv. Ua tib zoo xav seb txhua tus neeg to taub npaum li cas. Pab nws ua raws li txoj moo zoo ib theem mus ib theem.

poj niam txais lub cim nco txog

Peb txoj Kev Khi Lus Kom Txaus Siab Ris Yexus Khetos lub Npe

Thaum peb ua kev cai raus dej, peb khi lus tias peb yuav coj raws li Yexus Khetos “kawg siab kawg ntsws.” Peb kuj ua tim khawv tias peb “txaus siab ris Khetos lub npe” (2 Nifais 31:13; kuj saib Lus Qhuab Qhia thiab Kev Khi Lus 20:37).

Kev ris Yexus Khetos lub npe txhais hais tias peb nco ntsoov txog Nws thiab siv zog ua neej ua Nws cov thwj tim kom tas peb lub neej. Peb cia Nws txoj kev kaj ci los ntawm peb mus rau lwm tus. Peb saib peb tus kheej tias peb yog Nws li thiab peb saib Nws ua tus tseem ceeb tshaj hauv peb lub neej.

Tej feem nram qab no piav txog ob txoj kev uas peb nco txog thiab coj raws li Yexus Khetos.

Thov Vajtswv Ntau

Kev thov Vajtswv yog kev sib tham nrog Leej Txiv Saum Ntuj Ceeb Tsheej los ntawm ib tug neeg lub siab. Thaum peb thov Vajtswv, peb qhib siab hais lus ncaj rau Nws. Peb qhia Nws tias peb hlub Nws thiab peb ris Nws txiaj rau peb cov koob hmoov. Peb kuj thov kom Nws pab peb, pov hwm peb, thiab coj peb kev. Thaum peb thov Vajtswv tag lawm, peb yuav tsum siv sij hawm tos thiab mloog zoo.

Yexus qhia hais tias, “Nej yuav tsum thov Leej Txiv tas mus li los ntawm kuv lub npe” (3 Nifais 18:19, ntxiv qhov uas ntawv qaij; kuj saib Mauxes 5:8). Thaum peb thov los ntawm Yexus Khetos lub npe, peb nco txog Nws thiab Leej Txiv Saum Ntuj Ceeb Tsheej.

Yexus tau coj yam ntxwv rau peb xyaum thaum peb thov Vajtswv. Peb kawm tau ntau yam txog kev thov Vajtswv thaum peb kawm txog tus Cawm Seej txoj kev thov Vajtswv hauv phau vaj lug kub (saib Mathais 6:9–13; Yauhas 17).

Peb tej zaj lus thov Vajtswv los muaj tej yam no:

• Pib thov koj Leej Txiv Saum Ntuj Ceeb Tsheej.

• Cia li qhia tias peb lub siab xav li cas, xws li peb ris Nws txiaj vim peb tau txais cov koob hmoov.

• Nug tej yam, thov kom Nws qhia peb, thiab thov kom tau koob hmoov.

• Ces thov kom kawg thaum hais tias, “Los ntawm Yexus Khetos lub npe, amees.”

Cov vaj lug kub ntuas peb kom thov Vajtswv thaum sawv ntxov thiab thaum hmo ntuj. Tiam sis, peb thov thaum twg los tau thiab nyob qhov twg los tau. Thaum peb thov Vajtswv peb tus kheej thiab thov Vajtswv nrog peb tsev neeg, ces tej zaum yuav muaj nqis heev yog peb txhos caug thaum peb thov. Peb yeej yuav tsum thov Vajtswv hauv peb lub siab thiab. (Saib Amas 34:27; 37:36–37; 3 Nifais 17:13; 19:16.)

Peb yuav tsum ua tib zoo thov thiab hais txog tej yam nyob hauv peb lub siab. Thaum peb thov, peb yuav tsum tsis txhob hais tib yam raws li tib txoj kev.

Peb thov nrog kev ntseeg, kev mob siab, thiab kev muaj siab xav ua raws li tej yam uas tej lus teb uas peb txais tau. Thaum peb ua li no, Vajtswv yuav coj peb kev thiab pab peb txiav txim zoo. Peb yuav nrog Nws sib raug zoo. Nws yuav qhia qhov tseeb rau peb thiab pab peb to taub. Nws yuav foom koob hmoov rau peb kom muaj kev nplij siab, kev kaj siab lug, thiab lub dag zog.

Kev Kawm Vaj Lug Kub

• 2 Nifais 32:8–9

• Enos 1:1–12

• Amas 6:6; 13:28; 34:17–28; 37:36–37

• 3 Nifais 18:20

• Maulaunais 10:3–5

• Lus Qhuab Qhia thiab Kev Khi Lus 6:22–23; 8:2–3; 9:7–9; 10:5; 19:28; 42:14

Kawm Ntxiv txog lub Ntsiab Cai No

• Phau Qhia txog Vaj Lug Kub: “Thov Vajtswv”

• Phau Piav txog Npaivnpaum: “Thov Vajtswv”

• Txoj Moo Zoo tej Ntsiab Lus: “Thov Vajtswv”

Lus Caw

Koj puas kam thov Leej Txiv Saum Ntuj Ceeb Tsheej txhua hnub?

Kawm cov Vaj Lug Kub

Nifais qhia hais tias, “Mloog ntsoov Khetos tej lus; vim saib seb, Khetos tej lus yuav qhia nej txhua yam uas nej yuav tsum ua” (2 Nifais 32:3; kuj saib 31:20).

Kev kawm vaj lug kub yog ib txoj kev tseem ceeb kom nco txog thiab coj raws li Yexus Khetos. Nyob hauv cov vaj lug kub peb kawm txog Nws lub neej, txoj hauj lwm qhuab qhia, thiab tej lus qhia. Peb kuj kawm txog Nws cov lus cog tseg. Thaum peb nyeem cov vaj lug kub, peb paub txog Nws txoj kev hlub. Peb sab ntsuj plig loj zuj zus, peb txoj kev ntseeg Nws loj zuj zus, thiab peb lub siab to taub zoo. Peb zaj lus tim khawv txog Nws ntiag tug hauj lwm muaj zog ntxiv.

Peb nco qab thiab coj raws li Yexus thaum peb ua raws li Nws cov lus nyob hauv peb lub neej. Peb yuav tsum kawm cov vaj lug kub txhua hnub, qhov tseem ceeb yog Phau Ntawv Maumoos.

Cov vaj lug kub ntawm Yexus Khetos lub Koom Txoos ntawm Tsoom Haiv Neeg Ntseeg hauv Hnub Nyoog Kawg yog phau Npaivnpaum, Phau Ntawv Maumoos, phau Lus Qhuab Qhia thiab Kev Khi Lus, thiab phau lub Hlaws uas Muaj Nqis Heev. Cov vaj lug kub no hu ua “cov txhooj vaj lug kub.”

Kev Kawm Vaj Lug Kub

• 1 Nifais 19:22–23

• 2 Nifais 9:50–51; 25:26; 29:1–13; 31:19–20; 32:3

• Amas 32:28–30

• Lus Qhuab Qhia thiab Kev Khi Lus 1:37–38; 18:34–36

• Yauhas 20:31

• 2 Timautes 3:14–17

• 2 Petus 1:20–21

Kawm Ntxiv txog lub Ntsiab Cai No

• Phau Qhia txog Vaj Lug Kub: “Vaj Lug Kub”

• Txoj Moo Zoo tej Ntsiab Lus: “Vaj Lug Kub”

Lus Caw

Koj puas kam nyeem cov vaj lug kub txhua hnub? (Xav seb puas caw tib neeg nyeem tej tshooj.)

Yexus Khetos qhia ib pawg neeg

Peb tej Kev Khi Lus Coj Raws li Vajtswv cov Lus Txib

Lus Cim: Muaj ntau txoj kev uas peb siv tau kom qhia cov lus txib hauv tshooj no. Piv txwv hais tias, tej zaum koj yuav xav mus ob peb zaug kom qhia tej yam no. Los sis koj yuav xav qhia ib feem thaum koj qhia thawj peb zag lus qhia. Thaum koj qhia txog cov lus txib, ua tib zoo qhia kom txuas rau txoj kev khi lus thaum ua kev cai raus dej thiab txoj hau kev cawm seej.

Thaum peb ua kev cai raus dej, peb nrog Vajtswv khi lus tias peb yuav “coj raws li cov lus txib” (Mauxiyas 18:10; Amas 7:15).

Vajtswv tau muab cov lus txib rau peb vim Nws hlub peb. Nws xav kom peb tau tej yam zoo xwb, tam sim no thiab nyob mus ib txhis li. Vim Nws yog peb Leej Txiv Saum Ntuj Ceeb Tsheej, Nws paub tias peb xav tau dab tsi kom peb sab ntsuj plig thiab sab cev nqaij daim tawv yuav tau zoo. Nws paub tias tej yam twg yuav ua rau peb zoo siab tshaj plaws. Txhua lo lus txib yog ib lub txiaj ntsim, uas Vajtswv muab rau peb kom coj peb kev, pov hwm peb, thiab pab peb ua zoo zuj zus.

Peb tau los rau hauv lub ntiaj teb kom siv peb txoj kev ywj siab xaiv kawm thiab ua zoo zuj zus raws li lub tswv yim (saib Anplaham 3:25). Qhov uas peb xaiv ua raws li Vajtswv cov lus txib—thiab hloov siab lees txim thaum peb ua yuam kev—pab peb ua neej hauv lub ntiaj teb uas nyuaj heev.

Vajtswv cov lus txib yog ib lub hauv paus ntawm lub zog thiab cov koob hmoov (saib Lus Qhuab Qhia thiab Kev Khi Lus 82:8–9). Vim peb coj raws li cov lus txib, peb kawm tias tej kev cai no tsis yog tej nra hnyav uas txwv tsis pub peb muaj kev ywj siab. Kev ywj siab tiag tiag yeej los ntawm kev ua raws li cov lus txib. Kev mloog lus yog ib lub hauv paus uas ua rau peb txais tau txoj kev kaj thiab kev txawj ntse los ntawm tus Vaj Ntsuj Plig Dawb Huv. Kev mloog lus ua rau peb zoo siab kawg nkaus thiab pab peb hloov los ua neeg zoo li Vajtswv vim peb yog Nws cov me nyuam.

Vajtswv cog lus tias Nws yuav foom koob hmoov rau peb yog peb ua raws li Nws cov lus txib. Cov koob hmoov ib txhia yeej nyob ntawm tej lus txib. Nws cov koob hmoov zoo kawg nkaus yog kev kaj siab hauv lub neej no thiab txoj sia nyob mus ib txhis hauv lub neej tom ntej. (Saib Mauxiyas 2:41; Amas 7:16; Lus Qhuab Qhia thiab Kev Khi Lus 14:7; 59:23; 93:28; 130:20–21.)

Vajtswv foom koob hmoov ntawm sab ntsuj plig thiab sab cev nqaij daim tawv. Tej lub sij hawm, peb yuav tsum ua siab ntev tos ntsoov, tso siab tias peb yuav txais tau raws li Nws lub siab nyiam thiab lub sij hawm uas Nws teem tseg (saib Mauxiyas 7:33; Lus Qhuab Qhia thiab Kev Khi Lus 88:68). Muaj cov koob hmoov ib txhia uas peb yuav tsum mloog tus Ntsuj Plig thiab soj ntsuam saib seb peb tau txais. Qhov no yeej muaj tseeb thaum hais txog cov koob hmoov uas peb txais los ntawm tej kev uas yeej ib txwm muaj zoo li qub.

Muaj cov koob hmoov ib txhia uas yuav paub txog thaum yus xav txog yav dhau los. Muaj ib txhia uas tej zaum yuav tsis txais tsuas yog tom qab lub neej no xwb. Txawm yog peb txais Vajtswv cov koob hmoov thaum twg thiab txais li cas los, peb paub tias yuav tau koob hmoov ntawd thaum peb siv zog ua raws li Yexus Khetos txoj moo zoo (saib Lus Qhuab Qhia thiab Kev Khi Lus 82:10).

Vajtswv hlub tag nrho Nws cov me nyuam. Nws ua siab ntev thaum peb qaug zog, thiab Nws zam txim pub rau peb thaum peb hloov siab lees txim.

Ob txoj Lus Txib Tseem Ceeb

Muaj neeg uas nug Yexus hais tias, “Vajtswv txoj kev cai nqe twg yog nqe uas tseem ceeb dua ntais huv tib si?” Nws teb hais tias, “Nej yuav tsum hlub tus Tswv nej tus Vajtswv kawg siab kawg ntsws, kawg plab kawg plawv.”

Ces Yexus hais tias txoj lus txib tseem ceeb thib ob yeej zoo li txoj lus txib thib ib: “Hlub koj tej kwv tij zej zog ib yam li koj hlub koj lub cev” (Mathais 22:36–39). “Tsis muaj dua lwm nqe uas tseem ceeb tshaj ob nqe no lawm” (Malakaus 12:31).

Vim peb yog Vajtswv cov me nyuam ntsuj plig, peb txawj hlub lwm tus. Yeej yog ib feem ntawm peb sab ntsuj plig. Kev ua raws li ob txoj lus txib tseem ceeb no—hlub Vajtswv thiab hlub peb kwv tij zej zog—yeej yog ib tug cwj pwm ntawm Yexus Khetos cov thwj tim.

Vajtswv txoj Kev Hlub

Muaj ntau yam uas peb ua tau kom qhia tias peb hlub Vajtswv. Peb yuav ua raws li Nws cov lus txib (saib Yauhas 14:15, 21). Peb yuav saib Nws ua tus tseem ceeb tshaj hauv peb lub neej, ua raws li Nws lub siab nyiam. Peb yuav xav txog Nws hauv peb lub siab lub ntsws (saib Amas 37:36). Peb yuav ris Nws txiaj rau cov koob hmoov uas Nws foom pub rau peb—thiab ua siab dawb faib cov koob hmoov rau lwm tus (saib Mauxiyas 2:21–24; 4:16–21). Thaum peb thov Vajtswv thiab pab lwm tus, peb qhia tias peb hlub Nws thiab ua rau peb txoj kev hlub loj zuj zus.

Ib yam li lwm cov lus txib, txoj lus txib kom hlub Vajtswv yeej pab peb. Qhov uas peb hlub tiag yog qhov uas peb nrhiav kom tau xwb. Qhov uas peb nrhiav kom tau yuav tswj tau tej yam uas peb xav thiab ua. Tej yam uas peb xav thiab ua tswj tau saib peb coj li cas—thiab yuav rais los mus ua ib tug neeg zoo li cas.

Kev Hlub Lwm Tus

Peb hlub lwm tus vim peb hlub Vajtswv. Tus Cawm Seej tau qhia peb ntau yam uas peb ua tau kom hlub lwm tus (saib, ua piv txwv, Lukas 10:25–37 thiab Mathais 25:31–46). Peb nrog lawv tham thiab cia lawv koom nrog peb hauv peb lub siab thiab hauv peb lub neej. Peb hlub lwm tus thaum peb pab lawv—thaum peb siv peb lub sij hawm txawm yog ua tej yam me li cas los yog. Peb hlub lwm tus thaum peb siv tej txiaj ntsim uas Vajtswv tau foom pub rau peb kom foom koob hmoov rau lawv.

Kev hlub lwm tus yog kev ua siab ntev, ua siab zoo, thiab ua siab ncaj. Yuav tsum ua siab dawb zam txim pub rau lawv. Yuav tsum saib txhua tus neeg rau nqi.

Thaum peb hlub ib tug neeg, peb nrog tus ntawd tau koob hmoov. Peb lub siab loj tuaj, peb lub neej muaj nqis heev, thiab muaj txoj kev xyiv fab ntxiv.

Cov Koob Hmoov

Ob nqe lus txib tseem ceeb tshaj—kom hlub Vajtswv thiab hlub kwv tij zej zog—yog lub hauv paus ntawm tag nrho Vajtswv cov lus txib (saib Mathais 22:40). Thaum peb hlub Vajtswv tshaj txhua yam, thiab hlub lwm tus, txhua yam hauv peb lub neej yuav mus tau rau qhov zoo. Txoj kev hlub no yuav hloov peb txoj kev xam pom, peb txoj kev siv sij hawm, tej yam uas peb xav ua, thiab peb siv sij hawm rau tej lub hom phiaj twg.

Kev Kawm Vaj Lug Kub

• 2 Nifais 31:20

• Mauxiyas 2–5

• Maulaunais 7:45–48; 10:32

• Mathais 22:36–40; 25:31–46

• Malakaus 12:28–33

• Lukas 10:25–37

• Yauhas 13:34–35; 14:15, 21

• 1 Yauhas 4:7–8, 20–21; 5:3

• Yausuas 22:5

Kawm Ntxiv txog lub Ntsiab Cai No

• Phau Qhia txog Vaj Lug Kub: “Kev Siab Hlub,” “Hlub”

• Txoj Moo Zoo tej Ntsiab Lus: “Kev Siab Hlub,” “Hlub”

Coj Raws Li tus Yaj Saub Hais

Vajtswv hu cov yaj saub kom sawv Nws cev hauv lub ntiaj teb no. Dhau los ntawm Nws cov yaj saub, Nws qhia qhov tseeb, coj neeg thiab ceeb toom lawv.

Vajtswv tau hu Joseph Smith los ua thawj tus yaj saub hauv lub caij nyoog kawg no (saib zaj lus qhia 1). Cov yaj saub tom qab Joseph Smith kuj yog cov uas Vajtswv tau hu kom coj Nws lub Koom Txoos, tsis hais tus yaj saub uas coj niaj hnub no. Peb yuav tsum ntseeg tias Vajtswv tau hu tus yaj saub uas muaj sia nyob tam sim no thiab ua raws li nws tej lus qhia.

Cov yaj saub thiab cov thwj tim tej lus qhia yeej pab peb nyob ruaj nrees paub qhov tseeb hauv lub ntiaj teb uas pheej hloov kev cai. Thaum peb ua raws li Vajtswv cov yaj saub qhia, ces kev ntxhov siab thiab txhawj xeeb ntawm lub ntiaj teb yuav kov tsis yeej peb. Peb yuav zoo siab heev hauv lub neej no thiab yuav txais tej lus qhia kom paub ua neej thaum peb nyob mus ib txhis li.

Kev Kawm Vaj Lug Kub

• Mauxiyas 15:11–12

• 3 Nifais 12:1–2

• Lus Qhuab Qhia thiab Kev Khi Lus 1:4, 37–38; 21:1–7; 136:37–38

• Tes Hauj Lwm 10:34–43

• Efexus 2:19–20; 4:11–14

• Amaus 3:7

Kawm Ntxiv txog lub Ntsiab Cai No

• Phau Qhia txog Vaj Lug Kub: “Yaj Saub,” “Niam Yaj Saub,” “Qhia tej uas Yuav Muaj Los Yav Tom Ntej”

• Txoj Moo Zoo tej Ntsiab Lus: “Yaj Saub,” “Qhia tej uas Yuav Muaj Los Yav Tom Ntej”

Lus Caw

Koj puas kam ua raws li tus yaj saub uas muaj sia nyob hnub no tej lus ntuas?

Tej Lus Nug ntawm Kev Xam Phaj rau Kev Cai Raus Dej uas Zoo Nug

Koj puas ntseeg tias [lub Koom Txoos tus Thawj Tswj Hwm tam sim no] yog Vajtswv ib tug yaj saub? Koj xav tias qhov no txhais li cas?

Coj Raws Li Kaum Nqe Lus Txib

Vajtswv tau qhia Kaum Nqe Lus Txib rau ib tug yaj saub puag thaum ub hu ua Mauxes kom coj nws cov neeg mus. Cov lus txib no yeej muaj nqis rau peb hnub no ib yam li puag thaum ub. Cov lus txib no qhia kom peb teev tiam thiab hwm Vajtswv. Kuj qhia peb tias yuav tsum

• “Tsis txhob pe lwm tus vaj tswv, tiam sis pe kuv tib leeg xwb” (Khiav Dim 20:3). Lwm tus “vaj tswv” yog ntau yam, xws li tej khoom, lub hwj chim, los sis kev muaj koob muaj npe.

• “Tsis txhob puab tej mlom … rau nej pe” (Khiav Dim 20:4).

• “Tsis txhob muab kuv lub npe mus hais ua dog ua dig” (Khiav Dim 20:7).

• “Nco ntsoov hnub [caiv] ua hnub tseem ceeb” (Khiav Dim 20:8).

• “Yuav tsum hwm nej niam nej txiv” (Khiav Dim 20:12).

• “Tsis txhob tua neeg” (Khiav Dim 20:13).

• “Tsis txhob deev luag poj niam luag txiv” (Khiav Dim 20:14).

• “Tsis txhob ua tub sab” (Khiav Dim 20:15).

• “Tsis txhob ua tim khawv tsis tseeb ntxo kwv tij zej zog” (Khiav Dim 20:16).

• “Tsis txhob ntshaw luag [tug]” (Khiav Dim 20:17).

Laj Lim Tswv Yim txog Kev Qhia: Tsis Txhob Pe Lwm tus Vaj Tswv

Tib neeg nyob hauv ntau haiv neeg hwm tej khoom uas pab lawv nco txog Vajtswv los sis cov poj koob yawm txwv. Tej lub sij hawm tej khoom no, xws li tej mlom, tej cim teev ntuj, los sis tej thaj me me, yog tej yam uas lawv teev tiam. Peb cov neeg uas koj qhia kom tsom ntsoov ntseeg thiab teev tiam Leej Txiv Saum Ntuj Ceeb Tsheej thiab Yexus Khetos.

Kev Kawm Vaj Lug Kub

• Mauxiyas 13:11–24

• Lus Qhuab Qhia thiab Kev Khi Lus 35:24; 59:5–6

• Khiav Dim 20:1–17

• 2 Kev Cai 5:6–21

Kawm Ntxiv txog lub Ntsiab Cai No

• Phau Qhia txog Vaj Lug Kub: “Kaum Nqe Lus Txib”

• Txoj Moo Zoo tej Ntsiab Lus: “Kaum Nqe Lus Txib”

Lus Caw

Koj puas kam ua raws li Kaum Nqe Lus Txib?

txiv neej ev poj niam

Ua Raws Li Kev Cai Coj Dawb Huv

Txoj kev cai coj dawb huv yog ib qho tseem ceeb ntawm Vajtswv txoj hau kev cawm seej thiab kev tsa nto. Vajtswv twb pom zoo rau ib tug niam tsev txiv tsev pw ua ke kom tsim tau me nyuam thiab qhia tias nkawd sib hlub thaum nkawd sib yuav lawm. Txoj kev pw ua ke thiab lub hwj chim tsim tib neeg yeej yog tej yam zoo nkauj thiab dawb ceev.

Vajtswv txoj kev cai coj dawb huv yog kev tsis txhob pw ua ke thaum tsis tau sib yuav raws li txoj kev cai uas cia ib tug txiv neej thiab ib tug poj niam nkawd sib yuav. Txoj kev cai no kuj hais tias yuav tsum tsis txhob deev luag poj luag txiv tom qab tau sib yuav lawm.

Xwv kom pab peb ua raws li txoj kev cai coj dawb huv, cov yaj saub tau ntuas peb kom xav thiab hais lus dawb huv thiab. Peb yuav tsum tsis txhob saib duab liab qab hlo li. Kom ua raws li txoj kev cai coj dawb huv no, peb yuav tsum coj zoo thiab hnav khaub ncaws npog lub cev.

Cov neeg uas yuav ua kev cai raus dej yuav tsum ua raws li txoj kev cai coj dawb huv.

Kev Hloov Siab Lees Txim thiab Kev Zam Txim

Vajtswv saib tias kev ua txhaum kev cai coj dawb huv yeej yog ib qho loj heev (saib Khiav Dim 20:14; Efexus 5:3). Kev txhaum no siv lub hwj chim dawb huv kom tsim tau neeg ua yuam kev. Tiam sis Nws tseem hlub peb txawm yog peb tau ua txhaum txoj kev cai no. Nws caw peb hloov siab lees txim thiab ua neeg huv dhau los ntawm Yexus Khetos txoj kev txi theej txhoj. Kev nyuaj siab los ntawm kev txhaum los yuav muab pauv thiaj li muaj kev kaj siab lug los ntawm Vajtswv txoj kev zam txim pub rau peb (saib Lus Qhuab Qhia thiab Kev Khi Lus 58:42–43).

Cov Koob Hmoov

Vajtswv tau muab txoj kev cai coj dawb huv rau peb kom foom koob hmoov rau peb thiab cov me nyuam ntsuj plig uas Nws xa los rau hauv lub ntiaj teb. Yuav tsum ua raws li txoj kev cai no kom nyob kaj siab lug thiab muaj kev sib hlub, ib leeg ntseeg ib leeg, thiab koom siab koom ntsws hauv tsev neeg.

Thaum peb ua raws li txoj kev cai coj dawb huv, ces peb yuav txais kev tiv thaiv peb sab ntsuj plig kom tsis raug tej yam phem uas los ntawm kev pw ua ke thaum tsis tau sib yuav. Peb kuj yuav dim tej teeb meem ntawm sab siab ntsws thiab sab cev nqaij daim tawv uas muaj thaum tsis ua raws li txoj kev cai no. Peb yuav ua siab loj rau ntawm Vajtswv xub ntiag (saib Lus Qhuab Qhia thiab Kev Khi Lus 121:45). Peb yuav qhib siab ntxiv mloog tus Vaj Ntsuj Plig Dawb Huv lub hwj huam. Peb yuav npaj siab khi lus hauv lub tuam tsev kom peb tsev neeg nyob ua ke mus ib txhis li.

Ob Tug Nyob Ua Ke

Ib khub niam txiv uas nyob ua ke thaum tsis tau sib yuav raws li txoj kev cai los tsis pub ua kev cai raus dej mus txog thaum nkawd ua raws li txoj kev cai coj dawb huv lawm. Qhov no txhais tias nkawd yuav tsum tsis txhob nyob ua ke—tsis hais ib tug poj niam thiab ib tug txiv neej los sis ib khub uas yog poj niam nyiam poj niam los sis txiv neej nyiam txiv neej—los sis, yog tias yog poj niam thiab txiv neej, nkawd yuav tsum sib yuav. Kuj yuav tsum muab siab rau ntseeg kom hloov siab lees txim raws li hais nyob hauv phau Lus Qhuab Qhia thiab Kev Khi Lus 20:37. Txoj kev sib yuav ntawm ib tug txiv neej thiab ib tug poj niam tseem ceeb heev rau Vajtswv txoj hau kev.

Txoj kev caw neeg ua raws li kev cai coj dawb huv los tej zaum yuav nyuaj heev rau cov neeg uas koj qhia ib txhia. Thov Vajtswv thiab ua tib zoo xav txog txhua tus neeg qhov xwm txheej. Ua raws li tus Ntsuj Plig tej kev tshoov siab thaum koj qhia. Xyuam xim thiab tsis txhob sib tham meej txog tej yam uas lawv tau ua. Thaum twg yuav tsum ua, nrhiav tej lus ntuas los ntawm koj qhov chaw tshaj tawm txoj moo zoo tus thawj tswj hwm.

Kev Kawm Vaj Lug Kub

• 3 Nifais 12:27–30

• Lus Qhuab Qhia thiab Kev Khi Lus 42:22; 59:6; 63:16

• Mathais 5:27–28

• Efexus 5:3–5

Kawm Ntxiv txog lub Ntsiab Cai No

• Phau Qhia txog Vaj Lug Kub: “Kev Coj Dawb Huv”

• Txoj Moo Zoo tej Ntsiab Lus: “Kev Coj Dawb Huv”

Tej Lus Caw

Koj puas kam rau siab coj huv si ntawm koj tej kev xav thiab tej yam koj ua? Koj puas kam coj raws li txoj kev cai coj dawb huv?

Tej Lus Nug ntawm Kev Xam Phaj rau Kev Cai Raus Dej uas Zoo Nug

• Koj to taub dab tsi txog txoj kev cai coj dawb huv, uas txwv tsis pub kev pw ua ke yog ib tug poj niam thiab ib tug txiv neej tsis tau sib yuav raws li txoj kev cai? Koj puas kam ua raws li txoj kev cai no ua ntej thiab tom qab koj ua kev cai raus dej?

• Koj puas tau koom ua ke rho me nyuam tawm? [Lus Cim: Ib tug neeg uas hais tias nws tau ua mas yuav tsum cia qhov chaw tshaj tawm txoj moo zoo tus thawj tswj hwm los sis ib tug pab cuam ua ntej yuav tso cai rau nws ua kev cai raus dej.]

Kev Ua Raws Li Kev Cai Them Ib Feem Kaum

Cov mej zeej hauv lub Koom Txoos muaj cib fim them ib feem kaum. Thaum peb them ib feem kaum, peb pab ua Vajtswv txoj hauj lwm thiab foom koob hmoov rau Nws cov me nyuam.

Txoj kev cai them ib feem kaum los twb pib nyob hauv Phau Qub. Piv txwv hais tias, tus yaj saub Anplaham tau them ib feem kaum ntawm tag nrho tej yam uas nws muaj (saib Amas 13:15; Chiv Keeb 14:18–20).

Lo lus tithe txhia tias ib feem kaum. Thaum peb them ib feem kaum, peb muab peb cov nyiaj ib feem kaum rau lub Koom Txoos (saib Lus Qhuab Qhia thiab Kev Khi Lus 119:3–4; tej paj laum txhais tias yog nyiaj khwv). Tag nrho txhua yam uas peb muaj yog ib lub txiaj ntsim los ntawm Vajtswv los. Thaum peb them ib feem kaum, peb qhia Nws tias peb ris Nws txiaj vim peb muab ib feem uas Nws muab rau peb rov qab muab rau Nws.

Kev them ib feem kaum yog kev qhia tias yus muaj kev ntseeg. Kuj yog ib txoj kev kom hwm Vajtswv. Yexus tau qhia tias peb yuav tsum “xub nrhiav Vajtswv lub nceeg vaj” (Mathais 6:33), thiab kev them ib feem kaum yog ib txoj kev ua li ntawd.

Tus Poj Ntsuam lub Txiaj Toog, los ntawm Sandra Rast

Kev Siv cov Nyiaj Ib Feem Kaum

Cov nyiaj ib feem kaum yeej dawb ceev. Peb muab cov nyiaj ib feem kaum rau ib tug hauv pawg npisov, los sis nyob hauv ntau qhov chaw peb them tau online. Thaum tus neeg hauv pawg npisov txais nyiaj ib feem kaum, lawv xa mus rau lub Koom Txoos lub hauv paus.

Ib pawg uas los ntawm Thawj Pawg Thawj Tswj Hwm, Pawg Kaum Ob tug Thwj Tim, thiab Pawg Thawj Npisov txiav txim siab yuav siv cov nyiaj ib feem kaum li cas kom ua tau Vajtswv txoj hauj lwm (saib Lus Qhuab Qhia thiab Kev Khi Lus 120:1). Lawv siv ua tej yam xws li:

• Ua thiab tu tej tuam tsev thiab tej tsev sib ntsib.

• Kev txhais lus thiab muab cov vaj lug kub luam tawm.

• Txhawb nqa tej yam ntxim ua thiab tej txheej txheem ntawm tej pawg ntseeg ntawm lub Koom Txoos.

• Txhawb nqa cov tub txib txoj hauj lwm nyob thoob plaws lub ntiaj teb.

• Pab ua tej hauj lwm tshawb nrhiav tsev neeg zaj keeb kwm.

• Muab nyiaj rau tej kev kawm ntawv thiab kev kawm ntawv.

Tsis siv nyiaj ib feem kaum kom them cov thawj coj hauv lub Koom Txoos. Lawv ua siab dawb ua hauj lwm tsis them lawv hlo li.

Cov Koob Hmoov

Thaum peb them ib feem kaum, Vajtswv cog lus tias Nws yuav muab cov koob hmoov uas loj tshaj tej yam uas peb muab los. Nws yuav “qhib rooj ntug nchuav koob hmoov ntau nplua mias los rau nej” (Malakis 3:10; saib nqe 7–12). Tej zaum cov koob hmoov no yog los ntawm sab ntsuj plig thiab sab cev nqaij daim tawv.

Kev Kawm Vaj Lug Kub

• Lus Qhuab Qhia thiab Kev Khi Lus 119; 120

• Mathais 6:33

• Henplais 7:1–2

• Chiv Keeb 14:18–20

• Levis Kev Cai 27:30–33

• Malakis 3:7–12

Kawm Ntxiv txog lub Ntsiab Cai No

• Phau Qhia txog Vaj Lug Kub: “Ib Feem Kaum”

• Txoj Moo Zoo tej Ntsiab Lus: “Ib Feem Kaum”

Lus Caw

Koj puas kam ua raws li txoj kev cai them ib feem kaum tom qab koj ua kev cai raus dej?

Tej Lus Nug ntawm Kev Xam Phaj rau Kev Cai Raus Dej uas Zoo Nug

Koj to taub dab tsi txog txoj kev cai them ib feem kaum? Koj puas kam ua raws li txoj kev cai no?

Kev Them Ib Feem Kaum thiab Lwm cov Nyiaj Pab

Qhia cov mej zeej tshiab kom paub muab nyiaj ib feem kaum thiab cov nyiaj pab rau ib tug hauv pawg npisov (siv ib daim pub nyiaj) los sis nyob online (saib donations.ChurchofJesusChrist.org).

Piav hais tias pawg npisov thiab ib tug teev ntawv suav cov nyiaj ib feem kaum thiab lwm cov nyiaj pab. Txhua yam xov xwm txog kev pub nyiaj los tsis qhia rau leej twg li.

Cov mej zeej mus tshaj tawm tias lawv tau them ib feem kaum npaum li cas rau tus npisov thaum xyoo kawg. Nyob hauv kev sib ntsib nrog tus npisov xwb no, lawv qhia tias lawv tau rau siab them ib feem kaum npaum li cas thiab tej zaum yuav txais ib daim xov xwm txog qhov uas lawv pub pes tsawg.

Ua Raws Li txoj Lus Txawj Ntse

Tus Tswv txoj Kev Cai txog Kev Noj Qab Nyob Zoo

Peb lub cev yog tej txiaj ntsim dawb huv los ntawm Vajtswv. Peb txhua tus xav tau ib lub cev nqaij daim tawv kom hloov los ua neeg zoo li Nws. Peb lub cev tseem ceeb heev cov vaj lug kub thiaj li muab peb lub cev piv rau lub tuam tsev (saib 1 Kauleethaus 6:19–20).

Tus Tswv xav kom peb ua zoo rau peb lub cev. Xwv kom pab peb ua li no, Nws tau muab ib txoj kev cai txog kev noj qab nyob zoo tshwm sim hu ua Txoj Lus Txawj Ntse. Txoj kev tshwm sim no qhia peb txog kev noj zaub mov zoo thiab tsis txhob noj thiab haus tej yam uas ua phem rau peb lub cev—qhov tseem ceeb yog txhob haus cawv, luam yeeb, thiab cov dej sov (uas txhais tias dej xas thiab dej kasfes).

Zoo li tej yam uas hais nyob hauv Txoj Lus Txawj Ntse, cov yaj saub niaj hnub no tau ceeb toom peb kom txhob siv tej yam uas ua rau peb raug mob, txhaum kev cai, los sis muaj yees. Cov yaj saub kuj tau ceeb toom txog kev siv tshuaj uas tus kws kho mob sau kom siv raws li qhov tsis yog. (Koj qhov chaw tshaj tawm txoj moo zoo tus thawj tswj hwm yuav teb tej lus nug txog tej yam hauv koj thaj chaw yog tej uas yuav tsis txhob noj thiab haus.)

Cov Koob Hmoov

Tus Tswv tau muab Txoj Lus Txawj Ntse kom peb lub cev nqaij daim tawv thiab sab ntsuj plig yuav tau zoo. Nws cog lus tias peb yuav txais cov koob hmoov zoo kawg nkaus thaum peb ua raws li cov lus txib no. Cov koob hmoov no yog kev noj qab nyob zoo, laj lim tswv yim, txoj kev txawj ntse, thiab kev pov hwm (saib Lus Qhuab Qhia thiab Kev Khi Lus 89:18–21).

Kev ua raws li Txoj Lus Txawj Ntse yuav pab peb hnov tus Vaj Ntsuj Plig Dawb Huv tej kev tshoov siab. Txawm yog peb sawv daws raug kev mob kev nkees, yog peb ua raws li txoj kev cai no ces peb yuav noj qab nyob zoo hauv peb lub cev thiab lub siab lub ntsws.

Cov neeg uas yuav ua kev cai raus dej yuav tsum ua raws li Txoj Lus Txawj Ntse.

Yog xav paub pab cov neeg uas quav yeeb quav cawv, saib tshooj 10.

Kev Kawm Vaj Lug Kub

• Lus Qhuab Qhia thiab Kev Khi Lus 59:15–20; 88:124; 89

• 1 Kauleethaus 6:19–20

Kawm Ntxiv txog lub Ntsiab Cai No

• Phau Qhia txog Vaj Lug Kub: “Txoj Lus Txawj Ntse”

• Txoj Moo Zoo tej Ntsiab Lus: “Kev Noj Qab Nyob Zoo,” “Txoj Lus Txawj Ntse”

• Kev Pab lub Neej: “Kev Muaj Yees”

Lus Caw

Koj puas kam ua raws li Txoj Lus Txawj Ntse?

Tej Lus Nug ntawm Kev Xam Phaj rau Kev Cai Raus Dej uas Zoo Nug

Koj to taub dab tsi txog Txoj Lus Txawj Ntse? Koj puas kam ua raws li Txoj Lus Txawj Ntse ua ntej thiab tom qab koj ua kev cai raus dej?

Hwm Hnub Caiv Kom Dawb Huv

Ib Hnub So thiab Teev Tiam Vajtswv

Hnub Caiv yog ib hnub dawb huv uas Vajtswv tau tsa rau peb txhua lub lim tiam kom so tsis ua hauj lwm li txhua hnub ua thiab siv sij hawm teev tiam Nws. Ib nqe lus ntawm Kaum Nqe Lus txib uas tus Tswv muab rau Mauxes yog kom “nco ntsoov hnub [caiv] ua hnub tseem ceeb” (Khiav Dim 20:8; kuj saib nqe 9–11).

Nyob hauv kev tshwm sim niaj hnub nim no, tus Tswv tau qhia tias Hnub Caiv yog “ib hnub uas tau muab los rau nej so ntawm nej tej kev khwv, thiab muab nej tej kev hwm pub rau tus uas Siab Tshaj Plaws” (Lus Qhuab Qhia thiab Kev Khi Lus 59:10). Nws kuj hais tias yuav tsum saib Hnub Caiv ua ib hnub rau kev xyiv fab, kev thov Vajtswv, thiab kev ua Vajtswv tsaug (saib nqe 14–15).

Ib feem ntawm peb txoj kev teev tiam nyob rau Hnub Caiv, peb koom kev sib ntsib txais lub cim nco txog txhua lub lim tiam. Nyob hauv kev sib ntsib no, peb teev tiam Vajtswv thiab txais lub cim nco txog kom nco txog Yexus Khetos thiab Nws txoj Kev Theej Txhoj. Thaum peb txais lub cim nco txog, peb rov qab nrog Vajtswv khi lus thiab qhia tias peb txaus siab hloov siab lees txim rau peb tej kev txhaum. Kev noj lub cim nco txog yog qhov tseem ceeb ntawm peb txoj kev hawm rau Hnub Caiv.

Nyob hauv lub Koom Txoos peb kuj koom tej chav kawm rau peb kawm ntxiv txog Yexus Khetos txoj moo zoo. Peb txoj kev ntseeg loj tuaj thaum peb kawm cov vaj lug kub ua ke. Peb txoj kev hlub loj tuaj thaum peb ib leeg pab thiab txhawb nqa ib leeg.

Peb so tsis khwv ua hauj lwm nyob rau Hnub Caiv, tiam sis tsis tas li ntawd xwb, peb kuj tsis mus yuav khoom thiab ua lwm yam uas ua kom peb xav tias yog lwm hnub xwb. Peb tsis ua tej yam uas neeg ntiaj teb ua nyob rau Hnub Caiv thiab tsom ntsoov rau tej yam ntawm sab ntsuj plig.

Ib Hnub rau Kev Ua Zoo

Kev ua zoo nyob rau Hnub Caiv yeej tseem ceeb npaum li tej yam uas peb tsis ua kom hnub ntawd thiaj li dawb huv. Peb kawm txog txoj moo zoo, txhawb nqa kev ntseeg, nrog lwm tus sib raug zoo, pab lwm tus, thiab koom ua ke ua tej yam zoo nrog tsev neeg thiab phooj ywg.

ib khub nyeem phau vaj lug kub

Cov Koob Hmoov

Kev hwm Hnub Caiv kom dawb huv yog kev qhia tias peb hwm peb Leej Txiv Saum Ntuj Ceeb Tsheej thiab Yexus Khetos. Thaum peb ua tej yam nyob rau Hnub Caiv kom sib haum nrog Vajtswv lub siab nyiam rau hnub ntawd, peb yeej yuav muaj kev xyiv fab thiab kev kaj siab lug. Peb sab ntsuj plig thiab sab cev nqaij daim tawv yuav muaj zog. Peb yuav nyob ze Vajtswv thiab nrog tus Cawm Seej sib raug zoo. Peb yuav ceev peb tus kheej txhij zog kom tej yam ntawm lub ntiaj teb txhob ua rau peb ceb (Lus Qhuab Qhia thiab Kev Khi Lus 59:9). Hnub Caiv yuav los ua ib hnub zoo siab (Yaxayas 58:13; kuj saib nqe 14).

Kev Kawm Vaj Lug Kub

• 3 Nifais 18:1–12

• Lus Qhuab Qhia thiab Kev Khi Lus 59:9–19

• Mauxes 3:1–3

• Mathais 12:10–13

• Khiav Dim 20:8–11; 31:12–13, 16–17

• Yaxayas 58:13–14

Kawm Ntxiv txog lub Ntsiab Cai No

• Txoj Moo Zoo tej Ntsiab Lus: “Hnub Caiv”

• Phau Qhia txog Vaj Lug Kub: “Hnub Caiv”

Tej Lus Caw

• Koj puas kam hwm Hnub Caiv kom dawb huv thiab mus rau lub Koom Txoos txhua lub lim tiam?

• Koj puas kam rau siab txais lub cim nco txog tom qab koj ua kev cai raus dej?

• Koj puas kam nrog wb mus ntsib tus npisov (los sis ceg ntseeg tus thawj tswj hwm) ntawm peb pawg ntseeg?

Tej Lus Nug ntawm Kev Xam Phaj rau Kev Cai Raus Dej uas Zoo Nug

Koj to taub dab tsi txog kev hwm Hnub Caiv kom dawb huv, tsis hais kev txais lub cim nco txog txhua lub lim tiam thiab kev pab lwm tus? Koj puas kam ua raws li tej kev cai no ua ntej thiab tom qab koj ua kev cai raus dej?

Ua Hauj Lwm rau Hnub Caiv

Tej lub sij hawm cov mej zeej hauv lub Koom Txoos yuav tsum ua hauj lwm nyob rau Hnub Caiv vim cov neeg ntiav lawv ua hauj lwm yuam ua li ntawd los sis yuav tsum khwv nyiaj los sis pab zej zog. Thaum raug xwm txheej li no, cov mej zeej hwm Hnub Caiv npaum li lawv ua tau. Cov mej zeej nrog lawv cov thawj coj tham txog qhov no los tau.

Saib Taus thiab Ua Raws Li txoj Kev Cai

Tsoom Haiv Neeg Ntseeg hauv Hnub Nyoog Kawg ntseeg tias yuav tsum ua raws li kev cai thiab ua cov pej xeem zoo (saib Lus Qhuab Qhia thiab Kev Khi Lus 134; Tej Nqe Kev Ntseeg 1:12). Xav kom cov mej zeej ntawm lub Koom Txoos pab lwm tus kom ua rau lawv zej zog thiab lub teb chaws zoo dua. Kuj xav kom lawv muaj hwj huam kom tib neeg xav coj ncaj ncees hauv lub sawm fem no thiab lub tseem fwv.

Xav kom lub Koom Txoos cov mej zeej koom tes pab hauv lub tseem fwv thiab tus txheej txheem xaiv nom tswv raws li txoj kev cai hais. Cov mej zeej uas ua hauj lwm hauv lub tseem fwv yeej ua tej hauj lwm ntawd vim lawv yog cov pej xeem uas xav pab, lawv tsis yog cov uas sawv cev rau lub Koom Txoos.

Kev Kawm Vaj Lug Kub

• Lus Qhuab Qhia thiab Kev Khi Lus 58:21; 134

• Tej Nqe Kev Ntseeg 1:12

Kawm Ntxiv txog lub Ntsiab Cai No

• “Kev Pab Tseem Fwv thiab cov Pej Xeem” nyob hauv nqe 38.8 ntawm Phau Qhia Kev Coj lub Koom Txoos

• Txoj Moo Zoo tej Ntsiab Lus: “Kev Ua Pej Xeem”

Lus Caw

Koj puas kam ua raws li tej kev cai ntawm lub teb chaws uas koj nyob?

Tej Lus Nug ntawm Kev Xam Phaj rau Kev Cai Raus Dej uas Zoo Nug

Koj puas tau ua txhaum kev cai loj heev? Yog koj tau ua, tam sim no puas yog ceev xwm saib xyuas koj los sis twb tawm tsev kaw? [Lus Cim: Ib tug neeg uas hais tias nws tau ua mas yuav tsum cia qhov chaw tshaj tawm txoj moo zoo tus thawj tswj hwm los sis ib tug pab cuam ua ntej yuav tso cai rau nws ua kev cai raus dej.]

Tus Hlob Tshaj Plaws hauv lub Nceeg Vaj, los ntawm J. Kirk Richards

Peb txoj Kev Khi Lus Ua Hauj Lwm rau Vajtswv thiab Pab Lwm Tus

Kev Pab Lwm Tus

Thaum peb ua kev cai raus dej, peb khi lus tias peb yuav ua hauj lwm rau Vajtswv thiab pab lwm tus. Kev pab lwm tus yog ib txoj kev tseem ceeb uas peb ua hauj lwm rau Vajtswv (saib Mauxiyas 2:17). Tus yaj saub Amas qhia cov uas xav ua kev cai raus dej tias lawv yuav tsum “ib leeg txaus siab ris ib leeg tej nra, … nyuaj siab nrog cov uas nyuaj siab … , thiab nplij cov uas xav tau txoj kev nplij siab” (Mauxiyas 18:8–9).

Tsis ntev tom qab tau ua kev cai raus dej, cov mej zeej tshiab txais kev hu ua hauj hauv lub Koom Txoos. Tej kev hu no los tib neeg muaj siab dawb ua thiab tsis them nyiaj rau lawv. Thaum peb lees txais thiab rau siab ua hauj lwm, peb txoj kev ntseeg yuav loj tuaj, peb yuav muaj txuj ci ntxiv, thiab peb yuav foom koob hmoov rau lwm tus.

Ib feem ntxiv ntawm peb txoj kev pab lwm tus hauv lub Koom Txoos yog kev ua ib tug “kwv tij uas txhawb pab” los sis “viv ncaus uas txhawb pab.” Thaum ua txoj kev lav ris no, peb ua hauj lwm pab tib neeg thiab lawv tsev neeg.

Vim peb yog Yexus Khetos cov thwj tim, peb nrhiav cib fim pab lwm tus txhua hnub. Ib yam li Nws, peb “mus … ua tej hauj lwm zoo” (Tes Hauj Lwm 10:38). Peb pab peb cov neeg zej zog thiab lwm tus. Nyob hauv tej qhov chaw uas muaj, peb siv JustServe koom tes pab. Peb txhawb nqa lub Koom Txoos tej hauj lwm pab neeg txom nyem thiab koom tes pab thaum muaj xwm txheej loj heev.

Kev Kawm Vaj Lug Kub

• Mauxiyas 2:17; 4:15–16, 26; 18:8–10; 23:18

• Lus Qhuab Qhia thiab Kev Khi Lus 42:38

• Mathais 25:31–46

• Lukas 10:25–37

• Yakaunpaus 1:27; 2:17

Kawm Ntxiv txog lub Ntsiab Cai No

• Phau Qhia txog Vaj Lug Kub: “Pab”

• Txoj Moo Zoo tej Ntsiab Lus: “Pab”

Lus Caw

Koj puas kam ua qhov uas Vajtswv hu koj ua los sis txib ua yog tias hu koj ua li ntawd (tsis hais kev txib ua ib tug kwv tij uas txhawb pab los sis viv ncaus uas txhawb pab)?

cov neeg sib tham

Qhia txog Txoj Moo Zoo

Ib feem ntawm peb txoj kev khi lus thaum ua kev cai raus dej yog qhov uas peb cog lus tias peb yuav “ua tim khawv txog Vajtswv” (Mauxiyas 18:9). Ib txoj kev rau peb ua tim khawv yog thaum peb qhia Yexus Khetos txoj moo zoo. Qhov uas peb pab lwm tus txais txoj moo zoo yeej yog ib yam kev pab uas ua rau peb xyiv fab heev (saib Lus Qhuab Qhia thiab Kev Khi Lus 18:15–16). Yog kev qhia lwm tus txog peb txoj kev hlub.

Thaum peb txais cov koob hmoov los ntawm kev ua raws li txoj moo zoo, peb yeej xav qhia lwm tus txog cov koob hmoov ntawd. Peb tsev neeg, phooj ywg, thiab cov uas peb paub feem ntau yuav xav paub yog tias peb rau siab ntseeg coj yam ntxwv rau lawv pom tias txoj moo zoo ua rau peb txais tau cov koob hmoov hauv peb lub neej. Peb qhia tau txoj moo zoo raws li tej yam uas ib txwm ua thiab tsis txawv txav (saib Phau Qhia Kev Coj lub Koom Txoos, tshooj 23).

Peb caw lwm tus nrog peb koom ua ke thaum ua tej yam ntxim saib ntxim ua kom pab lwm tus thiab ua si hauv zej zog thiab hauv lub Koom Txoos. Peb caw tau lawv nrog peb mus rau kev sib ntsib hauv lub Koom Txoos los sis kev sib ntsib muab neeg ua kev cai raus dej. Peb caw tau lawv saib vidi-aus nyob online uas piav txog Yexus Khetos txoj moo zoo, caw tau lawv nyeem Phau Ntawv Maumoos, los sis mus saib thaum qhib lub tuam tsev. Muaj ntau yam uas peb caw tau tib neeg los ua. Feem ntau, kev caw tib neeg tsuas yog kev thov peb tsev neeg, phooj ywg, thiab neeg zej zog nrog peb koom ua ke thaum ua yam uas peb yeej yuav ua.

Yog peb thov, Vajtswv yuav pab peb pom tej lub cib fim kom qhia txoj moo zoo thiab qhia lwm tus tias qhov ntawd ua rau peb txais tau cov koob hmoov.

Yog xav kawm ntxiv txog kev siv tej ntsiab cai ntawm kev hlub, qhia, thiab caw, saib “Koom Siab Nrog cov Mej Zeej” nyob hauv tshooj 9.

Kev Kawm Vaj Lug Kub

• Lus Qhuab Qhia thiab Kev Khi Lus 88:81

• Mathais 28:19–20

Kawm Ntxiv txog lub Ntsiab Cai No

• Phau Qhia txog Vaj Lug Kub: “Tub Txib txoj Hauj Lwm”

• Txoj Moo Zoo tej Ntsiab Lus: “Tub Txib txoj Hauj Lwm”

Tej Lus Caw

• Koj puas kam thov Vajtswv pab cov tub txib thiab kom muaj cib fim qhia txoj moo zoo?

• Koj puas kam nrhiav kev ua raws li tej ntsiab cai txog kev hlub, kev qhia, thiab kev caw koj cov phooj ywg, cov txheeb ze, thiab lwm tus?

Yoo Mov thiab Nyiaj Yoo Mov

Vajtswv tau tsa txo kev cai yoo mov kom muaj ib txoj kev rau peb muaj zog ntawm sab ntsuj plig ntxiv thiab pab cov neeg uas xav tau kev pab.

Kev yoo mov txhais tias yus tsis noj mov thiab haus dej rau ib lub sij hawm. Lub Koom Txoos muab thawj Hnub Caiv Sunday txhua lub hli tseg cia ua ib hnub yoo mov. Ib hnub yoo mov txhais tias yus tsis noj mov thiab haus dej rau 24 teev yog tias yus muaj peev xwm ua li ntawd. Lwm yam uas ua nyob rau Hnub Caiv yoo mov yog kev thov Vajtswv thiab kev ua tim khawv. Xav kom peb yoo mov lwm lub sij hawm thaum peb xav tias tsim nyog ua li ntawd.

Kev Muaj Zog ntawm Sab Ntsuj Plig Ntxiv

Kev yoo mov pab tau peb txo hwj chim, nrog Vajtswv sib raug zoo ntxiv, thiab ua rau peb sab ntsuj plig muaj zog ntxiv. Ua ntej Nws pib ua Nws txoj hauj lwm qhuab qhia, Yexus Khetos yoo mov (saib Mathais 4:1–2). Cov vaj lug kub hais ntau zaj txog cov yaj saub thiab lwm tus uas yoo mov kom lawv sab ntsuj plig yuav muaj zog ntxiv thiab kom lawv thov tau cov koob hmoov rau lawv tus kheej los sis lwm tus.

Kev yoo mov thiab kev thov Vajtswv yeej koom ua ke. Thaum peb yoo mov thiab muaj kev ntseeg thov Vajtswv, ces peb haj yam txais tau kev tshwm sim. Peb kuj txawj paub qhov tseeb thiab to taub Vajtswv lub siab nyiam.

Pab cov uas Xav Tau Kev Pab

Thaum peb yoo mov, peb muab nyiaj pub rau lub Koom Txoos kom pab cov neeg uas xav tau. Cov nyiaj no hu ua nyiaj yoo mov. Xav kom peb muab nyiaj ntau npaum li qhov uas peb yuav siv yog tias yuav zaub mov noj yog tsis yoo mov. Xav kom peb ua siab dawb muab thiab muab ntau dua li qhov uas yuav siv yog tias yuav zaub mov. Kev muab nyiaj yoo mov yog ib txoj kev rau peb pab lwm tus.

Lawv siv cov nyiaj yoo mov kom muab zaub mov thiab lwm yam rau cov neeg uas xav tau, nyob hauv zej zog thiab thoob plaws lub ntiaj teb. Yog xav kawm ntxwv txog txoj kev muab nyiaj yoo mov, saib “Kev Them Ib Feem Kaum thiab Lwm cov Nyiaj Pab” nyob hauv zaj lus qhia no.

Kev Kawm Vaj Lug Kub

Yoo Mov

• Amas 5:45–46; 6:6; 17:2–3

• Maulaunais 6:5

• Lus Qhuab Qhia thiab Kev Khi Lus 59:12–16; 88:76

• Yaxayas 58:6–11

Kev Pab cov uas Xav Tau

• Mauxiyas 4:16–27

• Amas 4:12–13

• Mathais 25:31–46

Kawm Ntxiv txog lub Ntsiab Cai No

• Phau Qhia txog Vaj Lug Kub: “Yoo Mov”

• Phau Qhia Kev Coj lub Koom Txoos: 22.2.2

• Txoj Moo Zoo tej Ntsiab Lus: “Yoo Mov thiab Nyiaj Yoo Mov”

Tej Lus Caw

• Koj puas kam yoo mov thiab thov Vajtswv thaum txog Hnub Caiv Yoo Mov kom txais kev pab rau ib yam uas koj xav tau?

• Koj puas kam muab nyiaj yoo mov (tom qab koj ua kev cai raus dej)?

tsev neeg nyob lub tuam tsev sab nraud

Peb txoj Kev Khi Lus Nyiaj Mus Kom txog Thaum Kawg

Thaum peb ua kev cai raus dej, peb nrog Vajtswv khi lus tias peb yuav “nyiaj mus kom txog thaum kawg” ua neej raws li txoj moo zoo (2 Nifais 31:20; kuj saib Mauxiyas 18:13). Peb siv zog ua Yexus Khetos cov thwj tim tas ib sim neej.

Tus yaj saub hauv Phau Ntawv Maumoos hu ua Nifais piav tias txoj kev cai raus dej yog lub qhov rooj uas peb nkag haud kom taug txoj kev ua raws li txoj moo zoo (saib 2 Nifais 31:17). Tom qab peb ua kev cai raus dej, peb tseem “sib zog mus lawm tom hauv ntej nrog txoj kev ntseeg Khetos uas khov kho” (2 Nifais 31:20).

Thaum peb “sib zog mus lawm tom hauv ntej” ua Nws cov thwj tim, peb npaj siab mus rau lub tuam tsev. Nyob ntawd peb nrog Vajtswv khi lus thaum peb ua cov kab ke hauv lub tuam tsev. Nyob hauv lub tuam tsev, peb yuav txais vaj txiaj ntsim kom muaj hwj chim thiab nrog peb tsev neeg khi ua ke mus ib txhis li. Qhov uas peb ua raws li tej kev khi lus uas khi hauv lub tuam tsev yuav qhib qhov rooj rau peb kom txais tau tag nrho cov koob hmoov ntawm sab ntsuj plig uas Vajtswv xav muaj rau peb.

Thaum peb rau siab ua raws li txoj moo zoo, ces thaum kawg peb yuav txais tau Vajtswv lub txiaj ntsim zoo tshaj plaws—lub txiaj ntsim uas yog txoj sia nyob mus ib txhis li (saib 2 Nifais 31:20; Lus Qhuab Qhia thiab Kev Khi Lus 14:7).

Tej nqe no piav txog tej yam uas Vajtswv tau muab rau peb kom pab peb nyiaj mus kom txog thaum peb tas sim neej no—thiab muaj kev zoo siab.

Lub Pov Thawj Hwj thiab lub Koom Txoos tej Koom Haum Pab

Lub pov thawj hwj yog Vajtswv txoj cai thiab lub hwj chim. Dhau los ntawm lub pov thawj hwj, Leej Txiv Saum Ntuj Ceeb Tsheej ua Nws txoj hauj lwm kom “tib neeg tsis txawj tuag thiab kom tau txoj sia nyob mus ib txhis” (Mauxes 1:39). Vajtswv muab txoj cai thiab lub hwj chim rau Nws cov tub thiab cov ntxhais nyob hauv lub ntiaj teb kom pab ua txoj hauj lwm no.

Lub pov thawj hwj foom koob hmoov rau peb txhua tus. Cov kab ke xws li txoj kev cai raus dej thiab lub cim nco txog los peb txais los ntawm cov uas muaj lub luag hauj lwm pov thawj hwj. Peb kuj txais tau cov koob hmoov ntawm kev kho neeg mob, kev nplij neeg lub siab, thiab lus ntuas.

Lub Pov Thawj Hwj thiab lub Koom Txoos cov Thawj Coj thiab Kev Hu

Yexus Khetos siv cov yaj saub thiab cov thwj tim kom coj Nws lub Koom Txoos. Vajtswv hu cov thawj coj no thiab muab lawv tsa thiab muab txoj cai pov thawj hwj rau lawv kom ua tej yam los ntawm tus Cawm Seej lub npe.

Puag thaum ub, Yexus Khetos muab Nws cov Thwj Tim txoj cai pov thawj hwj no, uas ua rau lawv muaj cai coj Nws lub Koom Txoos tom qab Nws nce saum ntuj ceeb tsheej. Tom qab ntawd txoj cai ntawd twb ploj lawm thaum tib neeg xyeej txoj moo zoo thiab cov Thwj Tim tau tuag.

Cov tim tswv saum ntuj ceeb tsheej tau muab lub pov thawj hwj txum tim rov qab los nyob rau xyoo 1829 dhau los ntawm tus Yaj Saub Joseph Smith thiab tus Tswv rov qab muab Nws lub Koom Txoos tsa kom muaj cov thwj tim thiab cov yaj saub. (Saib zaj lus qhia 1.)

Nyob hauv zej zog, cov npisov thiab ceg txheem ntseeg cov thawj tswj hwm muaj txoj cai pov thawj hwj kom coj tej pawg hauv lub Koom Txoos.

Thaum Vajtswv hu cov txiv neej thiab cov poj niam thiab muab lawv tsa ua hauj lwm hauv lub Koom Txoos, ces kuj muab Vajtswv txoj cai rau lawv ua raws li txoj hauj lwm uas Nws tau hu lawv ua. Twb muab txoj cai no rau cov tub txib, cov thawj coj, cov xib hwb, thiab lwm tus mus txog thaum tso lawv tawm ntawm lawv txoj kev hu mus. Cov uas tuav yawm sij pov thawj hwj muab rau tib neeg sawv cev.

Tsuas pub siv txoj cai pov thawj hwj raws li kev ncaj ncees xwb (saib Lus Qhuab Qhia thiab Kev Khi Lus 121:34–46). Txoj cai no yog txoj kev tso siab rau koj kom sawv tus Cawm Seej cev thiab ua tej yam raws Nws lub npe. Yeej yuav tsum siv kom foom koob hmoov thiab pab lwm tus.

cov tub hluas kawm hnub caiv kev kawm vaj lug kub

Lub Pov Thawj Hwj Aloos thiab lub Pov Thawj Hwj Mekhixedes

Nyob hauv lub Koom Txoos, lub pov thawj hwj los muaj lub Pov Thawj Hwj Aloos thiab lub Pov Thawj Hwj Mekhixedes. Raws li cov uas tuav cov yawm sij pov thawj hwj qhia, lawv muab lub Pov Thawj Hwj Aloos thiab Mekhixedes rau cov txiv neej tsim nyog hauv lub Koom Txoos. Tom qab muab lub pov thawj hwj rau ib tug txiv neej, ces yuav muab ib lub luag hauj lwm pov thawj hwj rau tus ntawd, xws li dikas los sis txwj laug. Ib tug uas muaj txoj cai lawm yuav tsum muab tus ntawd tsa kom muab tib txoj cai ntawd.

Thaum ib tug txiv neej los sis tub hluas txais lub pov thawj hwj, nws nrog Vajtswv khi lus kom ua tej hauj lwm dawb ceev, pab lwm tus, thiab pab txhawb nqa lub Koom Txoos.

Cov tub hluas txais tau lub Pov Thawj Hwj Aloos thiab tsa tau lawv ua cov dikas pib thaum lub Ib Hlis Ntuj ntawm xyoo uas lawv yuav muaj 12 xyoos. Xyoo uas lawv yuav muaj 14 xyoo ces tsa tau lawv ua cov xib hwb thiab xyoo uas yuav muaj 16 xyoo ces tsa tau lawv ua cov pov thawj. Cov txiv neej laus txaus uas hloov siab los ntseeg txais tau lub Pov Thawj Hwj Aloos tom qab lawv ua kev cai raus dej thiab ua kev pom zoo. Cov uas tuav lub Pov Thawj Hwj Aloos ua cov kab ke xws li kev muab lub cim nco txog thiab muab neeg ua kev cai raus dej.

Tom qab siv sij hawm ua ib tug pov thawj ntawm lub Pov Thawj Hwj Aloos, ib tug txiv neej tsim nyog uas muaj 18 xyoo txais tau lub Pov Thawj Hwj Mekhixedes thiab tsa tau nws ua ib tug txwj laug. Cov txiv neej uas txais lub Pov Thawj Hwj Mekhixedes ua tau cov kab ke pov thawj hwj xws li kev foom koob hmoov kho neeg mob thiab nplij tsev neeg thiab lwm tus lub siab.

Saib Phau Qhia Kev Coj lub Koom Txoos, 38.2.9.1, yog xav kawm ntxiv txog cov mej zeej tshiab kev txais lub pov thawj hwj.

Tej Pawg lub thiab lub Koom Txoos tej Koom Haum Pab

Tej Pawg Pov Thawj Hwj Ib pawg pov thawj hwj yog ib pawg rau cov neeg uas tuav lub pov thawj hwj. Txhua pawg ntseeg muaj ib pawg txwj laug rau cov txiv neej laus. Tej pawg dikas, xib hwb, thiab pov thawj los muaj cov tub hluas.

Koom Haum Niam Tsev. Koom Haum Niam Tsev yog cov poj niam uas muaj 18 xyoo rov saud. Cov poj niam hauv Koom Haum Niam Tsev txhawb nqa tej tsev neeg, tib neeg, thiab zej zog.

Koom Haum Ntxhais Hluas. Cov ntxhais hluas koom Koom Haum Ntxhais Hluas pib thaum lub Ib Hlis Ntuj ntawm xyoo uas lawv yuav muaj 12 xyoos.

tus poj niam qhia ib chav kawm

Koom Haum Me Nyuam Yaus. Cov me nyuam uas muaj 3 mus txog 11 xyoos yog cov mej zeej hauv lub Koom Haum Me Nyuam Yaus.

Hnub Caiv Kev Kawm Vaj Lug Kub. Tag nrho cov neeg laus thiab cov tub hluas ntxhais hluas koom Hnub Caiv Kev Kawm Vaj Lug Kub, nyob ntawd lawv kawm cov vaj lug kub ua ke.

Yog xav kawm ntxiv txog lub pov thawj hwj, saib Phau Qhia Kev Coj lub Koom Txoos, tshooj 3.

Yog xav kawm ntxiv txog tej pawg pov thawj hwj thiab tej lub koom haum hauv lub Koom Txoos, saib Phau Qhia Kev Coj lub Koom Txoos, tshooj 8–13.

Kev Kawm Vaj Lug Kub

• Mauxiyas 18:17

• Amas 13:1–19

• Lus Qhuab Qhia thiab Kev Khi Lus 20:38–65; 84:19–20; 107; 121:34–46

• Tej Nqe Kev Ntseeg 1:5

• Lukas 9:1–6

• Yauhas 15:16

• Yakaunpaus 5:14–15

Kawm Ntxiv txog lub Ntsiab Cai No

• Phau Qhia Kev Coj lub Koom Txoos, tshooj 3: “Tej lub Ntsiab Cai txog lub Pov Thawj Hwj”

• Txoj Moo Zoo tej Ntsiab Lus: “Pov Thawj Hwj Aloos,” “Pov Thawj Hwj Mekhixedes,” “Pov Thawj Hwj”

Tej Lus Caw

• Koj puas kam npaj siab txais lub Pov Thawj Hwj Aloos? (Rau cov tub hluas thiab txiv neej uas muaj hnub nyoog 11 rov saud)

• Koj puas kam npaj siab txais lub Pov Thawj Hwj Mekhixedes? (Rau cov txiv neej)

• Koj puas kam koom tes nrog lub Koom Txoos tej koom haum uas koj mus tau?

Kev Sib Yuav thiab Tsev Neeg

Kev Sib Yuav

Vajtswv pom zoo rau kev sib yuav ntawm ib tug txiv neej thiab ib tug poj niam. Yog qhov tseem ceeb tshaj rau Nws txoj hau kev kom Nws cov me nyuam hloov zuj zus mus ib txhis li.

Qhov uas ib tug txiv neej thiab ib tug poj niam sib yuav yeej yog kev txheeb ze uas zoo tshaj plaws hauv lub ntiaj teb. Nkawd muaj kev lav ris kom ib leeg muab siab npuab rau ib leeg thiab rau siab ntseeg ua raws li lawv txoj kev khi lus ntawm kev sib yuav.

Vajtswv saib ib tug txiv tsev thiab niam tsev muaj nqis ib yam. Ib leeg yuav tsum tsis txhob tswj kav ib leeg. Nkawd yuav tsum koom siab koom ntsws thiab sib hlub thaum nkawd txiav txim ua ke.

Yog tias ib tug txiv tsev thiab ib tug niam tsev sib hlub thiab ua hauj lwm ua ke, nkawd txoj kev sib yuav yeej yuav ua rau nkawd zoo siab kawg nkaus. Nkawd pab tau nkawd tus kheej thiab nkawd cov me nyuam hloov zuj zus kom txais tau txoj sia nyob mus ib txhis.

Tsev Neeg

Ib yam li kev sib yuav, Vajtswv pom zoo rau tsev neeg uas yog ib qho tseem ceeb rau Nws txoj hau kev kom peb zoo siab mus ib txhis li. Peb tsev neeg yuav zoo siab tshaj plaws thaum peb ua raws li Yexus Khetos tej lus qhia. Cov niam tsev txiv tsev qhia lawv cov me nyuam txog Yexus Khetos txoj moo zoo thiab coj yam ntxwv zoo ua raws li txoj moo zoo ntawd. Ib tsev neeg ua rau peb muaj cib fim kom ib leeg hlub thiab pab ib leeg.

Cov niam tsev txiv tsev yuav tsum saib lawv tsev neeg yog qhov tseem ceeb tshaj plaws. Cov niam tsev txiv tsev muaj kev lav ris dawb ceev kom saib xyuas cov me nyuam uas lawv yug los los sis yuav ua lawv tug.

Txhua tsev neeg muaj tej teeb meem. Thaum peb thov Vajtswv txhawb nqa peb thiab ua raws li Nws cov lus txib, ces peb tsev neeg tej teeb meem yuav pab peb kawm ua zoo zuj zus. Tej lub sij hawm tej teeb meem pab peb kawm hloov siab lees txim thiab zam txim pub rau lwm tus.

txiv tsev qhia nws tsev neeg

Lub Koom Txoos cov thawj coj tau hais kom cov mej zeej muaj tsev neeg hmo ua ke txhua lub lim tiam. Cov niam tsev txiv tsev siv lub sij hawm no qhia lawv cov me nyuam txog txoj moo zoo, pab sawv daws sib raug zoo, thiab muaj kev lom zem ua ke. Lub Koom Txoos cov thawj coj kuj tau tshaj tawm ib zaj lus uas qhia tej lub tseeb tseem ceeb txog peb tsev neeg (saib “Tsev Neeg: Ib zaj Lus Tshaj Tawm rau lub Ntiaj Teb,” ChurchofJesusChrist.org)

Muaj lwm yam uas txhawb nqa ib tsev neeg xws li tsev neeg thov Vajtswv ua ke, kawm vaj lug kub, thiab teev tiam Vajtswv ua ke hauv lub tsev koom txoos. Peb kuj nrhiav tsev neeg zaj keeb kwm, sau ntawv txog tsev neeg zaj dab neeg, thiab pab lwm tus los tau.

Neeg coob tsis tshua muaj cib fim sib yuav los sis tsis muaj ib tsev neeg uas sib hlub. Neeg coob twb sib nrauj lawm thiab muaj tej xwm txheej nyuaj hauv lawv tsev neeg. Tiam sis, txoj moo zoo foom koob hmoov rau peb txhua tus txawm yog peb tsev neeg raug dab tsi los xij. Thiab thaum peb rau siab ntseeg, Vajtswv yuav npaj ib txoj kev rau peb kom peb tau koob hmoov uas yog ib tsev neeg uas sib hlub, txawm yog nyob hauv lub neej no los sis hauv lub neej tom ntej.

Kev Kawm Vaj Lug Kub

Kev Sib Yuav

• Lus Qhuab Qhia thiab Kev Khi Lus 42:22; 49:15

• Efexus 5:25

• Chiv Keeb 2:18, 24

Tsev Neeg

• Mauxiyas 4:14–15

• Amas 56:47; 57:21

• 3 Nifais 18:21

• Lus Qhuab Qhia thiab Kev Khi Lus 68:25–28

• Efexus 6:4

• Paj Lug 22:6

• “Tsev Neeg: Ib zaj Lus Tshaj Tawm rau lub Ntiaj Teb”

Kawm Ntxiv txog lub Ntsiab Cai No

• Phau Qhia txog Vaj Lug Kub: “Tsev Neeg,” “Sib Yuav”

• Phau Qhia Kev Coj lub Koom Txoos, tshooj 2: “Txhawb Nqa Tib Neeg thiab Tsev Neeg Ua txoj Hauj Lwm Cawm Seej thiab Kev Tsa Nto”

• Txoj Moo Zoo tej Ntsiab Lus: “Sib Yuav,” “Tsev Neeg,” “Niam Tsev Txiv Tsev”

Tej Lus Caw

Hloov tej lus caw nram qab no seb ib tug neeg lub neej zoo li cas.

• Koj puas kam ua tsev neeg hmo ua ke, nrog tsev neeg thov Vajtswv txhua hnub, thiab nrog lawv kawm vaj lug kub txhua hnub?

• Koj puas kam hwm Vajtswv nyob rau Hnub Caiv nrog koj tsev neeg?

Hauj Lwm hauv lub Tuam Tsev thiab Kev Nrhiav Tsev Neeg Zaj Keeb Kwm rau cov Poj Koob Yawm Txwv uas Tas Sim Neej Lawm

Leej Txiv Saum Ntuj Ceeb Tsheej hlub tag nrho Nws cov me nyuam thiab xav kom lawv txais tau txoj kev cawm seej thiab kev tsa nto. Tiam sis neeg coob tsis coob twb tuag ua ntej lawv hnov txog Yexus Khetos txoj moo zoo los sis tau txais cov kab ke cawm seej ntawm txoj moo zoo. Cov kab ke no yog txoj kev cai raus dej, kev cai pom zoo, kev tsa cov txiv neej rau lub pov thawj hwj, lub vaj txiaj ntsim hauv lub tuam tsev, thiab kev sib yuav mus ib txhis li.

Vim Nws muaj siab hlub tshua peb thiab muaj kev tshav ntuj, tus Tswv tau npaj lwm txoj kev rau cov neeg no txais txoj moo zoo thiab cov kab ke ntawd. Nyob hauv lub ntuj ntsuj plig, yuav qhia txoj moo zoo rau cov neeg uas tuag thiab tseem tsis tau txais (saib Lus Qhuab Qhia thiab Kev Khi Lus 138). Nyob hauv lub tuam tsev, peb ua tau cov kab ke sawv tam peb cov poj koob yawm txwv uas tuag lawm thiab lwm tus. Cov neeg uas tuag thiab nyob hauv lub ntuj ntsuj plig yuav lees txais los sis xyeej txoj moo zoo thiab cov kab ke uas tau ua sawv tam lawv.

tsev neeg kawm vaj lug kub ua ke

Tiam sis ua ntej peb ua tau cob kab ke no, peb yuav tsum nrhiav peb cov poj koob yawm txwv uas tseem tsis tau txais. Qhov uas peb nrhiav peb cov poj koob yawm txwv kom lawv txais tau cov kab ke no yeej yog ib lub ntsiab tseem ceeb ntawm peb txoj hauj lwm nrhiav tsev neeg zaj keeb kwm. Thaum peb nrhiav xov xwm txog lawv, peb muab sau rau lub Koom Txoos qhov chaw khaws ntaub ntawv ntawm FamilySearch.org. Ces peb (los sis lwm tus) ua tau cov kab ke sawv tam lawv nyob hauv lub tuam tsev.

Thaum peb nrhiav tau peb cov poj koob yawm txwv thiab ua kab ke rau lawv, ces peb tsev neeg yuav nyob ua ke mus ib txhis li.

Tsev Neeg zaj Keeb Kwm thiab Kev Mus rau lub Tuam Tsev

Coj cov mej zeej tshiab thiab cov uas koj qhia mus ntsib tus coj kev ua hauj lwm hauv lub tuam thiab tsev neeg zaj keeb kwm (los sis rau lwm tus mej zeej uas paub txog kev ua hauj lwm hauv lub tuam tsev thiab kev nrhiav tsev neeg zaj keeb kwm). Tus thawj coj no pab tau tib neeg nrhiav tau lawv cov txheeb ze uas tas sim neej lawm uas xav tau cov kab ke hauv lub tuam tsev. Siv kev sib ntsib koom tes txhua lub lim tiam kom npaj pab cov mej zeej tshiab pib ua hauj lwm hauv lub tuam tsev thiab nrhiav tsev neeg zaj keeb kwm.

Tus npisov muaj cai muab ib daim ntawv tso cai nkag tuam tsev rau cov mej zeej tshiab thiab lwm tus mej zeej kom ua tau kev cai raus dej thiab kev pom zoo sawv tam lawv cov poj koob yawm txwv uas tuag lawm thiab lwm tus. Ib tug mej zeej tsim nyog txais tau daim ntawv tso cai no pib thaum lub Ib Hlis Ntuj rau xyoo uas nws yuav muaj 12 xyoos. Cov txiv neej kuj yuav tsum tuav lub Pov Thawj Hwj Aloos kom tsim nyog ua. Txhawb nqa cov mej zeej tshiab kom txais tau ib daim ntawv tso cai sai li sai tau.

Yog ib lub tuam tsev nyob ze, cia li nrog cov mej zeej tshiab mus. Nrog lawv ua cov kab ke hauv lub tuam tsev.

Kev Kawm Vaj Lug Kub

• Lus Qhuab Qhia thiab Kev Khi Lus 128; 138

• 1 Kauleethaus 15:29

• 1 Petus 3:18–21; 4:6

Kawm Ntxiv txog lub Ntsiab Cai No

• Phau Qhia Kev Coj lub Koom Txoos, tshooj 28: “Cov Kab Ke hauv lub Tuam Tsev rau cov Neeg uas Tuag”

• Txoj Moo Zoo tej Ntsiab Lus: “Ua Kev Cai Raus Dej Sawv Cev rau cov Neeg Tuag,” “Tsev Neeg zaj Keeb Kwm”

Tej Lus Caw

• Koj puas kam npaj siab ua cov kab ke hauv lub tuam tsev sawv tam cov poj koob yawm txwv uas tas sim neej lawm?

• Koj puas kam nrhiav tsev neeg zaj keeb kwm thiab muab cov poj koob yawm txwv lub npe xa mus kom lawv txais tau cov kab ke hauv lub tuam tsev?

Cov Tuam Tsev, lub Vaj Txiaj Ntsim, Kev Sib Yuav Mus Ib Txhis Li, thiab Tsev Neeg Mus Ib Txhis Li

Cov Tuam Tsev

Lub tuam tsev yog tus Tswv lub tsev. Yog ib qho chaw dawb huv uas peb mus kom nrog Vajtswv khi lus thaum peb txais Nws cov kab ke dawb ceev. Thaum peb ua raws li tej kev khi lus no, peb yuav muaj hwj chim ua li Vajtswv nyob hauv peb lub neej (saib Lus Qhuab Qhia thiab Kev Khi Lus 84:19–22; 109:22–23).

Lub Vaj Txiaj Ntsim

Ib txoj kab ke uas peb txais hauv lub tuam tsev yog lub vaj txiaj ntsim. Lo lus vaj txiaj ntsim txhais tias “ib lub khoom plig.” Lub txiaj ntsim uas yog kev txawj ntse thiab lub hwj chim yeej los ntawm Vajtswv los. Thaum ua kab ke txais lub vaj txiaj ntsim peb nrog Vajtswv thiab Nws Leej Tub, Yexus Khetos, khi lus (saib tshooj 1).

Tej zaum cov neeg laus yuav tsim nyog txais lawv lub vaj txiaj ntsim hauv lub tuam tsev ib xyoos tom qab lawv ua mej zeej hauv lub Koom Txoos. Yog xav kawm ntxiv txog lub vaj txiaj ntsim, saib Phau Qhia Kev Coj lub Koom Txoos, 27.2.

Kev Sib Yuav thiab Tsev Neeg Mus Ib Txhis Li

Vajtswv txoj hau kev zoo siab los saum ntuj los ua rau kev ua niam ua txiv, ua tub ua ntxhais, ua kwv ua tij, ua neej ua tsa nyob mus li dhau lub qhov ntxa. Nyob hauv lub tuam tsev peb sib yuav rau lub neej no thiab nyob mus ib txhis li. Ua li no ua rau peb tsev neeg nyob ua ke tas mus li.

Tom qab ib khub niam txiv uas sib yuav lawm tau txais lawv lub vaj txiaj ntsim hauv lub tuam tsev, lawv ua tau kev sib khi los sis sib yuav mus ib txhis li. Muab nkawd cov me nyuam khi rau lawv.

Ib khub niam txiv uas tau ua kev cai sib khi hauv lub tuam tsev yuav tsum ua raws li lawv tej kev khi lus kom txais tau cov koob hmoov los ntawm kev sib yuav mus ib txhis li.

ib khub niam txiv taug txoj kev

Xyuam Xim Thaum Qhia txog Tsev Neeg Nyob Mus Ib Txhis Li

Tib neeg ib txhia muaj tej xwm txheej hauv lawv tsev neeg uas ua rau lawv tsis xav nyob ua ke tas mus li. Lwm tus los tej zaum tsis muaj ib tug khub los sis tsis muaj me nyuam hauv lub neej no.

Cia li hais rau cov neeg uas koj qhia tias Vajtswv txoj hau kev yog ib txoj hau kev zoo siab. Pab lawv pom tias kev ua raws li txoj moo zoo tam sim no yuav npaj muaj ib tsev neeg nyob mus ib txhis thaum yav tom ntej, txawm yog muaj txoj koob hmoov no tom qab lub neej no xwb.

Txawm yog ib tug neeg tsev neeg zoo li cas los sis nws yuav nws tus khub los tsis yuav los cov neeg laus yuav tau npaj txais tau lawv lub vaj txiaj ntsim. Kev txais lawv lub vaj txiaj ntsim yuav ua rau lawv muaj zog heev. Cia li pab lawv pom tias lawv muaj cib fim koom ua ke nrog cov poj koob yawm txwv uas tuag lawm thaum ua hauj lwm pab lawv hauv lub tuam tsev.

Kev Kawm Vaj Lug Kub

• Lus Qhuab Qhia thiab Kev Khi Lus 43:16; 95:8–9; 97:10–16; 109; 131:1–4

Kawm Ntxiv txog lub Ntsiab Cai No

• Phau Qhia Kev Coj lub Koom Txoos, tshooj 27: “Cov Kab Ke hauv lub Tuam Tsev rau cov Neeg uas Tuag”

• Txoj Moo Zoo tej Ntsiab Lus: “Tuam Tsev,” “Vaj Txiaj Ntsim,” “Sib Yuav”

• temples.ChurchofJesusChrist.org

Lus Caw

Koj puas kam npaj mus rau lub tuam tsev thiab txais cov kab ke hauv lub tuam tsev?