1 Thiab tau muaj tias thaum Yexus tau hais tej lus no tas, nws tau hais rau nws cov pab coj, ib tug dhau ib tug, hais rau lawv tias: Nej xav tau dab tsi ntawm kuv, tom qab uas kuv mus cuag Leej Txiv lawm?

2 Thiab lawv tag nrho, tsuas yog tshuav peb leeg xwb, tau hais tias: Peb xav kom tom qab uas peb tau ua neej nyob mus txog li tib neeg lub hnub nyoog, kom peb txoj kev ua hauj lwm qhuab qhia txoj moo zoo, qhov uas koj tau hu peb, yuav muaj qhov xaus, xwv kom peb yuav nrawm nroos los cuag koj nyob hauv koj lub nceeg vaj.

3 Thiab nws tau hais rau lawv tias: Nej tau koob hmoov vim nej xav tau tej yam no ntawm kuv; yog li ntawd, tom qab uas nej muaj xya caum thiab ob xyoos nej yuav los cuag kuv nyob hauv kuv lub nceeg vaj; thiab nrog kuv, nej yuav nrhiav tau txoj kev so.

4 Thiab thaum nws tau hais rau lawv tas, nws tau tig nws tus kheej mus rau peb tug, thiab tau hais rau lawv tias: Nej xav kom kuv ua dab tsi rau nej thaum kuv mus cuag Leej Txiv lawm?

5 Thiab lawv tau nyuaj lawv tej siab heev, vim lawv tsis kam hais rau nws txog tej yam uas lawv xav tau.

6 Thiab nws tau hais rau lawv tias: Saib seb, kuv paub nej tej kev xav, thiab nej xav tau tej yam uas Yauhas, tus uas kuv hlub, tus uas nyob nrog kuv hauv kuv lub caij ua hauj lwm qhuab qhia txoj moo zoo, ua ntej uas kuv tau raug muab dai los ntawm cov Neeg Yudais, xav tau ntawm kuv.

7 Yog li ntawd, nej tau koob hmoov ntau dua, vim nej yuav tsis tau saj txoj kev tuag li; tiam sis nej yuav muaj sia nyob mus pom tag nrho tej uas Leej Txiv ua rau noob neej, mus txog ntua thaum txhua yam yuav muaj puv npo raws li Leej Txiv lub siab nyiam, thaum kuv yuav los nyob hauv kuv lub yeeb koob nrog tej hwj chim ntawm ntuj ceeb tsheej.

8 Thiab nej yuav tsis tau tiv tej kev mob ntawm txoj kev tuag; tiam sis thaum kuv los nyob hauv kuv lub yeeb koob tib ntsais muag nej yuav hloov ntawm lub cev uas txawj ploj txawj tuag mus rau lub ces uas tsis txawj ploj tsis txawj tuag; thiab tom qab ntawd nej yuav tau koob hmoov nyob hauv kuv Txiv lub nceeg vaj.

9 Thiab ntxiv, nej yuav tsis muaj mob thaum nej tseem ua neej nyob, thiab tsis muaj kev nyuaj siab tsuas yog rau tej kev txhaum ntawm lub ntiaj teb xwb; thiab kuv yuav ua tag nrho txhua yam no vim yog yam uas nej tau xav yuav ntawm kuv, vim nej tau xav tias nej yuav coj tib neeg tej ntsuj plig los cuag kuv, thaum lub ntiaj teb tseem muaj nyob.

10 Thiab vim qhov no nej yuav muaj txoj kev xyiv fab puv nkaus; thiab nej yuav zaum nyob hauv kuv Txiv lub nceeg vaj; muaj tseeb tiag, nej txoj kev xyiv fab yuav muaj puv nkaus, tib yam li Leej Txiv tau muab txoj kev xyiv fab puv nkaus rau kuv; thiab nej yuav zoo tib yam li kuv, thiab kuv zoo tib yam li Leej Txiv; thiab Leej Txiv thiab kuv yog ib tug.

11 Thiab tus Vaj Ntsuj Plig Dawb Huv ua tim khawv txog Leej Txiv thiab kuv; thiab Leej Txiv muab tus Vaj Ntsuj Plig Dawb Huv rau noob neej, vim yog kuv.

12 Thiab tau muaj tias thaum Yexus tau hais tej lus no tas, nws tau tuav lawv txhua tus nrog nws tus ntiv tes tsuas yog tshuav peb tug uas yuav nyob xwb, thiab tom qab ntawd nws txawm tau ncaim lawm.

13 Thiab saib seb, ntuj tau qhib, thiab lawv tau raug coj mus rau saum ntuj ceeb tsheej, thiab tau pom thiab tau hnov tej yam uas hais tsis tau.

14 Thiab lawv tau raug txwv kom lawv tsis txhob hais; thiab lawv tsis tau raug muab hwj chim kom lawv yuav muaj cuab kav hais tau tej uas lawv tau pom thiab tau hnov;

15 Thiab txawm tias lawv nyob hauv lub cev los sis tawm ntawm lub cev, lawv tsis muaj peev xwm qhia tau; vim lawv tau xav tias nws zoo li ib txoj kev hloov hlo ntawm lawv, kom lawv raug hloov ncaim ntawm lub cev uas txawj ploj tuag mus rau ib lub tsis txawj ploj tuag, xwv kom lawv yuav muaj peev xwm pom tau tej yam ntawm Vajtswv.

16 Tiam sis tau muaj tias lawv tau rov qhuab qhia rau saum lub ntiaj teb dua; txawm li ntawd los lawv tsis tau qhuab qhia txog tej yam uas lawv tau hnov thiab pom, vim yog txoj lus txib uas tau muab rau lawv nyob saum ntuj ceeb tsheej.

17 Thiab nim no, txawm tias lawv txawj ploj tuag los sis tsis txawj ploj tuag, txij li hnub uas lawv tau hloov hlo, kuv tsis paub;

18 Tiam sis kuv paub npaum li no, raws li phau ceev xwm txheej uas tau raug muab—lawv tau tawm mus rau saum thaj av, thiab tau muab kev pab rau tag nrho cov neeg, tau sau coob npaum li coob tau cov uas yuav ntseeg lawv tej lus qhuab qhia los rau lub koom txoos; tau ua kev cai raus dej rau lawv, thiab coob npaum li coob tau uas tau ua kev cai raus dej tau txais tus Vaj Ntsuj Plig Dawb Huv.

19 Thiab lawv tau raug pov rau hauv qhov taub los ntawm lawv cov uas tsis tau zwm rau hauv lub koom txoos. Thiab tej nkuaj ntim tsis tas lawv, vim lawv tau ntuag ua ob sab.

20 Thiab lawv tau raug pov rau hauv tej qhov av, tiam sis lawv tau ntaus tej av nrog Vajtswv txoj lus, kawg tias thaum kawg los ntawm nws lub hwj chim lawv tau raug cawm dim tawm ntawm tej qhov av tob tob; thiab yog li ntawd lawv tsis muaj peev xwm khawb tej qhov kom txaus ntim lawv.

21 Thiab lawv tau raug pov rau hauv qhov cub peb zaug thiab tsis tau txais kev mob dab tsi.

22 Thiab lawv tau raug pov ob zaug rau hauv ib lub qhov uas muaj tej tsiaj qus nyob; thiab saib seb lawv tau ua si nrog tej tsiaj qus zoo ib yam li ib tug me nyuam yaus ua si nrog ib tug me nyuam yaj uas tsis tau tso mis, thiab tsis tau txais kev mob dab tsi.

23 Thiab tau muaj tias li no lawv tau tawm mus rau tag nrho hauv cov neeg ntawm Nifais, thiab tau qhuab qhia Khetos txoj moo zoo rau tag nrho cov neeg uas nyob saum thaj av; thiab lawv tau raug hloov siab tshiab los cuag tus Tswv, thiab tau raug los koom rau Khetos lub koom txoos, thiab li no cov neeg ntawm tiam neeg ntawd tau koob hmoov, raws li Yexus txoj lus.

24 Thiab nim no kuv, Maumoos, yuav xaus hais txog tej yam no ib ntus.

25 Saib seb, kuv twb yuav luag sau tej npe ntawm cov uas yuav tsis tau saj txoj kev tuag li, tiam sis tus Tswv tau txwv; yog li ntawd kuv thiaj tsis tau muab lawv sau, vim lawv raug muab zais ncaim ntawm lub ntiaj teb lawm.

26 Tiam sis saib seb, kuv tau pom lawv, thiab lawv tau muab kev pab rau kuv.

27 Thiab saib seb lawv yuav nrog Lwm Haiv Neeg nyob, thiab Lwm Haiv Neeg yuav tsis paub lawv.

28 Lawv kuj yuav nrog cov Neeg Yudais nyob thiab, thiab cov Neeg Yudais yuav tsis paub lawv.

29 Thiab yuav tau muaj tias, thaum tus Tswv pom tsim nyog nyob hauv nws txoj kev txawj ntse kom lawv yuav muab kev pab rau tag nrho tej xeem ntawm Ixayees uas tau tawg ri niab, thiab rau txhua haiv neeg, txhua xeem neeg, txhua yam lus thiab cov neeg sawv daws, thiab yuav coj ntau tus tawm ntawm lawv los mus cuag Yexus, xwv kom lawv tej kev xav tau yuav muaj puv nkaus, thiab vim yog lub hwj chim yaum ntawm Vajtswv uas nyob hauv lawv.

30 Thiab lawv zoo ib yam li Vajtswv tej tim tswv, thiab yog lawv yuav thov rau Leej Txiv los ntawm Yexus lub npe lawv yeej muaj peev xwm ua lawv tus kheej los rau tus neeg dab tsi pom los tau uas lawv xav tias zoo.

31 Yog li ntawd, tej hauj lwm loj thiab zoo kawg nkaus uas xav tsis thoob yuav raug ua tiav los ntawm lawv, ua ntej hnub loj thiab yuav los thaum tag nrho cov neeg sawv daws yuav tsum tau sawv tseeb tseeb ntawm Khetos lub rooj txiav txim;

32 Muaj tseeb tiag nyob hauv Lwm Haiv Neeg los twb yuav muaj ib txoj hauj lwm loj thiab zoo kawg nkaus uas xav tsis thoob ua tiav los ntawm lawv, ua ntej hnub txiav txim ntawd.

33 Thiab yog nej tau muaj tag nrho tej vajlugkub uas tau muab ib zag txog tag nrho tej hauj lwm zoo kawg uas xav tsis thoob ntawm Khetos, ces raws li Khetos tej lus, nej yuav paub tias tej yam no yeej yuav tsum muaj los tiag.

34 Thiab kev txom nyem yuav raug rau nws tus uas yuav tsis mloog rau Yexus tej lus, thiab kuj rau lawv cov uas nws tau xaiv thiab tau xa mus rau hauv lawv; vim tus uas tsis kam txais Yexus tej lus thiab tej lus ntawm cov uas nws tau xa mus tsis kam txais yuav nws; thiab yog li ntawd nws yuav tsis kam txais yuav lawv nyob rau hauv hnub kawg;

35 Thiab nws yuav zoo dua rau lawv yog lawv tsis tau yug los. Vim nej puas xav tias nej muaj peev xwm muab tau txoj kev txim lij ntawm Vajtswv tus uas raug tawm tsam pov tseg, tus uas tau raug neeg tsuj rau hauv qab xib taws, xwv kom txoj kev cawm seeg yuav los tau ntawm qhov ntawd los no los?

36 Thiab nim no saib seb, ib yam li kuv tau hais txog cov uas tus Tswv tau xaiv, muaj tseeb tiag, tib yam li peb tug uas tau raug coj mus rau saum ntuj ceeb tsheej, uas kuv tsis paub xyov lawv puas raug ua kom huv ntawm txoj kev txawj ploj tuag mus rau txoj kev tsis txawj ploj tuag—

37 Tiam sis saib seb, txij li thaum kuv tau sau tej ntawd tas, kuv tau thov tus Tswv, thiab nws tau ua rau kuv paub tias yuav tsum tsim nyog muaj ib qho kev hloov ua tiav rau lawv tej cev, los sis tsis li ntawd lawv yuav tsum tau saj txoj kev tuag xwb;

38 Yog li ntawd, kom lawv yuav tsis tau saj txoj kev tuag tau muaj ib qho kev hloov ua tiav nyob rau lawv tej cev, xwv kom lawv yuav tsis tau nyiaj txoj kev mob nkeeg los sis txoj kev txom nyem siab tsuas yog rau tej kev txhaum ntawm lub ntiaj teb xwb.

39 Nim no txoj kev hloov no yeej tsis tau npaum li txoj uas yuav muaj nyob rau hauv hnub kawg; tiam sis tau muaj ib qho kev hloov ua tiav nyob hauv lawv, kawg tias Dab Ntxwg Nyoog tsis muaj peev xwm muaj hwj chim rau saum lawv, uas nws tsis muaj peev xwm ntxias tau lawv; thiab lawv tau raug ua dawb huv thaum tseem ua neej nyob, kom lawv yuav dawb huv, thiab kom tej hwj chim ntawm lub ntiaj teb tsis muaj peev xwm tuav tau lawv.

40 Thiab nyob zoo li no lawv tau raug kom nyob mus txog Khetos hnub txiav txim; thiab nyob rau hauv hnub ntawd lawv tseem yuav tau raug txais ib qho kev hloov loj dua, thiab raug txais mus rau hauv Leej Txiv lub nceeg vaj uas yuav tsis tawm mus sab nraud ib zaug ntxiv lawm, tiam sis yuav nyob nrog Vajtswv mus ib txhis li saum ntuj ceeb tsheej.