« ការប្រតិព័ទ្ធភេទដូចគ្នា » ធនធានការប្រឹក្សា ( ឆ្នាំ ២០២០ ) ។
« ការប្រតិព័ទ្ធភេទដូចគ្នា » ធនធានការប្រឹក្សា ។
ការប្រតិព័ទ្ធភេទដូចគ្នា
សមាជិកមួយចំនួនអាចនឹងមានអារម្មណ៍ប្រតិព័ទ្ធភេទដូចគ្នា ឬដែលកំណត់អត្តសញ្ញាណថាជាមនុស្សខ្ទើយប្រុស ខ្ទើយស្រី ឬខ្ទើយទាំងពីរភេទ ។ នៅពេលអ្នកស្វែងរកការណែនាំពីព្រះវិញ្ញាណបរិសុទ្ធ ហើយចំណាយពេលដើម្បីអប់រំខ្លួនអ្នកអំពីតម្រូវការទាំងឡាយរបស់បុត្រាបុត្រីនៃព្រះ ដែលមានអារម្មណ៍ប្រតិព័ទ្ធភេទដូចគ្នា ឬដែលកំណត់អត្តសញ្ញាណថាជាខ្ទើយ នោះអ្នកនឹងអភិវឌ្ឍសេចក្ដីសប្បុរសធម៌ និងសមត្ថភាពរបស់អ្នកក្នុងការផ្ដល់ការងារបម្រើនឹងតម្កើងឡើង ។
ការមានអារម្មណ៍ប្រតិព័ទ្ធភេទដូចគ្នា ឬការជ្រើសរើសប្រើស្លាកអត្តសញ្ញាណភេទមួយ ( ដូចជាខ្ទើយប្រុស ខ្ទើយស្រី ឬខ្ទើយទាំងពីរភេទ ) ពុំមែនជាអំពើបាបទេ ហើយក៏ពុំល្មើសនឹងគោលនយោបាយរបស់សាសនាចក្រដែរ ។ ពាក្យថា ខ្ទើយប្រុស និង ខ្ទើយស្រី មានន័យផ្សេងគ្នាចំពោះមនុស្សខុសៗគ្នា ។ ការកំណត់អត្តសញ្ញាណថាជាខ្ទើយប្រុស អាចមានន័យថា សមាជិកម្នាក់មានអារម្មណ៍ប្រតិព័ទ្ធភេទដូចគ្នា ប៉ុន្ដែមិនជ្រើសរើសធ្វើតាមអារម្មណ៍ទាំងនេះទេ ។ ស្លាកនេះក៏អាចពិពណ៌នាអំពីរបៀបដែលពួកគេបង្ហាញអារម្មណ៍ផ្ទាល់ខ្លួនគេខាងសតិអារម្មណ៍ ខាងរូបកាយ ខាងមនោសញ្ចេតនា ខាងផ្លូវភេទ ឬខាងនយោបាយផងដែរ ។ សូមកុំសន្មតថាបុគ្គលម្នាក់បំពានក្រឹត្យវិន័យនៃច្បាប់ព្រហ្មចារីភាព ដោយសារតែពួកគេប្រើស្លាកអត្តសញ្ញាណភេទនោះឡើយ ។
អែលឌើរ អិម រ័សុល បាឡឺដ បានថ្លែងថា « សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយជឿថា ‹ ការជាប់ទាក់ទងនឹងការប្រតិព័ទ្ធភេទដូចគ្នាគឺជាភាពពិតដ៏ស្មុគស្មាញមួយចំពោះមនុស្សជាច្រើន › ។ ការប្រតិព័ទ្ធតែម្យ៉ាងគឺពុំមែនជាអំពើបាបទេ ប៉ុន្ដែការមានសកម្មភាពគឺជាអំពើបាប ។ ទោះជាបុគ្គលម្នាក់ៗពុំជ្រើសរើសដើម្បីមានការប្រតិព័ទ្ធប្រភេទនេះក្ដី ក៏ពួកគេអាចជ្រើសរើសរបៀបដើម្បីឆ្លើយតបនឹងអារម្មណ៍នេះបានដែរ ។ ដោយក្ដីស្រឡាញ់ និងការយល់យោគ សាសនាចក្រឈោងទៅជួយបុត្រាបុត្រីទាំងអស់របស់ព្រះ រួមទាំង [ អ្នកដែលប្រតិព័ទ្ធភេទដូចគ្នា ] ផងដែរ » ( « Be Still, and Know That I Am God » [ ការប្រជុំធម្មនិដ្ឋានប្រព័ន្ធអប់រំសាសនាចក្រសម្រាប់យុវមជ្ឈិមវ័យ ថ្ងៃទី ៤ ខែ ឧសភា ឆ្នាំ ២០១៤ ] នៅលើគេហទំព័រ broadcasts.ChurchofJesusChrist.org ) ។
មនុស្សដែលមានអារម្មណ៍ប្រតិព័ទ្ធភេទដូចគ្នា តែតាំងចិត្តដើម្បីរក្សាបទបញ្ញត្តិរបស់ព្រះ អាចទទួលបានការហៅបម្រើក្នុងសាសនាចក្រ កាន់ប័ណ្ណចូលព្រះវិហារបរិសុទ្ធ ហើយទទួលពិធីបរិសុទ្ធក្នុងព្រះវិហារបរិសុទ្ធបាន ។
រឿងសំខាន់បំផុតដែលអ្នកអាចធ្វើបន្ទាប់ពីបុគ្គលម្នាក់បង្ហាញអារម្មណ៍អំពីការប្រតិព័ទ្ធភេទដូចគ្នា នោះអ្នកត្រូវស្ដាប់ ហើយជួយពួកគេឲ្យមានអារម្មណ៍ស្វាគមន៍ ។
គោលការណ៍ជាច្រើនអំពីការប្រតិព័ទ្ធភេទដូចគ្នា នឹងអនុវត្តចំពោះអស់អ្នកដែលមានបទពិសោធន៍ការមិនពេញចិត្តនឹងភេទ ឬកំណត់អត្តសញ្ញាណថាជា បុគ្គលប្តូរភេទ ។ ទោះជាយ៉ាងណាក៏ដោយ ការប្រតិព័ទ្ធភេទដូចគ្នា និងការមិនពេញចិត្តនឹងភេទ គឺមានភាពខុសគ្នាខ្លាំងណាស់ ។ អ្នកដែលមានបទពិសោធន៍ការមិនពេញចិត្តនឹងភេទ អាចមាន ឬមិនអាចមានការប្រតិព័ទ្ធភេទដូចគ្នា ហើយភាគច្រើនមនុស្សដែលមានអារម្មណ៍ប្រតិព័ទ្ធភេទដូចគ្នាគ្មានបំណងប្រាថ្នាដើម្បីផ្លាស់ប្ដូរភេទរបស់ពួកគេឡើយ ។
សម្រាប់ការបង្រៀនរបស់សាសនាចក្រអំពីការប្រតិព័ទ្ធភេទដូចគ្នា សំណួរដែលត្រូវបានគេសួរជាញឹកញាប់ និងព័ត៌មានដែលមានប្រយោជន៍ដទៃទៀតចំពោះថ្នាក់ដឹកនាំ គ្រូបង្រៀន ឪពុកម្ដាយ និងបុគ្គលម្នាក់ៗ សូមមើល Life Help section និង ប្រធានបទដំណឹងល្អ នៅលើគេហទំព័រ ChurchofJesusChrist.org ។
ព្យាយាមយល់
អស់អ្នកដែលមានអារម្មណ៍ប្រតិព័ទ្ធភេទដូចគ្នា អាចនឹងមានអារម្មណ៍ខ្មាស់អៀន ឬមិនស័ក្ដិសម ទោះជាពួកគេពុំធ្លាប់ធ្វើទង្វើតាមអារម្មណ៍ទាំងនោះក្ដី ។ ពួកគេអាចនឹងខ្លាចអ្នកបដិសេធពួកគេ ដោយសារតែអារម្មណ៍ទាំងនេះ ហើយពួកគេអាចមិនដឹងអំពីរបៀបដើម្បីផ្សះផ្សារបទពិសោធន៍របស់ពួកគេជាមួយនឹងគោលការណ៍នៃដំណឹងល្អ ។
នៅពេលអ្នកប្រឹក្សានឹងបុគ្គលម្នាក់ៗដែលមានអារម្មណ៍ប្រតិព័ទ្ធភេទដូចគ្នា សូមទទួលស្គាល់សេចក្ដីជំនឿ និងភាពក្លាហានរបស់ពួកគេនៅក្នុងការពិភាក្សាពីអារម្មណ៍ទាំងនេះជាមួយនឹងអ្នក ។ សូមបញ្ជាក់ប្រាប់ពួកគេថា ព្រះស្រឡាញ់ពួកគេ ។ សូមសារភាពថា អ្នកអាចនឹងមិនដឹងពេញលេញអំពីអ្វីដែលពួកគេកំពុងតែឆ្លងកាត់ ។ សូមឲ្យពួកគេដឹងថាអ្នកស្រឡាញ់ពួកគេ ហើយចង់យល់ដឹងពីពួកគេ ។ សូមបង្ហាញពីឆន្ទៈរបស់អ្នកដើម្បីផ្ដល់ការគាំទ្រខាងសតិអារម្មណ៍ និងខាងវិញ្ញាណ ។
សូមពិចារណាអំពីសំណួរខាងក្រោមនេះប្រកបដោយការអធិស្ឋានដើម្បីយល់ដឹងអំពីស្ថានភាពនោះបានកាន់តែល្អប្រសើរ ។ សូមព្យាយាមដើម្បីផ្ដល់ការមើលថែ ហើយប្រុងប្រយ័ត្នដើម្បីចៀសវាងពីការសាកសួរជាក់ស្តែងខ្លាំងពេក ៖
-
សូមអ្នកប្រាប់ខ្ញុំបន្ថែមអំពីបទពិសោធន៍របស់អ្នកបានទេ ?
-
តើអារម្មណ៍ទាំងនេះមានឥទ្ធិពលលើជីវិតរបស់អ្នកយ៉ាងដូចម្ដេចខ្លះ ? តើអារម្មណ៍ទាំងនេះជះឥទ្ធិពលលើជីវិតរបស់មិត្តភក្ដិ និងគ្រួសារអ្នកយ៉ាងដូចម្ដេចខ្លះ ?
-
តើខ្ញុំអាចជួយអ្នកបានយ៉ាងដូចម្ដេច ?
-
តើអ្នកចង់ឲ្យយើងជួបជាទៀងទាត់ដើម្បីពិភាក្សាអំពីរឿងនេះដែរឬទេ ?
-
ស្លាកមានអត្ថន័យផ្សេងៗគ្នាសម្រាប់មនុស្សខុសៗគ្នា ។ តើពាក្យ ខ្ទើយប្រុស ( ឬ ខ្ទើយស្រី ខ្ទើយទាំងពីរភេទ ការប្រតិព័ទ្ធភេទដូចគ្នា ជាដើម ) មានន័យយ៉ាងណាចំពោះអ្នក ?
ជួយបុគ្គលម្នាក់
នៅពេលអ្នកប្រឹក្សាជាមួយនឹងបុគ្គលម្នាក់ៗដែលមានអារម្មណ៍ប្រតិព័ទ្ធភេទដូចគ្នា នោះអ្នកពុំចាំបាច់យល់ដឹងឥតខ្ចោះអំពីរឿងនេះនោះទេ ។ បំណងប្រាថ្នារបស់អ្នកដើម្បីយល់ដឹង និងជួយ នឹងធ្វើឲ្យអ្នកសមនឹងទទួលការណែនាំពីព្រះវិញ្ញាណ នៅពេលអ្នកស្រឡាញ់ ហើយស្ដាប់ ។
សូមជួយបុគ្គលម្នាក់ៗឲ្យទទួលស្គាល់ថា អារម្មណ៍នៃការប្រតិព័ទ្ធភេទដូចគ្នា អាចនឹងជាទិដ្ឋភាពមួយនៃបទពិសោធន៍ក្នុងជីវិតរមែងស្លាប់របស់ពួកគេ ប៉ុន្តែអារម្មណ៍ទាំងនោះពុំអាចផ្លាស់ប្ដូរអត្តសញ្ញាណដ៏អស់កល្បជានិច្ច និងដ៏ទេវភាពរបស់ពួកគេក្នុងនាមជាកូនរបស់ព្រះបានឡើយ ។
-
ជួយបុគ្គលម្នាក់ៗឲ្យទទួលស្គាល់កម្លាំង ទេពកោសល្យ និងសមត្ថភាពរបស់ពួកគេ ។ សូមលើកទឹកចិត្តពួកគេឲ្យព្យាយាមស្គាល់គោលបំណងរបស់ព្រះ ហើយដឹងពីការដឹកនាំជាក់លាក់ និងដោយផ្ទាល់អំពីផ្លូវរបស់ពួកគេតាមរយៈព្រះវិញ្ញាណបរិសុទ្ធ ។
-
បើបុគ្គលនោះជាប់ទាក់ទងនៅក្នុងការប្រព្រឹត្តខាងផ្លូវភេទជាមួយភេទដូចគ្នា សូមបង្រៀនអំពីការប្រែចិត្ត និងការអភ័យទោស តាមរយៈដង្វាយធួនរបស់ព្រះអង្គសង្គ្រោះព្រះយេស៊ូវគ្រីស្ទ ។
-
ផ្ដល់ការប្រឹក្សា និងការគាំទ្រជាទៀងទាត់ ដើម្បីកុំឲ្យបុគ្គលនោះមានអារម្មណ៍ឯកោនៅលើដំណើរនេះ ។
-
ចៀសវាងកុំសន្យាអំពីការកាត់បន្ថយ ឬការលុបបំបាត់នៃការប្រតិព័ទ្ធភេទដូចគ្នាជាការដោះដូរចំពោះភាពស្មោះត្រង់ឡើយ ។
-
អាពាហ៍ពិពាហ៍ពុំគួរត្រូវបានផ្ដល់ជាអនុសាសន៍ធ្វើជារបៀបមួយដើម្បីលុបបំបាត់ ឬកាត់បន្ថយការប្រតិព័ទ្ធភេទដូចគ្នាឡើយ ។
សូមអញ្ជើញបុគ្គលនោះឲ្យផ្ដោតទៅលើការបង្កើត ឬការរក្សាលំនាំជីវិតរស់នៅដែលមានសុខភាពល្អ ។
-
ទទួលស្គាល់កម្លាំងខាងវិញ្ញាណដែលអាចកើតមាន ឬមានរួចហើយ ដែលជាការឆ្លើយតបដោយសេចក្ដីជំនឿចំពោះអារម្មណ៍ប្រតិព័ទ្ធភេទដូចគ្នា ។
-
ជួយបុគ្គលនោះឲ្យស្វែងរកឱកាសដើម្បីធ្វើការចែកចាយដ៏មានអត្ថន័យទៅកាន់គ្រួសារ និងវួដរបស់គាត់ តាមរយៈការហៅបម្រើ និងឱកាសបម្រើដទៃទៀត ។
សូមលើកទឹកចិត្តដល់បុគ្គលនេះឲ្យបង្កើតទំនាក់ទំនងល្អ ពុំមែនខាងផ្លូវភេទដែលមានភេទដូចគ្នាជាមួយនឹងមនុស្សជាទីទុកចិត្ត ។ សូមជួយបុគ្គលនោះឲ្យ ៖
-
ស្វែងរកអ្នកណែនាំ ឬមិត្តជាទីទុកចិត្តម្នាក់ដើម្បីជួបជាទៀងទាត់ដើម្បីពិភាក្សាអំពីគោលដៅ និងការរីកចម្រើន ។
-
បង្ហាញអារម្មណ៍អំពីការប្រតិព័ទ្ធភេទដូចគ្នាទៅកាន់បុគ្គលជាទីទុកចិត្តនោះ ។ ការបើកបង្ហាញអារម្មណ៍ទាំងនេះដោយការគិតគូរពុំគ្រាន់តែជាជំនួយប៉ុណ្ណោះទេ ប៉ុន្តែជាការការពារដ៏ល្អបំផុតចំពោះបុគ្គលមួយចំនួនកុំឲ្យមានជំងឺធ្លាក់ទឹកចិត្ត ឬបំផ្លាញខ្លួនឯង ។
-
សូមព្យាយាមពង្រឹងទំនាក់ទំនងជាមួយនឹងសមាជិកគ្រួសារ មិត្តភក្ដិ អ្នកជិតខាង និងសហការីជាទីទុកចិត្ត ។
បុគ្គលមួយចំនួនដែលមានអារម្មណ៍ប្រតិព័ទ្ធភេទដូចគ្នា អាចបានប្រព្រឹត្តទង្វើតាមអារម្មណ៍ទាំងនេះ ហើយល្មើសនឹងច្បាប់ព្រហ្មចារីភាព ៖
-
បើបុគ្គលនោះមានបញ្ហានឹងការណ៍អាសគ្រាម ការសម្រេចកាមដោយខ្លួនឯង ឬការប្រព្រឹត្តិខាងផ្លូវភេទដទៃទៀត ដែលមិនសមស្របទៅតាមច្បាប់ព្រហ្មចារីភាព សូមគាំទ្រដល់ការខិតខំរបស់ពួកគេក្នុងការយកឈ្នះលើបញ្ហាទាំងនេះ ។ សូមយោងទៅវគ្គ « Addressing Pornography » នៅលើគេហទំព័រ ChurchofJesusChrist.org សម្រាប់ជំនួយជាមួយនឹងបញ្ហាការណ៍អាសគ្រាម ។
-
ប្រាប់អំពីស្ថានភាពទូទៅបំផុតដែលនាំទៅរកឥរិយាបថប្រកបដោយអំពើបាប ។
-
យល់ពីអារម្មណ៍នៅពីក្រោយស្ថានភាពទាំងនេះ ( ដូចជាភាពឯកោ ឬការបដិសេធ ) ។
-
ជួយបុគ្គលនោះឲ្យបង្កើតការឆ្លើយតបផ្សេងៗ ។
មនុស្សមួយចំនួនដែលមានអារម្មណ៍ប្រតិព័ទ្ធភេទដូចគ្នា អាចនឹងស្វែងរកការណែនាំមកពីអ្នកប្រឹក្សាដែលមានវិជ្ជាជីវៈ ។ ការព្យាបាលអាចពង្រឹងដល់លំនាំល្អនៃជីវិត ។ សូមពិចារណានូវចំណុចដូចតទៅនេះ ៖
-
ពេលខ្លះវាអាចនឹងពិបាកសម្រាប់មនុស្សដើម្បីមើលឃើញពីភាពពិតរបស់ខ្លួនឯង ។ ការស្វែងរកគំនិតយោបល់មកពីអ្នកផ្ដល់ការប្រឹក្សាដែលមានវិជ្ជាជីវៈដែលសមស្របទៅតាមគោលការណ៍ដំណឹងល្អ អាចជួយនៅក្នុងទិដ្ឋភាពជាច្រើននៃជីវិត រួមទាំងលំនាំនៃការធ្លាក់ទឹកចិត្ត និងអារម្មណ៍អន្ទះអន្ទែង ឥរិយាបថដែលមិនអាចគ្រប់គ្រង ឥទ្ធិពលនៃការរំលោភបំពាន និងបញ្ហាខាងសតិអារម្មណ៍ដទៃទៀត ។ ដូចជាអែលឌើរ ជេហ្វ្រី អ័រ ហូឡិន បានកត់សម្គាល់ ជំនួយដែលមានវិជ្ជាជីវៈអាចសំខាន់ដូចជាជំនួយខាងវិញ្ញាណផងដែរនៅពេលខ្លះ ( សូមមើល « Like A Broken Vessel » Liahona ខែ វិច្ឆិកា ឆ្នាំ ២០១៣ ទំព័រ ៤១ ) ។
-
ការស្វែងរកគំនិតយោបល់មកពីអ្នកផ្ដល់ការប្រឹក្សាដែលមានវិជ្ជាជីវៈ គឺជាសញ្ញានៃភាពខ្លាំង និងការបន្ទាបខ្លួន ។ បើបុគ្គលម្នាក់ជ្រើសរើសស្វែងរកជំនួយដូច្នេះ នោះអ្នកដទៃទៀតគួរតែគោរពដល់សិទ្ធិរបស់គាត់ដើម្បីកំណត់នូវលទ្ធផលដែលចង់បាន ។ សាសនាចក្រផ្ដល់អនុសាសន៍មធ្យោបាយនានាដែលគោរពដល់ « ការតាំងចិត្តផ្ទាល់ខ្លួនរបស់អតិថិជន » ។
-
ក្នុងន័យផ្សេងទៀត បុគ្គលម្នាក់នោះមានសិទ្ធិដើម្បីកំណត់ពីលទ្ធផលដែលចង់បាន ហើយអ្នកព្យាបាល និងអ្នកផ្ដល់ការប្រឹក្សាគួរតែគោរពដល់ការចង់បានរបស់គាត់ ។ សម្រាប់មនុស្សម្នាក់ដែលមានអារម្មណ៍ប្រតិព័ទ្ធភេទដូចគ្នា ឬកំណត់អត្តសញ្ញាណថាជាមនុស្សខ្ទើយ នោះការប្រឹក្សាអាចនឹងជួយដល់បុគ្គលនោះឲ្យមានជីវិតខាងភេទដែលកាន់តែល្អ និងកាន់តែពេញលេញ ។ ទោះជាយ៉ាងណា មនុស្សគ្រប់រូបពុំសុទ្ធតែត្រូវការការប្រឹក្សា និងការព្យាបាលនោះទេ ។
-
ខណៈដែលការផ្លាស់ប្ដូរនៅក្នុងជីវិតភេទអាចកើតមាន ហើយវាច្បាស់ជាកើតមានឡើងសម្រាប់មនុស្សមួយចំនួន នោះវាពុំត្រឹមត្រូវតាមសីលធម៌ទេ ដែលត្រូវផ្ដោតលើការព្យាបាលតាមវិជ្ជាជីវៈ ទៅតាមការសន្មតមួយថាការផ្លាស់ប្ដូរភេទនឹងកើតឡើង ឬត្រូវតែកើតមាននោះ ។
សូមទាក់ទងទៅកាន់សេវាកម្មគ្រួសារសម្រាប់ព័ត៌មាន ឬការពិគ្រោះយោបល់ បើមានសេវាកម្មនេះ ។
គាំទ្រដល់គ្រួសារ
ការប្រតិព័ទ្ធភេទដូចគ្នា ជះឥទ្ធិពលលើសមាជិកគ្រួសារក៏ដូចជាបុគ្គលម្នាក់ៗផងដែរ ។ សូមកំណត់អំពីឥទ្ធិពលមកលើគ្រួសាររបស់បុគ្គលនោះ ហើយព្យាយាមដោះស្រាយបញ្ហាទាំងអស់នោះ ។
-
គាំទ្រដល់សមាជិកគ្រួសារ រួមទាំងស្វាមី ឬភរិយា នៅពេលដែលពួកគេព្យាយាមសម្រួលអារម្មណ៍ដែលមាន ដូចជាការរន្ធត់ ការឈឺចាប់ កំហឹង ការក្បត់ និងកំហុស ។
-
ជួយឪពុកម្ដាយ ស្វាមី ឬភរិយា ឬសមាជិកគ្រួសារដទៃទៀតកុំឲ្យបន្ទោសខ្លួនឯង ឬអ្នកដទៃ ដើម្បីពួកគេអាចផ្ដោតទៅលើការចិញ្ចឹមបីបាច់ទំនាក់ទំនងគ្រួសារបានកាន់តែប្រសើរឡើង ។
-
លើកទឹកចិត្តដល់សមាជិកគ្រួសារឲ្យ ស្រឡាញ់ សមាជិកគ្រួសារនេះ ហើយទទួលយកបុគ្គលនេះ ។
-
លើកទឹកចិត្តសមាជិកគ្រួសារឲ្យស្វែងរកជំនួយ និងការប្រឹក្សាដែលមានវិជ្ជាជីវៈ បើចាំបាច់ ។
-
លើកទឹកចិត្តសមាជិកគ្រួសារឲ្យស្វែងរកព័ត៌មានមកពីធនធានសាសនាចក្រ ដូចជា ប្រធានបទដំណឹងល្អ ឬ Life Help section នៅលើគេហទំព័រ ChurchofJesusChrist.org ។
ប្រើប្រាស់ធនធានក្នុងវួដ និងស្ដេក
សូមពិចារណាធ្វើការសួរដល់ថ្នាក់ដឹកនាំវួដ ឬបុគ្គលដែលជាទីទុកចិត្តដទៃទៀតដើម្បីបន្ដផ្ដល់ការគាំទ្រ ការណែនាំ និងជំនួយ ។ ស្នើសុំការអនុញ្ញាតពីបុគ្គលនោះពីមុនពិភាក្សាអំពីស្ថានភាពនោះជាមួយអ្នកដទៃ ។
សូមកំណត់ពីរបៀបដែលអាចផ្ដល់ការងារបម្រើបានល្អបំផុតចំពោះអស់អ្នកដែលមានអារម្មណ៍ប្រតិព័ទ្ធភេទដូចគ្នា ។
-
បង្កើតបរិយាកាស និងវប្បធម៌មួយដើម្បីឲ្យបុគ្គលទាំងអស់មានអារម្មណ៍ស្វាគមន៍ និងត្រូវបានគេស្រឡាញ់ ។
-
ពិចារណាពិភាក្សាអំពីបញ្ហានៅក្នុងក្រុមប្រឹក្សាវួដ ឬនៅក្នុងមេរៀនអាទិត្យទីប្រាំ ។ ប្រើសម្ភារៈចេញមកពី Life Help section នៅលើគេហទំព័រ ChurchofJesusChrist.org និង « ការប្រតិព័ទ្ធភេទដូចគ្នា » នៅលើប្រធានបទដំណឹងល្អដើម្បីរៀបចំមេរៀន ឬការពិភាក្សា ។
-
ទប់ទល់នឹងផ្នត់គំនិត និងទេវកថាអំពីការប្រតិព័ទ្ធភេទដូចគ្នា ។ បើមនុស្សនៅក្នុងវួដ ឬសាខារបស់អ្នកពុំមានការយល់ដឹងក្នុងដំណឹងល្អអំពីរឿងនេះ សូមយោងវាទៅកាន់ Life Help section នៅលើគេហទំព័រ ChurchofJesusChrist.org និង « ការប្រតិព័ទ្ធភេទដូចគ្នា » នៅក្នុងប្រធានបទដំណឹងល្អ ។
-
សូមជួយបុគ្គលម្នាក់ៗឲ្យយល់ថា ការនៅជិតនឹងអ្នកដែលមានអារម្មណ៍ប្រតិព័ទ្ធភេទដូចគ្នា ពុំមានន័យថាពួកគេនឹងមានអារម្មណ៍ប្រតិព័ទ្ធភេទដូចគ្នាផងដែរនោះទេ ហើយថាបទពិសោធន៍នៃការប្រតិព័ទ្ធភេទដូចគ្នានេះ ក៏ពុំបង្កើនហានិភ័យនៃការចង់រួមភេទជាមួយកុមារនោះដែរ ។
សូមស្គាល់អ្នកផ្ដល់ការប្រឹក្សាក្នុងមូលដ្ឋាន និងធនធានតាមអនឡាញដែលមានសេវាត្រូវគ្នានឹងគោលការណ៍នៃដំណឹងល្អ ។
សូមពិចារណាធ្វើការទាក់ទងទៅសេវាកម្មគ្រួសារ បើមាន ដើម្បីស្គាល់អំពីធនធាននានា ។