« ការញៀន » ធនធានការប្រឹក្សា ( ឆ្នាំ ២០២០ ) ។
« ការញៀន » ធនធានការប្រឹក្សា ។
ការញៀន
ការញៀនគឺជាការពឹងផ្អែកទាំងស្រុងមួយទៅលើឥរិយាបទ ឬសារធាតុដែលមានគ្រោះថ្នាក់ ។ ការញៀនគ្រប់ប្រភេទ មានន័យថាការចុះចាញ់ និងការទៅជាពឹងផ្អែកទៅលើសារធាតុ ឬឥរិយាបទមួយ ។ ការញៀនអាចនាំទៅកាន់ភាពបរាជ័យនៅក្នុងការបំពេញកាតព្វកិច្ចចម្បងនៅកន្លែងធ្វើការ សាលារៀន ឬនៅគេហដ្ឋាន ។ ការញៀនអាចដឹកនាំទៅរកការបោកបញ្ឆោត និងការដោះសារនៃជម្រើសអវិជ្ជមានទាំងឡាយ ។ អ្នកទាំងនោះជាច្រើនដែលកំពុងមានបញ្ហានឹងការញៀន មានអារម្មណ៍ខួចចិត្តយ៉ាងខ្លាំង និងអស់សង្ឃឹម ។
ព្យាយាមយល់
ការពិភាក្សាអំពីការញៀនអាចជាការពិបាក ហើយមនុស្សអាចមានអារម្មណ៍ឈឺចាប់ ឬខ្មាសអៀន ។ នៅពេលអ្នកនិយាយជាមួយនឹងបុគ្គលម្នាក់ៗ សូមអរគុណពួកគេចំពោះភាពក្លាហានរបស់ពួកគេនៅក្នុងការសុំឲ្យគេជួយ ។ សូមព្យាយាមដើម្បីបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។
សូមពិចារណាដោយការអធិស្ឋានដើម្បីសួរនូវសំណួរទាំងនេះ ឬនិយាយអំពីស្ថានភាពនេះដើម្បីជួយអ្នកឲ្យយល់ពីការញៀនរបស់បុគ្គលនោះបានកាន់តែច្បាស់ ហើយដឹងពីតម្រូវការរបស់គាត់ ឬនាង ។
-
សូមប្រាប់ខ្ញុំអំពីអ្វីដែលកំពុងកើតឡើង ។
-
តើបញ្ហានេះចាប់ផ្ដើមឡើងយ៉ាងដូចម្ដេច ?
-
តើឧបសគ្គធំបំផុតដើម្បីយកឈ្នះការញៀននេះមានអ្វីខ្លះ ?
-
តើការខិតខំប្រឹងប្រែងអ្វីខ្លះដែលអ្នកបានធ្វើ ដើម្បីយកឈ្នះលើបញ្ហានេះ ? តើមានអ្វីខ្លះដែលបានជួយក្នុងពេលមួយរយៈនេះ ?
-
តើព្រះអម្ចាស់អាចជួយអ្នកឲ្យយកឈ្នះលើការញៀនរបស់អ្នកដោយរបៀបណា ?
-
តើនរណាខ្លះទៀតដែលបានដឹងអំពីការណ៍នេះ ហើយតើពួកគេបានផ្ដល់ការគាំទ្រអ្វីខ្លះមកឲ្យអ្នក ?
ជួយបុគ្គលម្នាក់
នៅពេលអ្នកជួយបុគ្គលម្នាក់ឲ្យធ្វើការយកឈ្នះលើបញ្ហានេះ សូមពិចារណាប្រើប្រាស់យោបល់មួយចំនួនដូចខាងក្រោម ។ សូមប្រាកដថាបានបង្ហាញសេចក្ដីស្រឡាញ់ និងការយកចិត្តទុកដាក់ជានិច្ច នៅពេលអ្នកធ្វើការជាមួយគ្នា ។
សូមជួយបុគ្គលនោះឲ្យដាក់ផែនការមួយដើម្បីចៀសវាង ឬដោះស្រាយស្ថានភាពដែលគាត់ ឬនាងមានអារម្មណ៍ថាងាយនឹងចាញ់ការល្បួង ។ សូមរំឭកមើលផែនការនេះជាទៀងទាត់ ។
សូមបង្រៀនបុគ្គលនោះអំពីគោលលទ្ធិនៃសិទ្ធិជ្រើសរើស ហើយជួយគាត់ ឬនាងឲ្យយល់ថា ការញៀនពុំអាចផ្លាស់ប្ដូរអត្តសញ្ញាណដ៏អស់កល្បជានិច្ចរបស់យើងបានទេ ។
-
បង្រៀនថារាល់ការញៀន អាចយកឈ្នះបានតាមរយៈព្រះអង្គសង្គ្រោះ ព្រះយេស៊ូវគ្រីស្ទ ដោយសារតែដង្វាយធួនរបស់ទ្រង់ ។
-
ជួយបុគ្គលនោះឲ្យយល់អំពីរបៀបដែលព្រះអង្គសង្គ្រោះអាចធ្វើឲ្យនរណាម្នាក់យកឈ្នះលើឧបសគ្គនានាបាន ។
-
ជួយបុគ្គលនោះឲ្យយល់អំពីរបៀបដែលព្រះអង្គសង្គ្រោះអាចធ្វើឲ្យនរណាម្នាក់យកឈ្នះលើឧបសគ្គនានាបាន ។
-
ជួយបុគ្គលនោះឲ្យមើលឃើញពី អត្តសញ្ញាណ របស់គាត់ ឬនាងក្នុងនាមជាកូនរបស់ព្រះ ហើយទទួលស្គាល់ភាពខ្លាំង ទេពកោសល្យ និងសមត្ថភាពផ្ទាល់ខ្លួនរបស់គាត់ ឬនាង ។
សូមជួយបុគ្គលនោះឲ្យស្គាល់ស្ថានភាពទូទៅបំផុតដែលបង្កើនការល្បួង ( ដូចជាស្ថានភាពដែលដាស់គំនិត និងចំណង់ទាក់ទងនឹងការញៀននោះ ) ។
-
រុករកអារម្មណ៍នៅពីក្រោយស្ថានភាពនានា ( ឧទាហរណ៍ អារម្មណ៍ធុញទ្រាន់ ឯកោ ខឹង ស្មុគស្មាញ ឬនឿយហត់ ) ។
-
ពិចារណាអំពីទីកន្លែង ពេលវេលា និងរបៀបដែលស្ថានភាពនីមួយៗអាចកើតឡើង ។
សូមអញ្ជើញសមាជិកឲ្យចូលរួមក្នុងក្រុមគាំទ្រ កម្មវិធីព្យាបាលការញៀន (ARP) នៅក្នុងមូលដ្ឋាន ឬការប្រជុំព្យាបាលការញៀនទាំង ១២ ជំហាន ។
សូមលើកទឹកចិត្តបុគ្គលនោះឲ្យបើកចិត្ត ហើយស្មោះត្រង់អំពីការញៀនជាមួយនឹងស្វាមី ឬភរិយា ឪពុកម្ដាយ ឬសមាជិកគ្រួសារដទៃទៀតរបស់គាត់ ។
សូមជួយសមាជិកនេះឲ្យស្វែងរកជំនួយមកពីនរណាម្នាក់ដែលគាត់ ឬនាងទុកចិត្ត ។
គាំទ្រដល់គ្រួសារ
ការញៀនជះឥទ្ធិពលដល់សមាជិកគ្រួសារក៏ដូចជាបុគ្គលខ្លួនឯងផងដែរ ។ នៅពេលអ្នកនិយាយជាមួយនឹងសមាជិកគ្រួសារដែលរងឥទ្ធិពល សូមប្រាកដថាបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។ សូមកំណត់អំពីឥទ្ធិពលរបស់វាទៅលើស្វាមី ឬភរិយា ឬគ្រួសារ ហើយដោះស្រាយបញ្ហាទាំងនោះ ។
សូមចាប់ផ្ដើមដោយការជួយសមាជិកគ្រួសារឲ្យមានអារម្មណ៍សេចក្ដីស្រឡាញ់ ហើយបានស្ដាប់ឮ ។ អ្នកអាចនិយាយថា « នេះគឺជាស្ថានភាពលំបាកមួយដើម្បីឆ្លងកាត់ ។ តើអ្នកមានអារម្មណ៍យ៉ាងណាដែរ ? »
សូមសង្កេតមើលបើមានភាពភ័យខ្លាច ការបារម្ភ ការបន្ទោសខ្លួនឯង ឬការខ្វះទំនុកចិត្ត ។
សូមអញ្ជើញស្វាមី ឬភរិយា ឬសមាជិកគ្រួសារឲ្យសិក្សាគោលការណ៍នានានៅក្នុង មគ្គុទេសន៍ជំនួយ ៖ ជំនួយដល់ស្វាមីភរិយា និងគ្រួសារនៃអ្នកដែលស្ថិតក្នុងការព្យាបាលជាសះស្បើយ ។
សូមអញ្ជើញសមាជិកគ្រួសារឲ្យចូលរួមនៅក្នុងក្រុមគាំទ្រ កម្មវិធីព្យាបាលការញៀនរបស់ស្វាមីភរិយា និងគ្រួសារ ឬក្រុមគាំទ្រស្រដៀងគ្នានេះ ។
សូមជួយសមាជិកគ្រួសារឲ្យយល់អំពីរបៀបដែលព្រះអង្គសង្គ្រោះអាចជួយព្យាបាលពួកគេដោយផ្ទាល់ ទោះជាមិនដឹងថាមនុស្សជាទីស្រឡាញ់របស់ពួកគេយកឈ្នះលើការញៀនបាន ឬមិនបានក្ដី ( សូមមើល អាលម៉ា ៧:១១; ម៉ាថាយ ១១:២៨–៣០ ) ។
ប្រើប្រាស់ធនធានក្នុងវួដ និងស្ដេក
សូមពិចារណាធ្វើការសួរដល់ថ្នាក់ដឹកនាំវួដ ឬបុគ្គលដែលជាទីទុកចិត្តដទៃទៀតដើម្បីបន្ដផ្ដល់ការគាំទ្រ ការណែនាំ និងជំនួយ ។ ស្នើសុំការអនុញ្ញាតពីបុគ្គលនោះពីមុនពិភាក្សាអំពីស្ថានភាពនោះជាមួយអ្នកដទៃទៀត ។
ប៊ីស្សពអាចធ្វើការជាមួយនឹងបុគ្គលនោះដើម្បីស្គាល់មនុស្សជាទីទុកចិត្តម្នាក់ដើម្បីធ្វើជាអ្នកណែនាំដល់បុគ្គលនោះ បន្ទាប់មកលើកទឹកចិត្តពួកគេទាំងពីរនាក់ឲ្យដាក់គោលដៅ និងរៀបផែនការដើម្បីធ្វើការជាមួយគ្នា ។
-
អ្នកណែនាំគួរតែជាមនុស្សម្នាក់ដែលបុគ្គលនោះអាចចុះសម្រុងជាមួយ ហើយជាពិសេសគឺជាមនុស្សម្នាក់ដែលបានយកឈ្នះលើបញ្ហាដូចគ្នានោះ ។
-
បើបុគ្គលនោះគឺជាអនីតិជន នោះប៊ីស្សពគួរតែឲ្យឪពុកម្ដាយចូលរួមចំណែក នៅពេលកំណត់អំពីអ្នកណែនាំ ។
សូមមើលគេហទំព័រកម្មវិធីព្យាបាលការញៀន ( addictionrecovery.ChurchofJesusChrist.org ) ដើម្បីស្វែងរកការប្រជុំក្នុងមូលដ្ឋានសម្រាប់ឲ្យបុគ្គលនោះចូលរួម ។ បើពុំមានទេ សូមពិចារណាធ្វើការទំនាក់ទំនងទៅកាន់ប្រធានស្ដេកដើម្បីស្នើសុំចាប់ផ្ដើមកម្មវិធីមួយនោះឡើង ។
សូមស្វែងរកធនធាននានាក្នុងមូលដ្ឋានដែលមានសេវាកម្មនេះ ដែលត្រូវគ្នានឹងគោលការណ៍នៃដំណឹងល្អ ។
-
ធនធាននានាអាចរួមមានអ្នកផ្ដល់ប្រឹក្សាដែលមានវិជ្ជាជីវៈ កម្មវិធីព្យាបាល និងភ្នាក់ងាររដ្ឋាភិបាលដទៃទៀត ។
-
បុគ្គលនោះក៏អាចត្រូវការជំនួយវេជ្ជសាស្ត្របន្ថែមផងដែរ ។ សូមពិចារណាធ្វើការទទួលបានការវាយតម្លៃពីអ្នកមានវិជ្ជាជីវៈដើម្បីកំណត់ពីកម្រិតនៃការមើលថែឲ្យបានត្រឹមត្រូវ ។