« ការរំលោភបំពាន ( ជំនួយសម្រាប់ជនរងគ្រោះ ) » ធនធានការប្រឹក្សា ( ឆ្នាំ ២០២០ ) ។
« ការរំលោភបំពាន ( ជំនួយសម្រាប់ជនរងគ្រោះ ) » ធនធានការប្រឹក្សា ។
ការរំលោភបំពាន ( ជំនួយសម្រាប់ជនរងគ្រោះ )
បណ្តាញជំនួយនានា
ប៊ីស្សព ប្រធានសាខា និងប្រធានស្ដេកគួរតែទូរសព្ទ ភ្លាមៗ សុំជំនួយបព្វជិតរបស់សាសនាចក្រនៅ រាល់ពេលដែលពួកគេដឹងអំពីការរំលោភបំពាន ។ ធនធាននេះផ្ដល់ជំនួយនៅក្នុងការជួយជនរងគ្រោះ និងនៅក្នុងការបំពេញតាមតម្រូវការរបាយការណ៍ផ្សេងៗ ។ ចូរទៅកាន់ លេខបណ្ដាញជំនួយ សម្រាប់លេខបណ្ដាញជំនួយ និងព័ត៌មានបន្ថែមទៀត ។
ថ្នាក់ដឹកនាំសាសនាចក្រមិនត្រូវបដិសេធចំពោះការរាយការណ៍ស្ដីពីការរំលោភបំពាន ឬប្រឹក្សាឲ្យបុគ្គលម្នាក់កុំរាយការណ៍អំពីសកម្មភាពឧក្រិដ្ឋកម្មនោះឡើយ ។
សហរដ្ឋ និងកាណាដា
បើសមាជិកដទៃទៀតដឹងអំពីការរំលោភបំពាន នោះពួកគេគួរតែទាក់ទងទៅកាន់អាជ្ញាធរដែនដីស្របច្បាប់ជាបន្ទាន់ ។ ពួកគេក៏គួរតែប្រឹក្សាជាមួយប៊ីស្សព ឬប្រធានស្ដេករបស់ពួកគេផងដែរ ដែលពួកលោកនឹងទូរសព្ទទៅកាន់បណ្ដាញជំនួយអំពីករណីការរំលោភបំពានដើម្បីសុំការណែនាំក្នុងការជួយដល់ជនរងគ្រោះ និងក្នុងការបំពេញតម្រូវការផ្សេងៗដើម្បីរាយការណ៍ ។
ប្រទេសនៅក្រៅសហរដ្ឋ និងកាណាដា
រៀនអំពីរបៀប និងពេលវេលាដែលអ្នកគួរតែរាយការណ៍អំពីការរំលោភបំពាន ។ ប្រធានស្ដេក និងប៊ីស្សពគួរតែទូរសព្ទទៅកាន់លេខជំនួយជាបន្ទាន់ដើម្បីសុំរកការណែនាំ បើមាននៅក្នុងប្រទេសរបស់ពួកគេ ។ នៅក្នុងប្រទេសដែលគ្មានបណ្តាញជំនួយ នោះប៊ីស្សពដែលដឹងអំពីការរំលោភបំពានគួរតែទាក់ទងទៅប្រធានស្តេករបស់គាត់ ។ គាត់នឹងស្វែងរកការណែនាំមកពីក្រុមប្រឹក្សាច្បាប់ប្រចាំតំបន់នៅការិយាល័យតំបន់ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ( ឆ្នាំ ២០២០ ) ៣៨.៦.២.១ នៅលើគេហទំព័រ ChurchofJesusChrist.org ) ។ សមាជិកដទៃទៀតគួរតែអនុលោមទៅតាមកាតព្វកិច្ចរាយការណ៍ស្របច្បាប់ណាមួយ និងប្រឹក្សាជាមួយនឹងប៊ីស្សពរបស់ពួកគេ ។
ការរំលោភបំពានមិនអាចអត់ឱនឲ្យបានទេ
ការរំលោភបំពានគឺជាការប្រព្រឹត្តអាក្រក់ ឬការប្រមាថមនុស្សដទៃ ( ដូចជាកូន ឬស្វាមី ឬភរិយា មនុស្សចាស់ ឬមនុស្សពិការ ) ក្នុងរបៀបមួយដែលបណ្តាលឲ្យមានគ្រោះថ្នាក់ដល់រាងកាយ ផ្លូវចិត្ត ឬផ្លូវភេទ ។ គោលជំហររបស់សាសនាចក្រគឺថាការរំលោភបំពាន មិនអាចត្រូវបានអត់ឱនឲ្យនៅគ្រប់រូបភាពទាំងអស់ ហើយថាអស់អ្នកដែលរំលោភបំពានគឺត្រូវទទួលខុសត្រូវចំពោះព្រះ ។ មិនថាមាន ឬមិនមាននរណាម្នាក់ត្រូវផ្ដន្ទាទោសក្ដី ក៏ជនល្មើសនឹងត្រូវស្ថិតនៅក្រោមការដាក់វិន័យសាសនាចក្រ ហើយអាចបាត់បង់សមាជិភាពរបស់ពួកគេនៅក្នុងសាសនាចក្រផងដែរ ( សូមមើល ម៉ាថាយ ១៨:៦; ម៉ាកុស ៩:៤២; លូកា ១៧:២ ) ។
ការទទួលខុសត្រូវដំបូងរបស់សាសនាចក្រនៅក្នុងករណីរំលោភបំពានគឺ ១ ) ជួយអ្នកដែលត្រូវបានគេរំលោភបំពានដោយមានសន្ដានចិត្តល្អ និងយកចិត្តទុកដាក់ និង ២ ) ការពារដល់អ្នកដែលអាចនឹងត្រូវរងគ្រោះពីការរំលោភបំពាននាពេលអនាគត ។ ខណៈពេលដែលប្រភេទនៃការរំលោភបំពានមួយចំនួន អាចបណ្ដាលឲ្យមានគ្រោះថ្នាក់ខាងរូបកាយ នោះគ្រប់ទម្រង់នៃការរំលោភបំពានជះឥទ្ធិពលមកលើចិត្ត និងវិញ្ញាណ ។ ជាញឹកញាប់ ការរំលោភបំពានបំផ្លាញសេចក្ដីជំនឿ ហើយអាចបណ្ដាលឲ្យជនរងគ្រោះមានការភាន់ច្រឡំ សង្ស័យ បាត់ទំនុកចិត្ត ការមានអារម្មណ៍ថាខុស និងភ័យខ្លាច ។ សូមមើល « Recognizing Patterns of Abuse » និង « What are signs that someone is being abused? »
សូមជួយជនរងគ្រោះឲ្យយល់ថា គាត់ ឬនាងមិនទទួលខុសត្រូវចំពោះសកម្មភាពរបស់អ្នករំលោភបំពានឡើយ ហើយមិនរំពឹងឲ្យស៊ូទ្រាំចំពោះឥរិយាបទរំលោភបំពាននោះដែរ ។
សូមដឹងជាមុនថា អ្នករំលោភបំពានអាចនឹងមានល្បិច ឧបាយកល និងបោកបញ្ឆោត ដូច្នេះការរៀបរាប់ពីព្រឹត្តិការណ៍របស់ពួកគេអាចនឹងខុសប្លែកពីការរៀបរាប់របស់ជនរងគ្រោះ ។ នៅគ្រប់ករណីទាំងអស់ សូមពិចារណាអំពីសុវត្ថិភាព និងការការពារដល់ជនរងគ្រោះមុនគេបង្អស់ ។
ថ្នាក់ដឹកនាំទាំងឡាយរបស់សាសនាចក្រពុំត្រូវបានរំពឹង ហើយក៏មិនត្រូវបានលើកទឹកចិត្តឲ្យធ្វើរោគវិនិច្ឆ័យ ឬផ្ដល់ការព្យាបាលដល់អ្នកដែលមានបញ្ហាសុខភាពផ្លូវចិត្តទាក់ទងនឹងការរំលោភបំពាននោះទេ ។ បើចាំបាច់ សូមលើកទឹកចិត្តបុគ្គលនោះឲ្យពិចារណាស្វែងរកជំនួយដែលមានវិជ្ជាជីវៈ ។ សេវាកម្មគ្រួសារ ( នៅកន្លែងដែលមាន ) អាចផ្ដល់ការពិគ្រោះយោបល់ ហើយផ្ដល់ព័ត៌មានដល់ថ្នាក់ដឹកនាំអំពីធនធាននៅក្នុងសហគមន៍របស់ពួកគេ ។
នៅពេលអ្នកអានព័ត៌មានដូចខាងក្រោម សូមស្វែងរកការបំផុសគំនិតដើម្បីសម្របយោបល់ទាំងនេះទៅតាមស្ថានភាពរបស់ជនរងគ្រោះ ដែលវាអាចនឹងផ្លាស់ប្ដូរ បើជនរងគ្រោះគឺជាស្វាមី ឬភរិយា កូន ឪពុក ឬម្ដាយជរា ឬជនពិការ ។
ព្យាយាមយល់
ការជួយជនរងគ្រោះឲ្យដឹងថា អ្នកស្ដាប់ និងយល់ពីពួកគេ អាចជារឿងសំខាន់ដូចជាការប្រឹក្សាឯទៀតដែលអ្នកអាចផ្ដល់ឲ្យដែរ ។ នៅពេលអ្នកនិយាយជាមួយនឹងជនរងគ្រោះ សូមព្យាយាមបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។ ការពិភាក្សាអំពីការរំលោភបំពានតម្រូវឲ្យមានភាពក្លាហានច្រើនពីខាងផ្នែកជនរងគ្រោះ ហើយគាត់ ឬនាងអាចនឹងត្រូវការការធានាអះអាង និងការលួងលោមចិត្ត ។
សូមបន្ដស្ងៀមស្ងាត់ ហើយមានឆន្ទៈចំណាយពេលស្ដាប់ភាពភ័យខ្លាច ភាពសង្ស័យ និងកង្វល់របស់ជនរងគ្រោះ ។ សូមពិចារណាដោយការអធិស្ឋាន សួរនូវសំណួរទាំងនេះដោយសន្ដានចិត្តល្អ និងយកចិត្តទុកដាក់ដើម្បីជួយអ្នកឲ្យយល់ពីស្ថានភាពរបស់ជនរងគ្រោះឲ្យបានកាន់តែច្បាស់ ហើយដឹងពីតម្រូវការរបស់ពួកគេ ។ សូមប្រាកដថាបានអនុញ្ញាតឲ្យជនរងគ្រោះពិពណ៌នាអំពីស្ថានភាពរបស់គាត់ ឬនាងដោយខ្លួនឯង ជាជាងសាកសួរទៅកាន់គាត់ ឬនាង ។
-
តើមានរឿងអ្វីកំពុងកើតឡើង ?
-
តើអ្នកមានអារម្មណ៍ថាមានសុវត្ថិភាពប៉ុណ្ណាដែរ ?
-
តើអ្នកមានអារម្មណ៍ថាមានសុវត្ថិភាពប៉ុណ្ណាដែរ នៅពេលមានមនុស្សដទៃទៀតនៅជុំវិញខ្លួនអ្នកនោះ ?
-
តើអ្នកបាននិយាយអំពីរឿងនេះប្រាប់នរណាផ្សេងទៀតខ្លះ ( ដូចជាគ្រួសារ ឪពុកម្ដាយ អ្នកដឹកនាំសាសនាចក្រ ឬអាជ្ញាធរស៊ីវិល ) ?
-
តើតម្រូវការបន្ទាន់របស់អ្នកមានអ្វីខ្លះ ?
-
តើមានអ្វីផ្សេងទៀតអំពីការរំលោភបំពាននេះ ដែលខ្ញុំគួរតែដឹងដែរឬទេ ?
ជនរងគ្រោះពីការរំលោភបំពាន អាចស្វែងរកជំនួយមកពីថ្នាក់ដឹកនាំសាសនាចក្រដើម្បីទទួលបានការព្យាបាលខាងវិញ្ញាណ ។ ស្ត្រី និងយុវវ័យអាចមានអារម្មណ៍កាន់តែកក់ក្ដៅដើម្បីជួបជាមួយនឹងប៊ីស្សព ឬថ្នាក់ដឹកនាំដទៃទៀត បើពួកគេមានមិត្តភក្ដិ ឪពុក ឬម្ដាយ ឬថ្នាក់ដឹកនាំសាសនាចក្រដែលពួកគេអាចទុកចិត្តបានមានវត្តមានជាមួយនឹងពួកគេ ។ សូមប្រាកដថាជនរងគ្រោះដឹងថា ពួកគេអាចឲ្យមនុស្សគាំទ្រម្នាក់មានវត្តមានជាមួយពួកគេបាន ។
ជួយបុគ្គលម្នាក់
នៅពេលអ្នកផ្ដល់ជំនួយ ឬគាំទ្រដល់ជនរងគ្រោះ សូមពិចារណាអំពីយោបល់ដូចខាងក្រោម ។ សូមចងចាំដើម្បីមានចិត្តអាណិតអាសូរ និងក្ដីស្រឡាញ់នៅក្នុងការផ្ដល់យោបល់របស់អ្នក ។
សូមជួយបុគ្គលនេះឲ្យយល់អំពីរបៀបដើម្បីទទួលការព្យាបាលតាមរយៈព្រះអង្គសង្គ្រោះ និងដង្វាយធួនរបស់ទ្រង់ ( សូមមើល អាលម៉ា ៧:១១–១២; នីហ្វៃទី ២ ៩:២១; គោលលទ្ធិ និង សេចក្ដីសញ្ញា ៨៨:៦ ) ។
សូមសរសើរគាត់ ឬនាងដែលមានភាពក្លាហានដើម្បីចែកចាយអំពីការរំលោភបំពាន ។
សូមអះអាងដល់ជនរងគ្រោះថា គាត់ ឬនាងមិនចាំបាច់ធ្វើការប្រែចិត្តនោះទេ ព្រោះគាត់គឺជាជនរងគ្រោះនៃការរំលោភបំពាន ។
សូមលើកទឹកចិត្តបុគ្គលនោះឲ្យស្វែងរកការប្រសិទ្ធពរបព្វជិតភាព ។
សូមយកចិត្តទុកដាក់ចំពោះដំណើរការនៃការព្យាបាលផ្ទាល់ខ្លួនរបស់ជនរងគ្រោះ ដែលអាចនឹងត្រូវការពេលវេលាច្រើន ។ ចូរកុំព្យាយាមប្រញាប់ប្រញាល់ ឬគ្រប់គ្រងដំណើរការឡើយ ។
សូមអនុញ្ញាតឲ្យជនរងគ្រោះសម្រួលអារម្មណ៍ និងដោះស្រាយឧបសគ្គផ្ទាល់ខ្លួនរបស់គាត់ ឬនាង ទាក់ទងទៅនឹងរឿងរំលោភបំពាននេះ ពីមុនប្រឹក្សាដល់បុគ្គលនោះឲ្យអភ័យទោសដល់ជនល្មើស ។
សូមជួយបុគ្គលនោះឲ្យមានអារម្មណ៍សុវត្ថិភាព ។
សូមមើលអត្ថបទ « How do I stay safe? » សម្រាប់ព័ត៌មានបន្ថែម ។
សូមលើកទឹកចិត្តជនរងគ្រោះឲ្យឈោងទៅរកអ្នកដទៃដែលគាត់ទុកចិត្តឲ្យជួយ និងគាំទ្រ រួមមានការប្រឹក្សាដែលមានវិជ្ជាជីវៈជាដើម បើចាំបាច់ ។
គាំទ្រដល់គ្រួសារ
ការរំលោភបំពានជះឥទ្ធិពលដល់សមាជិកគ្រួសារក៏ដូចជាបុគ្គលនោះផងដែរ ។ សូមកំណត់អំពីឥទ្ធិពលរបស់វាទៅលើស្វាមី ឬភរិយា ឬគ្រួសារ ហើយដោះស្រាយបញ្ហាទាំងនោះ ។ គឺដូចជាអ្នកបង្ហាញសេចក្ដីស្រឡាញ់ និងការខ្វល់ខ្វាយចំពោះជនរងគ្រោះដែរ សូមប្រាកដថាបានបង្ហាញសេចក្ដីស្រឡាញ់ និងការខ្វល់ខ្វាយចំពោះសមាជិកគ្រួសារ ដែលអាចនឹងកំពុងមានបញ្ហា ឬមានការឈឺចាប់ ។
សូមពិចារណាអំពីការចូលប្រើធនធានក្នុងសហគមន៍ ឬជំនួយមានវិជ្ជាជីវៈចំពោះសមាជិកគ្រួសារដែលអាចនឹងត្រូវការការប្រឹក្សា ឬការគាំទ្រ ។
សូមជួយសមាជិកគ្រួសារឲ្យយល់អំពីរបៀបដែលព្រះអង្គសង្គ្រោះអាចជួយពួកគេជាសះស្បើយដោយផ្ទាល់ ( សូមមើល អាលម៉ា ៧:១១ និង ម៉ាថាយ ១១:២៨–៣០ ) ។
សូមផ្ដល់ការគាំទ្រជាបន្ដបន្ទាប់ចំពោះគ្រួសាររបស់ជនរងគ្រោះ ។
ប្រើប្រាស់ធនធានក្នុងវួដ និងស្ដេក
បើបុគ្គលដែលត្រូវបានគេរំលោភបំពានផ្ដល់ការអនុញ្ញាតដល់អ្នកឲ្យពិភាក្សាអំពីស្ថានភាពជាមួយអ្នកដទៃទៀត សូមធ្វើការនៅក្រោមការដឹកនាំរបស់ប៊ីស្សពដើម្បីកំណត់ពីថ្នាក់ដឹកនាំវួដ និងបុគ្គលជាទីទុកចិត្តដទៃទៀត ដែលអាចផ្ដល់ការគាំទ្រ ការណែនាំ និងជំនួយជាបន្ដបន្ទាប់ ។ ( សូមមើលការណែនាំអំពី « Preventing and Responding to Abuse » សម្រាប់ព័ត៌មានបន្ថែមទៀត ) ។
សូមពិភាក្សាជាមួយប៊ីស្សពអំពីរបៀបដើម្បីគាំទ្របុគ្គលនោះ ឬគ្រួសារ និងរបៀបដើម្បីឆ្លើយតបដោយវិជ្ជមានចំពោះស្ថានភាពនេះ ។
សូមជួយជនរងគ្រោះឲ្យស្វែងរក និងទាក់ទងទៅធនធាននានា ឬជំនួយមានវិជ្ជាជីវៈដែលមាន ។ សូមមើល « Should I get professional help? »
-
ធនធាននានាអាចរួមមាន កន្លែងស្នាក់អាស្រ័យ អ្នកផ្ដល់ការប្រឹក្សា សេវាវេជ្ជសាស្ត្រ សេវាផ្លូវច្បាប់ និងការគាំទ្រដទៃទៀត ។
-
ដោយអាស្រ័យទៅលើភាពធ្ងន់ធ្ងរនៃស្ថានភាព និងការគិតពិចារណាដទៃទៀត បុគ្គលនោះអាចនឹងត្រូវពិចារណាឲ្យមានវត្តមានរបស់អាជ្ញាធរស៊ីវិល ឬទទួលបានការការពារស្របច្បាប់ ។
សូមអធិស្ឋាន និងយកចិត្តទុកដាក់ដល់តម្រូវការរបស់ជនរងគ្រោះ និងគិតពីអ្នកដែលអាចនឹងត្រូវចាត់តាំងឲ្យធ្វើជាបងប្អូនប្រុសស្រីដែលផ្ដល់ការងារបម្រើ ។ បើសមរម្យ សូមពិចារណាឲ្យជនរងគ្រោះគិតគូរនៅក្នុងការសម្រេចចិត្តនេះដែរ ។ ជនរងគ្រោះមួយចំនួនអាចនឹងកាន់តែមានអារម្មណ៍កក់ក្ដៅជាមួយនឹងអ្នកដែលផ្ដល់ការងារបម្រើជាគូស្វាមីភរិយា ជាជាងបងប្រុសដែលផ្ដល់ការងារបម្រើទាំងពីរនាក់ ។
សូមពិចារណាធ្វើការជាមួយនឹងប៊ីស្សពដើម្បីចំណាយពេលនៅក្នុងក្រុមប្រឹក្សាវួដ ឬការប្រជុំដទៃទៀតដើម្បីបំពាក់បំប៉នថ្នាក់ដឹកនាំអំពីការបង្ការ និងការឆ្លើយតបចំពោះការរំលោភបំពាន ។
-
« Preventing and Responding to Abuse » ឯកសារធនធាន