« ការធ្វើអត្តឃាត » ធនធានការប្រឹក្សា ( ឆ្នាំ ២០២០ ) ។
« ការធ្វើអត្តឃាត » ធនធានការប្រឹក្សា ។
ការធ្វើអត្តឃាត
សូមចូលទៅមើលវគ្គ « ការធ្វើអត្តឃាត » នៅលើគេហទំព័រ ChurchofJesusChrist.org ឬនៅក្នុងកម្មវិធីបណ្ណាល័យដំណឹងល្អ ដើម្បីស្វែងរកបណ្ដាញជំនួយដែលឥតគិតថ្លៃមកពីជុំវិញពិភពលោក និងធនធាននានាសម្រាប់ជួយបុគ្គលម្នាក់ៗដែលមានបញ្ហានឹងវិបត្តិជាប់ទាក់ទងនឹងការធ្វើអត្តឃាត ។
អត្តឃាតកម្មគឺជាបញ្ហាសុខភាពជាសាធារណៈទូទាំងសកលមួយ ដែលជាញឹកញាប់វាអាចនឹងបង្ការបាន ។ មនុស្សភាគច្រើនដែលមានគំនិតធ្វើអត្តឃាតខ្លួនឯងពុំចង់ស្លាប់នោះទេ ពួកគេគ្រាន់តែចង់បានការធូរស្បើយពីការឈឺចាប់ផ្នែករូបកាយ ផ្នែកស្មារតី ផ្នែកសតិអារម្មណ៍ ឬផ្នែកវិញ្ញាណ ដែលពួកគេកំពុងឆ្លងកាត់តែប៉ុណ្ណោះ ។ ទោះជាយ៉ាងណា ពួកគេអាចនឹងឈានចូលដល់វិបត្តិនៅចំណុចមួយ ដែលពួកគេបាត់បង់សេចក្តីសង្ឃឹម ហើយមិនអាចរកឃើញដំណោះស្រាយមួយចំពោះការឈឺចាប់របស់ពួកគេ នៅពេលដែលពួកគេជឿថាពួកគេគឺជាបន្ទុកចំពោះអ្នកដទៃ នៅពេលពួកគេប្រែជាពុំខ្វល់ ឬលែងខ្លាចស្លាប់ និងការឈឺចាប់ ឬនៅពេលពួកគេមិនអាចរកឃើញហេតុផលដើម្បីរស់នៅ ។
ហានិភ័យនៃការធ្វើអត្តឃាត អាចនឹងកាត់បន្ថយនៅពេលសមាជិកគ្រួសារ មិត្តភក្ដិ សមាជិកវួដ និងអ្នកមានវិជ្ជាជីវៈសុខភាពផ្លូវចិត្ត ធ្វើការរួមគ្នាដើម្បីជួយដល់អស់អ្នកដែលកំពុងមានបញ្ហាទាំងនេះ ។ មនុស្សគ្រប់រូបគួរដឹងអំពីកត្តាហានិភ័យ និងសញ្ញាព្រមានអំពីការធ្វើអត្តឃាត បន្ទាប់មកឈោងទៅស្វែងរកជំនួយសម្រាប់មនុស្សដែលគិតចង់ធ្វើអត្តឃាត ។ ការនិយាយជាមួយនឹងនរណាម្នាក់អំពីអត្តឃាតកម្ម កាត់បន្ថយលទ្ធភាពដែលបុគ្គលនោះនឹងធ្វើតាមអារម្មណ៍ចង់ធ្វើអត្តឃាត ។
មនុស្សគ្រប់រូបគួរតែយកចិត្តទុកដាក់ខ្លាំងចំពោះស្ថានភាពនីមួយៗ កាលដែលបុគ្គលម្នាក់ថ្លែង ឬបញ្ជាក់ថា គាត់គិតអំពីការធ្វើអត្តឃាត ឬមនុស្សជាទីស្រឡាញ់ម្នាក់ថ្លែង ឬបញ្ជាក់ថា មានបុគ្គលម្នាក់ស្ថិតនៅក្នុងភាពប្រថុយប្រថានចង់ធ្វើអត្តឃាត ។ មនុស្សគ្រប់រូបគួរឈោងទៅជួយដោយក្ដីស្រឡាញ់ដើម្បីលួងលោម លើកទឹកចិត្ត ហើយមើលថែដល់អស់អ្នកដែលកំពុងពុះពារនឹងបញ្ហានេះ ព្រមទាំងសមាជិកគ្រួសាររបស់ពួកគេផងដែរ ។
គួរឲ្យសោកស្ដាយ មិនថាយើងខិតខំយ៉ាងណាទេ អត្តឃាតកម្មពុំតែងតែបង្ការបានជានិច្ចកាលនោះទេ ។ នៅពេលវាកើតឡើង វាបន្សល់ទុកនូវការខូចចិត្ត ចលាចលខាងសតិអារម្មណ៍យ៉ាងខ្លាំង ព្រមទាំងសំណួរដែលគ្មានចម្លើយចំពោះសមាជិកគ្រួសារ និងមនុស្សជាទីស្រឡាញ់ ។ នៅក្នុងស្ថានភាពទាំងនេះ ថ្នាក់ដឹកនាំ និងសមាជិកវួដគួរតែព្យាយាមដើម្បីពង្រឹង និងគាំទ្រដល់គ្រួសារ ព្រមទាំងមនុស្សជាទីស្រឡាញ់ ។
អែលឌើរ ឌែល ជី រ៉េនឡាន់ បានមានប្រសាសន៍ថា « ជំនឿខាងសាសនាពីបុរាណថា ការធ្វើអត្តឃាតគឺជាអំពើបាប ហើយថាមនុស្សដែលប្រព្រឹត្តអំពើអត្តឃាត គឺត្រូវបោះបង់ចោលទៅក្នុងស្ថាននរកជារៀងរហូត…[ គឺជា ] ជំនឿខុសឆ្គងទាំងស្រុង » ( ឌែល ជី រ៉េនឡាន់ « Understanding Suicide » [ វីដេអូ ] ) ។
អែលឌើរ អិម រ័សុល បាឡឺដ បានផ្ដល់នូវប្រសាសន៍លួងលោមចិត្តទាំងនេះថា ៖
« ជាក់ស្ដែងណាស់ យើងមិនដឹងអំពីស្ថានភាពទាំងស្រុងដែលជាប់ពាក់ព័ន្ធនឹងការធ្វើអត្តឃាតទាំងអស់នោះទេ ។ មានតែព្រះអម្ចាស់ប៉ុណ្ណោះដែលទ្រង់ជ្រាប់ដឹងព័ត៌មានលម្អិតទាំងអស់ ហើយទ្រង់គឺជាអង្គដែលនឹងកាត់សេចក្តីពីទង្វើរបស់យើងនៅលើផែនដីនេះ ។
« នៅពេលទ្រង់ជំនុំជម្រះពួកយើង នោះខ្ញុំមានអារម្មណ៍ថា ទ្រង់នឹងលើកយកអ្វីៗទាំងអស់មកព្រះតំរិះ ៖ ហ្សែន និងលក្ខណៈនៃធាតុគីមីរបស់យើង ស្ថានភាពផ្លូវចិត្តរបស់យើង សមត្ថភាពនៃបញ្ញារបស់យើង ការបង្រៀនដែលយើងបានទទួល ប្រពៃណីនៃជីដូនជីតារបស់យើង និងសុខភាពរបស់យើងជាដើម » ( « Suicide: Some Things We Know, and Some We Do Not » Ensign ខែ តុលា ឆ្នាំ ១៩៨៧ ទំព័រ ៨ ) ។
ព្យាយាមយល់
នៅពេលអ្នកនិយាយជាមួយនឹងបុគ្គលម្នាក់ៗ សូមប្រាកដថាបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។ បទពិសោធន៍ និងស្ថានភាពនៃជីវិតគឺមានខុសៗគ្នាសម្រាប់មនុស្សគ្រប់រូប ។ បើអ្នកមានអារម្មណ៍ថាសមាជិកស្ថិតក្នុងហានិភ័យប៉ុនប៉ងធ្វើអត្តឃាត សូមពិចារណាសួរនូវសំណួរទាំងនេះប្រកបដោយការអធិស្ឋានដើម្បីជួយអ្នកឲ្យយល់អំពីកង្វល់ និងតម្រូវការរបស់ពួកគេឲ្យបានកាន់តែច្បាស់ ៖
-
តើអ្នកអាចជួយខ្ញុំឲ្យយល់អំពីអារម្មណ៍ និងបទពិសោធន៍របស់អ្នកនាពេលនេះបានឬទេ ?
-
តើអ្នកធ្លាប់បានធ្វើរោគវិនិច្ឆ័យអំពីស្ថានភាពសុខភាពផ្លូវចិត្តដែរឬទេ ? តើអ្នកធ្វើតាមការព្យាបាលតាមបទបញ្ជាសម្រាប់ស្ថានភាពនេះដែរឬទេ ?
-
តើអ្នកមានសង្ឃឹមថា ស្ថានភាពទាំងឡាយនឹងបានប្រសើរឡើងនៅក្នុងជីវិតរបស់អ្នកដែរឬទេ ?
-
តើអ្នកមានហេតុផលអ្វីខ្លះដើម្បីរស់នៅ ?
-
តើធនធានអ្វីខ្លះបានជួយអ្នកឲ្យគ្រប់គ្រងរឿងក្នុងអតីតកាលបាន ?
-
តើអ្នកមានបានព្យាយាមធ្វើបាបខ្លួនឯងពីមុនដែរឬទេ ? ចុះបច្ចុប្បន្ននេះ ?
-
តើអ្នកកំពុងគិតអំពីការធ្វើអត្តឃាតឬទេឥឡូវនេះ ?
-
តើអ្នកមានផែនការចង់ធ្វើអត្តឃាតឬទេ ? តើអ្នកមានគិតអំពីពេលវេលា ទីតាំង ឬវិធីដែរឬទេ ?
-
តើគ្រួសារអ្នក មិត្តភក្ដិ ឬអ្នកដទៃបានដឹងអំពីគំនិតរបស់អ្នកដែរឬទេ ?
-
តើអ្នកបើកចិត្តប៉ុណ្ណាដែរដើម្បីទទួលជំនួយក្នុងពេលនេះ ?
ជួយបុគ្គលម្នាក់
នៅពេលអ្នកព្យាយាមជួយដល់បុគ្គលនេះ សូមធ្វើការពិចារណាពីយោបល់ដូចខាងក្រោម ។
សូមជួយសមាជិកឲ្យស្វែងរកសង្ឃឹម និងការព្យាបាលតាមរយៈព្រះអង្គសង្គ្រោះព្រះយេស៊ូវគ្រីស្ទ ។
-
ជួយបុគ្គលនេះឲ្យយល់អំពីព្រះចេស្ដាដែលអាចធ្វើអ្វីៗឲ្យកើតឡើង និងប្រោសលោះរបស់ព្រះយេស៊ូវគ្រីស្ទ ។
-
ជួយបុគ្គលនេះឲ្យយល់ថា គាត់គឺជាកូនរបស់ព្រះ និងមានតម្លៃដ៏មហិមា ។
-
ជួយបុគ្គលនេះឲ្យដឹងថាព្រះស្រឡាញ់នាង ឬគាត់ មិនថាមានអ្វីកើតឡើងនោះទេ ។
-
ជួយសមាជិកនេះឲ្យយល់ថា ការព្យាបាលអាចនឹងពុំមែនជាមធ្យោបាយដើម្បីជាសះស្បើយពីជំងឺផ្លូវចិត្តនៅក្នុងជីវិតនេះជានិច្ចកាលនោះទេ ។ សូមមើលធនធាននៅលើ សុខភាពផ្លូវចិត្ត សម្រាប់ព័ត៌មានបន្ថែម ។
-
ពិចារណាធ្វើការជួបជាទៀងទាត់ជាមួយនឹងបុគ្គលនោះ និងគ្រួសារគាត់បន្ថែមពីលើការជួបជាទៀងទាត់មកពីថ្នាក់ដឹកនាំសាសនាចក្រ ។
-
ភ្ជាប់ទំនាក់ទំនងឲ្យបុគ្គលនោះសិក្សាធនធានសាសនាចក្រដទៃទៀត ដូចជាវគ្គ « អត្តឃាតកម្ម » និង « សុខភាពផ្លូវចិត្ត » នៅលើគេហទំព័រ ChurchofJesusChrist.org ដែលគាត់ ឬនាងអាចស្វែងរកចម្លើយចំពោះសំណួរជាក់លាក់បាន ។
-
សូមប្រាកដថាបុគ្គលនោះស្គាល់លេខទូរសព្ទបន្ទាន់ដែលជួយក្នុងករណីធ្វើអត្តឃាត និងអាចទទួលបានជំនួយក្នុងពេលអាសន្ន ។
សូមពិគ្រោះជាមួយនឹងធនធានមានវិជ្ជាជីវៈ ។
-
បើអ្នកបារម្ភអំពីសុវត្ថិភាពរបស់នរណាម្នាក់ ឬជឿថាបុគ្គលនោះអាចនឹងប៉ងធ្វើអត្តឃាត សូមទាក់ទងទៅកាន់សេវាវេជ្ជសាស្ត្របន្ទាន់ក្នុងមូលដ្ឋាន ឬការិយាល័យសេវាកម្មគ្រួសាររបស់អ្នក ( នៅកន្លែងដែលមាន ) ។ ថ្នាក់ដឹកនាំទាំងឡាយរបស់សាសនាចក្រ ក៏អាចទាក់ទងទៅបណ្ដាញជំនួយរបស់សាសនាចក្រសម្រាប់ជំនួយជាមួយនឹងបញ្ហានេះផងដែរ ។
-
ធនធានទាំងនេះអាចជួយអ្នកឲ្យស្គាល់អ្នកមានវិជ្ជាជីវៈក្នុងមូលដ្ឋាន ឬអង្គការដែលអាចជួយដល់បុគ្គលនោះបាន ។
សូមជួយបុគ្គលនោះឲ្យទទួលបានការព្យាបាលត្រឹមត្រូវសម្រាប់ស្ថានភាពសុខភាពផ្លូវចិត្តរបស់គាត់ ។
-
លើកទឹកចិត្តបុគ្គលនោះឲ្យប្រើធនធានដែលបានផ្ដល់អនុសាសន៍ដោយសេវាកម្មគ្រួសារ ឬសេវាវេជ្ជសាស្ត្របន្ទាន់ ។ អ្នកអាចជួយគាត់ឲ្យដាក់កាលវិភាគប្រឹក្សា ឬទៅកាន់បន្ទប់សង្គ្រោះបន្ទាន់ក្នុងមន្ទីរពេទ្យដែលជិតបំផុត ។
-
ដោយមានការអនុញ្ញាតមកពីបុគ្គលនោះ សូមជូនដំណឹងដល់សមាជិកគ្រួសារអំពីស្ថានភាពនេះតាមការគួរ ។ ចូរសុំពួកគេឲ្យស្វែងរកការដឹកនាំមកពីអ្នកមានវិជ្ជាជីវៈខាងសុខភាពផ្លូវចិត្តអំពីរបៀបដាក់ផែនការសម្រាប់សុវត្ថិភាពរបស់បុគ្គលនោះ ។ ការណ៍នេះអាចរាប់បញ្ចូលទាំងការដាក់កំហិតលទ្ធភាពរបស់បុគ្គលនោះឲ្យមានរបស់ដែលអាចមានគ្រោះថ្នាក់ ។
-
តាមសមរម្យ សូមបន្ដទំនាក់ទំនងជាទៀងទាត់ជាមួយនឹងអ្នកមានវិជ្ជាជីវៈខាងសុខភាពផ្លូវចិត្ត ឬសមាជិកគ្រួសារអំឡុងពេលព្យាបាល ។
-
បើបុគ្គលនោះបដិសេធមិនទទួលជំនួយ ហើយមានផែនការប៉ងបង្កគ្រោះថ្នាក់ដល់ខ្លួនឯង សូមទំនាក់ទំនងភ្លាមទៅកាន់ធនធានសង្គ្រោះបន្ទាន់ក្នុងមូលដ្ឋាន ( ដូចជាអាជ្ញាធរស៊ីវិល ) និងសមាជិកគ្រួសារដើម្បីកំដរបុគ្គលនោះទៅកាន់សេវាសង្គ្រោះបន្ទាន់ ។
គាំទ្រដល់គ្រួសារ
បុគ្គលម្នាក់ដែលមានហានិភ័យក្នុងការប៉ងធ្វើអត្តឃាតជះឥទ្ធិពលទៅលើជីវិតរបស់សមាជិកគ្រួសាររបស់គាត់ឬនាង ។ ឪពុកម្ដាយ ស្វាមីភរិយា និងសមាជិកគ្រួសារដទៃទៀត ជាធម្មតាមានបញ្ហាក្នុងការដឹងពីរបៀបជួយដល់មនុស្សជាទីស្រឡាញ់ក្នុងវិបត្តិនេះ ។ ជាញឹកញាប់ ពួកគេមានអារម្មណ៍សន្ធប់ ហើយអាចនឹងមើលមិនឃើញពីសញ្ញាព្រមាននានា ។ នៅពេលអ្នកព្យាយាមជួយដល់សមាជិកគ្រួសារ សូមធ្វើការពិចារណាពីយោបល់ដូចខាងក្រោម ។
សូមរក្សាការសម្ងាត់អំពីស្ថានភាពនេះ លុះត្រាតែមានការគំរាមគំហែងហៀបនឹងកើតឡើង ស្ថានភាពជាប់ទាក់ទងនឹងកុមារជាអនីតិជន ឬបុគ្គលនោះ ឬគ្រួសារផ្ដល់ការអនុញ្ញាតឲ្យអ្នកនិយាយទៅកាន់អ្នកដទៃទៀត ។
សូមកំណត់អំពីឥទ្ធិពលនៃស្ថានភាពរបស់សមាជិកនេះទៅលើគ្រួសាររបស់គាត់ ឬនាង ហើយជួយសមាជិកគ្រួសារឲ្យស្គាល់ធនធានដែលពួកគេត្រូវការសម្រាប់ការគាំទ្រ និងការណែនាំផ្ទាល់ខ្លួនរបស់ពួកគេ ។
-
លើកទឹកចិត្តគ្រួសារឲ្យប្រឹក្សាជាមួយគ្នាអំពីតម្រូវការរបស់បុគ្គលនេះ និងអំពីរបៀបដើម្បីប្រើធនធនាដែលមានដើម្បីជួយគាត់ ឬនាង និងខ្លួនពួកគេផ្ទាល់ ។
-
បើគ្រួសារចង់ធ្វើដូច្នោះ សូមទៅជួបពួកគេ ( ឬផ្ដល់អនុសាសន៍ថ្នាក់ដឹកនាំដទៃទៀតឲ្យជួបនឹងពួកគេតាមការគួរ ) ដើម្បីបង្កើតផែនការល្អមួយដើម្បីបំពេញតម្រូវការរបស់ពួកគេ រួមទាំង ផែនការសុវត្ថិភាព ហើយគាំទ្រដល់មនុស្សជាទីស្រឡាញ់របស់ពួកគេដើម្បីទទួលការមើលថែមានវិជ្ជាជីវៈ និងការមើលថែខាងវិញ្ញាណដែលចាំបាច់ ។
សូមពិចារណាអំពីជំនួយមានវិជ្ជាជីវៈផ្ទាល់ខ្លួន ឬការប្រឹក្សាសម្រាប់សមាជិកគ្រួសារ ។
-
លើកទឹកចិត្តស្វាមី ឬភរិយា ឪពុកម្ដាយ និងសមាជិកគ្រួសារដទៃទៀតឲ្យចូលរួមនៅក្នុងការប្រឹក្សាជាមួយនឹងបុគ្គលនោះផងដែរ បើអ្នកមានវិជ្ជាជីវៈខាងសុខភាពផ្លូវចិត្តកំណត់ថា ការចូលរួមនេះគឺអាចធ្វើទៅបាន ហើយសមរម្យ ។
ប្រើប្រាស់ធនធានក្នុងវួដ និងស្ដេក
សូមធ្វើការពិចារណាយោបល់ដូចខាងក្រោម នៅពេលអ្នកព្យាយាមប្រើធនធានវួដ និងស្ដេកដើម្បីជួយដល់បុគ្គលនោះ និងគ្រួសាររបស់គាត់ ។ សូមចងចាំដើម្បីរក្សាភាពសម្ងាត់អំពីស្ថានភាពនេះ លុះតា្រតែបុគ្គលនោះ ឬគ្រួសាររបស់គាត់ផ្ដល់ការអនុញ្ញាតឲ្យអ្នកនិយាយជាមួយនឹងអ្នកដទៃទៀត ។
ចូរសុំដល់ថ្នាក់ដឹកនាំសាសនាចក្រ ឬបុគ្គលដែលជាទីទុកចិត្តដទៃទៀតឲ្យបន្ដផ្ដល់ការគាំទ្រ ការណែនាំ និងជំនួយដល់បុគ្គលនោះ ។
សូមអធិស្ឋានកំណត់ពីបុគ្គលដែលជាទីទុកចិត្តម្នាក់ដែលគាត់អាចធ្វើការតាមដានជាមួយនឹងបុគ្គលនោះជាទៀងទាត់ ហើយអញ្ជើញបុគ្គលនោះឲ្យធ្វើដូច្នោះ ។
-
បុគ្គលដែលត្រូវបានជ្រើសរើសគួរតែជាមនុស្សម្នាក់ដែលបុគ្គលនោះមានអារម្មណ៍ល្អជាមួយ ។
-
បុគ្គលនោះគួរតែយកចិត្តទុកដាក់ និងមានស្ថានភាពសតិអារម្មណ៍នឹងនរ ហើយអាចជាបងប្អូនប្រុសស្រីដែលផ្ដល់ការងារបម្រើម្នាក់ ។
សូមពិចារណាធ្វើការរៀបចំការបំពាក់បំប៉នសម្រាប់សមាជិកក្រុមប្រឹក្សាវួដ ឬស្ដេកអំពីការបង្ការការធ្វើអត្តឃាត ។
-
ប្រើសម្ភារមកពីធនធានប្រឹក្សា ឬមកពីវគ្គ « ការធ្វើអត្តឃាត » នៅលើគេហទំព័រ suicide.ChurchofJesusChrist.org ។
-
ពិចារណាអញ្ជើញអ្នកមានវិជ្ជាជីវៈមកពីកម្មវិធីធនធានសហគមន៍ដែលនៅជិតអ្នកឲ្យជួយ ។ សេវាកម្មគ្រួសារ ( នៅកន្លែងដែលមាន ) ឬសេវាវេជ្ជសាស្ត្រសង្គ្រោះបន្ទាន់ក្នុងមូលដ្ឋាន អាចជួយប្រាប់អំពីធនធានដូច្នេះបាន ។