« ការប្រើប្រាស់ការណ៍អាសគ្រាម » ធនធានការប្រឹក្សា ( ឆ្នាំ ២០២០ ) ។
« ការប្រើប្រាស់ការណ៍អាសគ្រាម » ធនធានការប្រឹក្សា ។
ការប្រើប្រាស់ការណ៍អាសគ្រាម
ការណ៍អាសគ្រាមគឺជាសម្ភារនានា ដែលបង្ហាញ ឬពិពណ៌នាអំពីរូបកាយមនុស្ស ឬអាកប្បកិរិយាផ្លូវភេទតាមរបៀបមួយដែលដាស់អារម្មណ៍ផ្លូវភេទ ។ សាសនាចក្របង្រៀនយ៉ាងខ្ជាប់ខ្ជួនថា ការប្រើប្រាស់ការណ៍អាសគ្រាមគឺជាឥរិយាបថប្រកបដោយអំពើបាប ។
បុគ្គលភាគច្រើនដែលប្រើប្រាស់ការណ៍អាសគ្រាមមានការលំបាកក្នុងទំនាក់ទំនង—ជាមួយព្រះ ខ្លួនឯង និងអ្នកដទៃទៀតនៅក្នុងកម្រិតផ្សេងៗគ្នា ។ ពួកគេក៏អាចនឹងមានអារម្មណ៍ថាមានកំហុស ឬភាពអាម៉ាស់ផងដែរ ។ មិនថាកម្រិតនៃការប្រើប្រាស់ការណ៍អាសគ្រាមប៉ុណ្ណានោះទេ ការបង្ហាញសេចក្ដីស្រឡាញ់ និងការដឹងគុណដល់បុគ្គលម្នាក់ៗចំពោះកម្លាំងរបស់ពួកគេក្នុងការចេញមុខទទួលស្គាល់កំហុស គឺជាជំហានដ៏សំខាន់មួយដើម្បីជួយពួកគេឲ្យបង្កើនការឲ្យតម្លៃខ្លួនឯង និងសមត្ថភាពរបស់ពួកគេដើម្បីយកឈ្នះលើបញ្ហានេះ ។
នៅពេលអ្នកផ្ដល់ការងារបម្រើដល់បុគ្គលម្នាក់ៗដែលមានបញ្ហានឹងការប្រើប្រាស់ការណ៍អាសគ្រាម សូមព្យាយាមណែនាំពួកគេឲ្យមកកាន់ព្រះគ្រីស្ទ ។ សូមលើកទឹកចិត្តឲ្យបុគ្គលម្នាក់ៗយល់ពីកត្តានានាដែលជំរុញឲ្យប្រើប្រាស់ការណ៍អាសគ្រាមរបស់ពួកគេ ហើយបង្កើតផែនការដើម្បីផ្លាស់ប្ដូរឥរិយាបថរបស់ពួកគេ ។
ព្យាយាមយល់
ការប្រើប្រាស់ការណ៍អាសគ្រាមអាចក្លាយជាញៀនបាន ប៉ុន្តែសូមផ្ដល់ការប្រឹក្សាដល់សមាជិកឲ្យផ្ដោតលើអត្តសញ្ញាណដ៏ទេវភាពរបស់ពួកគេ ក្នុងនាមជាបុត្រា និងបុត្រីរបស់ព្រះ ជាជាងការដាក់ស្លាកខ្លួនឯងទៅតាមឥរិយាបថរបស់ពួកគេ ។ សូមពិចារណាសួរនូវសំណួរទាំងនេះប្រកបដោយការអធិស្ឋាន ដើម្បីយល់ដឹងកាន់តែច្បាស់អំពីការប្រើប្រាស់ការណ៍អាសគ្រាមរបស់សមាជិកនេះ និងដឹងពីតម្រូវការរបស់គាត់ ឬនាង ។
-
តើការប្រើប្រាស់ការណ៍អាសគ្រាមមានឥទ្ធិពលអ្វីខ្លះមកលើជីវិតរបស់អ្នក ?
-
តើអ្នកប្រើការណ៍អាសគ្រាមញឹកញាប់ប៉ុណ្ណាដែរ ?
-
តើមានអ្វីខ្លះដែលបានជួយអ្នកឲ្យយកឈ្នះលើបញ្ហានេះ ?
-
តើអ្នកបានអនុវត្តគោលការណ៍ដំណឹងល្អដើម្បីយកឈ្នះលើបញ្ហានេះដោយរបៀបណា ?
បើអ្នកបានដឹងពីការមើល ការទិញ ឬការចែកចាយនៃការណ៍អាសគ្រាមកុមារ សូមទាក់ទងទៅកាន់អាជ្ញាធរស៊ីវិល ។ មាន បណ្ដាញជំនួយ ដើម្បីឲ្យប៊ីស្សពរបស់អ្នកទូរសព្ទទៅ នៅពេលជួបប្រទះនឹងបញ្ហានេះ
ជួយបុគ្គលម្នាក់ៗ
ជាញឹកញាប់ ការប្រើប្រាស់ការណ៍អាសគ្រាមគឺមិនមែនគ្រាន់តែជាភាពទន់ខ្សោយខាងសីលធម៌នោះទេ ហើយមានកត្តាជំរុញជាច្រើនផងដែរ ។ ការជួយបុគ្គលម្នាក់ៗឲ្យទទួលបានការយល់ដឹងកាន់តែខ្លាំងអំពីកត្តានានាដែលជំរុញឲ្យប្រើប្រាស់ការណ៍អាសគ្រាម អាចពង្រឹងសមត្ថភាពរបស់ពួកគេដើម្បីយកឈ្នះលើវាបាន ។
សូមពង្រឹងការយល់ដឹងរបស់បុគ្គលម្នាក់ៗអំពីគោលលទ្ធិ ដែលអាចជួយពួកគេឲ្យយកឈ្នះលើការប្រើប្រាស់ការណ៍អាសគ្រាមបាន ៖
-
សូមជួយពួកគេឲ្យយល់ដឹងអំពីតួនាទីរបស់ព្រះអង្គសង្គ្រោះ និងសមត្ថភាពរបស់ទ្រង់ដើម្បីជួយយើងតាមរយៈដង្វាយធួនរបស់ទ្រង់ ។
-
សូមជួយបុគ្គលនោះឲ្យមើលឃើញពីអត្តសញ្ញាណរបស់គាត់ ឬនាងក្នុងនាមជាបុត្ររបស់ព្រះ ហើយទទួលស្គាល់ភាពខ្លាំង ទេពកោសល្យ និងសមត្ថភាពផ្ទាល់ខ្លួនរបស់ពួកគេម្នាក់ៗ ។
-
សូមជួយបុគ្គលនោះឲ្យយល់ដឹងអំពីសិទ្ធិជ្រើសរើស និងការទទួលខុសត្រូវរបស់គាត់ ឬនាងដើម្បីឆ្លងកាត់បញ្ហានេះ ។
-
សូមជួយបុគ្គលម្នាក់ៗឲ្យយល់ដឹងអំពីឥទ្ធិពលដ៏បំផ្លិចបំផ្លាញមួយនៃការប្រើប្រាស់ការណ៍អាសគ្រាម គឺថាអ្នកប្រើប្រាស់វា ជាញឹកញាប់ចាប់ផ្ដើមមើលឃើញអ្នកដទៃទៀតថាជាឧបករណ៍ដើម្បីបំពេញចំណង់របស់ពួកគេ ជាជាងមើលទៅអ្នកដទៃទៀតថាជាបុត្រាបុត្រីរបស់ព្រះ ។
-
សូមពិភាក្សាអំពីភាពខុសគ្នារវាងកំហុស ( « ខ្ញុំបានធ្វើរឿងអាក្រក់មួយ » ) និងភាពអាម៉ាស់ ( « ខ្ញុំជាមនុស្សអាក្រក់ » ) ហើយសូមជួយបុគ្គលនោះឲ្យយល់ដឹងអំពីសារៈសំខាន់នៃកំហុស ខណៈពេលដែលចៀសវាងពីភាពអាម៉ាស ។
-
សូមលើកទឹកចិត្តដល់សមាជិកឲ្យស្វែងរកព័ត៌មានអំពីសុខភាពផ្លូវភេទ ការបង្ហាញអារម្មណ៍ខាងផ្លូវភេទត្រឹមត្រូវ និងតួនាទីនៃចំណង់ផ្លូវភេទដែលមាននៅក្នុងរង្វង់ដែនកំណត់ដែលព្រះបានបង្កើតឡើង ។
សូមលើកទឹកចិត្តបុគ្គលនោះឲ្យបង្កើតផែនការមួយដើម្បីបញ្ឈប់ការប្រើប្រាស់ការណ៍អាសគ្រាមរបស់ពួកគេ ។
-
សូមអញ្ជើញបុគ្គលនោះឲ្យស្វែងរកការបំផុសគំនិតផ្ទាល់ខ្លួនរបស់ពួកគេនៅក្នុងការបង្កើតផែនការដែលអាចដំណើរការបាន ។
-
សូមលើកទឹកចិត្តបុគ្គលនោះឲ្យរៀបចំមធ្យោបាយដើម្បីដាក់កំហិតការចូលមើលការណ៍អាសគ្រាម ដូចជាការតម្លើងតម្រងអ៊ីនធឺណិត និងការអនុញ្ញាតឲ្យអ្នកដទៃទៀតចូលទៅកាន់ឧបករណ៍ទូរសព្ទ កុំព្យូទ័រ ព្រមទាំងលេខសម្ងាត់ដើម្បីគ្រប់គ្រងលើប្រវត្តិការមើលរបស់ពួកគេ ។
សូមលើកទឹកចិត្តដល់បុគ្គលនោះឲ្យកំណត់សម្គាល់ពីស្ថានភាពទូទៅបំផុតនានា ដែលបង្កើនការល្បួងឲ្យប្រើការណ៍អាសគ្រាម និងរបៀបដើម្បីចៀសវាងពីវា ។
-
សូមកំណត់ « ទីកន្លែង » « ពេលវេលា » និង « របៀប » នៃស្ថានភាពនីមួយៗ ( ពិចារណាអំពីការកំណត់លើការចូល និងការប្រើប្រាស់នៃប្រព័ន្ធផ្សព្វផ្សាយ ដូចជាទស្សនាវដ្ដី សៀវភៅ ទូរទស្សន៍ ខ្សែភាពយន្ដ តន្ត្រី អ៊ីនធឺណិត ។ល។ ) ។
-
សូមស្វែងយល់ពីអារម្មណ៍ដែលនៅពីក្រោយស្ថានភាពទាំងនោះ ( ឧទាហរណ៍ អារម្មណ៍ធុញទ្រាន់ ឯកោ ខឹង ស្មុគស្មាញ ឬនឿយហត់ ) ។
សូមអញ្ជើញបុគ្គលនោះឲ្យពិភាក្សាអំពីបញ្ហានោះជាមួយនឹងស្វាមី ឬភរិយា ឬឪពុក ឬម្ដាយរបស់គាត់ ឬនាង ។
-
សូមលើកទឹកចិត្តឲ្យបុគ្គលនោះបង្កើតផែនការដើម្បីស្ដារទំនុកចិត្តជាមួយនឹងអ្នកទាំងឡាយដែលមានអារម្មណ៍ថាត្រូវគេក្បត់ដោយការប្រើប្រាស់ការណ៍អាសគ្រាម ។
សូមអញ្ជើញបុគ្គលនោះឲ្យជួបជាទៀងទាត់ជាមួយនឹងមនុស្សជាទីទុកចិត្តម្នាក់ដើម្បីពិភាក្សាអំពីការរីកចម្រើន ។
សូមពិចារណាធ្វើការភ្ជាប់បុគ្គលនោះជាមួយនឹងក្រុមគាំទ្រ ឬកម្មវិធីដែលគាំទ្រដល់គុណតម្លៃដូចគ្នានៅជុំវិញការយកឈ្នះលើការណ៍អាសគ្រាម ។
-
សូមអញ្ជើញសមាជិកនោះឲ្យចូលរួមក្រុមគាំទ្រការព្យាបាលក្នុងមូលដ្ឋាន ( វគ្គ « Addiction Recovery នៅលើគេហទំព័រ ChurchofJesusChrist.org ) នៅកន្លែងដែលមាន ។
-
បើគ្មានកម្មវិធីគាំទ្រក្នុងមូលដ្ឋានទេ សូមពិចារណាអំពីជម្រើសផ្សេងៗទៀត ដែលអាចមានដូចជា ក្រុមគាំទ្រតាមសហគមន៍ ឬក្រុម ឬកម្មវិធីគាំទ្រនានាតាមអនឡាញ ។
គាំទ្រដល់គ្រួសារ
ការប្រើប្រាស់ការណ៍អាសគ្រាមមានឥទ្ធិពលលើស្វាមី ឬភរិយា និងសមាជិកគ្រួសារដទៃទៀត ។ នៅពេលអ្នកព្យាយាមគាំទ្រស្វាមី ឬភរិយា ឬសមាជិកគ្រួសារដទៃទៀតរបស់អ្នកប្រើប្រាស់ការណ៍អាសគ្រាម សូមស្ដាប់ភាពភ័យខ្លាច និងការព្រួយបារម្ភរបស់ពួកគេ ។ សូមប្រាកដថាបានបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។ បន្ថែមពីលើនោះ សូមប្រាកដថាផ្ដល់ការគាំទ្រល្មមគ្រប់គ្រាន់ដល់ស្វាមី ឬភរិយាដែលអាចកំពុងតែមានបញ្ហានេះ ។ សូមមើល គាំទ្រដល់ស្វាមីភរិយារបស់អ្នកប្រើប្រាស់ការណ៍អាសគ្រាម សម្រាប់ព័ត៌មានបន្ថែមទៀត ។
សូមលើកទឹកចិត្តដល់ស្វាមី ឬភរិយា ឬសមាជិកគ្រួសារឲ្យកំណត់ពីឥទ្ធិពលដែលស្ថានភាពនេះបានមានមកលើគាត់ ឬនាង ហើយស្វែងរកជំនួយតាមការចាំបាច់ ដើម្បីដោះស្រាយបញ្ហាទាំងអស់នោះ ។
សូមជួយសមាជិកគ្រួសារឲ្យយល់អំពីរបៀបដែលព្រះអង្គសង្គ្រោះអាចជួយបាន ទោះជាមនុស្សដែលពួកគាត់ស្រឡាញ់អាច ឬពុំអាចឈប់មើលការណ៍អាសគ្រាមក្ដី ( សូមមើល អាលម៉ា ៧:១១ និង ម៉ាថាយ ១១:២៨–៣០ ) ។
សូមអញ្ជើញសមាជិកគ្រួសារឲ្យចូលរួម ក្រុមគាំទ្រស្វាមី ឬភរិយា និងគ្រួសារ ក្នុងសាសនាចក្រ ឬក្រុមគាំទ្រស្រដៀងគ្នានោះ ប្រសិនបើមាន ។ សូមមើលវគ្គ « ការព្យាបាលការញៀន » នៅលើគេហទំព័រ ChurchofJesusChrist.org សម្រាប់ម៉ោងក្រុមគាំទ្រ ។
សូមលើកទឹកចិត្តសមាជិកគ្រួសារឲ្យមើលធនធានសម្រាប់ស្វាមីភរិយា និងសមាជិកគ្រួសារនៅក្នុងវគ្គ « Addressing Pornography » នៅលើគេហទំព័រ ChurchofJesusChrist.org ។
ប្រើប្រាស់ធនធានក្នុងវួដ និងស្ដេក
សូមពិចារណាធ្វើការសួរដល់ថ្នាក់ដឹកនាំវួដ ឬបុគ្គលដែលជាទីទុកចិត្តដទៃទៀតដើម្បីបន្ដផ្ដល់ការគាំទ្រ ។ សូមស្នើសុំការអនុញ្ញាតពីបុគ្គលនោះពីមុនពិភាក្សាអំពីស្ថានភាពនោះជាមួយអ្នកដទៃទៀត ។
សូមកំណត់ពីបុគ្គលដែលជាទីទុកចិត្តឲ្យធ្វើជាអ្នកគាំទ្រដល់សមាជិកនេះ ហើយលើកទឹកចិត្តពួកគេឲ្យជួបគ្នាជាទៀងទាត់ ។
-
ជាពិសេស បុគ្គលនេះគួរតែជាមនុស្សម្នាក់ដែលបុគ្គលនោះមានអារម្មណ៍ល្អជាមួយ ហើយជាមនុស្សម្នាក់ដែលបានទទួលជោគជ័យនៅក្នុងការយកឈ្នះលើការណ៍អាសគ្រាម ឬជាមនុស្សដែលមានការយល់ដឹងល្អអំពីបញ្ហាអស់ទាំងនេះ ។
-
បុគ្គលនេះអាចជាបងប្អូនប្រុសស្រីដែលផ្ដល់ការងារបម្រើ ។
នៅក្នុងករណីមួយចំនួន ការប្រើប្រាស់ការណ៍អាសគ្រាមរបស់បុគ្គលម្នាក់អាចនឹងនៅបន្ដ ទោះជាគាត់បានខិតខំយ៉ាងខ្លាំង ហើយមានជំនួយមកពីអ្នកដទៃទៀតដើម្បីយកឈ្នះលើការប្រើប្រាស់ការណ៍អាសគ្រាមក្ដី ។
-
សូមពិចារណានាំសមាជិកនោះទៅកាន់អ្នកមានវិជ្ជាជីវៈខាងសុខភាពផ្លូវចិត្តដែលផ្ដល់សេវាសមស្របទៅនឹងគោលការណ៍ដំណឹងល្អ ។
-
សេវាកម្មគ្រួសារ ( នៅកន្លែងដែលមាន ) អាចនឹងជាជំនួយ ឬធ្វើការណែនាំទៅកាន់ធនធានក្នុងមូលដ្ឋាន ដែលអាចរួមមានទាំងកម្មវិធី ឬមជ្ឈមណ្ឌលព្យាបាល កម្មវិធីសហគមន៍ក្នុងមូលដ្ឋាន ឬក្រុមគាំទ្រ និងភ្នាក់ងារនានារបស់រដ្ឋាភិបាល ។