ការជាសះស្បើយពីអន្ទាក់នៃការណ៍អាសគ្រាម

ខែ តុលា ឆ្នាំ ២០១៥

ការជាសះស្បើយពីអន្ទាក់នៃ ការណ៍អាសគ្រាម

ដោយ អែលឌើរ ដាល្លិន អេច អូក

នៃកូរ៉ុមនៃពួកសាវកដប់ពីរនាក់

រូបភាព

Elder Dallin H. Oaks

យើងទាំងអស់គ្នាត្រូវរៀនឆ្លើយតបយ៉ាងត្រឹមត្រូវចំពោះប្រព័ន្ធផ្សព្វផ្សាយដែលមានព័ត៌មានអំពីផ្លូវភេទ ។

ការទៅរកព្រះអម្ចាស់ដោយបន្ទាបខ្លួន ដឹកនាំបុគ្គលម្នាក់ឲ្យទទួលយកសេចក្តីពិតជាក់លាក់ ដែលនៅពេលបានយល់ច្បាស់ ផ្តល់ជាកម្លាំង និងកំចាត់ចោលភាពខ្មាស់អៀនបាន ។

កាលពីមួយទស្សវត្សរ៍មុនខ្ញុំបាននិយាយនៅក្នុងសន្និសីទទូទៅអំពីប្រធានបទនៃការណ៍អាសគ្រាម ។ ខ្ញុំបានបន្ថែមពាក្យសម្តីរបស់ខ្ញុំលើពាក្យសម្តីរបស់ថ្នាក់ដឹកនាំផ្សេងទៀត ដែលបានព្រមានប្រឆាំងនឹងការបំផ្លិចបំផ្លាញខាងវិញ្ញាណដ៏ធ្ងន់ធ្ងរដោយសារតែការណ៍អាសគ្រាម ។ ខ្ញុំបានព្រមានថា បុរស និង ក្មេងប្រុសជាច្រើនបានកំពុងត្រូវរបួសដោយសារអ្វីមួយដែលខ្ញុំហៅថា « អក្សរសាស្រ្តផ្សព្វផ្សាយខុសសីលធម៌នៃទំនាក់ទំនងផ្លូវភេទ » ។^១ ការណ៍អាសគ្រាមប្រើអំពើអាក្រក់គ្រប់បែបយ៉ាង—វាបំផ្លាញស្មារតីខាងវិញ្ញាណ វាធ្វើឲ្យសមត្ថភាពចុះខ្សោយដើម្បីអនុវត្តអំណាចបព្វជិតភាព ហើយវាបង្កគ្រោះថ្នាក់ដល់ទំនាក់ទំនងដ៏មានតម្លៃ ។

ឥឡូវ១០ឆ្នាំបានកន្លងផុតទៅហើយ ខ្ញុំមានអំណរគុណដែលមនុស្សជាច្រើនបានស្តាប់ ហើយធ្វើតាមការព្រមានរបស់ព្យាការីបានចៀសវាង ហើយបន្តស្អាតស្អំ ព្រមទាំងពុំប្រលាក់នឹងការណ៍អាសគ្រាមឡើយ ។ ខ្ញុំមានអំណរគុណផងដែរដែលមនុស្សជាច្រើនបានស្តាប់តាមការអញ្ជើញរបស់ព្យាការីឲ្យងាកចេញពីការណ៍អាសគ្រាម កែសម្រួលដួងចិត្ត និង ទំនាក់ទំនងដែលខូចបង់ ហើយឆ្ពោះទៅមុនលើមាគ៌ានៃភាពជាសិស្ស ។ ប៉ុន្តែខ្ញុំព្រួយបារម្ភកាន់តែខ្លាំងជាងមុនទៅទៀតថា មានមនុស្សខ្លះក្នុងចំណោមពួកយើងបន្តធ្លាក់ធ្វើជាចំណីនៃការណ៍អាសគ្រាម ជាពិសេសយុវជនរបស់យើង ហើយសូម្បីតែចំនួនយុវនារីក៏មានការកើនឡើងដែរ ។

មូលហេតុចម្បងនៃបញ្ហាកើនឡើងនៃការណ៍អាសគ្រាមនេះគឺថាពិភពលោកបច្ចុប្បន្ននេះ ទាំងពាក្យសម្តី រូបភាពដែលមានផ្ទុកព័ត៌មានអំពីផ្លូវភេទ និង ឥទ្ធពលរបស់វាមាននៅគ្រប់ទីកន្លែង ៖ វាអាចមាននៅក្នុងខ្សែភាពយន្ត កម្មវិធីទូរទស្សន៍ ប្រព័ន្ធផ្សព្វផ្សាយសង្គម សារជាអក្សរ ប្រព័ន្ធapp នៅក្នុងទូរសព្ទ ការផ្សព្វផ្សាយ សៀវភៅផ្សេងៗ តន្ត្រី និង ការសន្ទនារាល់ថ្ងៃ ។ ជាលទ្ធផល យើងមិនអាចចៀសរួចដែលត្រូវជួបប្រទះសារផ្លូវភេទក្នុងការងារប្រចាំថ្ងៃ ។

I. កម្រិតនានានៃការពាក់ព័ន្ធ

ដើម្បីជួយយើងទប់ទល់នឹងការរីកចម្រើននៃការអាក្រក់នេះ ខ្ញុំចង់បង្ហាញកម្រិតនៃការពាក់ព័ន្ធផ្សេងៗគ្នាជាមួយការណ៍អាសគ្រាមមួយចំនួនហើយផ្តល់យោបល់ផ្សេងៗដែលយើងគួរឆ្លើយតបចំពោះការអាក្រក់និមួយៗនោះ ។

កាលពីសម័យ និង កាលៈទេសៈដើមឡើយ ការទូន្មានរបស់យើងអំពីការណ៍អាសគ្រាម បានផ្តោតលើគោលការណ៍ជួយបុគ្គលម្នាក់ៗឲ្យចៀសវាងពីការចាប់ផ្តើមជួបប្រទះ ឬ ជាសះស្បើយពីការញៀន ។ ខណៈដែលកិច្ចខិតខំទាំងនោះនៅតែសំខាន់ នោះបទពិសោធន៍កាលពីអតីតកាល និង កាលៈទេសៈបច្ចុប្បន្ន បានបង្ហាញពីតម្រូវការសម្រាប់ការទូន្មានដែលបានផ្តល់ឲ្យទៅលើកម្រិតនានានៃការណ៍អាសគ្រាមដែលប្រើរវាងប្រត្តិកម្មនៃការចៀសវាង និង ការញៀន ។ វាមានប្រយោជន៍ដើម្បីផ្តោតលើកម្រិតខុសគ្នាបួនយ៉ាងនៃការពាក់ព័ន្ធជាមួយការណ៍អាសគ្រាម ៖ (១) ប្រទះភ្នែកដោយចៃដន្យ (២) មើលម្តងម្កាល (៣) មានបំណងមើល និង (៤) អន្ទះសាចង់មើល ( ញៀន ) ។

ប្រទះភ្នែកដោយចៃដន្យ ខ្ញុំជឿថាអ្នកគ្រប់គ្នាធ្លាប់បានប្រទះភ្នែកឃើញវាដោយចៃដន្យ ។ វាគ្មានបាបទេដោយសារការណ៍នេះឡើយ នៅពេលយើងងាកចេញពីវា ហើយកុំតាមមើលវាទៀត ។ វាគឺដូចជាកំហុស ដែលត្រូវស្វែងរកការកែតម្រូវជាជាងការប្រែចិត្ត ។^២
មើលម្តងម្តាល ការមើលការណ៍អាសគ្រាមបែបនេះអាចយូរៗម្តង ឬ ក៏ញឹកញាប់ ប៉ុន្តែដោយពុំបានតាំងចិត្តឡើយ ហើយនោះគឺជាការណ៍អាក្រក់របស់ការណ៍អាសគ្រាម ។

ការណ៍អាសគ្រាមបញ្ឆេះ និង ជម្រុញឲ្យមានកម្លាំងអារម្មណ៍ខាងផ្លវភេទ ។ អង្គបង្កបង្កើតបានប្រទានអារម្មណ៍ទាំងនេះដល់យើងសម្រាប់គោលបំណងដ៏ឈ្លាសវៃរបស់ទ្រង់ ប៉ុន្តែទ្រង់ក៏បានប្រទានព្រះបញ្ញត្តិដើម្បីកំណត់អារម្មណ៍ទាំងនោះចំពោះបុរស និង ស្ត្រីដែលបានរៀបការតែប៉ុណ្ណោះ ។ ការណ៍អាសគ្រាមបន្ថយសារៈសំខាន់នៃការបង្ហាញទំនាក់ទំនងផ្លូវភេទសមរម្យ ហើយជម្រុញចិត្តឲ្យបង្ហាញអារម្មណ៍ផ្លូវភេទក្រៅចំណងនៃអាពាហ៍ពិពាហ៍ ។ អស់អ្នកដែលមើលការណ៍អាសគ្រាមកំពុងតែមិនគោរពអំណាចដ៏ខ្លាំងក្លាដែលថា ពួកគេអាចបង្កើតជីវិត ឬ បំផ្លាញជីវិតឡើយ ។ កុំធ្វើដូច្នោះឡើយ !

គ្រោះថ្នាក់ដោយការមើលការណ៍អាសគ្រាមដោយចេតនាមិនថាជាការជាប់លាប់ ឬមិនញឹកញាប់ក្តី តែវាតែងតែល្បួងឲ្យមានការមើលកាន់តែញឹកញាប់ ដែលចៀសមិនរួចពីការកើនឡើងនៃការគិតជាប់ជានិច្ចអំពីអារម្មណ៍ និង អាកប្បកិរិយ៉ាផ្លូវភេទឡើយ ។ អ្នកវិទ្យាសាស្ត្របានរកឃើញថា រូបភាពផ្លូវភេទបង្កើតសារធាតុគីមីនៅក្នុងខួរក្បាលដែលបង្កើតអារម្មណ៍ផ្លូវភេទ ក្រោយមកជម្រុញឲ្យកាន់តែផ្តោតលើអាកប្បកិរិយាផ្លូវភេទ ។^៣ អាកប្បកិរិយាអសីលធម៌ខាងផ្លូវភេទគ្រប់រូបភាព ឬ កម្រិតណាក៏ដោយ បង្កើតអារម្មណ៍ខ្មាស់អៀន ដែលយូរៗទៅអាចដក់ជាប់នៅក្នុងចិត្តរបស់បុគ្គលម្នាក់ ។
មានបំណងមើល ការមានបំណងមើលការណ៍អាសគ្រាមម្តងហើយម្តងទៀតអាចធ្វើឲ្យវាក្លាយទៅជាទម្លាប់ « អាកប្បកិរិយាដែលធ្វើជាប្រចាំរហូតដល់មិនអាចគ្រប់គ្រងបាន » ។^៤ ការមើលជាទម្លាប់ នាំឲ្យបុគ្គលម្នាក់ជួបប្រទះនូវតម្រូវការមួយដើម្បីភ្ញោចបន្ថែមទៀត ឲ្យមានប្រតិកម្មដូចគ្នាដើម្បីមានភាពត្រេកត្រអាល ។
អន្ទះសាចង់មើល ( ញៀន ) ។ អាកប្បកិរិយាញៀន របស់មនុស្សម្នាក់ នៅពេលដែលបានក្លាយជា « មិនឯករាជ្យ » (ជាពាក្យពេទ្យដែលបានប្រើ ចំពោះការប្រើប្រាស់ថ្នាំញៀន គ្រឿងស្រវឹង ការញៀននឹងល្បែងជាដើម ) ដែលជា « ការបង្ខំដោយការល្បួង » ដែល « វាលុបលើអ្វីៗស្ទើរតែទាំងអស់នៅក្នុងជីវិត » ។^៥II

. សារៈសំខាន់នៃការយល់ដឹងពីកម្រិតទាំងនេះ

នៅពេលយើងស្គាល់ពីកម្រិតខុសៗគ្នាទាំងនេះ នោះយើងក៏ស្គាល់ថា មិនមែនមនុស្សគ្រប់រូបដែលមើលការណ៍អាសគ្រាមនឹងញៀននឹងវានោះទេ ។ ពិតណាស់ យុវជន និង យុវនារីភាគច្រើនដែលមានបញ្ហាជាមួយការណ៍អាសគ្រាមគឺមិនមែនជាការញៀនទេ ។ នោះគឺជាភាពដាច់ដោយឡែកមួយយ៉ាងសំខាន់ដែលត្រូវធ្វើ—គឺមិនមែនគ្រាន់តែសម្រាប់ឪពុកម្តាយ ឬ ស្វាមី ភរិយា និង អ្នកដឹកនាំ ដែលមានបំណងដើម្បីជួយនោះឡើយ ប៉ុន្តែសម្រាប់អស់អ្នកដែលពុះពារជាមួយបញ្ហានេះ ។ នេះគឺជាហេតុផល ។

ទីមួយ បើកម្រិតនៃការពាក់ព័ន្ធរបស់បុគ្គលម្នាក់កាន់តែជ្រៅ—ចាប់ពី ការប្រទះភ្នែកដោយចៃដន្យ មើលម្តងម្កាល ឬ មានបំណងមើល និង អន្ទះសាចង់មើល ( ញៀន )—នោះក៏កាន់តែមានការលំបាកដើម្បីជាសះស្បើយពីវាផងដែរ ។ បើសិនអាកប្បកិរិយានោះខុសពីចំណាត់ថ្នាក់ដូចជាការញៀន នោះអ្នកប្រើប្រាស់អាចគិតថាគាត់បាត់បង់សិទ្ធិជ្រើសរើស និង សមត្ថភាពដើម្បីយកឈ្នះបញ្ហានោះ ។ ការណ៍នេះអាចធ្វើឲ្យការដោះស្រាយដើម្បីជាសះស្បើយ និង ប្រែចិត្តកាន់តែចុះខ្សោយ ។ ម្យ៉ាងវិញទៀត ការយល់ច្បាស់ពីជម្រៅនៃបញ្ហាមួយ—ដែលវាប្រហែលជាជ្រួតជ្រាប ឬ ភ័យខ្លាចខ្លាំង—អាចផ្តល់សេចក្តីសង្ឃឹម និង បង្កើនសមត្ថភាពដើម្បីអនុវត្តសិទ្ធិជ្រើសរើសដើម្បីបញ្ឈប់ ហើយប្រែចិត្ត ។

ទីពីរ រាល់អាកប្បកិរិយាដែលពោរពេញដោយអំពើបាប ការមានបំណងមើលការណ៍អាសគ្រាមបណ្តេញព្រះវិញ្ញាណចេញឆ្ងាយ ។ មនុស្សមួយចំនួនដែលធ្លាប់មានបទពិសោធន៍បែបនេះ នឹងមានអារម្មណ៍បំផុសឲ្យប្រែចិត្ត ។ ទោះជាយ៉ាងណា មនុស្សដទៃទៀត អាចមានអារម្មណ៍អៀនខ្មាស់ ហើយព្យាយាមលាក់បាំងកំហុសរបស់ខ្លួនដោយការបោកប្រាស់ ។ ពួកគេក៏អាចចាប់ផ្តើមមានអារម្មណ៍ខ្មាស់ ដែលអាចនាំឲ្យមានអារម្មណ៍ស្អប់ខ្លួនឯង ។ បើសិនការណ៍នេះកើតឡើងមែន នោះអ្នកមើលការណ៍អាសគ្រាមចាប់ផ្តើមជឿលើការកុហក់ដ៏ធំរបស់សាតាំង ៖ ថានោះជាអ្វីដែលពួកគេធ្លាប់ធ្វើ ឬ បន្តធ្វើដែលនាំឲ្យពួកគេក្លាយជាមនុស្សអាក្រក់ មិនសក្តិសមនឹងព្រះគុណរបស់ព្រះអង្គសង្គ្រោះ និង មិនអាចប្រែចិត្តបានឡើយ ។ ការណ៍នោះមិនពិតនោះទេ ។ យើងមិនដែលនៅឆ្ងាយពេកពីការឈោងជួយរបស់ព្រះអង្គសង្គ្រោះ និង ដង្វាយធួនរបស់ទ្រង់ឡើយ ។

ទីបំផុត វាសំខាន់ដើម្បីកុំកំណត់ថាការមើលការណ៍អាសគ្រាមដោយតាំងចិត្ត ឬ ជាទម្លាប់គឺជាការញៀនឡើយ ព្រោះនោះមិនមែនជាការពិពណ៌នាត្រឹមត្រូវឡើយអំពីកាលៈទេសៈ ឬ លក្ខណៈពេញលេញនៃតម្រូវការនៃការប្រែចិត្ត និង ការជាសះស្បើយឡើយ ។ ការមានការយល់ដឹងកាន់តែប្រសើរអំពីចំណុចណាមួយដែលបុគ្គលនោះនៅក្នុងដំណើរការនេះ នឹងធ្វើឲ្យមានការយល់កាន់តែប្រសើរអំពីវិធានការដែលចាំបាច់ដើម្បីជាសះស្បើយ ។

III. ការគេចឲ្យផុតពីការណ៍អាសគ្រាម

ឥឡូវចូរយើងពិចារណាពីរបៀបដែលបុគ្គលម្នាក់ៗអាចគេចឲ្យផុត ហើយជាសះស្បើយពីអន្ទាក់នៃការណ៍អាសគ្រាម ។ ការណ៍នេះមិនគ្រាន់តែផ្តល់អត្ថប្រយោជន៍ចំពោះអ្នកដែលពុះពារយកឈ្នះលើការមើលការណ៍អាសគ្រាមនេះឡើយ ប៉ុន្តែក៏មានប្រយោជន៍ដល់ឪពុកម្តាយ និង អ្នកដឹកនាំដែលជួយពួកគេផងដែរ ។ បុគ្គលម្នាក់ៗនឹងកាន់តែមានភាពជោគជ័យទាំងការចៀសវាង និង ជាសះស្បើយពីការណ៍អាសគ្រាម នៅពេលពួកគេពិភាក្សាពីប្រធានបទទាំងនេះជាមួយឪពុកម្តាយ និង អ្នកដឹកនាំ ។^៦

ដោយមិនគិតពីកម្រិតនៃការពាក់ព័ន្ធក្នុងការមានបំណងមើលការណ៍អាសគ្រាម វិធីសាស្ត្រដើម្បីជាសះស្បើយ ភាពបរិសុទ្ធ និង ការប្រែចិត្តធ្វើតាម និង តម្រូវឲ្យមានគោលការណ៍គ្រឹះដូចជា ៖ ការបន្ទាបខ្លួន ភាពជាសិស្ស ការតាំងចិត្តធ្វើតាមផែនការផ្ទាល់ខ្លួនដើម្បីផ្លាស់ប្តូរ ទំនួលខុសត្រូវ និង ការគាំទ្រ ព្រមទាំងការស៊ូទ្រាំក្នុងសេចក្តីជំនឿ ។

ការធ្វើតាមសេចក្តីពិតទាំងនេះ ក៏តម្រូវឲ្យបុគ្គលម្នាក់ៗទទួលយកដើម្បីរស់នៅដូចជាសិស្សរបស់ព្រះអម្ចាស់ ព្រះយេស៊ូវ គ្រីស្ទ ហើយការធ្វើកិច្ចការអ្វីៗដែលបន្សុទ្ធ និងពង្រឹងពួកគេឲ្យតទល់នឹងការល្បួងទាំងឡាយនៅថ្ងៃខាងមុខ ។

ក. ការបន្ទាបខ្លួន

ដើម្បីយកឈ្នះដ៏ពិតលើការណ៍អាសគ្រាម និង អាកប្បកិរិយាដែលទាក់ទងនឹងវា នោះបុគ្គលម្នាក់ៗត្រូវតែបង្កើនការបន្ទាបខ្លួន ( សូមមើល អេធើរ ១២:២៧ ) ។ សូមត្រឡប់ទៅរកព្រះអម្ចាស់ដោយការបន្ទាបខ្លួន នាំឲ្យមនុស្សម្នាក់ទទួលយកការពិតដែលច្បាស់លាស់ កាលណាបានយល់ដឹងពេញលេញហើយ នោះវាផ្តល់ជាកម្លាំង និង បោះបង់ចោលការខ្មាស់អៀន ។ សេចក្តីពិតទាំងនេះរួមមាន ៖

យើងម្នាក់ៗគឺជាកូនសំណព្វរបស់ព្រះវរបិតាសួគ៌ ។
ព្រះអង្គសង្គ្រោះរបស់យើងគឺព្រះយេស៊ូវគ្រីស្ទស្រឡាញ់ និង ស្គាល់យើងម្នាក់ៗដោយផ្ទាល់ ។
ដង្វាយធួនរបស់ព្រះអង្គសង្គ្រោះរបស់យើងអនុវត្តចំពោះកូនចៅទាំងអស់របស់ព្រះ ។
តាមរយៈព្រះគុណរបស់ព្រះយេស៊ូវគ្រីស្ទ នោះមនុស្សទាំងអស់អាចត្រូវបានអភ័យទោស ហើយទទួលអំណាចដើម្បីផ្លាស់ប្តូរ ។
យើងម្នាក់ៗមានអំណោយទាននៃសិទ្ធិជ្រើសរើសដែលមិនអាចកាត់ថ្លៃបាន ដែលធ្វើឲ្យយើងទទួលបានអំណាច និង កម្លាំងនៃដង្វាយធួន ។
បុគ្គលម្នាក់ៗដែលពុះពារជាមួយការណ៍អាសគ្រាម អាចប្រើសេចក្តីសង្ឃឹមមកពីសេចក្តីពិតដែលមនុស្សដទៃទៀតបានមានជោគជ័យនៅក្នុងសង្គ្រាមនេះ ។
ការណ៍អាសគ្រាមគឺជាអំពើអាក្រក់ ប៉ុន្តែការពាក់ព័ន្ធនឹងវាមិនធ្វើឲ្យមនុស្សនោះអាក្រក់ឡើយ ។
បុគ្គលណាក៏ដោយ អាចគេចផុតពីអន្ទាក់នៃការណ៍អាសគ្រាម ហើយជាសះស្បើយយ៉ាងពេញលេញ ប៉ុន្តែការណ៍នេះអាចធ្វើបានតែតាមរយៈការប្រើអំណាចនៃដង្វាយធួនប៉ុណ្ណោះ ។
ការប្រែចិត្តដ៏ពិតពីការណ៍អាសគ្រាមតម្រូវឲ្យធ្វើលើសពីការគ្រាន់តែឈប់មើលវាទៅទៀត ។ ការប្រែចិត្តបែបនោះតម្រូវឲ្យមានការផ្លាស់ប្តូរមួយនៃដួងចិត្តតាមរយៈដង្វាយធួនរបស់ព្រះគ្រីស្ទ ។

ការទទួលយកសេចក្តីពិតទាំងនេះ រៀបចំមនុស្សម្នាក់ខាងវិញ្ញាណឲ្យធ្វើសកម្មភាពលើសេចក្តីពិតទាំងនោះ ដែលនាំឲ្យបើកទ្វារដើម្បីទទួលជំនួយរបស់ព្រះអម្ចាស់ដើម្បីធ្វើការផ្លាស់ប្តូរដែលចាំបាច់ដើម្បីប្រែចិត្ត ហើយជាសះស្បើយ ។

ខ. ភាពជាសិស្ស

ការលើកដាក់ខ្លួននូវសេចក្តីពិតទាំងនេះ ក៏តម្រូវឲ្យបុគ្គលម្នាក់ៗតាំងចិត្តសារជាថ្មីដើម្បីរស់នៅក្នុងនាមជាសិស្សរបស់ព្រះអម្ចាស់ យេស៊ូវគ្រីស្ទ ហើយធ្វើការណ៍ទាំងនោះដែលបរិសុទ្ធ និង ពង្រឹងពួកគេដើម្បីទប់ទល់នឹងការល្បួងនៅពេលខាងមុខ ។ ការណ៍នេះមានន័យថា ការតាំងចិត្តចំពោះអាកប្បកិរិយាសាសនាផ្ទាល់ខ្លួន ៖ ការអធិស្ឋានដ៏មានអត្ថន័យ និង ការសិក្សាព្រះគម្ពីរប្រចាំថ្ងៃ ចូលរួមការប្រជុំនានារបស់សាសនាចក្រ បម្រើ តមអាហារ និង ( នៅពេលមានការអនុញ្ញាតពីប៊ីស្សព ) ទទួលទានសាក្រាម៉ង់ ហើយថ្វាយបង្គំនៅក្នុងព្រះវិហារបរិសុទ្ធ ។

គ. ការតាំងចិត្តចំពោះផែនការផ្ទាល់ខ្លួន

សិស្សដ៏រាបទាបរបស់ព្រះយេស៊ូវគ្រីស្ទនឹងងាយទទួលបានដើម្បីទទួលស្គាល់ជម្រៅនៃអារម្មណ៍ ស្ថានភាពសង្គម និង បរិស្ថានជុំវិញខ្លួន ដែលជម្រុញឲ្យមានការល្បួងដើម្បីមើលការណ៍អាសគ្រាម ។ ដោយបានវិភាគពីកត្តាជម្រុញទាំងនោះ ពួកគេអាចបង្កើនផែនការគេចខ្លួនផ្ទាល់ខ្លួនមួយដើម្បីជួយពួកគេ ៖

ទទួលស្គាល់កត្តាជម្រុញ និង បំណងប្រាថ្នានានានៅពេលវាកើតមានឡើង ។
បង្កើតសកម្មភាពជាក់លាក់នានាដើម្បីជួយពួកគេដកថយចេញពីការល្បួងនោះ ។
ដឹកនាំគំនិត កម្លាំងសារជាថ្មីឆ្ពោះទៅរកព្រះអម្ចាស់ ។
គូសបង្ហាញសកម្មភាពជាក់លាក់នានាប្រចាំថ្ងៃដើម្បីពង្រឹងការតាំងចិត្តផ្ទាល់ខ្លួនដើម្បីរស់នៅដោយសុចរិត ។

នៅពេលបង្កើនផែនការផ្ទាល់ខ្លួន បុគ្គលម្នាក់ៗគួរតែប្រើធនធានដ៏ល្អឥតខ្ចោះនានាដែលបានផ្តល់ឲ្យដោយសាសនាចក្រ ។ ឧទាហរណ៍ គេហទំព័ររបស់សាសនាចក្រ OvercomingPornography.org មានព័ត៌មានសម្រាប់បុគ្គលម្នាក់ៗ ព្រមទាំងសមាជិកគ្រួសារ និង អ្នកដឹកនាំបព្វជិតភាពដែលគាំទ្រពួកគេ ។ លើសពីនេះទៅទៀត កម្មវិធីជាសះស្បើយលើការញៀនរបស់សាសនាចក្រគឺមានសម្រាប់សមាជិកទាំងអស់គ្នាដែលពុះពារយកឈ្នះនឹងអាកប្បកិរិយាញៀន ហើយនឹងជួយដល់សមាជិកគ្រួសាររបស់ខ្លួនផងដែរ ។

ឃ. ទំនួលខុសត្រូវ និង ការគាំទ្រ

អ្នកដើរតាមព្រះយេស៊ូវគ្រីស្ទដ៏រាបសារដែលទទួលស្គាល់ថាពួកគេត្រូវការព្រះអង្គសង្គ្រោះ នឹងព្យាយាមស្វែងរកជំនួយពីប៊ីស្សពរបស់ខ្លួន ដែលត្រូវបានហៅដោយព្រះអម្ចាស់ផងដែរដោយអ្នកដឹកនាំបព្វជិតភាព និង អស់អ្នកដែលកាន់កូនសោចាំបាច់ផ្សេងទៀតអាចជួយពួកគេឲ្យប្រែចិត្ត ។ ជាមួយនឹងការយល់ព្រមពីបុគ្គលដែលពាក់ព័ន្ធ ហើយបើសិនប៊ីស្សពមានអារម្មណ៍ថាត្រូវបានបំផុសគំនិតយ៉ាងខ្លាំង នោះប៊ីស្សពអាចហៅនរណាមា្នក់ឲ្យធ្វើការជាមួយ និង ជួយពួកគេ ។ មិនថាស្ថិតក្នុងកាលៈទេសៈណាឡើយ ការទូន្មានមកពីប្រធាន ហ្គរដុន ប៊ី ហ៊ិងគ្លី ( ឆ្នាំ ១៩១០–២០០៨ ) នៅតែអនុវត្ត ៖

« ទូលអង្វរជាមួយព្រះអម្ចាស់ឲ្យអស់ពីព្រលឹងអ្នក ដែលទ្រង់នឹងយកការញៀនដែលរុំជាប់នឹងអ្នកចេញ ។ ហើយចូរអ្នកក្លាហានដើម្បីស្វែងរកការណែនាំដែលពេញដោយសេចក្តីស្រឡាញ់ពីប៊ីស្សពរបស់អ្នក ហើយបើចាំបាច់សូមប្រឹក្សាជាមួយអ្នកមានវិជ្ជាជីវៈដែលមានការយកចិត្តទុកដាក់ » ។^៧

អាស្រ័យទៅលើទំហំនៃបញ្ហា នោះបុគ្គលម្នាក់ៗអាចត្រូវការជំនួយពីអ្នកផ្តល់ការប្រឹក្សាដែលទុកចិត្តបាន មានបទពិសោធន៍ ឬ មានវិជ្ជាជីវៈ ជាអ្នកដែលពួកគេអាចងាកទៅរកគ្រប់ពេល ដើម្បីត្រូវបានពង្រឹងក្នុងពេលនៃភាពទន់ខ្សោយ ហើយជាអ្នកដែលអាចធ្វើទំនួលខុសត្រូវផ្ទាល់ខ្លួនចំពោះផែនការរបស់ពួកគេ ។

ង. ឆ្ពោះទៅមុខដោយជំនឿ

មនុស្សដែលបានប្រែចិត្ត ហើយត្រូវបានប្រទានពរដើម្បីយកឈ្នះលើបំណងប្រាថ្នាមើលការណ៍អាសគ្រាម ត្រូវតែបន្តការប្រុងប្រយត្ន័ ដោយសារមារសត្រូវនឹងនៅតែបន្តស្វែងរកដើម្បីធ្វើបាបលើភាពទន់ខ្សោយនៃភាពជាមនុស្សរបស់ពួកគេ ។ ការប្រទះភ្នែកដោយចៃដន្យអាចនៅតែបន្តកើតឡើងទោះបីជាមានកិច្ចខិតខំគ្រប់យ៉ាងដើម្បីចៀសវាងវាក៏ដោយ ។ ក្នុងមួយជីវិតរបស់ពួកគេ បុគ្គលម្នាក់ៗត្រូវតែរៀនដើម្បីគ្រប់គ្រងអារម្មណ៍ផ្លូវភេទរបស់ខ្លួន ដែលព្រះប្រទានឲ្យ ហើយរក្សាកិច្ចខិតខំរបស់ពួកគេដើម្បីបានជ្រះស្អាត ។

IV. សេចក្តីអាណិតអាសូរសម្រាប់មនុស្សទាំងអស់

ឥឡូវនេះពាក្យមួយម៉ាត់ដែលទាក់ទងនឹងរបៀបដែលយើងអាចប្រព្រឹត្តិចំពោះអស់អ្នកដែលជាប់អន្ទាក់នៃការណ៍អាសគ្រាមនេះ ។ ពួកយើងទាំងអស់គ្នាត្រូវការដង្វាយធួនរបស់ព្រះយេស៊ូវគ្រីស្ទ ។ អស់អ្នកដែលពុះពារជាមួយនឹងការណ៍អាសគ្រាមត្រូវការសេចក្តីអាណិតអាសូរ និង សេចក្តីស្រឡាញ់របស់យើង នៅពេលពួកគេធ្វើតាមគោលការណ៍ដ៏ចាំបាច់ និង ជំហាននៃការជាសះស្បើយនានា ។ សូមកុំផ្តន្ទាទោសពួកគេឡើយ ។ ពួកគេទាំងនោះពុំមែនជាមនុស្សអាក្រក់ ឬ មនុស្សគ្មានសង្ឃឹមនោះឡើយ ។ ពួកគេគឺជាបុត្រា និង បុត្រីរបស់ព្រះវរបិតាសួគ៌របស់យើង ។ តាមរយៈការប្រែចិត្តត្រឹមត្រូវ និង ពេញលេញ នោះពួកគេអាចប្រែជាស្អាតស្អំ បរិសុទ្ធ ហើយសក្តិសមសម្រាប់គ្រប់សេចក្តីសញ្ញា និង ពរជ័យនៃព្រះវិហារបរិសុទ្ធដែលបានសន្យាដោយព្រះ ។

នៅពេលដល់ឱកាសរៀបអាពាហ៍ពិពាហ៍ ខ្ញុំសូមលើកទឹកចិត្តដល់យុវនារី និង យុវជនឲ្យមានការប្រុងប្រយ័ត្នក្នុងការជ្រើសរើសដៃគូ ដើម្បីក្លាយជាគូកនអស់កល្បជានិច្ច ត្រូវជាម្នាក់ដែលស្អាតស្អំ ហើយបរិសុទ្ធចំពោះព្រះអម្ចាស់ ហើយសក្តិសមដើម្បីចូលទៅព្រះវិហារបរិសុទ្ធ ។ បុគ្គលម្នាក់ៗដែលប្រែចិត្តជឿពេញលេញពីការណ៍អាសគ្រាមគឺសក្តិសមទទួលពរជ័យទាំងនេះ ។

V. សេចក្ដីបញ្ចប់

ក្នុងមួយជីវិតយើងនេះ យើងទាំងអស់គ្នានឹងប្រឈមមុខចំពោះអ្វីៗដែលមានទាក់ទងនឹងរឿងផ្លូវភេទ ។ ដោយមានការណែនាំពីព្រះអង្គសង្គ្រោះដែលពេញដោយសេចក្តីស្រឡាញ់របស់យើង រួមទាំងការបញ្ជាក់មកពីសេចក្តីសញ្ញានៃសាក្រាម៉ង់ដែលយើងនឹងតែងតែមានព្រះវិញ្ញាណរបស់ទ្រង់គង់នៅជាមួយនឹងយើង ជានិច្ច ( សូមមើល គ និង ស ២០:៧៧ ) នោះ យើងនឹងតែងតែឆ្លើយតបបានយ៉ាងត្រឹមត្រូវ ។ ខ្ញុំសូមថ្លែងទីបន្ទាល់ថា នេះគឺជាអ្វីដែលយើងគួរតែធ្វើដើម្បីរីករាយនឹងពរជ័យនានាពីទ្រង់ជាអង្គដែលយើងថ្វាយបង្គំ ។ នៅពេលយើងធ្វើដូច្នេះ នោះយើងនឹងទទួលភាពសុខសាន្តកាន់តែពេញលេញពីព្រះអង្គសង្គ្រោះ ហើយយើងនឹងបន្តនៅលើផ្លូវឆ្ពោះទៅកាន់ជោគវាសនាដ៏អស់កល្បជានិច្ចនៃភាពលើកតម្កើងរបស់យើង ។

អាស្រ័យទៅលើជម្រៅនៃបញ្ហាបុគ្គលម្នាក់ៗអាចត្រូវការជំនួយពីបុគ្គលដែលទុកចិត្ត និងមានបទពិសោធន៍ ឬអ្នកប្រឹក្សាដែលមានអាជីព ។

រចនារូបថតដោយ អ៊ិនហ្គ្រាម PUBLISHING/ISTOCK/THINKSTOCK