« គាំទ្រដល់ស្វាមីភរិយារបស់អ្នកប្រើប្រាស់ការណ៍អាសគ្រាម » ធនធានការប្រឹក្សា ( ឆ្នាំ ២០២០ ) ។
« គាំទ្រដល់ស្វាមីភរិយារបស់អ្នកប្រើប្រាស់ការណ៍អាសគ្រាម » ធនធានការប្រឹក្សា ។
គាំទ្រដល់ស្វាមីភរិយារបស់អ្នកប្រើប្រាស់ការណ៍អាសគ្រាម
ការប្រើប្រាស់ការណ៍អាសគ្រាម ជាញឹកញាប់ជះឥទ្ធិពលយ៉ាងខ្លាំងទៅលើស្វាមី ឬភរិយានៃអ្នកប្រើប្រាស់នោះ ។ ស្វាមី ឬភរិយាអាចមានអារម្មណ៍ថាខឹង អស់សង្ឃឹម និងត្រូវអ្នកប្រើប្រាស់នោះក្បត់ ។ បន្ថែមពីលើនោះ អារម្មណ៍នៃការភ័យ តក់ស្លុត ឈឺចាប់ខ្លាំង ទុក្ខព្រួយ និងសោកសៅ ក៏ដូចជាកំហឹង ឬការធ្លាក់ទឹកចិត្តគឺជារឿងទូទៅ ។ ជាញឹកញាប់ ស្វាមីភរិយាមានអារម្មណ៍ខ្មាសអៀនខ្លាំង ហើយមានចម្ងល់អំពីតម្លៃផ្ទាល់ខ្លួនគេ ។ ស្វាមីភរិយាមួយចំនួនថែមទាំងអាចនឹងមានរោគសញ្ញាខាងរាងកាយ ដូចជាជំងឺ ការឈឺបេះដូង ឬដើមទ្រូងដែលពុំអាចពន្យល់បាន ឈឺក្បាល ឬពុំអាចដេកលក់ជាដើម ។
ពួកគេក៏អាចមានអារម្មណ៍ថាព្រះបោះបង់ពួកគេ ហើយងឿងឆ្ងល់ថាទ្រង់អាចទុកឲ្យរឿងនេះកើតឡើងចំពោះគេដោយរបៀបណា ។ មិនមែនស្វាមីភរិយាគ្រប់រូបនឹងមានប្រតិកម្ម និងឆ្លើយតបតាមរបៀបដូចគ្នានេះនោះទេ ។ បញ្ហាអាពាហ៍ពិពាហ៍ដទៃទៀត ឬភាពញឹកញាប់ ឬរយៈពេលនៃការប្រើប្រាស់ការណ៍អាសគ្រាម អាចនឹងមានឥទ្ធិពលទៅលើប្រតិកម្មរបស់ពួកគេ និងទំហំនៃការឆ្លើយតបរបស់ពួកគេ ។
ស្វាមីភរិយាអាចនឹងស្ទាក់ស្ទើរដើម្បីប្រាប់នរណាម្នាក់អំពីអារម្មណ៍ និងបញ្ហាខាងវិញ្ញាណរបស់ពួកគេ ហើយពេលខ្លះជ្រើសរើសរងទុក្ខដោយស្ងាត់ៗជាជាងឈោងទៅរកជំនួយ ឬការគាំទ្រ ។ នៅពេលពួកគេស្វែងរកជំនួយ ជាញឹកញាប់ស្វាមីភរិយាទាំងនោះត្រូវការនរណាម្នាក់ឲ្យស្ដាប់ពួកគេដោយយកចិត្តទុកដាក់ ហើយផ្ដល់ការគាំទ្រ និងក្ដីមេត្តាករុណា ។ ជាញឹកញាប់ ស្វាមីភរិយាអាចនឹងស្មានដោយមិនត្រឹមត្រូវថាបញ្ហានោះ គឺជាកំហុសរបស់ពួកគេ ដូច្នេះពួកគេអាចត្រូវការជំនួយដើម្បីយល់ថា ពួកគេមិនទទួលខុសត្រូវចំពោះឥរិយាបទរបស់អ្នកប្រើប្រាស់ឡើយ ។
ព្យាយាមយល់
ការជួយស្វាមី ឬភរិយារបស់បុគ្គលដែលប្រើប្រាស់ការណ៍អាសគ្រាមឲ្យមានអារម្មណ៍ថា អ្នកស្ដាប់ និងយល់ពីពួកគេ អាចជារឿងសំខាន់ដូចជាការប្រឹក្សាឯទៀតដែលអ្នកអាចផ្ដល់ឲ្យដែរ ។ ការស្ដាប់ដោយក្ដីអាណិតអាសូរ នឹងផ្ញើជាសារលិខិតដ៏មានអានុភាពចំពោះស្វាមី ឬភរិយានោះថា មានគេស្រឡាញ់ គាំទ្រ និងយកចិត្តទុកដាក់ដល់គាត់ ឬនាង ។ សូមព្យាយាមដើម្បីបង្ហាញសេចក្ដីស្រឡាញ់ និងការអាណិតអាសូរដូចជាព្រះអង្គសង្គ្រោះនឹងធ្វើដែរ ។ សូមពិចារណាដោយការអធិស្ឋានក្នុងការសួរនូវសំណួរទាំងនេះដើម្បីជួយអ្នកឲ្យយល់ពីស្ថានភាពរបស់ស្វាមី ឬភរិយានោះបានកាន់តែច្បាស់ ហើយដឹងពីតម្រូវការរបស់គាត់ ឬនាង ។ សូមមានឆន្ទៈដើម្បីចំណាយពេលស្ដាប់ស្វាមី ឬភរិយានោះពេលគាត់បង្ហាញពីភាពភ័យខ្លាច ការសង្ស័យ និងកង្វល់ ។
ស្វាមី ឬភរិយាម្នាក់អាចនឹងមានអារម្មណ៍កក់ក្ដៅជាងដើម្បីនិយាយអំពីស្ថានភាពនេះ បើគាត់ ឬនាងមានមិត្តម្នាក់ ឪពុក ឬម្ដាយ និងថ្នាក់ដឹកនាំសាសនាចក្រជាទីទុកចិត្តមានវត្តមាននោះ ។ សូមប្រាកដថាស្វាមី ឬភរិយាដឹងថាគាត់ ឬនាងអាចឲ្យមនុស្សគាំទ្រម្នាក់មានវត្តមានជាមួយបាន ។ សូមពិចារណាសួរនូវសំណួរដូចខាងក្រោមនេះដោយយកចិត្តទុកដាក់ និងក្ដីស្រឡាញ់ ៖
-
តើស្ថានភាពបច្ចុប្បន្ននេះយ៉ាងម៉េចដែរ ហើយតើអ្នកកំពុងឆ្លងកាត់អ្វីខ្លះ ?
-
តើអ្វីខ្លះជារឿងរកាំរកុះចិត្តបំផុតអំពីការប្រើប្រាស់ការណ៍អាសគ្រាមរបស់ស្វាមី ឬភរិយារបស់អ្នក ?
-
តើមានអ្វីដែលជាកង្វល់ខ្លាំងបំផុតនៅក្នុងអាពាហ៍ពិពាហ៍របស់អ្នកនាពេលឥឡូវនេះ ?
-
តើការណ៍អាសគ្រាមជះឥទ្ធិពលលើអ្នក និងគ្រួសារអ្នកយ៉ាងដូចម្ដេចដែរ ( បញ្ហាគ្រួសារ បញ្ហាសុខភាព ជាដើម ) ?
-
តើបច្ចុប្បន្ននេះអ្នកងាកទៅរកប្រភពគាំទ្រអ្វីខ្លះ ?
-
តើស្វាមី ឬភរិយារបស់អ្នកបើកចិត្ត និងស្មោះត្រង់យ៉ាងណាដែរ ទាក់ទងនឹងបញ្ហាជាមួយនឹងការណ៍អាសគ្រាមនេះ ?
-
តើអ្នកបើកចិត្ត ឬមានឆន្ទៈខ្លាំងប៉ុណ្ណាដែរ នៅក្នុងការពិភាក្សាអំពីបញ្ហានេះជាមួយនឹងស្វាមី ឬភរិយារបស់អ្នក ?
-
តើមានអ្វីខ្លះទៀតដែលខ្ញុំគួរតែដឹងអំពីស្ថានភាពនេះ ?
-
តើព្រះអម្ចាស់បានជួយអ្នកឲ្យស៊ូទ្រាំនឹងការសាកល្បងនេះដោយរបៀបណា ?
បើអ្នកបានដឹងពីការរំលោភបំពាន អំពើហឹង្សាក្នុងផ្ទះ ឬការមើល ការទិញ ឬការចែកចាយនៃការណ៍អាសគ្រាមកុមារ សូមទាក់ទងទៅកាន់អាជ្ញាធរស៊ីវិល ។ ប៊ីស្សពមាន បណ្តាញជំនួយ បន្ថែម ដែលពួកគាត់អាចទូរសព្ទទៅនៅក្នុងស្ថានភាពទាំងនេះ ។
ជួយបុគ្គលម្នាក់
នៅពេលអ្នកជួយស្វាមី ឬភរិយានោះ សូមពិចារណាប្រើនូវយោបល់មួយចំនួនដូចខាងក្រោមនេះ ។
សូមសង្កត់ធ្ងន់លើសមត្ថភាពរបស់ព្រះអង្គសង្គ្រោះដើម្បីប្រទាននូវការព្យាបាលផ្ទាល់ខ្លួនដល់ស្វាមី ឬភរិយារបស់អ្នកដែលមានបញ្ហានឹងការណ៍អាសគ្រាមនោះ ( សូមមើល អាលម៉ា ៧:១១ និង ម៉ាថាយ ១១:២៨–៣០ ) ។
-
អញ្ជើញស្វាមីភរិយាឲ្យសិក្សាអំពីរបៀបដែលព្រះគ្រីស្ទបានបម្រើដល់អស់អ្នកដែលឆ្លងកាត់រឿងអាក្រក់នានា និងរបៀបដែលទ្រង់អាចជួយព្យាបាលពួកគេ ។
-
ជួយស្វាមី ឬភរិយាឲ្យយល់ និងមានសេចក្ដីជំនឿទៅលើពិធីបរិសុទ្ធនៃបព្វជិតភាព ជាពិសេសពិធីបរិសុទ្ធក្នុងព្រះវិហារបរិសុទ្ធ ។
-
លើកទឹកចិត្តស្វាមី ឬភរិយាឲ្យស្វែងរកការប្រសិទ្ធពរបព្វជិតភាព ។
សូមផ្ដល់ការគាំទ្រដើម្បីជួយគាត់ឲ្យគ្រប់គ្រងអារម្មណ៍ឈឺចាប់ ។
-
បង្ហាញសេចក្តីស្រឡាញ់ និងការខ្វល់ខ្វាយរបស់អ្នកចំពោះគាត់ ឬនាងម្នាក់ៗ ព្រមទាំងស្វាមី ឬភរិយា និងកូនៗរបស់គាត់ ឬនាងផងដែរ ។
-
ជួយស្វាមី ឬភរិយាឲ្យយល់ថា ការសម្រេចចិត្តរបស់អ្នកប្រើប្រាស់ការណ៍អាសគ្រាម ពុំអាចផ្លាស់ប្ដូររបៀបដែលព្រះទតមើលមកលើស្វាមី ឬភរិយាម្នាក់ៗនោះឡើយ ។
-
បញ្ជាក់ឲ្យច្បាស់ថាគាត់ពុំទទួលខុសត្រូវចំពោះការប្រើប្រាស់ការណ៍អាសគ្រាម ឬឥរិយាបថអាក្រក់របស់ស្វាមីឬភរិយាគាត់ទេ ហើយគាត់ពុំត្រូវបានរំពឹងឲ្យស៊ូទ្រាំនឹងឥរិយាបថរំលោភបំពាននេះឡើយ ។ បើអ្នកបានដឹងអំពីការរំលោភបំពានណាមួយ សូមទាក់ទងទៅកាន់អាជ្ញាធរស៊ីវិល ។
-
រំឭកដល់ស្វាមី ឬភរិយាអំពីតម្លៃ និងគុណតម្លៃរបស់គាត់ ឬនាង ។
-
លើកទឹកចិត្តស្វាមីឬភរិយាឲ្យជួបនឹងប៊ីស្សព បើគាត់ ឬនាងពុំទាន់បានធ្វើនៅឡើយនោះ ។
សូមអញ្ជើញស្វាមី ឬភរិយាឲ្យមើលធនធានសម្រាប់គូស្វាមីភរិយា និងគ្រួសារអំពី « AddressingPornography » នៅលើគេហទំព័រ ChurchofJesusChrist.org ។
សូមជួយស្វាមី ឬភរិយាឲ្យយល់ថា គាត់ ឬនាងអាចទទួលបានការបំផុសគំនិតផ្ទាល់ខ្លួន ដើម្បីដឹងពីរបៀបកំណត់ព្រំដែនច្បាស់លាស់នៅក្នុងទំនាក់ទំនងនេះ និង នៅក្នុងគេហដ្ឋាន ។
-
អញ្ជើញគាត់ឲ្យសិក្សា « គោលការណ៍ ៨ ៖ រឹងមាំ និងខ្ជាប់ខ្ជួន » នៅក្នុង Support Guide: Help for Spouses and Family of Those in Recovery ( មាននៅក្នុងវគ្គ « Addiction Recovery » នៅលើគេហទំព័រ ChurchofJesusChrist.org ) ដើម្បីជួយគាត់ ឬនាងឲ្យយល់អំពីរបៀបដើម្បីកំណត់ព្រំដែនដែលអាចជួយស្ដាររបៀបរៀបរយនៅក្នុងជីវិត និងគេហដ្ឋានបាន ។
-
សូមជួយស្វាមី ឬភរិយាឲ្យយល់ថា គាត់ ឬនាងមានសិទ្ធិដើម្បីមានភាពទៀងត្រង់ទាំងស្រុង គ្មានការណ៍អាសគ្រាមក្នុងគេហដ្ឋាន ហើយមានឥរិយាបទជាច្រើនទៀត ដែលជួយធ្វើឲ្យមានភាពសុខសាន្ដ និងសាមគ្គីភាព ។
-
ជួយគាត់ ឬនាងឲ្យយល់ថា គាត់ ឬនាងអាចសម្រេចចិត្ត និងពិភាក្សាជាមួយស្វាមី ឬភរិយារបស់គាត់ ឬនាងថា តើគាត់ ឬនាងចង់ដឹងអំពីការប្រើប្រាស់ការណ៍អាសគ្រាមនោះខ្លាំងប៉ុណ្ណា ( ដូចជាលក្ខណៈ រយៈពេល និងភាពធ្ងន់ធ្ងរនៃបញ្ហានេះ ) ។ ការបើកបង្ហាញយ៉ាងពេញលេញអាចនាំទៅរកដំណើរការនៃការព្យាបាល ។
សូមជួយស្វាមី ឬភរិយាឲ្យរកមិត្ត ឬសមាជិកគ្រួសារជាទីទុកចិត្តម្នាក់ ដែលអាចផ្ដល់ការគាំទ្រប្រកបដោយអត្ថន័យក្នុងពេលជាទៀងទាត់ នៅពេលគាត់ ឬនាងព្យាយាមស្វែងរកភាពសុខសាន្ដ និងស្ថេរភាពក្នុងជីវិតរបស់គាត់ ឬនាង ។
-
នៅពេលសមរម្យ សូមលើកទឹកចិត្តស្វាមី ឬភរិយាឲ្យនិយាយជាមួយនឹងអ្នកដទៃដែលនឹងមិនបង្អាប់ដល់អ្នកប្រើប្រាស់ការណ៍អាសគ្រាម ឬជំរុញឲ្យស្វាមី ឬភរិយាធ្វើការវិនិច្ឆ័យភ្លាមៗ ឬធ្វើការសម្រេចចិត្តដ៏អាក្រក់ ។
-
នៅកន្លែងណាដែលមាន ជាញឹកញាប់ ការប្រជុំគាំទ្រដល់ស្វាមី ឬភរិយា និងគ្រួសារជាកន្លែងដ៏ល្អមួយដើម្បីមានអារម្មណ៍ថាត្រូវបានគេគាំទ្រ បានស្ដាប់ឮ និងមានសុពលភាព ហើយស្វែងរកកម្លាំងនៅក្នុងព្រះគ្រីស្ទតាមរយៈព្រះចេស្ដានៃដង្វាយធួនរបស់ទ្រង់ ។
សូមជួយគាត់ ឬនាងឲ្យយល់ថា ការអភ័យទោសឲ្យស្វាមី ឬភរិយាគឺជាដំណើរការមួយ ហើយថាគាត់ ឬនាងអាចទទួលបានការបំផុសគំនិតផ្ទាល់ខ្លួនដើម្បីដឹងពីរបៀប និងពេលណាដើម្បីចាប់ផ្ដើមដំណើរការនេះ ។
-
លើកទឹកចិត្តដល់ស្វាមី ឬភរិយាឲ្យយកចិត្តទុកដាក់ចំពោះដំណើរការនៃការព្យាបាលខាងសតិអារម្មណ៍ និងខាងវិញ្ញាណផ្ទាល់ខ្លួនពួកគេ ដែលអាចនឹងចំណាយពេលច្រើន ហើយនឹងឯករាជ្យពីការព្យាបាលរបស់អ្នកប្រើប្រាស់ ។ ចូរកុំព្យាយាមប្រញាប់ប្រញាល់ ឬគ្រប់គ្រងដំណើរការឡើយ ។ សូមអនុញ្ញាតឲ្យគាត់ ឬនាងសម្រួលអារម្មណ៍ដោយខ្លួនឯង និងដោះស្រាយបញ្ហានានាដែលទាក់ទងទៅនឹងស្ថានភាពពីមុនការពិភាក្សាអំពីការអភ័យទោស ។
-
រំឭកដល់ស្វាមី ឬភរិយាថា ជានិច្ចកាលការផ្ដល់ការអភ័យទោសពុំមានន័យថាផ្ដល់ទំនុកចិត្តនោះទេ ។ ការទុកចិត្តអាចនឹងកើតមានឡើងនៅពេលក្រោយ ឬពុំមានសោះ ដែលវាអាស្រ័យទៅលើការជ្រើសរើស និងឥរិយាបទនាពេលអនាគត ។ ទំនុកចិត្តនឹងស្ថាបនាឡើងវិញ នៅពេលអ្នកប្រើប្រាស់ការណ៍អាសគ្រាមធ្វើការព្យាបាលខ្លួនឯង ហើយស្វាមី ឬភរិយានឹងមើលឃើញពីភាពព្យាយាម និងការតាំងចិត្តដើម្បីផ្លាស់ប្ដូររបស់អ្នកប្រើប្រាស់នោះ ។
ថ្នាក់ដឹកនាំសាសនាចក្រគួរតែប្រុងប្រយ័ត្នមិនត្រូវសន្និដ្ឋានថា ទំនាក់ទំនងរួមប្រតិព័ទ្ធពីអតីតកាលរបស់ស្វាមីភរិយានេះ ជាហេតុដែលនាំឲ្យស្វាមី ឬភរិយាជាប់ទាក់ទងនឹងការណ៍អាសគ្រាមនេះឡើយ ។ ទោះជាយ៉ាងណាក៏ដោយ ការប្រើប្រាស់ការណ៍អាសគ្រាមអាចនឹងធ្វើឲ្យខូចដល់ទំនាក់ទំនងរួមប្រតិព័ទ្ធ ។ ថ្នាក់ដឹកនាំសាសនាចក្រគួរតែចៀសវាងពីការផ្ដល់ការប្រឹក្សាអំពីបញ្ហារួមប្រតិព័ទ្ធ ហើយនៅពេលណាត្រូវការជំនួយរឿងនោះ សូមប្រឹក្សាជាមួយនឹងសេវាកម្មគ្រួសារ ឬអ្នកជំនាញគាំទ្រខាងសង្គម និងខាងសតិអារម្មណ៍ដទៃទៀត ហើយណែនាំគូស្វាមីភរិយាទៅកាន់អ្នកមានវិជ្ជាជីវៈត្រឹមត្រូវ ។
គាំទ្រដល់គ្រួសារ
ចូរកំណត់អំពីឥទ្ធិពលនេះទៅលើអាពាហ៍ពិពាហ៍ និងគ្រួសារ ហើយដោះស្រាយរាល់បញ្ហានានា ។
បើដៃគូអាពាហ៍ពិពាហ៍ត្រូវការជំនួយបន្ថែម សូមលើកទឹកចិត្តពួកគេឲ្យទទួលជំនួយដែលពួកគេត្រូវការរៀងៗខ្លួន ព្រមជាមួយនឹងជំនួយក្នុងនាមជាដៃគូអាពាហ៍ពិពាហ៍ ។
បើមានកូនៗក្នុងគ្រួសារដឹងអំពីបញ្ហានេះ សូមជួយឪពុកម្ដាយរបស់ពួកគេឲ្យដឹងថា វាជាទំនួលខុសត្រូវរបស់ពួកគេដើម្បីណែនាំ និងថែទាំដល់កូនៗ ហើយជួយកូនៗតាមចាំបាច់ ។
សូមព្យាយាមជួយដល់អ្នកប្រើប្រាស់ការណ៍អាសគ្រាមនៅក្នុងដំណើរការនៃការព្យាបាលខាងវិញ្ញាណរបស់គាត់ឬនាង ។ ធនធានអំពី ការញៀន និងការប្រើប្រាស់ការណ៍អាសគ្រាមវគ្គ « Addressing Pornography » នៅលើគេហទំព័រ ChurchofJesusChrist.org និងគេហទំព័រ កម្មវិធីព្យាបាលការញៀន អាចនឹងមានប្រយោជន៍ នៅពេលអ្នកជួយបុគ្គលដែលមានបញ្ហានឹងការណ៍អាសគ្រាមនោះឲ្យយល់ដឹងអំពីការទទួលខុសត្រូវរបស់គាត់ ឬនាងដើម្បីដោះស្រាយឥរិយាបថនោះ ។
សូមលើកទឹកចិត្តដល់បុគ្គលដែលប្រើប្រាស់ការណ៍អាសគ្រាមនោះ ឲ្យមានទំនួលខុសត្រូវចំពោះទង្វើរបស់ខ្លួន ហើយគាំទ្រដល់ស្វាមី ឬភរិយារបស់ខ្លួន ។ សូមមើលធនធានអំពីការប្រើប្រាស់ការណ៍អាសគ្រាមសម្រាប់ព័ត៌មានបន្ថែម ។
ប្រើប្រាស់ធនធានក្នុងវួដ និងស្ដេក
បន្ទាប់ពីទទួលបានការអនុញ្ញាតពីភាគីទាំងពីខាងស្វាមីឬភរិយា និងបុគ្គលដែលប្រើប្រាស់ការណ៍អាសគ្រាមឲ្យពិភាក្សាអំពីស្ថានភាពនោះជាមួយអ្នកដទៃហើយ សូមពិចារណាធ្វើការសម្របសម្រួលនឹងថ្នាក់ដឹកនាំវួដ ឬមនុស្សជាទីទុកចិត្តដទៃទៀតឲ្យផ្ដល់ការគាំទ្រ ការណែនាំ និងជំនួយជាបន្ដបន្ទាប់ ។
សូមកំណត់ពីមនុស្សជាទីទុកចិត្តម្នាក់ដែលអាចនឹងគាំទ្រដល់ស្វាមី ឬភរិយារបស់អ្នកប្រើប្រាស់ការណ៍អាសគ្រាមនោះ ។ ជាពិសេស អ្នកគាំទ្រនេះធ្លាប់មានជោគជ័យក្នុងការប្រឈមមុខជាមួយនឹងបញ្ហាស្រដៀងគ្នានេះ ប៉ុន្តែរាល់បុគ្គលដែលចាស់ទុំខាងវិញ្ញាណគ្រប់រូបដែលមានចិត្តមេត្តាករុណា អាចផ្ដល់នូវការគាំទ្រដោយការយកចិត្តទុកដាក់បាន ។
សូមអញ្ជើញស្វាមី ឬភរិយាឲ្យចូលរួមក្នុងក្រុមមូលដ្ឋានដែលគាំទ្រដល់គូស្វាមីភរិយា និងសមាជិកគ្រួសាររបស់ពួកគេ ។
-
សូមមើលគេហទំព័រ កម្មវិធីព្យាបាលការញៀន ( វគ្គ « Addiction Recovery » នៅលើគេហទំព័រ ChurchofJesusChrist.org ) ដើម្បីស្វែងរកការប្រជុំក្រុមគាំទ្រដល់គូស្វាមីភរិយាក្នុងមូលដ្ឋាន ដែលធ្វើឡើងដោយការជួបទល់មុខផ្ទាល់ ឬការប្រជុំតាមរយៈទូរសព្ទ ។
-
បើគ្មានការប្រជុំដូចនេះទេ សូមពិចារណាធ្វើការទាក់ទងទៅប៊ីស្សពដើម្បីស្នើសុំឲ្យមានការប្រជុំមួយចាប់ផ្ដើមមានឡើង ឬប្រើក្រុមគាំទ្រក្នុងសហគមន៍ ។
សូមគិតពីការបញ្ជូនស្វាមី ឬភរិយាដែលមានបញ្ហានឹងការណ៍អាសគ្រាមទៅកាន់អ្នកមានជំនាញវិជ្ជាជីវៈឲ្យជួយ ឬផ្តល់ការប្រឹក្សា ។ សូមស្វែងរកធនធាននានាក្នុងមូលដ្ឋានដែលមានសេវាត្រូវគ្នានឹងគោលការណ៍នៃដំណឹងល្អ ។