« តើគោលលទ្ធិអ្វីខ្លះដែលអាចជួយដល់បុគ្គលម្នាក់ៗយកឈ្នះលើបញ្ហាការណ៍អាសគ្រាម ? » ធនធានការប្រឹក្សា ( ឆ្នាំ ២០២០ ) ។
« តើគោលលទ្ធិអ្វីខ្លះដែលអាចជួយដល់បុគ្គលម្នាក់ៗយកឈ្នះលើបញ្ហាការណ៍អាសគ្រាម ? » ធនធានការប្រឹក្សា ។
ធនធានការប្រឹក្សា
តើគោលលទ្ធិអ្វីខ្លះដែលអាចជួយដល់បុគ្គលម្នាក់ៗយកឈ្នះលើបញ្ហាការណ៍អាសគ្រាម ?
ការទទួលខុសត្រូវមួយរបស់អ្នកក្នុងនាមជាសមាជិកសាសនាចក្រ គឺត្រូវបង្រៀន និងថ្លែងទីបន្ទាល់អំពីគោលលទ្ធិដ៏បរិសុទ្ធនៃដំណឹងល្អនៃព្រះយេស៊ូវគ្រីស្ទ ។ ការណ៍នេះអាចធ្វើទៅបានតាមរយៈការបង្រៀនអំពីគោលលទ្ធិនៃព្រះគ្រីស្ទ គឺថាមនុស្សទាំងអស់គ្រប់ទិសទីត្រូវតែមានសេចក្ដីជំនឿលើព្រះយេស៊ូវគ្រីស្ទ ប្រែចិត្តពីអំពើបាបរបស់ពួកគេ ទទួលបុណ្យជ្រមុជទឹក ទទួលអំណោយទាននៃព្រះវិញ្ញាណបរិសុទ្ធ និងកាន់ខ្ជាប់ដរាបដល់ចុងបំផុត ។ សូមមើលសុន្ទរកថាទាំងនេះ ដែលមាននៅវគ្គ « Addressing Pornography » នៅលើគេហទំព័រ ChurchofJesusChrist.org ផងដែរ ៖
« អំណាចនៃការបង្រៀនគោលលទ្ធិ »
« ការផ្ដោតទៅលើគោលលទ្ធិនៃព្រះគ្រីស្ទ »
« ធ្វើតាមគោលលទ្ធិ និង ដំណឹងល្អរបស់ព្រះគ្រីស្ទ »
បុគ្គលម្នាក់ៗទទួលខុសត្រូវចំពោះការដោះស្រាយបញ្ហាផ្ទាល់ខ្លួនរបស់ពួកគេជាមួយនឹងការណ៍អាសគ្រាម ។ ពួកគេត្រូវតែទទួលខុសត្រូវចំពោះជីវិតផ្ទាល់ខ្លួនរបស់ពួកគេ ហើយពួកគេចាំបាច់ត្រូវតែធ្វើការផ្លាស់ប្ដូរ ។ នៅពេលអ្នកចូលរួមនៅក្នុងការពិភាក្សាដ៏បំផុសគំនិតជាមួយនឹងបុគ្គលម្នាក់ៗនោះ សូមដឹកនាំពួកគេឲ្យស្វែងរកវិវរណៈផ្ទាល់ខ្លួនទាក់ទងទៅនឹងដំណោះស្រាយនានា ។ សូមលើកទឹកចិត្តពួកគេឲ្យស្វែងរកភាពខ្លួនទីពឹងខ្លួនខាងវិញ្ញាណតាមរយៈការខិតខំស្វែងយល់ និងអនុវត្តគោលលទ្ធិនៃព្រះគ្រីស្ទ ។ ការសិក្សា និងការអធិស្ឋានមានសារៈសំខាន់នៅក្នុងដំណើរការនេះ ។
បុគ្គលម្នាក់ៗក៏មានការទទួលខុសត្រូវក្នុងការយល់ដឹង និងដោះស្រាយចំពោះការឈឺចាប់ដែលបណ្ដាលមកពីការប្រើការណ៍អាសគ្រាមរបស់ពួកគេទៅលើអ្នកដទៃ ។ នៅពេលអ្នកធ្វើការជាមួយពួកគេ សូមណែនាំពួកគេឲ្យទទួលយកការទទួលខុសត្រូវរបស់ពួកគេ ហើយធ្វើអ្វីដែលពួកគេអាចធ្វើទៅបានដើម្បីស្ដារអ្វីៗឡើងវិញ ។
ការយកឈ្នះលើការណ៍អាសគ្រាមអាចនឹងជាការលំបាក ។ បុគ្គលម្នាក់ៗគួរតែរៀនស្គាល់ និងលើកឡើងនូវកត្តាពិសេសៗដែលមានឥទ្ធិពលទៅលើការប្រើប្រាស់ការណ៍អាសគ្រាមរបស់ពួកគេ ។ វាសំខាន់ដើម្បីកត់សម្គាល់ថាដំណោះស្រាយខាងវិញ្ញាណ ថ្វីដ្បិតតែវាសំខាន់ និងមានប្រយោជន៍នៅក្នុងការយកឈ្នះលើការណ៍អាសគ្រាមពិតមែន ក៏ជាញឹកញាប់វាគ្រាន់តែជាផ្នែកមួយនៃដំណោះស្រាយទាំងស្រុងប៉ុណ្ណោះ ។ បុគ្គលម្នាក់ៗគួរតែពិចារណាអំពីការរុករកមើលបញ្ហាខាងជីវសាស្ត្រ ខាងចិត្តសាស្ត្រ និងខាងសង្គម ដែលជាញឹកញាប់វាបង្កឲ្យមានការប្រើប្រាស់ការណ៍អាសគ្រាម ។
បង្រៀនគោលលទ្ធិ
នៅពេលអ្នកបង្រៀនដល់អ្នកដែលកំពុងមានបញ្ហានឹងការណ៍អាសគ្រាម សូមធ្វើការជាមួយគ្នាដើម្បីកំណត់ថាតើគោលលទ្ធិណាមួយដែលអាចជួយពួកគេឲ្យដោះស្រាយឥទ្ធិពល ដែលប៉ះពាល់ដល់ឥរិយាបថរបស់ពួកគេ ។ ប្រធាន ប៊យដ៏ ឃេ ផាកកឺ បានបង្រៀន ៖ « ការយល់ដឹងពីគោលលទ្ធិពិតនឹងផ្លាស់ប្ដូរអាកប្បកិរយា និងឥរិយាបថ ។ ការសិក្សាអំពីគោលលទ្ធិនៃដំណឹងល្អ នឹងអភិវឌ្ឍឥរិយាបថបានរហ័សជាងការសិក្សាអំពីឥរិយាបថ ដើម្បីអភិវឌ្ឍឥរិយាបថទៅទៀត ។ ការជាប់ចិត្តនឹងឥរិយាបទដែលមិនស័ក្ដិសម អាចនាំឲ្យមានឥរិយាបទដែលមិនស័ក្ដិសម ។ នោះហើយជាមូលហេតុ ដែលយើងសង្កត់ធ្ងន់ជាខ្លាំងទៅលើការសិក្សាគោលលទ្ធិទាំងឡាយនៃដំណឹងល្អ » (« Little Children » Ensign ខែ វិច្ឆិកា ឆ្នាំ ១៩៨៦ ទំព័រ ១៧ ) ។
គោលលទ្ធិគ្រឹះដែលបានបង្រៀននៅក្នុងថ្នាក់សិក្ខាសាលា និងថ្នាក់វិទ្យាស្ថាន គឺជាការណែនាំដ៏មានប្រយោជន៍ដើម្បីដឹងថាត្រូវផ្ដោតលើគោលលទ្ធិមួយណា ( សូមមើល « គោលលទ្ធិគ្រឹះនានា » ) ។ សូមបង្រៀនគោលលទ្ធិតាមរយៈការប្រើប្រាស់ធនធានដំណឹងល្អដូចជា ព្រះគម្ពីរ និងសុន្ទរកថាសន្និសីទទូទៅនានា ។
សូមផ្ដល់ការងារបម្រើដោយសេចក្ដីសប្បុរសនៅពេលអ្នកបង្រៀន ហើយផ្ដោតទៅលើការជួយដល់បុគ្គលម្នាក់ៗឲ្យទទួលស្គាល់ព្រះវិញ្ញាណបរិសុទ្ធនៅក្នុងជីវិតរបស់ពួកគេ ។ សូមលើកទឹកចិត្តពួកគេឲ្យរុករកមើលរបៀបដើម្បីរីកចម្រើនតាមរយៈបញ្ហារបស់ពួកគេជាមួយនឹងការណ៍អាសគ្រាម ។ សូមពិចារណាសួរនូវសំណួរបំផុសគំនិតអំពីការរីកចម្រើនរបស់ពួកគេ ការរីកចម្រើនទៅលើការយល់ដឹងអំពីខ្លួនពួកគេខាងជីវសាស្ត្រ ខាងចិត្តសាស្ត្រ ខាងសង្គម និងខាងវិញ្ញាណ និងការអភិវឌ្ឍគុណលក្ខណៈដូចជាព្រះគ្រីស្ទរបស់ពួកគេ ។ សូមដឹកនាំបុគ្គលម្នាក់ៗឲ្យយល់ដឹងអំពីរបៀបដែលព្រះចេស្ដានៃព្រះគ្រីស្ទអាចផ្លាស់ប្រែពួកគេ ហើយកែទម្រង់ពួកគេឲ្យទៅជាមនុស្សដែលពួកគេគួរតែប្រែក្លាយ ។
សូមផ្ដោតការបង្រៀនរបស់អ្នកទៅលើការជួយបុគ្គលម្នាក់ៗឲ្យយល់អំពីការប្រែចិត្ត និងព្រះចេស្ដានៃព្រះយេស៊ូវគ្រីស្ទ និងដង្វាយធួនរបស់ទ្រង់ ។ វាក៏អាចជាប្រយោជន៍ផងដែរដើម្បីលើកទឹកចិត្តដល់ពួកគេឲ្យស្វែងរកព័ត៌មានអំពីសុខភាពផ្លូវភេទ ការបង្ហាញអារម្មណ៍ខាងផ្លូវភេទត្រឹមត្រូវ និងតួនាទីនៃភេទមាននៅក្នុងរង្វង់ដែនកំណត់ដែលព្រះបានបង្កើតឡើង ។
ឧទាហរណ៍អំពីការបង្រៀនខាងគោលលទ្ធិ
ឧទាហរណ៍ដូចខាងក្រោមលើកឡើងពីបញ្ហាជាទូទៅដែលបុគ្គលម្នាក់ៗដែលពុះពារនឹងការណ៍អាសគ្រាមបានជួប ហើយផ្ដល់គោលលទ្ធិដែលអាចជួយក្នុងបញ្ហាទាំងនេះបាន ។ សូមអធិស្ឋានជាមួយបុគ្គលម្នាក់ៗដើម្បីជួយគាត់ ឬនាងឲ្យស្គាល់គោលលទ្ធិជាក់លាក់ដែលត្រូវការចាំបាច់បំផុតក្នុងពេលឥឡូវនេះ ។
ភាពឯកោ និងការនៅដាច់ពីគេ
បុគ្គលដែលមានបញ្ហានឹងការណ៍អាសគ្រាម ជាញឹកញាប់មានអារម្មណ៍ឯកោ និងនៅដាច់ពីគេ ។ ពួកគេអាចនឹងខ្វះទំនាក់ទំនងសង្គមជាមួយអ្នកដទៃ ។ ការយល់ដឹងអំពីគោលលទ្ធិនៃក្រុមព្រះ អាចជួយបុគ្គលម្នាក់ៗឲ្យមានអារម្មណ៍សេចក្ដីស្រឡាញ់មកពី និងភ្ជាប់ទៅនឹងព្រះវរបិតាសួគ៌ ព្រះយេស៊ូវគ្រីស្ទ និងព្រះវិញ្ញាណបរិសុទ្ធ ។ សូមព្យាយាមបង្រៀនអំពីលក្ខណៈជាព្រះ និងតួនាទីរបស់សមាជិកមួយអង្គៗនៃក្រុមព្រះ ។
ការខ្មាសអៀន និងការលាក់ពួន
អារម្មណ៍ខ្មាសអៀន ជាញឹកញាប់នាំឲ្យបុគ្គលម្នាក់ៗលាក់ឥរិយាបទរបស់ពួកគេ ។ ការខ្មាសអៀនធ្វើឲ្យបុគ្គលម្នាក់ៗមានអារម្មណ៍ថា ពួកគេជាមនុស្សអាក្រក់ ហើយពុំស័ក្ដិសមដើម្បីទទួលការអភ័យទោសទេ ។ ម៉្យាងវិញទៀត ទោសកំហុសក៏នាំឲ្យបុគ្គលម្នាក់ៗទទួលស្គាល់កំហុស និងស្វែងរកការប្រែចិត្ត ហើយផ្លាស់ប្ដូរផងដែរ ។ ការយល់ដឹងពីផែនការនៃសេចក្ដីសង្គ្រោះជួយយើងឲ្យប្រើអំណាចនៃសិទ្ធិជ្រើសរើស និងការទទួលខុសត្រូវ ។ ព្រះយេស៊ូវគ្រីស្ទ និងដង្វាយធួនរបស់ទ្រង់លុបបំបាត់ចោលនូវភាពខ្មាសអៀន ហើយជួយយើងឲ្យប្រែចិត្ត រីកចម្រើន និងផ្លាស់ប្ដូរ ។
ការភាន់ច្រឡំអំពីតួនាទីនៃជីវិតផ្លូវភេទ
ជំនឿខុសឆ្គង ឬមិនត្រឹមត្រូវអំពីតួនាទីនៃនៃការបង្ហាញអារម្មណ៍ខាងផ្លូវភេទ អាចនឹងបង្ហាញឡើងតាមរយៈការប្រើប្រាស់ការណ៍អាសគ្រាម ។ ផែនការនៃសេចក្តីសង្គ្រោះបញ្ជាក់អំពីសារៈសំខាន់នៃតួនាទីនៃការបង្ហាញអារម្មណ៍ខាងផ្លូវភេទ និងគោលបំណងរបស់វានៅក្នុងការបង្កើតក្រុមគ្រួសារ និងទំនាក់ទំនងក្នុងចំណងអាពាហ៍ពិពាហ៍ដោយក្ដីស្រឡាញ់ ។ សូមបង្រៀនថា ផែនការនៃសេចក្តីសង្គ្រោះ និងគោលលទ្ធិដទៃទៀតជួយដាក់គុណតម្លៃនៅលើតម្លៃនៃព្រលឹងមួយ ជាជាងការបង្ខូច និងការបដិសេធដ៏គ្រោះថ្នាក់ ដែលវាមាននៅក្នុងការណ៍អាសគ្រាម ។
នៅពេលអ្នកស្ដាប់បុគ្គលម្នាក់ៗពិភាក្សាអំពីឧបសគ្គនានាដែលពួកគេប្រឈម នោះអ្នកនឹងត្រូវបានដឹកនាំឲ្យកំណត់ថាតើគោលលទ្ធិមួយណាដែលល្អបំផុតដើម្បីបំពេញតម្រូវការរបស់ពួកគេ ។ ឧទាហរណ៍ទាំងនេះគឺគ្រាន់តែជារបៀបមួយចំនួនដើម្បីប្រើការបង្រៀនគោលលទ្ធិប៉ុណ្ណោះ ។
លើកទឹកចិត្តបុគ្គលម្នាក់ៗឲ្យអនុវត្តគោលលទ្ធិដំណឹងល្អ
សូមជួយបុគ្គលម្នាក់ៗឲ្យព្យាយាមយល់គោលលទ្ធិដែលទាក់ទងទៅនឹងតម្រូវការពិសេសរបស់ពួកគេ ។ ព្រះវិញ្ញាណបរិសុទ្ធអាចបំផុសគំនិតបុគ្គលម្នាក់ៗឲ្យដឹងពីរបៀបជាក់លាក់ដើម្បីអនុវត្តសេចក្ដីពិតនៅក្នុងជីវិតរបស់ពួកគេ ។ សូមលើកទឹកចិត្តពួកគេឲ្យតាំងចិត្តរស់នៅស្របទៅតាមការបំផុសគំនិតដែលពួកគេបានទទួល បទបញ្ញត្តិទាំងឡាយរបស់ព្រះអម្ចាស់ និងការបង្រៀននៃដំណឹងល្អរបស់ព្រះយេស៊ូវគ្រីស្ទ ។ នេះគឺជាដំណើរការពេញមួយជីវិតសម្រាប់មនុស្សទាំងអស់ដែលព្យាយាមក្លាយជាសិស្សរបស់ព្រះយេស៊ូវគ្រីស្ទ ។
គោលគំនិតដូចខាងក្រោមនេះ គឺជាគោលលទ្ធិបន្ថែមដែលអាចជួយបុគ្គលម្នាក់ៗដែលមានបញ្ហានឹងការប្រើប្រាស់ការណ៍អាសគ្រាមបាន ។
ការទទួលខុសត្រូវ
យើងម្នាក់ៗគឺជាបុត្ររបស់ព្រះ ។ ដោយសារតែអត្តសញ្ញាណដ៏ទេវភាពនោះហើយ ទើបយើងមានអំណោយទានដូចជា សិទ្ធិជ្រើសរើស និងការទទួលខុសត្រូវ ដូចជាទំនួលខុសត្រូវលើការធ្វើខុសឆ្គង ។
ការទទួលខុសត្រូវចំពោះខ្លួនឯង អ្នកដទៃ និងព្រះ គឺជាគន្លឹះទៅកាន់ការរីកចម្រើន ។ សូមបង្រៀនបុគ្គលម្នាក់ៗអំពីគ្រោះថ្នាក់នៃការណ៍អាសគ្រាម ហើយនឹងរបៀបដែលវាបំពានបទដ្ឋានរបស់ព្រះ ។ សូមជួយពួកគេឲ្យយល់ថា ពួកគេមិនអាចឆ្ពោះទៅមុខដោយមិនធ្វើជាម្ចាស់ការលើឥរិយាបទដែលមានគ្រោះថ្នាក់ និងពុំត្រឹមត្រូវបានទេ ។
សម្រាប់ប៊ីស្សព និងប្រធានសាខា ៖ ការណ៍នេះរួមបញ្ចូលទាំងការសារភាពផងដែរ ។ ពេលខ្លះអ្នកអាចនឹងត្រូវជួបប្រជុំជាច្រើនដងពីមុនអ្នកដែលប្រើការណ៍អាសគ្រាមទាំងនោះ បង្ហាញពីទង្វើមិនត្រឹមត្រូវយ៉ាងពេញលេញ ។ នៅពេលអ្នកជួបនឹងពួកគេ សូមជួយពួកគេឲ្យយល់ពីទំនាក់ទំនងរវាងភាពយុត្តិធម៌ និងក្ដីមេត្តាករុណា និងរបៀបដែលសេចក្ដីពិតទាំងនេះជាប់ទាក់ទងនឹងការសារភាព និងការទទួលខុសត្រូវ ។ សូមប្រើអារម្មណ៍ ក្ដីស្រឡាញ់ និងភាពកក់ក្ដៅដើម្បីបំផុសគំនិត និងលើកទឹកចិត្ត ។ សូមប្រយ័ត្នប្រយែងដើម្បីចៀសវាងពីភាពខ្មាសអៀន ឬការបង្ខិតបង្ខំ ។ ក្រុមប្រឹក្សាសមាជិកភាពមិនគួរធ្វើការដាក់វិន័យ ឬគំរាមគំហែងដល់សមាជិកដែលកំពុងមានបញ្ហាការណ៍អាសគ្រាមទេ ( សូមមើល ក្បួនខ្នាតទូទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ [ ឆ្នាំ ២០២០ ] ៣២.៨.២ ) ។
ការអធិស្ឋាន និងការសិក្សាព្រះគម្ពីរជាទៀងទាត់
ការអធិស្ឋាន និងការសិក្សាព្រះគម្ពីរជាទៀងទាត់ គឺសំខាន់ដើម្បីមានការផ្លាស់ប្ដូរដ៏ធំនៅក្នុងដួងចិត្ត ។ សូមបង្រៀនបុគ្គលម្នាក់ៗឲ្យអធិស្ឋានជាពិសេស ទូលសូមការអភ័យទោស ហើយអនុវត្តសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ បុគ្គលម្នាក់ៗក៏អាចទទួលបានកម្លាំងតាមរយៈការសិក្សាព្រះគម្ពីរមរមនជាប្រចាំថ្ងៃផងដែរ ( សូមមើល រ័សុល អិម ណិលសុន « Book of Mormon: What Would Your Life Be Like without It? » Liahona ខែ វិច្ឆិកា ឆ្នាំ ២០១៧ ទំព័រ ៦០–៦៣ ) ។ សូមអញ្ជើញពួកគេឲ្យស្វែងរកសុន្ទរកថាសន្និសីទទូទៅ និងអត្ថបទទស្សនាវដ្ដីសាសនាចក្រដែលនិយាយអំពីការណ៍អាសគ្រាម និងគោលដៅខាងវិញ្ញាណជាទៀងទាត់ ។
សេចក្តីជំនឿលើព្រះវរបិតាសួគ៌ និងព្រះយេស៊ូវគ្រីស្ទ
បុគ្គលម្នាក់ៗត្រូវតែជឿថាពួកគេអាចផ្លាស់ប្ដូរបាន ។ សូមព្យាយាមមានភាពវិជ្ជមាន និងប្រាកដនិយមជាមួយពួកគេ នៅពេលអ្នករំឭកអំពីគោលការណ៍នានានៃសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ សូមបង្រៀនពួកគេថា បំណងប្រាថ្នាដ៏តូចបំផុតដើម្បីចាប់ផ្ដើមដំណើរការនៃការផ្លាស់ប្ដូរ អាចនាំទៅរកការរីកចម្រើនបាន ( សូមមើល អាលម៉ា ៣២:២៧–២៨ ) ។ នៅពេលបុគ្គលម្នាក់ៗបីបាច់សេចក្ដីជំនឿរបស់ពួកគេ ហើយអនុវត្តនូវអ្វីដែលពួកគេកំពុងរៀន នោះពួកគេអាចចម្រើនសេចក្ដីជំនឿរបស់ពួកគេដើម្បីទទួលបានការផ្លាស់ប្ដូរដ៏ធំមួយ ។
ដំណើរការ ពុំមែនជាព្រឹត្តិការណ៍ទេ
ការប្រែចិត្តគឺជាដំណើរការមួយប្រកបដោយអំណរ ដែលត្រូវការពេលវេលា ( សូមមើល ឌែល ជី រ៉េនឡាន់ « Repentance: A Joyful Choice » Liahona ខែ វិច្ឆិកា ឆ្នាំ ២០១៦ ទំព័រ ១២១–២៤; ស្ទីវិន ដបុលយូ អូវិន « Repentance Is Always Positive » Liahona ខែ វិច្ឆិកា ឆ្នាំ ២០១៧ ទំព័រ ៤៨–៥០ )។ គឺដូចជាការបង្កើតទម្លាប់អាក្រក់ត្រូវការពេលវេលា នោះការអភិវឌ្ឍឥរិយាបថល្អដូចជាព្រះគ្រីស្ទក៏ត្រូវការពេលវេលាផងដែរ ។ ការសិក្សាព្រះគម្ពីរ ការអធិស្ឋានជាទៀងទាត់ និងការអភិវឌ្ឍសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ជាជំនួយទៅលើដំណើរការនេះ ។
វាពុំតម្រូវនោះទេ ទាំងពុំពិតប្រាកដផងដែរដែលថាបុគ្គលម្នាក់ៗនឹងឆ្ពោះទៅមុខដោយល្អឥតខ្ចោះ ឬថាគាត់នឹងមានបទពិសោធន៍នៃការផ្លាស់ប្ដូរដ៏ធំនៅក្នុងដួងចិត្តភ្លាមៗនោះ ។ ប៉ុន្តែគាត់ ឬនាងត្រូវតែឆ្ពោះទៅមុខដោយបំណងពិតដើម្បីស្វែងរកការអភ័យទោស ទម្លាក់ចោលទង្វើប្រកបដោយអំពើបាប ហើយធ្វើការរីកចម្រើនសន្សឹមៗ ។ បន្ថែមពីលើនោះ មនុស្សដែលមើលការណ៍អាសគ្រាមត្រូវតែទទួលស្គាល់ និងទទួលខុសត្រូវផងដែរចំពោះឥរិយាបថដែលបណ្ដាលឲ្យមានការឈឺចាប់ និងការបាត់បង់ទំនុកចិត្តដែលគាត់បង្កើតឲ្យមាននៅក្នុងទំនាក់ទំនងរបស់គាត់ ឬនាង ។ ការណ៍នេះអាចរួមមានទាំងការស្ដារនូវអ្វីៗទាំងអស់ឡើងវិញ ហើយគួរតែរាប់បញ្ចូលទាំងការមានភាពស្មោះត្រង់ចំពោះស្វាមី ឬភរិយាផងដែរ បើបុគ្គលនោះបានរៀបការរួចហើយ ។
សូមថ្លែងទីបន្ទាល់ជាញឹកញាប់អំពីអំណាចនៃដង្វាយធួនរបស់ព្រះយេស៊ូវគ្រីស្ទ និងសមត្ថភាពរបស់ទ្រង់ដើម្បីជួយមនុស្សឲ្យផ្លាស់ប្ដូរ ។ ដង្វាយធួនរបស់ព្រះយេស៊ូវគ្រីស្ទនាំមកនូវអំណរ ( សូមមើល ម៉ូសាយ ៤:២–៣ ) ។