យុវមជ្ឈិមវ័យ
ការដើរលេងជាគូ និងការណ៍អាសគ្រាម
ជំនួយ និងសេចក្តីសង្ឃឹមក្នុងការប្រឈមមុខនឹងការណ៍អាសគ្រាមក្នុងទំនាក់ទំនងការដើរលេងជាគូ ។
រូបថត និងរូបតំណាងមកពីរូបភាពហ្គីធី បានប្រើសម្រាប់គោលបំណងជាឧទាហរណ៍ បង្ហាញដោយគំរូ
ក្នុងនាមជាយុវមជ្ឈិមវ៏យ យើងទាំងអស់គ្នាដឹងថា ការដើរលេងជាគូអាចជារឿងដ៏រំភើប គួរឲ្យខ្លាច ជាការបំពេញចិត្តមួយ និងជារឿងលំបាកមួយនៅក្នុងពេលដំណាលគ្នានោះ ។ ពេលយើងបើកដួងចិត្តចំពោះគ្នាទៅវិញទៅមក នោះយើងចង់ស្គាល់គ្នាកាន់តែច្បាស់ ហើយការបង្កើននូវភាពមានឥទ្ធិពលចំពោះគ្នាគឺជារឿងសំខាន់ក្នុងការស្ថាបនា និងធ្វើឲ្យទំនាក់ទំនងមានភាពស៊ីជម្រៅ ។ តើអ្វីខ្លះជាក្តីសុបិន ការភ័យខ្លាច និងជំនឿរបស់យើង ? តើយើងមានអារម្មណ៍យ៉ាងណាអំពីអាពាហ៍ពិពាហ៍ និងក្រុមគ្រួសារ ? តើយើងបានប្រឈមមុខនឹងឧបសគ្គអ្វីខ្លះកាលពីអតីតកាល ឬបច្ចុប្បន្ននេះ ដែលយើងគួរតែចែកចាយជាមួយគ្នា ?
ការខ្លាចមិនហ៊ាននិយាយ ( ឬសួរ ) អំពីបញ្ហាការណ៍អាសគ្រាម ប្រហែលជា មិន និយាយអំពីវា អាចនាំទៅកាន់បញ្ហាធ្ងន់ធ្ងរនៅពេលក្រោយ ។ បញ្ហាការណ៍អាសគ្រាមនីមួយៗគឺមានលក្ខណៈពិសេស និងមានឧបសគ្គ ហើយអ្នកថែមទាំងពុំអាចដឹងថា តើវាជាបញ្ហាដែរឬទេ ឬតើអ្នកលើកមកនិយាយពីរឿងនេះជាមួយបុគ្គលដែលអ្នកកំពុងដើរលេងជាគូដោយរបៀបណា ដូច្នេះវាសំខាន់ថា អ្នកត្រូវស្វែងរកការណែនាំពីព្រះវិញ្ញាណ ។ ពុំមែនមានតែដំណោះស្រាយមួយសម្រាប់គ្រប់ស្ថានភាពទេ ប៉ុន្តែនៅក្នុងអត្ថបទនេះ យើងសូមផ្តល់យោបល់មួយចំនួនដល់អ្នកដែលអាចមានចម្ងល់ ៖
-
តើខ្ញុំអាចលើកនិយាយពីប្រធានបទការណ៍អាសគ្រាមជាមួយបុគ្គលដែលខ្ញុំកំពុងដើរលេងជាគូតាមរបៀបណា ? តើនៅពេលណាដែលវាសមរម្យដើម្បីសួរ/ប្រាប់ ?
-
តើខ្ញុំអាចដឹងតាមរបៀបណាថា តើខ្ញុំគួរតែបន្តទំនាក់ទំនងជាមួយបុគ្គលម្នាក់ដែលមានប្រវត្តិនឹងការប្រើប្រាស់ការណ៍អាសគ្រាមនោះ ឬយ៉ាងណា ?
-
តើយើងអាចធ្វើការរួមគ្នាដើម្បីយកឈ្នះលើការណ៍អាសគ្រាមយ៉ាងដូចម្តេច ?
ចំពោះអស់អ្នកដែលធ្លាប់មានបញ្ហា ឬកំពុងមានបញ្ហា
ប្រសិនបើអ្នកធ្លាប់មានបញ្ហាជាមួយការណ៍អាសគ្រាមកាលពីអតីតកាល ឬប្រសិនបើអ្នកកំពុងមានបញ្ហាក្នុងពេលបច្ចុប្បន្ននេះ គំនិតនៃការដើរលេងជាគូអាចនាំអារម្មណ៍នៃក្តីអស់សង្ឃឹម ឬចិត្តរសាប់រសល់ដល់អ្នក ។ ប៉ុន្តែប្រសិនបើអ្នកមានបំណងប្រាថ្នាស្មោះសរដើម្បីដកការណ៍អាសគ្រាមចេញពីជីវិតអ្នក ( ឬបានដកចេញរួចទៅហើយនោះ ) សូមដឹងថា ជាមួយនឹងកិច្ចខិតខំផ្ទាល់របស់អ្នក និងជំនួយពីព្រះវរបិតាសួគ៌ និងព្រះយេស៊ូវគ្រីស្ទ នោះទំនាក់ទំនងល្អ និងយូរអង្វែងអាចកើតមានដល់អ្នក ។ សូមពិចារណាអំពីសំណួរដូចតទៅនេះ ពេលអ្នកបន្តទំនាក់ទំនងរបស់អ្នក ។
១. តើយើងពិតជាត្រូវនិយាយគ្នាអំពីបញ្ហានោះដែរឬទេ ?
សំណួរទូទៅមួយគឺថា « តើខ្ញុំពិតជាត្រូវចែកចាយប្រវត្តិនៃការប្រើប្រាស់ការណ៍អាសគ្រាមរបស់ខ្ញុំជាមួយបុគ្គលដែលខ្ញុំកំពុងដើរលេងជាគូដែរឬទេ សូម្បីតែខ្ញុំបានប្រែចិត្តពីវាហើយនោះ ? » ឬ « តើខ្ញុំត្រូវតែនិយាយអំពីបញ្ហាការណ៍អាសគ្រាមបច្ចុប្បន្នរបស់ខ្ញុំជាមួយបុគ្គលដែលខ្ញុំកំពុងដើរលេងជាគូដែរឬទេ ? » ជាទូទៅ វា ពិតជា ត្រូវពិភាក្សាគ្នា—នៅពេលវេលាសមរម្យ និងក្នុងរបៀបមួយដែលអាចទទួលយកបាន ។ ពេលអ្នកមានការសន្ទនានេះ សូមចាំពីគោលការណ៍សំខាន់មួយចំនួន ៖
-
ពេលវេលា—ការសន្ទនាគួរតែធ្វើឡើង ពេលទំនាក់ទំនងរីកចម្រើនទៅរកស្ថានភាពមួយដែលប្រាកដប្រជា ដែលនឹងតម្រូវឲ្យមានការសន្ទនាពីរឿងនោះដោយឯកឯង ។
-
ភាពទៀងត្រង់—ទំនាក់ទំនងគួរតែផ្អែកលើការទុកចិត្ត និងភាពទៀងត្រង់ ។ ទោះបីជាបុគ្គលដែលអ្នកកំពុងដើរលេងជាគូអាចជ្រើសរើសបញ្ចប់ទំនាក់ទំនងក្តី ពួកគេត្រូវតែយល់ពីធម្មជាតិនៃបញ្ហានោះ ការរីកចម្រើនបច្ចុប្បន្នរបស់អ្នកក្នុងការដោះស្រាយវា និងផែនការរបស់អ្នកសម្រាប់ដោះស្រាយវា ប្រសិនបើកើតឡើងម្តងទៀតនាពេលខាងមុខ ។
-
ការអភ័យទោស—ការមានភាពទៀងត្រង់អំពីការប្រើប្រាស់ការណ៍អាសគ្រាមរបស់អ្នកជាមួយបុគ្គលដែលអ្នកកំពុងដើរលេងជាគូ ពុំមែនមានន័យថា អ្នកត្រូវតែប្រាប់លម្អិតពេលពិភាក្សាពីរឿងនោះទេ ។ ប្រសិនបើអ្នកបានប្រែចិត្ត ហើយទទួលអារម្មណ៍ថា អ្នកបានទទួលការអភ័យទោស អ្នកពុំគួរមានវិប្បដិសារីអំពីរឿងនោះទៀតទេ ។ ព្រះអម្ចាស់ពុំចាំអំពើបាបយើងទៀតទេ បន្ទាប់ពីយើងប្រែចិត្តពីវានោះ ( សូមមើល គោលលទ្ធិ និងសេចក្ដីសញ្ញា ៥៨:៤២ ) ដូច្នេះការពិភាក្សារបស់អ្នកជាមួយបុគ្គលដែលអ្នកកំពុងដើរលេងជាគូគឺ « សារភាព » តិច ប៉ុន្តែបង្កើនការសាងទំនុកចិត្ត ការចែកចាយផែនការសម្រាប់ការជាសះស្បើយជារៀងរហូត និងការទទួលបានការគាំទ្រ ។
-
ការព្យាបាល—ទោះបីអ្នកបានប្រែចិត្ត បានពន្យារពេល ឬប្រើប្រាស់ការណ៍អាសគ្រាមច្រើនយ៉ាងណាក្តី វាអាចមានឥទ្ធិពលជីវសាស្ត្រ ផ្លូវចិត្ត សង្គម និងខាងវិញ្ញាណយូរអង្វែង ។ ដំណើរការនៃការព្យាបាលអាចមានការពិបាក ហើយត្រូវការពេលវេលា ប៉ុន្តែការជាសះស្បើយ និងការព្យាបាលពិតប្រាកដគឺអាចកើតមាន ។ តាមរយៈដំណើរការនេះ អ្នកត្រូវការជំនួយ និងការគាំទ្រសមស្រប ដែលគួរតែរួមទាំងអនាគតស្វាមី ឬភរិយារបស់អ្នក ។
២. តើខ្ញុំត្រៀមខ្លួនរួចជាស្រេចសម្រាប់ទំនាក់ទំនងប្រាកដប្រជាដែរឬទេ ?
ភាពខុសគ្នាដ៏ធំបំផុតមួយរវាងបុគ្គលម្នាក់ដែលត្រៀមខ្លួនរួចជាស្រេចសម្រាប់ទំនាក់ទំនងប្រាកដប្រជា និងបុគ្គលម្នាក់ដែលគ្មានឆន្ទៈធ្វើឲ្យមានតម្លាភាពជាមួយបុគ្គលដែលពួកគេកំពុងដើរលេងជាគូ ។ ប្រសិនបើអ្នកមានបញ្ហាជាមួយការណ៍អាសគ្រាម នោះអ្នកអាចបណ្តោយឲ្យភាពភ័យខ្លាចឆក់យកទំនាក់ទំនងរបស់អ្នកទៅក្នុងស្ថានភាពមួយដែលគ្មានការទុកចិត្ត ឬប្រើសេចក្តីជំនឿដើម្បីដោះស្រាយឧបសគ្គរួមគ្នា ។
ទោះបីវាពុំងាយស្រួល ហើយគួរឲ្យខ្លាចរអាលក្នុងការចែកចាយប្រវត្តិការណ៍អាសគ្រាមរបស់អ្នកក្តី ការចៀសវាងមិនចែកចាយពីវា អាចធ្វើឲ្យអ្នកមានអារម្មណ៍កាន់តែភ័យខ្លាច និងខ្មាស់អៀន ។ ការភ័យខ្លាចរបស់អ្នកក្នុងការបាត់បង់បុគ្គលនោះ អាចធ្វើឲ្យអ្នកបដិសេធ ឬចៀសវាងការចែកចាយរឿងនោះទាំងស្រុង ដែលអាចធ្វើឲ្យ បាត់បង់ទំនុកចិត្ត ឬបំផ្លាញទំនាក់ទំនងរបស់អ្នកនៅពេលក្រោយ ។
ម្យ៉ាងវិញទៀត ពេលអ្នកគោរពដល់សិទ្ធិជ្រើសរើសរបស់បុគ្គលដែលអ្នកកំពុងដើរលេងជាគូ នោះអ្នកនឹងគោរពដល់ជម្រើសរបស់ពួកគេ ដើម្បីបន្តទំនាក់ទំនងមួយដែលដឹងទាំង រឿងល្អ និងរឿងអាក្រក់ផងនោះទេ ។ អ្នកអាចនៅតែខ្លាចចំពោះលទ្ធផលដែលកើតឡើង ប៉ុន្តែវាសំខាន់ដើម្បីដឹងថា ការផ្តល់ព័ត៌មានទាំងអស់ នោះដល់ បុគ្គលផ្សេងទៀតក៏អាចជួយអ្នកក្នុងកិច្ចខិតខំ និងបំណងប្រាថ្នារបស់អ្នកដើម្បីដកយកការណ៍អាសគ្រាមចេញពីជីវិតរបស់អ្នកផងដែរ ។ ប៉ុន្តែទោះបីទំនាក់ទំនងនោះមិនដំណើរការល្អក្តី ជាមួយនឹងជំនួយរបស់ព្រះ អ្នកអាចបន្តដើរនៅលើផ្លូវឆ្ពោះទៅកាន់ការជាសះស្បើយ ។
ចំពោះអ្នកដែលកំពុងដើរលេងជាគូជាមួយនរណាម្នាក់ដែលធ្លាប់មានបញ្ហា
ដោយសារអាត្រាអាយុជាមធ្យមនៃការមើលការណ៍អាសគ្រាមលើកដំបូងគឺនៅអាយុ ១១ ឆ្នាំ ហើយវាមានភាពងាយស្រួលនឹងចូលមើល នោះយុវវ័យជាច្រើនបានមើលការណ៍អាសគ្រាមយ៉ាងហោចណាស់នៅពេលអាយុ ១៨ ឆ្នាំ ។ នេះអាចជាកង្វល់ទាក់ទងនឹងការដើរលេងជាគូ ។ ប៉ុន្តែការមើលឃើញពុំដូចការញៀនទេ ហើយមានកម្រិតខុសគ្នាក្នុងការពាក់ព័ន្ធនឹងការណ៍អាសគ្រាម ( សូមមើល ដាល្លិន អេក អូក « Recovering from the Trap of Pornography » Liahona ខែ តុលា ឆ្នាំ ២០១៥ ទំព័រ ៥០–៥៥ ) ។ ដំណឹងល្អនោះគឺថា ដង្វាយធួនរបស់ព្រះយេស៊ូវគ្រីស្ទអាចផ្ដល់កម្លាំង និងការព្យាបាលដល់មនុស្សទាំងអស់ដែលស្វែងរកវា ។ នេះគឺជាសំណួរមួយចំនួនដែលអ្នកអាចយកមកពិចារណា ពេលទំនាក់ទំនងរបស់អ្នករីកចម្រើន ៖
១. តើខ្ញុំគួរតែសួរអំពីការណ៍អាសគ្រាមពេលណា និងរបៀបណា ?
ការសម្រេចចិត្តពេលវេលា និងពីរបៀបដើម្បីលើកមកនិយាយពីបញ្ហានេះជាមួយបុគ្គលដែលអ្នកកំពុងដើរលេងជាគូអាចជាអ្វីមួយដែលត្រូវពិភាក្សាជាមួយឪពុកម្តាយ បងបង្កើតរបស់អ្នក ថ្នាក់ដឹកនាំរបស់សាសនាចក្រ ឬនរណាម្នាក់ដែលអ្នកទុកចិត្តថានឹងផ្តល់យោបល់បានល្អ ។ សូមស្វែងរករបៀបមួយដែលធ្វើឲ្យអ្នកមានអារម្មណ៍ល្អ បន្ទាប់មកធ្វើការសន្ទនានៅពេលវេលាសមរម្យ ពេលអ្នកដាក់ចិត្ត ឬមានទំនាក់ទំនងប្រាកដប្រជាក្នុងទំនាក់ទំនងរបស់អ្នក ។
នោះពុំមែនមានន័យថា អ្នកត្រូវចាប់ផ្តើមការដើរលេងជាគូដំបូងរបស់អ្នកជាមួយនឹងការសួរសំណួរពីអតីតកាលរបស់ពួកគេនោះទេ ប៉ុន្តែពេលទំនាក់ទំនងអ្នករីកចម្រើន អ្នកអាចស្វែងរកការបំផុសគំនិតពីព្រះវិញ្ញាណដើម្បីជួយអ្នកដឹងពីរបៀប និងពេលវេលាដើម្បីសួរអំពីប្រវត្តិរបស់ពួកគេទាក់ទងនឹងការណ៍អាសគ្រាម ។
២. តើខ្ញុំគួរតែឆ្លើយតបដូចម្តេច ?
ពេលអ្នក និងបុគ្គលដែលអ្នកកំពុងដើរលេងជាគូចាប់ផ្តើមចែកចាយអារម្មណ៍ស្មោះត្រង់របស់អ្នក វាអាចនាំមកនូវការព្យាបាល ។ វាសំខាន់ដើម្បីដឹងពីគំនិត និងអារម្មណ៍ផ្ទាល់ខ្លួនរបស់អ្នក ពេលការប្រើប្រាស់ការណ៍អាសគ្រាមត្រូវបានបើកបង្ហាញប្រាប់—វាអាចបណ្តាលឲ្យអ្នកមានភាពម៉ឹងម៉ាត់ ខឹង តក់ស្លុត ឬមានអារម្មណ៍ថាគេបោកប្រាស់អ្នក ។ ប៉ុន្តែនៅក្នុងពេលដំណាលគ្នានេះ ការចែករំលែករបស់ពួកគេក៏អាចបង្កើននូវទំនុកចិត្ត ការអាណិតអាសូរ សេចក្ដីស្រឡាញ់ និងការយោគយល់ជាមួយអ្នកផងដែរ ។ សូមពិចារណាពីអារម្មណ៍របស់ពួកគេ និងអារម្មណ៍របស់អ្នកផ្ទាល់ ពេលអ្នកឆ្លើយតប ។
៣. តើខ្ញុំបន្តទៅមុខទៀតដោយរបៀបណា ?
ការដឹងថា បុគ្គលដែលអ្នកកំពុងដើរលេងជាគូកំពុងមានបញ្ហាជាមួយការណ៍អាសគ្រាមគួរតែជាកង្វល់ មួយ ប៉ុន្តែកុំក្បត់ទំនុកចិត្តរបស់ពួកគេដោយការចែកចាយឧបសគ្គរបស់ពួកគេផ្ទាល់ជាមួយមនុស្សដទៃឡើយ ។ ការនិយាយដោយមានទំនុកចិត្តជាមួយប៊ីស្សព ឬអ្នកព្យាបាល ឬដោយមានការអនុញ្ញាតពីបុគ្គលដែលអ្នកកំពុងដើរលេងជាគូ ជាមួយមិត្តភក្តិ ឬថ្នាក់ដឹកនាំដែលទុកចិត្តក៏អាចមានប្រយោជន៍ផងដែរ ។
ពេលសម្រេចចិត្តថា តើគួរតែបន្តទំនាក់ទំនងទៀតឬអត់ នោះអ្នកគួរតែបន្តស្វែងរកការណែនាំពីព្រះវិញ្ញាណ ។ ប៉ុន្តែយោបល់ដូចតទៅនេះក៏អាចមានប្រយោជន៍ផងដែរ ៖
-
សួរពួកគេថា តើការណ៍អាសគ្រាមបានជះឥទ្ធិពលខ្លាំងប៉ុណ្ណាដល់ជីវិតរបស់ពួកគេ ហើយតើពួកគេកំពុងស្ថិតនៅចំណុចណានៃដំណើរការព្យាបាលរបស់ពួកគេ ។ ពួកគេត្រូវបង្ហាញបំណងប្រាថ្នារបស់ខ្លួន ដើម្បីកម្ចាត់ការណ៍អាសគ្រាមចេញពីជីវិតពួកគេ តាមរយៈការចាត់វិធានការសមរម្យផ្សេងៗដែលចាំបាច់ ។
-
ទទួលស្គាល់ថា ទម្រង់មួយចំនួននៃការប្រើប្រាស់ការណ៍អាសគ្រាម ( ឧទាហរណ៍ ការណ៍អាសគ្រាមកុមារ ) គឺជាសញ្ញាបង្ហាញដ៏ធំមួយថា បុគ្គលនោះត្រូវការជំនួយពីអ្នកមានវិជ្ជាជីវៈ ហើយគាត់អាចគ្មានសុវត្ថិភាពទេ ។
-
សូមដឹងថា ព្រះចេស្ដានៃដង្វាយធួនរបស់ព្រះអង្គសង្គ្រោះ គឺមានពិត ។ អ្នកអាចអត់ទោសឲ្យគេ ហើយពួកគេអាចបានព្យាបាល ។
-
សូមសម្រេចចិត្តថា អ្នកនឹងរស់នៅដោយពុំចង់បានអ្វីក្រៅពីភាពស្មោះត្រង់ទាំងស្រុងក្នុងទំនាក់ទំនងរបស់អ្នក និងភាពស័ក្តិសមដើម្បីរៀបការក្នុងព្រះវិហារបរិសុទ្ធទេ ។
-
សូមយល់ថា ការព្យាបាល និងការជាសះស្បើយត្រូវការចំណាយពេលវេលា ។ ការលាប់ឡើងវិញអាចកើតមាន ហើយអ្នកដែលកំពុងព្យាយាមព្យាបាលត្រូវការការគាំទ្រ ។ ការណ៍នេះរួមទាំងការយល់ពីគន្លិះអូសទាញរបស់ពួកគេ ( អ្វីដែលអាចបណ្តាលឲ្យពួកគេត្រឡប់ទៅរកការណ៍អាសគ្រាមវិញ ) ហើយគាំទ្រ ឬជួយបង្កើតសុវត្ថិភាពសមរម្យមួយ ។
-
ប្រសិនបើទំនាក់ទំនងរបស់អ្នកកំពុងរីកចម្រើនឆ្ពោះទៅរកការរៀបអាពាហ៍ពិពាហ៍ សូមប្រាកដថា អ្នកទាំងពីរយល់ស្របថា ការណ៍អាសគ្រាមជារឿងពុំអាចទទួលយកបានទេ ហើយពុំឆ្លុះបញ្ចាំងពីទំនាក់ទំនងផ្លូវភេទល្អនៃអាពាហ៍ពិពាហ៍ទេ ។
ផ្នែកដ៏សំខាន់បំផុតនៃការបន្តឆ្ពោះទៅមុខនោះគឺពឹងផ្អែកលើអ្វីដែលព្រះវិញ្ញាណបរិសុទ្ធបំផុសគំនិតអ្នកឲ្យធ្វើ ដែលអាចជាអ្វីមួយពីការបន្តទំនាក់ទំនងនោះ ជាមួយនឹងការយល់ដឹងថា ការប្រើប្រាស់ការណ៍អាសគ្រាមគឺត្រូវឈប់ ឬត្រូវបញ្ចប់ទំនាក់ទំនងប៉ុន្តែបន្តគាំទ្រកិច្ចខិតខំរបស់ពួកគេឲ្យផ្លាស់ប្តូរ ។ ទោះបីអ្នកសម្រេចចិត្តបែបណាក្តី បុគ្គលដែលអ្នកកំពុងដើរលេងជាគូគួរតែយល់ថា អ្វីៗអាចផ្លាស់ប្តូរអាស្រ័យលើការរីកចម្រើនរបស់ពួកគេ ឬកង្វះនៃការរីកចម្រើនក្នុងការយកឈ្នះលើការណ៍អាសគ្រាម ។
ការធ្វើការរួមគ្នាដើម្បីយកឈ្នះលើការណ៍អាសគ្រាម
ការយកឈ្នះលើការណ៍អាសគ្រាមអាចចំណាយពេល ហើយមានការពិបាក ប៉ុន្តែវាអាចធ្វើបាន ។ ហើយនៅទីបំផុត ការខិតខំយកឈ្នះលើវាជាមួយគ្នាអាចពង្រឹងទំនាក់ទំនងរបស់អ្នក ពេលអ្នកទាំងពីរទទួលការយល់ដឹងកាន់តែស៊ីជម្រៅអំពីដង្វាយធួនរបស់ព្រះយេស៊ូវគ្រីស្ទ និងការរៀនគាំទ្រគ្នាឆ្លងកាត់គ្រាលំបាក ។ សូមពិចារណានូវចំណុចដូចតទៅនេះ ពេលអ្នកធ្វើការរួមគ្នាដើម្បីឈ្នះលើការណ៍អាសគ្រាម ៖
-
គេហទំព័រ overcomingpornography.ChurchofJesusChrist.org របស់សាសនាចក្រផ្តល់ធនធានជាច្រើន ( រួមមានព័ត៌មានរបស់សាសនាចក្រស្តីពីកម្មវិធីការជាសះស្បើយពីការញៀន ) ដែលអាចជួយអ្នកទាំងពីរស្វែងរកដំណើរការព្យាបាលនេះ ។
-
សូមគិតពីទីកន្លែង និងពេលវេលាជាក់លាក់ដើម្បីពិភាក្សាពីបញ្ហាការណ៍អាសគ្រាម ដើម្បីកុំឲ្យវាក្លាយជារឿងផ្តោតចិត្តលើទំនាក់ទំនងរបស់អ្នក ។ ពេលអ្នកចង់និយាយអំពីរឿងនេះ សូមកុំនិយាយមើលងាយ ឬធ្វើតម្រូវចិត្តគេឡើយ ។ ទំនាក់ទំនងរបស់អ្នកគួរតែជាកន្លែងមួយមានសុវត្ថិភាព ជាកន្លែងដែលអ្នកទទួលអារម្មណ៍ថា មានគេស្រឡាញ់ និងគាំទ្រ មិនមែនជាកន្លែងដែលគេចោទសួរ ឬបន្ទាបបន្ថោកទេ ។
-
ការអនុវត្តខាងវិញ្ញាណរបស់អ្នកអាចជួយផ្តល់ការការពារទាស់នឹងការល្បួង ។ សូមលើកទឹកចិត្តគ្នាទៅវិញទៅមក ដើម្បីរក្សា និងពង្រឹងទម្លាប់ខាងវិញ្ញាណជាទៀងទាត់—រួមមានការសិក្សាព្រះបន្ទូលប្រកបដោយអត្ថន័យ និងការថ្វាយបង្គំនៅព្រះវិហារបរិសុទ្ធ ( ពេលពេលវេលាអនុញ្ញាតឲ្យ ) គោរពថ្ងៃឈប់សម្រាក បម្រើមនុស្សដទៃ តមអាហារឲ្យបានជាប់លាប់ និងអធិស្ឋានដោយស្មោះសរ—ជាមួយនឹងការបង្កើនបំណងប្រាថ្នាដើម្បីពង្រឹងទំនាក់ទំនងរបស់អ្នកជាមួយព្រះអង្គសង្គ្រោះ និងព្រះវរបិតាសួគ៌ ។ ទំនាក់ទំនងនោះអាចជួយបន្ថយឥទ្ធិពលនៃការណ៍អាសគ្រាមដែលមានលើជីវិតអ្នក ។ វិន័យគឺជាការស្វែងរកយូរអង្វែង ហើយកម្លាំងដែលយើងទទួលបានក្នុងនាមជាអ្នកដើរតាមព្រះគ្រីស្ទនឹងជួយយើងយកឈ្នះលើឧបសគ្គទាំងអស់ក្នុងជីវិតយើង ពុំមែនគ្រាន់តែការណ៍អាសគ្រាមនោះទេ ។
-
ប្រសិនបើកិច្ចខិតខំរបស់អ្នកផ្ទាល់ពុំផ្តល់ជោគជ័យទេនោះ សូមកុំខ្លាច ឬខ្មាស់អៀនដើម្បីស្វែងរកជំនួយពីអ្នកមានវិជ្ជាជីវៈផ្នែកសុខភាពផ្លូវចិត្តក្នុងផ្នែកញៀនខាងផ្លូវភេទ ។ ពួកគេអាចជួយអ្នកឲ្យទទួលបានការយល់ដឹងកាន់តែច្រើននៅក្នុងការព្យាបាលការប្រើប្រាស់ការណ៍អាសគ្រាម និងការដោះស្រាយមូលហេតុដែលបង្កប់នៅក្នុងនោះ ។
-
សូមចងចាំថា យើងត្រូវបានហ៊ុមព័ទ្ធដោយប្រព័ន្ធផ្សព្វផ្សាយពុំសមរម្យដែលល្បួងទាក់ទាញយើងឲ្យធ្វើបាប ។ ប្រសិនបើបុគ្គលដែលអ្នកកំពុងដើរលេងជាគូមានដំណើរលាប់ឡើងវិញ របៀបដែលពួកគេត្រឡប់មកលើផ្លូវវិញយ៉ាងលឿន គឺជាសញ្ញាល្អមួយនៃការតាំងចិត្តរបស់ពួកគេ ដើម្បីកម្ចាត់ការណ៍អាសគ្រាមចេញពីជីវិតពួកគេ ។ ប្រសិនបើអ្នកចាប់ផ្តើមមានអារម្មណ៍ថា អ្នកត្រូវបានជំរុញចិត្តកាន់តែខ្លាំងឲ្យឃើញការផ្លាស់ប្តូរជាងខ្លួនពួកគេ នោះអ្នកគួរតែពិចារណាឡើងវិញពីការបន្តទំនាក់ទំនងដើរលេងជាគូរបស់អ្នក ។
-
ឥទ្ធិពលរបស់អ្នកលើបុគ្គលដែលអ្នកកំពុងដើរលេងជាគូអាចមានទំហំខ្លាំងក្លា ប៉ុន្តែវាគួរតែពុំមែនជាហេតុផលចម្បងសម្រាប់ការផ្លាស់ប្តូរឥរិយាបថរបស់ពួកគេនោះទេ ។ បំណងប្រាថ្នារបស់ពួកគេដើម្បីផ្លាស់ប្តូរគឺត្រូវចេញពីចិត្តពួកគេ ពុំមែនមកពីអ្នកនោះទេ ។
លើសពីអ្វីៗទាំងអស់ សូមស្វែងរកការណែនាំពីព្រះវរបិតាសួគ៌ ហើយចងចាំថា មានសេចក្តីសង្ឃឹមជានិច្ចតាមរយៈព្រះអង្គសង្គ្រោះ ។ ព្រះគុណរបស់ទ្រង់គឺមានល្មមគ្រប់គ្រាន់ដើម្បីព្យាបាល និងផ្លាស់ប្តូរយើង ។ ដង្វាយធួនរបស់ទ្រង់គឺមានសម្រាប់អ្នកទាំងពីរដើម្បីផ្តល់កម្លាំង ហើយជួយអ្នកឲ្យអភ័យទោស ។ ទោះជាយ៉ាងណាក៏ដោយ បុគ្គលដែលមានបញ្ហាជាមួយការណ៍អាសគ្រាមត្រូវស្វែងរកជំនួយពីព្រះអម្ចាស់យ៉ាងសកម្ម ដើម្បីយកឈ្នះលើវា ។ គ្មាននរណាម្នាក់អាចធ្វើវាជំនួសពួកគេបានទេ ។ សូមមានសេចក្តីជំនឿ ហើយទុកចិត្តលើព្រះវរបិតាសួគ៌ ។ ទ្រង់នឹងដឹកនាំអ្នកនៅក្នុងស្ថានភាពជាក់លាក់របស់អ្នក ។