សំឡេងពួកបរិសុទ្ធថ្ងៃចុងក្រោយ
បានដឹកនាំទៅរកម៉ូនីកា
រ៉ូសាណា សូរ៉េស រដ្ឋយូថាហ៍ ស.រ.អា
រចនារូបភាពដោយ ស្ទេន ហ្វែឡូ
កាលខ្ញុំរស់នៅទីក្រុង សៅ ប៉ូឡូ ប្រទេស ប្រេស៊ីល ខ្ញុំបានស្គាល់ស្ត្រីដ៏អស្ចារ្យម្នាក់ឈ្មោះហ្គ្រាស្សា ។ គាត់ជាមនុស្សគួរឲ្យស្រឡាញ់ ហើយមានចិត្តល្អ ហើយជាមិត្តជាមួយមនុស្សទាំងអស់ ។
ហ្គ្រាស្សាគឺជាគ្រូបង្រៀនសួរសុខទុក្ខរបស់ខ្ញុំ ។ គាត់មានកូនបីនាក់ ធ្វើការក្រៅម៉ោង ហើយគ្មានឡាន ឬទូរសព្ទទេ ប៉ុន្តែទោះបីគាត់គ្មានវាក្តី ក៏វាមិនអាចបញ្ឈប់គាត់មិនឲ្យបម្រើផងដែរ ។
ខ្ញុំអាចមើលឃើញបង្អួចមួយនៅផ្ទះរបស់គាត់ពីរានហាលផ្ទះខ្ញុំ ។ ពេលគាត់ទំនេរ ហ្គ្រាស្សានឹងដាក់ក្រណាត់ពណ៌ក្រហមមួយផ្ទាំងនៅបង្អួចនោះ ដើម្បីផ្តល់ជាសញ្ញាថា គាត់ត្រៀមខ្លួនចេញទៅសួរសុខទុក្ខហើយ ។ គាត់មិនដែលដោះសារថាមិនបម្រើឡើយ ។ ជារឿយៗខ្ញុំបានគិតអំពីសញ្ញារបស់ហ្គ្រាស្សា និងគំរូដ៏អស្ចារ្យរបស់គាត់អំពីការបម្រើដោយស្មោះត្រង់ និងសាមញ្ញៗ ។
បទពិសោធន៍មួយបានផុសឡើងក្នុងគំនិតខ្ញុំ ។ យើងបានរៀបចំ ហើយអធិស្ឋានពីមុនទៅសួរសុខទុក្ខបងប្អូនស្រីរបស់យើងម្នាក់ ។ ពេលយើងទៅដល់ផ្ទះគាត់ យើងបានដឹងថា យើងត្រូវបានទាក់ទាញចិត្តឲ្យទៅផ្ទះបងស្រីផ្សេងម្នាក់ទៀត ។ យើងត្រូវបានចាត់ឲ្យទៅសួរសុខទុក្ខបងស្រីនេះ ជាម្តាយមួយរូបដែលមិនសូវសកម្ម ដែលមានកូនតូចពីរនាក់ ប៉ុន្តែយើងពុំបានគ្រោងទៅសួរសុខទុក្ខគាត់នៅថ្ងៃនោះទេ ។ ដោយសារយើងបានទៅទីនោះ យើងបានគោះទ្វារ ប៉ុន្តែគ្មាននរណាបើកទេ ។
យើងបានសម្រេចចិត្តបន្តគោះទ្វារ ហើយរង់ចាំ ។ ទីបំផុត បងស្រីម៉ូនីកាបានមក ហើយប្រាប់យើងថា គាត់ជាប់រវល់ ។ យើងបានសម្គាល់ឃើញថា គាត់ហត់នឿយ ហើយស្ទើរតែយំ ។ ពេលយើងនិយាយថា យើងមកទីនេះដើម្បីជួយ នោះគាត់បានអនុញ្ញាតឲ្យយើងចូលទៅក្នុងផ្ទះ ។ កូនរបស់គាត់បានស្រែកយំ ដូច្នេះយើងបានប្រាប់គាត់ឲ្យមើលកូនគាត់ ហើយយើងបានរង់ចាំ ។ ពេលម៉ូនីកាបានឡើងទៅជាន់ខាងលើជាមួយកូនគាត់ យើងបានធ្វើកិច្ចការផ្សេងៗ ជូតសម្អាតបន្ទប់បីបួន និងបត់ខោអាវដែលយើងអាចមើលឃើញ ។
ពេលម៉ូនីកាបានឃើញថា ផ្ទះគាត់មើលទៅមានសណ្តាប់ធ្នាប់ នោះគាត់បានចាប់ផ្តើមយំ បានបើកដួងចិត្តចំពោះយើង ហើយគាត់បានប្រាប់យើងពីឧបសគ្គមួយចំនួនរបស់គាត់ ។ យើងបានសន្យាដើម្បីជួយគាត់ ហើយយើងបាននិយាយជាមួយប្រធានសមាគមសង្រ្គោះអំពីឧបសគ្គរបស់គាត់ ។ នៅសប្តាហ៍បន្ទាប់ ម៉ូនីកាបានទៅព្រះវិហារ ។
ម៉ូនីកាបានសកម្មឡើងវិញ ជាស្ត្រីរីករាយម្នាក់ ហើយយើងបានបន្តផ្តល់ការងារបម្រើដល់គាត់ដោយសេចក្តីស្រឡាញ់ និងការមើលថែ ។ គាត់នៅតែមានឧបសគ្គដដែល ប៉ុន្តែគាត់អាចដោះស្រាយឧបសគ្គនោះបានជាមួយនឹងសេចក្តីជំនឿកាន់តែខ្លាំង ហើយមានភាពក្លាហាន ដោយសារសកម្មភាពរបស់គាត់នៅក្នុងព្រះវិហារ ។
ខ្ញុំមានអំណរគុណចំពោះគំរូរបស់ហ្គ្រាស្សា ពេលយើងបានបម្រើជាមួយគ្នា ។ យើងបានអធិស្ឋានទូលសូមការណែនាំ ហើយព្រះបាននាំយើងទៅរកម៉ូនីកា ។