ʻAi Hangatonu
ʻOku mahulu hake nai ʻa e fakamoʻoní ʻi he ongó pē?
Ko e fakamoʻoní ko e meʻa ia naʻe folofola ki ai ʻa e Fakamoʻuí ʻi he taimi naʻá Ne folofola ai kia Pita, “Naʻe ʻikai fakahā ia kiate koe ʻe he kakanó mo e totó, ka ko ʻeku Tamai ʻoku ʻi he langí” (Mātiu 16:17). Ko e ʻilo ia mei he ʻOtuá kuo fakahā ʻo fakafou ʻi he Laumālie Māʻoniʻoní.
ʻOku folofola ʻa e Laumālie Māʻoniʻoní ʻi ha leʻo ʻoku lahi ange ke tau ongoʻi kae ʻikai fanongoa, ka ʻoku fakatou hoko mai ia ʻi “hoʻo fakakaukaú mo ho lotó” (T&F 8:2; naʻe tānaki atu hono fakamamafaʻí)—ʻi heʻetau fakakaukaú pea mo hotau ongó foki.
Naʻe fakamatalaʻi ʻe he Palōfita ko Siosefa Sāmitá ʻa e laumālie ʻo e fakahaá ko ha “ʻilo haohaoa ʻoku taumalingi mai kiate koe, [ʻo ʻoatu] ha ngaahi fakakaukau fakafokifā” (Ngaahi Akonaki ʻa e Kau Palesiteni ʻo e Siasí: Siosefa Sāmita [2007], 151).
Ko e taimi ʻoku tafoki ai hotau ʻatamaí mo hotau lotó—ʻetau fakakaukaú, ongó, mo e ngaahi holí—ki he ʻOtuá, te Ne lava ʻo folofola ki hotau ʻatamaí mo hotau lotó ʻi he kihiʻi leʻo siʻi mo vanavanaiki ʻo e Laumālie Māʻoniʻoní. Ko e taimi ʻokú Ne fetuʻutaki ai mo hotau laumālié, ʻoku hangē ʻoku malingi mai ha ngaahi ongo mo ha fakakaukau pau kiate kitautolú. Ko e fakamoʻoni ʻeni ʻokú Ne foaki maí.