Lotu he Teleʻá
Naʻá ku kaka moʻunga mo ʻeku tangataʻeikí mo hoku tokouá ʻi he taʻu kuo ʻosí. Naʻa mau kaka mamaʻo ki he loto teleʻá. Naʻe ʻikai fuoloa kuo mau muimui ʻi ha kiʻi hala he tafaʻakí. Naʻa mau ʻilo ha ʻū ʻana lalahi mo ha ngaahi feituʻu lelei ke mamata mei ai. Naʻa mau kaka ʻo toe māʻolunga ange ʻi ha ʻū maka teka mo ha tafungofunga lilifa.
Taimi siʻi pē kuo mau hē fakaʻaufuli. Naʻe ʻikai ke mau ʻiloʻi ha toe hala ki he takele ʻo e teleʻá. Naʻa mau hē ʻi he vaó, ʻo ʻikai toe sio ki he tumuʻakí pe takele ʻo e teleʻá. Naʻe kamata ke u fuʻu lotomamahi moʻoni. Naʻe ʻikai ke u toe ʻilo pe te u ʻalú ki fē, pea pehē foki ki heʻeku tangataʻeikí!
Naʻe fakaʻau ke poʻuli mo momoko, pea naʻa mau mamaʻo mei he hūʻanga ki tuʻa ʻo e teleʻá. Naʻá ku ʻilo ʻoku ʻafioʻi ʻe he Tamai Hēvaní ʻa e hala ke mau fou aí.
Naʻá ku talaange leva, “Kapau ʻoku tau fie mavahe mei he feituʻú ni, ʻoku fie maʻu ke tau lotu!” Ko ia ne mau tūʻulutui toko tolu leva ʻo lotu, ʻo kole ki he Tamai Hēvaní ke Ne tataki kimautolu ki tuʻa mei he teleʻá.
ʻI he taimi naʻa mau kamata ai ke luelué, naʻe talamai ʻe ha ongo kiate au ko e taimi te u sio ai ki ha fuʻu ʻakau hangatonu mo māʻolungá, ʻoku totonu ke u afe hema. Hili ʻeku afe hemá, naʻá ku sio ki heʻemau kaá. Naʻá ku ʻiloʻi naʻe tokoniʻi kimautolu ʻe he Tamai Hēvaní ke mau hao mei he teleʻá. Naʻe tali ʻe he Tamai Hēvaní ʻemau lotú, pea mau hao mai—feʻunga tonu pē mo e tō ʻa e laʻaá.
ʻOku ou fakafetaʻi lahi ki he mālohi ʻo e lotú pea mo e telinga fakafanongo ʻa e Tamai Hēvaní.