Ulo Ngingila ʻi he Lepāpulika Sekí

Fakatahatatahaʻi ʻe Sharon Goodrich, ʻŪ Makasini ʻa e Siasí

Ko e fānau Palaimeli kimautolu ʻi he Lepāpulika Sekí Ko e founga ʻeni ʻoku mau ulo ngingila ai ʻi homau fonuá.

Naʻe mole he taimi ʻe taha hoku kofunima naʻá ku saiʻia taha aí. Naʻá ku fuʻu loto-mamahi. Naʻá ku lotu mo ʻeku fineʻeikí, ka naʻe ʻikai ke ma maʻu ia. Naʻá ku feinga ke maʻu ha tui. Ne ʻosi ha uike ʻe taha mei ai, ne maʻu ʻe hoku kiʻi tokoua siʻisiʻí hoku kofunimá ʻi he veʻehalá! ʻOku tali ʻe he ʻOtuá ʻetau ngaahi lotú. ʻOku ou ʻofa ʻiate Ia, pea ʻoku ou ʻiloʻi ʻokú Ne moʻui.

ʻOnitulei W., taʻu 9

ʻOku ʻi ai hoku ngaahi kaungāmeʻa ʻi he akó ʻoku ʻikai ke nau kau ki he Siasí ka ʻoku nau kei fakaʻapaʻapaʻi ʻeku ngaahi tuʻunga moʻuí. Naʻe ʻi ai ha taimi ʻe taha ne u talaange ai ʻoku totonu ke mau lotu, pea naʻa nau loto ki ai! Naʻá ku fiefia lahi.

ʻIvana A., taʻu 11

Naʻá ku hifo mo hoku ngaahi kaungāmeʻá mei he fungavaká. Ko e taimi naʻa mau aʻu ai ki he ʻeleveitá, naʻá ku maʻu ha ongoʻi taʻefiemālie peá u kole ange ki hoku ngaahi kaungāmeʻá ke ʻoua te mau fakaʻaongaʻi ia. Ka naʻa nau pehē ke nau fai pē ʻe nautolu. Naʻá ku fakaʻaongaʻi leva ʻe au ʻa e sitepú. ʻI he taimi naʻá ku aʻu ai ki laló, naʻe ʻikai ke ʻi ai hoku ngaahi kaungāmeʻá ʻoʻoku. Naʻe maumau ʻa e ʻeleveitá! Naʻe kiʻi fuoloa pea nau toki lava ʻo hū ki tuʻa. Naʻá ku fiefia he naʻe ʻikai hoko ha meʻa fakatuʻutāmaki fēfē. Naʻá ku toe fiefia foki ʻi heʻeku muimui ki he Laumālie Māʻoniʻoní.

ʻAmalie N., taʻu 10

Naʻe kamata ke fakapōpōʻuli ʻa e langí ʻi he matātahí. Naʻe angi ʻa e matangí ʻo tupu ai ha ngaahi peau lalahi! Naʻe mana, ʻuhila, mo ʻuha maka. Naʻe lele ʻa e taha kotoa ke toi. Naʻe ʻikai uesia kimautolu ʻe he matangí. Naʻa mau fakatokangaʻi ha ʻumata ʻe tolu ʻi heʻemau foki ki ʻapí. ʻOku mau ʻiloʻi naʻe tokoniʻi mo maluʻi kimautolu ʻe he ʻOtuá.

Sakupu B., taʻu 10

ʻOku ʻi ai haku kaungāmeʻa ʻi he ʻakó ʻoku ʻikai ha taha ʻe fie kaungāmeʻa mo ia. Naʻe kamata ke fai ʻe he toenga ʻo e fānaú ha ngaahi meʻa taʻeʻofa kiate ia ʻo fakatupu ai haʻane ongoʻi taʻetaau. Naʻá ku talaange ʻeni ki heʻeku faiakó mo fakaafeʻi hoku kaungāmeʻá ke ma vaʻinga. Naʻe ongoʻi ai ʻe hoku kaungāmeʻá ʻoku fiefia!

Lutimila V., taʻu 8

Naʻá ku ʻita ʻi heʻeku faʻeé he naʻe ʻikai ke u fie kaukau peá u toki mohé. Naʻá ku loto-mamahi ʻi he ʻaho hono hokó koeʻuhí ko ʻeku fili halá. Naʻe pehē ʻe he fineʻeikí te ma lava ʻo lotu ʻo kole ki he Tamai Hēvaní ke ne fakamolemoleʻi kimaua. Naʻá ma tūʻulutui leva ʻo lotu. Naʻá ku ongoʻi lelei ange. Naʻá ku ako ai te tau lava ʻo fakatomala, pea ʻe lava ʻo fakamolemoleʻi kitautolu koeʻuhí ko Sīsū Kalaisi.

Samuela H., taʻu 5

Naʻá ku fai ʻeku fakamoʻoní ʻi he lotú. Naʻe fie maʻu ki ai ʻa e loto-toʻá! Talu mei ai, mo ʻeku ongoʻi ʻa e Laumālié.

Elisika K., taʻu 11

Ko e taimi naʻe puke ai ʻeku kiʻi kumaá (guinea pig), naʻá ku lotua ia. ʻOku ou fakamālō ki he Tamai Hēvaní Heʻene tokoniʻi kimauá.

ʻAneta P., taʻu 10