Ko ha Malimali ʻo e Tali Leleí

Franklin Romero

Manapi, ʻEkuatoa

Naʻe fakahoko ʻe homau uōtí ʻi ha pō ʻe taha ha ʻekitivitī naʻe lauhoua ʻemau teuteu ki aí. Naʻe lea māvae mai ha taha fiefanongo kiate au ʻi he ʻosi ʻa e ʻekitivitií ka naʻá ne toe foki mai hili ha ngaahi miniti siʻi ʻo ʻeke mai, “Pīsope, ko e fē taimi ʻoku fie maʻu ke u toe foki mai aí?” Naʻá ku talaange ko e Sāpaté, pea pehē vave mai ʻa e kiʻi tamasiʻi ia, “ʻIkai, ʻoku ʻikai ke ʻi ai ha toe ʻekitivitī ia?” Naʻá ne fakalataʻia ʻi he feohi mo e toʻu tupu homau uōtí naʻá ne toe fie foki mai ai.

Naʻá ku toe talanoa foki mo ha ongomātuʻa naʻá na ʻaʻahi mai ki he ʻekitivitií peá u ʻeke ange pe ko e hā haʻana fakakaukau. Naʻe pehē ʻe he husepānití, “Talu ʻema aʻu mai, mo ʻema ongoʻi nonga mo lōngonoa,” ʻa ia ne fakamoʻoni ki ai hono uaifí ʻaki ha kamo hono ʻulu. Naʻá ku ʻohovale he meʻá ni koeʻuhí he ko e taimi naʻá na ʻuluaki aʻu mai aí, naʻe tokolahi ʻa e kakai naʻe pōtalanoa mo longoaʻá. Ka naʻá ne hoko atu ʻo ne ʻeke mai mo sio mai kiate au, “Ko e Laumālie Māʻoniʻoní ia, ko ia?” ʻI heʻeku ʻohovalé, ko e meʻa pē naʻá ku lava ʻo lea ʻakí ko e ʻio.

Naʻe lahi ʻa e ngaahi meʻa ke fai ke mateuteu ai ki he ʻekitivitī ko ʻení, ko ia ʻi he ʻosi ʻa e meʻa kotoa pē ʻi he pō ko iá, ko e meʻa pē naʻá ku fie fakahokó ko e foki ki ʻapi ʻo mohe. Koeʻuhí ko ʻeku fuʻu ongosiá, naʻe ʻikai ke u lava ʻo fakakaukau ki heʻeku pōtalanoa mo e kau fiefanongó. Ko e taimi naʻá ku aʻu ai ki ʻapí, naʻá ku lotu peá u tokoto ki hoku mohengá, ka naʻe ʻikai ke u lava ʻo mohe; naʻá ku sioloto ki he ʻEikí ʻoku malimali. Ko ha malimali ia ʻo e tali leleí. Naʻá ku kamata ʻi he momeniti ko iá ke manatuʻi e ngaahi meʻa fakaʻofoʻofa naʻe hoko ʻi he ʻekitivitií.

Naʻe mahino kiate au naʻe hanga ʻe he faivelenga mo e ʻofa ʻa e kāingalotu ʻo e uōtí ʻo ueʻi ʻa e loto ʻo e kau fiefanongo e toko tolu ko iá. Naʻe mahino kiate au ko e malimali ʻo e tali leleí naʻe ʻuhinga ia ki he meʻa ne mau fakahokó. Naʻe ʻikai ke u kei lava ʻo mataʻofi ʻeku tangí, pea naʻá ku ongoʻi houngaʻia ʻi he meʻafoaki kuo foaki mai ʻe he ʻEikí maʻamautolú. Kuó Ne fai mai ha malimali ʻo e tali leleí. ʻOku ou fakamoʻoni ʻoku moʻoni e folofola ʻa e ʻEikí; ko e taimi ʻoku tau ʻomi ai ha foʻi laumālie ʻe taha kiate Iá, ʻe lahi fau ʻetau fiefia ʻi he puleʻanga ʻo e Tamaí (vakai, T&F 18:15).