Ko Hono Tufaki e ʻOfa ʻa e ʻOtuá
Naʻá ku hiki mo hoku fāmilí ki Kenitaki ʻi ha taimi nounou mei heni. Naʻá ku mātuʻaki loto-mamahi koeʻuhí naʻá ku mavahe mei hoku ngaahi kaungāmeʻá mo e kāingá kotoa. Naʻe kehe ʻaupito ʻa Kenitaki ia mei he meʻa naʻá ku anga ki aí. Ko e fuofua taimi naʻa mau ō ai ki he lotú, naʻá ku fakatokangaʻi naʻe ʻikai fuʻu tokolahi ʻa e kakaí. Ko e taimi naʻá ku fakatokangaʻi ai e tokosiʻi homau kiʻi koló, naʻá ku fili ke u fai ha meʻa ki ai, kae ʻoua te u fakakaukau kovi ki aí.
Naʻá ku ʻalu mo ʻeku fineʻeikí ki he falekoloá ʻi he ʻaho hono hokó. Kimuʻa peá ma mavahe mei ʻapí, naʻá ku toʻo ha fanga kiʻi kaati tufa. Naʻá ku toʻo ha foʻi lole ʻi heʻemau aʻu ki he falekoloá peá u ʻalu ke totongi. Naʻe tohoʻi ʻe he faifakataú ʻa e foʻi lolé he komipiutá, peá ne mono mai. Naʻá ku toe fakafoki atu ia. Naʻá ne mataʻi puputuʻu peá ne pehē mai, “Taʻahine, naʻá ke toki totongi ia.”
Peá u pehē ange leva, “ʻOku ou ʻiloʻi, ka ʻoku ou foaki atu ia kiate koe ko ha meʻaʻofa.” Peá u fakatahaʻi leva e foʻi lolé mo ha kaati tufa. Naʻá ne malimali mo fakamālō mai. Naʻá ne sio ki he tuʻa ʻo e kaati tufá, ʻa ia naʻá ku tohiʻi ai, “Ko e tokotaha kotoa pē ko e fānau ia ʻa e ʻOtuá.” Naʻá ku lue fiefia leva ʻi heʻeku ʻiloʻi ʻe tatau ai pē kapau he ʻikai kau mai ki he Siasí, ka naʻá ku fai ha ngāue lelei.
Naʻá ku manatuʻi kimui ange ʻi he ʻaho ko iá, naʻá ku hili ʻa e toenga ʻo e fanga kiʻi kaati tufá ʻi he veʻe mīsini paʻangá! Ko e taimi hono hoko naʻá ma ʻalu ai ki he falekoloá, naʻá ku ʻalu ʻo ʻeke pe ʻoku kei ʻi ai pē. Ka ne u fakatokangaʻi ha meʻa, peá u tuʻu maʻu leva. Ko ha mīsini tānaki paʻanga ʻe nima naʻe ʻi ai ha kaati tufa ʻoku pehē ai, “Ko e taha kotoa pē ko e fānau ʻa e ʻOtuá.” Naʻe tufaki ia ʻe he faifakataú! Naʻá ku ongoʻi fiefia ʻi he meʻa naʻá ku faí.