ʻOku fakahā mai ʻe he folofolá ke tau haohaoa. Te u lava fēfē ʻo fai ia?
Ko e hā naʻe kole mai ʻe he Fakamoʻuí kiate kitautolu ʻi he taimi naʻá Ne folofola ai, “Ke mou haohaoa ʻo hangē pē ko aú, pe hangē ko e haohaoa hoʻomou Tamai ʻa ia ʻoku ʻi he langí”? (3 Nīfai 12:48).
ʻI he folofolá, ʻoku ʻuhinga ʻa e haohaoá ko e “kakato, kātoa, mo e tupulaki kakato; māʻoniʻoni kakato. … ʻE lava ʻa e kakai muimui moʻoni kia Kalaisí ʻo haohaoa ʻi Heʻene ʻaloʻofá mo e Fakaleleí.”1
Ne akoʻi ʻe ʻEletā Lāsolo M. Nalesoni ʻo e Kōlomu ʻo e Kau ʻAposetolo ʻe Toko Hongofulu Mā Uá ko e haohaoa ko ia ʻi he moʻui ko ʻení “ʻe lava ke toki aʻusia pē ia ʻi heʻetau feinga ke fakahoko ʻa e fatongia kotoa pē [mo] tauhi e fono kotoa pē. … Kapau te tau fai e lelei taha te tau lavá, ʻe tāpuakiʻi kitautolu ʻe he ʻEikí ʻo fakatatau mo ʻetau ngaahi ngāué mo e ngaahi holi ʻa hotau lotó.”2
Naʻe ʻikai folofola e Fakamoʻuí ia ʻoku ʻuhinga e haohaoá ke ʻoua ʻe fakahoko ha fehalaaki. Naʻe ʻikai foki ke Ne folofola ʻoku ʻuhinga hono fai ha fehalākí he ʻikai ke tau aʻusia ai e haohaoá. Te tau lava ʻo fakatomala.
Fakatatau mo Palesiteni Lolenisou Sinou (1814–1901), ko e kī ki he haohaoa ʻi he moʻuí ni ko e “lelei ange ʻi he ʻahó ni mei he ʻaneafí. … Hokohoko feinga ke tau lelei ange he ʻaho takitaha.”3