Kiʻi Tohi Fakamatala ʻo e Konifelenisi ʻo ʻOkatopa 2013

“ʻIlonga ha meʻa kuó u lea ʻaki ʻe au ko e ʻEikí, kuó u lea ʻaki ia; … neongo pē ko e fai ia ʻi hoku leʻo pē ʻoʻokú pe ʻi he leʻo ʻo ʻeku kau tamaioʻeikí, ʻoku tatau ai pē” (T&F 1:38).

ʻI hoʻo toe vakaiʻi ko ia ʻa e konifelenisi lahi ʻo ʻOkatopa 2013, ʻe lava ke ke fakaʻaongaʻi ʻa e ngaahi pēsí ni (mo e ngaahi Tohi Fakamatala Fakakonifelenisi ʻi he ngaahi pulusinga he kahaʻú) ke tokoni atu ki hoʻo akó mo fakaʻaongaʻi ʻa e ngaahi akonaki fakamuimuitaha ʻa e kau palōfita mo e kau ʻaposetolo moʻuí mo e kau taki kehe ʻo e Siasí.

Ke lau, mamata, pe fakafanongo ki he ngaahi lea ʻo e konifelenisi lahí, ʻalu ki he conference.lds.org.

Ko ha Talaʻofa Fakaepalōfita

Palesiteni Dieter F. Uchtdorf

“ʻOku fakanatula pē ke ʻi ai ha ngaahi fehuʻi—kuo tāhuli e tenga ʻo e fekumi moʻoní ʻo hoko ko ha fuʻu ʻakau lahi ʻo e moʻoní. ʻOku tokosiʻi pe ha kāingalotu ʻo e Siasí, kuo teʻeki ai ke nau fefaʻuhi mo ha ngaahi fehuʻi vivili pe pelepelengesi, ʻi ha taimi. Ko e taha e ngaahi taumuʻa ʻo e Siasí ke fafangaʻi mo tanumaki ʻa e tenga ʻo e tuí—ʻo aʻu ai pē he taimi ʻe niʻihi ki he kelekele touʻone ʻo e veiveiuá mo e taʻe-pauʻiá. Ko e tuí ko e ʻamanaki lelei ki ha ngaahi meʻa ʻoku ʻikai mamata ki ai ka ʻoku moʻoni [vakai, Hepelū 11:1 ʻAlamā 32:21].

“Ko ia ai, ʻe kāinga ʻofeina—mo hoku kaungāmeʻa ʻofeina, kātaki ʻo tomuʻa fakafehuʻia hoʻo veiveiuá ka ke toki fakafehuʻia hoʻo tuí. Kuo pau ke ʻoua naʻa tau teitei tuku e veiveiuá ke ne haʻisia mo taʻofi kitautolu mei he ʻofa, nonga mo e ngaahi meʻafoaki fakalangi ʻoku maʻu ʻi he tui ki he ʻEiki ko Sīsū Kalaisí.”

Palesiteni Dieter F. Uchtdorf, Tokoni Ua ʻi he Kau Palesitenisī ʻUluakí, “Haʻu, ʻo Kau mo Kimautolu, Liahona, Nōvema 2013, 23.

Ngaahi Lea Fakaepalōfita kau Ki he Nofomalí

“ʻOku mahuʻinga e malí ʻi he vahaʻa ʻo ha tangata mo ha fefine he ko ha konga tefito ia ʻo e tokāteline ʻa e ʻEikí pea ʻoku mahuʻinga ia ki he palani taʻengata ʻa e ʻOtuá. Ko e malí ʻi he vahaʻa ʻo ha tangata mo ha fefine ko e sīpinga ia ʻa e ʻOtuá ki he kakato ʻo e moʻuí ʻi he māmaní pea ʻi he langí. He ʻikai lava ke ngaohikovia, taʻe mahino, pe taki hala ʻa e sīpinga ʻa e ʻOtuá ki he nofomalí [vakai, Mātiu 19:4–6]. Kapau ʻokú ke fie maʻu ʻa e fiefia moʻoní. ʻOku maluʻi ʻe he sīpinga ki he nofomali ʻa e ʻOtuá e mālohi toputapu ʻo e fakatupú mo e fiefia ʻi he feohi moʻoni ʻi he malí. ʻOku tau ʻilo ne mali ʻa ʻĀtama mo ʻIvi ʻi he ʻOtuá kimuʻa peá na aʻusia e fiefia ʻo e fakataha ko ha husepāniti mo ha uaifí.”

ʻEletā Russell M. Nelson ʻo e Kōlomu ʻo e Kau ʻAposetolo ʻe Toko Hongofulu Mā Uá, “Ngaahi Fili ki ʻItānití, Liahona, Nōvema 2013, 108.

Ngaahi Tali Maʻaú

ʻI he konifelenisi takitaha, ʻoku ʻomi ai ʻe he kau palōfitá mo e kau ʻaposetoló ha ngaahi tali fakalaumālie ki he ngaahi fehuʻi ʻe ala maʻu ʻe he kāingalotu ʻo e Siasí. Fakaʻaongaʻi hoʻo makasini ʻo Nōvema 2013 pe vakai ki he conference.lds.org ke maʻu ha tali ki he ngaahi fehuʻi ko ʻení:

• Ko e hā te u lava ʻo fai kapau kuo hē ha mēmipa ʻo e fāmilí mei he ongoongoleleí? Vakai, Henry B. Eyring, “Ki Hoku Makapuná.”

• ʻOku ʻi ai ha feituʻu malu ke ʻohake ai ʻetau fānaú? Vakai, Boyd K. Packer, “Ko e Kī ki he Malu Fakalaumālié.”

• Ko e hā ʻoku mahuʻinga ai ʻa e ivi tākiekina ʻo e houʻeiki fafiné? Vakai, D. Todd Christofferson, “Ko e Mālohi Fakaivia ʻo e Kakai Fafiné.”

Ngaahi Fakafehoanakí: ʻOfa ʻa e ʻOtuá

Ko ha niʻihi ʻo e ngaahi tefito mahuʻinga tahá ʻoku lea ki ai ha toko taha pe toko lahi ange ʻo e kau lea he konifelenisi lahí. Ko e meʻa ʻeni ne lea ʻaki ʻe ha kau lea ʻe toko tolu fekauʻaki mo e ʻofa ʻa e ʻOtuá kiate kitautolú:

• “ʻOku ʻofa hoʻomou Tamai Hēvaní ʻiate kimoutolu—fakafoʻituitui. Kuo teʻeki ai liliu e ʻofa ko iá. …ʻOku ʻi ai ia.”¹—Palesiteni Thomas S. Monson

• “ʻOkú Ne [Fakamoʻuí] ofi maʻu pē, tautautefito ʻi he ngaahi potu toputapú pea ʻi he taimi faingataʻá; pea ko e taimi ʻe niʻihi ne ʻikai ke u ʻamanaki ki aí, hangē pē ʻokú Ne kiʻi tātaaʻi hoku umá ke u ʻilo ʻokú Ne ʻofa ʻiate au.”²— ʻEletā Terence M. Vinson ʻo e Kau Fitungofulú

• “ʻOku ou fakamoʻoni atu ʻoku ʻikai ha taha ʻe sola ki heʻetau Tamai Hēvaní. ʻOku mahuʻinga e taha kotoa pē kiate ia.”³— Pīsope Gérald Caussé, Tokoni ʻUluaki ʻi he Kau Pīsopeliki Pulé

Maʻuʻanga Fakamatalá

1. Thomas S. Monson, “ʻOku ʻIkai ʻAupito ke Tau Tuenoa,” Liahona, Nōvema 2013, 123, 124.

2. Terence M. Vinson, “ʻUnuʻunu ke Ofi Ange ki he ʻOtuá, Liahona, Nōvema 2013, 106.

3. Gérald Caussé, “ʻOku ʻIkai ko ha Kau Muli Kimoutolu,” Liahona, Nōvema 2013, 51.

Paʻanga Faifekau ʻa e ʻUōtí mo Fakalūkufuá

“ʻOku ou fakamālō atu ʻi hoʻomou tokoni ʻofá. ʻOku kei hokohoko atu pē ʻa e fie maʻu tokoní ke tau lava ʻo tokoni ki he niʻihi kehe ʻoku fie ngāué ka ʻoku ʻikai ke nau siʻi lava ʻo fuesia ia ʻiate kinautolu peé.”

Palesiteni Tōmasi S. Monisoni, “Talitali Lelei Kimoutolu ki he Konifelenisí,” Liahona, Nōvema 2013, 4–5.