Kae ʻOua Ke Tau Toe Feʻiloaki
Ko e Tatali ʻi he Hūʻanga
Naʻá ku ongoʻi taʻefiemālie ʻi he taimi ne u tatali ai ʻi he hūʻangá pea pehē ki he temipalé koeʻuhí ko ha ngaahi fehalaaki fakakalake.
Ne u ʻave ʻa hoku tuongaʻané mo e ngaahi tokouá ʻi ha efiafi ʻe taha ki he temipalé ke fakahoko ha papitaiso. ʻI hono vakaiʻi ʻe he tokotaha ngāue temipalé ʻemau lekomení, naʻá ne ʻilo ne teʻeki fakamoʻoni hingoa e pīsopé ʻi he lekomeni hoku tokouá. Naʻá ku kamata fakafonu ha foomu ke ʻave ki he tauhi lekooti ʻa e temipalé, pea te ne tā leva ki he pīsopé. Ne vakaiʻi ʻe he tokotaha ngāue temipalé ʻa e lekomeni hoku tuongaʻané ʻo ʻilo ne teʻeki ai ke fakamoʻui (activate) ia. Ne ʻi ai haʻaku peni, ko ia ne u ʻave ʻa e foomu naʻe ʻomí pea kamata fakafonu foki mo ia.
Naʻá ku ʻiloʻi he ʻikai lava hoku tuongaʻané mo hoku tokouá ʻo hū ki loto ʻi he ʻi ai e fehalaaki ʻi heʻena lekomení, ka ne u ongoʻi ʻoku ou fatongia ʻaki kinautolu, pea he ʻikai te u lava ʻo hū ki loto kaeʻoua kuó u tokoniʻi kinautolu ke fakatonutonu e ngaahi fehalākí ni. Naʻá ku ongoʻi taʻefiemālie ʻi hono taʻofi ʻi tuʻa he temipalé. Ne mau mavahe mei he faiʻanga papitaisó ʻo ʻalu ki ʻolunga ki he hūʻanga ki he temipalé ke fakamatalaʻi ʻa e tuʻunga ne mau ʻi aí ʻi he tesi ʻi muʻá. Naʻe pehē ʻe he tauhi lekooti ʻa e temipalé te ne lava ke fakaleleiʻi e palopalemá ʻi ha ngaahi miniti siʻi, ko ia ne mau tangutu toko fā hifo ʻi he hūʻangá.
Lolotonga ʻeku tangutú, ne liliu ʻeku loto ʻitá ki he loto-foʻí. Ne taʻofi kimautolu ʻi tuʻá ko ha ngaahi fehalaaki iiki, ka naʻa nau hoko ko e faikehekehe ʻo e tatali ʻi he hūʻangá mo e hū ki he fale ʻo e ʻEikí. Ko ha ʻaho faingataʻa ia, pea ne u fakakaukau ʻe tokoni e temipalé ke u ongoʻi nonga. Naʻe ʻikai ko e ngaahi fehalaaki ia ʻaʻaku, ka ʻi he fuoloa atu e tatalí, ne u meimei tangi. Naʻá ku feinga ke fai lelei ʻaki ʻeku ʻalu ki he temipalé pea tā ha sīpinga ʻo e ʻalu ki he temipalé ki hoku ngaahi tokouá mo e tuongaʻané. Ka ko e hā ʻoku taʻofi ai kimautolu ʻi tuʻá ʻi heʻeku fuʻu fie maʻu ke u ʻi lotó?
Pea ne u toki ʻiloʻi ha meʻa: kapau naʻá ku ongoʻi loto-foʻi ʻo ka taʻofi au mei he temipalé ʻi ha ngaahi fehalaaki fakakalake, ʻe fēfē haʻaku ongoʻi loto mamahi ʻi hano taʻofi au koeʻuhí ko ʻeku ngaahi fehalākí—ʻo ʻikai taau ke hū he temipalé? ʻI heʻeku fakakaukau ki aí, naʻe fakafokifā pē kuo nonga hoku lotó. Ne u ongoʻi naʻá ku ako ʻa e lēsoni naʻe fie maʻu ʻe he ʻOtuá ke u akó. Naʻá ku palōmesi kiate Ia te u feinga maʻu pē ke moʻui taau ke hū ki he loto temipalé. Naʻá ku palōmesi he ʻikai teitei taʻofi au mei he fale ʻo e ʻEikí ʻi haʻaku ngaahi fehalaaki; ʻoku ʻikai te u fie maʻu ke hanga ʻe heʻeku ngaahi tōʻongá ʻo fakangata pē au ʻi he feituʻu talitaliʻangá.
Kimui ange pō ko iá ne ʻi ai haʻaku ʻapoinimeni mo ʻeku pīsopé ke fakafoʻou ʻeku lekomeni temipalé. Kimuʻa peá u ʻalú, ne u vakaiʻi pe ʻoku ʻi ai haʻaku ngaahi fehalaaki te ne ala taʻofi au mei he temipalé. ʻI he taimi ne ʻeke mai ai ʻe he pīsopé pe naʻá ku moʻui taau ke hū ki he fale ʻo e ʻEikí, naʻá ku fakamālō ʻi he lava ke u tali ʻió.