Kaungāmeʻá ʻi he Funga Māmaní
Ko Tenitai au mei Simipāpuē
Mhoroi, shamwari! *
Feʻiloaki mo Tenitai, ʻokú ne nofo ʻi he fonua ko Simipāpuē. ʻOku ʻi he feituʻu fakatonga ʻo ʻAfiliká ʻa Simipāpuē. ʻOku lahi e fanga monumanú ʻi ʻAfilika, hangē ko e fanga laino, ʻelifānité, pafalō Keipí, laioné, mo e fanga sīlafé. Ka ʻoku ʻikai maʻu ʻe Tenitai ha faingamālie ke sio ofi ki he fanga monumanu ko ʻení ʻi hono falé he ʻokú ne nofo ʻo ofi ki Halale, ko e kolo lahi taha ʻo Simipapuē. Ka ʻoku fiefia ʻa Tenitai he nofo ʻa e fanga monumanu fakaʻofoʻofa ko ʻení ʻi hono fonuá.
Ko e talanoa fakafolofola ʻoku ou saiʻia taha aí ko hono fekauʻi ʻa Nīfai ke foʻu ha vaká. ʻOku ou fakaʻamu ʻe lava ke u hangē ko Nīfaí ʻo maʻu ʻa e loto-toʻa ke fai e meʻa ʻoku totonú.
Ko e konga ʻoku ou saiʻia taha ai he Palaimelí ko hono fai e fakamatala he Palaimelí. ʻOku ou saiʻia hono vahevahe ʻeku fakamoʻoni kia Sīsū Kalaisí.
ʻI he taimi ʻoku ʻosi ai ʻeku ngāue fakaako mei ʻapí, ʻoku ou tokoni ki hoku taʻoketé ʻi heʻene ngaahi lēsoni. ʻOku ʻi ai ha ngaahi meʻa ʻoku faingataʻaʻia ai pea ʻoku faingataʻa ai ke ako. ʻOku ou saiʻia foki ke tokoniʻi ha niʻihi ʻo e fānau kehe ʻi hoku ʻapiakó ʻoku faingataʻaʻiá. ʻOku kataʻi ʻe ha niʻihi ʻo e fānaú ʻa e fānau ko ʻení, ka ʻoku ʻikai ke u fai pehē.
Naʻe ai ha niʻihi ʻo hoku kaungāmeʻá ne vaʻinga ʻi homau loto ʻapí ʻi ha ʻaho ʻe taha. Naʻe lea kovi ha toko taha ʻo kinautolu. Naʻe kata e tamaiki kehé, ka naʻe ʻikai ke u kata au. Naʻá ku talaange kiate kinautolu naʻe ʻikai fakaoli pea ʻoku ʻikai totonu ke mau fai ha ngaahi lea kovi.
ʻOku fuʻu mahuʻinga kiate au ʻa hoku fāmilí. ʻOku ʻi ai hoku taʻokete mo ha ongo tokoua ko ha ongo māhanga. ʻOku ou nofo mo hoku ongo tokouá mo ʻemau faʻeé pea mo ʻemau kuifefine hono uá, pe Gogo. Ko e “kuifefiné” ia ʻi heʻemau lea faka-Souná.