Ko ha Tali ki Heʻene Lotú
ʻOku nofo ʻa e tokotaha faʻu tohí ʻi Kautengi, Saute ʻAfilika.
ʻI ha pō ʻe taha ne ʻaʻahi mai ai kiate au haku kaungāmeʻa ʻo ha tui fakalotu kehe. Naʻá ku faʻa ako toko taha pē ʻeku folofolá, pea ne u toʻo hake ke ako ia he pō ko iá. Naʻe ueʻi au ke fakaafeʻi ia ke ma ako folofola, ka ne u manavasiʻi peá u kamata ako toko taha pē. Naʻá ku ʻiloʻi ne u tukunoaʻi ha ueʻi mei he Laumālié. Hili ha ngaahi miniti siʻi ne u fehuʻi momou ange, “Te ke fie ako folofola mo au?” Naʻe tali taʻe toe veiveiua mai hoku kaungāmeʻá, “ʻIo.”
Ne ma lau leva e Tohi ʻa Molomoná. Naʻá ne fai mai ha ngaahi fehuʻi, pea naʻe lava ke u ongoʻi hono tataki ʻe he Laumālié ʻeku talí. Naʻá ku fai ai ʻeku fakamoʻoni ki hono moʻoni ʻo e Tohi ʻa Molomoná. Hili ʻeku fai ʻení, naʻá ne talamai kiate au, “Ne u tangi mo loto tailiili pē he ʻahó kotoa.” Naʻá ku lotu ki he ʻOtuá ke maʻu ha tokoni, feʻunga ia mo hoʻo kole mai ke ta lau folofolá. ʻOku ou ongoʻi fiefia ange he taimí ni. Mālō ʻaupito.”
Naʻe fakaʻaongaʻi au ʻe he ʻEikí ke u hoko ko ha meʻangāue ke tali ha lotu mo tokoni ki ha taha ʻo ʻEne fānau ʻoku faingataʻaʻia. ʻOku ou ʻilo ko e ngaahi ueʻí ko ha fakahinohino fakalangi ia mei ha Tamai poto mo nāunauʻia. ʻI he taimi ʻoku tau tukuange ai ʻetau manavasiʻí, ʻoku tau tuku leva Ia ke Ne fakahā ʻa Hono mālohí ʻo fakafou ʻi heʻetau talangofuá.