Te Kainikoroboki ae Teimatoa tanena
Te tia korea te karaki e maeka i Utah, USA.
Tanen ara kairua a riai n aki teimatoa. Karekean baai aika itiaki e bon tau, e ngae ngkana e bon kammaraki.
Teuana te wiiki i mwiin banen au reirei ae rietata, I mwaing nakon iteran te aba are teuana ni maeka ma ana utu mwaneu te aine ae e ikawai riki ibukin te tiamwa i mwaain ae I moana reireiu n te kaoreti n tain te bwaka.
I karekeia raraou tabeman, angiia n te kaoreti ao a ikawai riki. Tairikin te Kaonobong teuana uoman mai irouia raoraou aika boou a anaai n nako n ongora n te baen ae tamaroa ae katangitang n te kirabu teuana.
Ngke ti katea ara ka, I moanna n namakina teutana te neweti, ma I aki tangiria ni kauntaba ao ni kabuakaka te tairiki. Ti rinnako n te kirabu, ao te mwaane iakun te kaunta e taraa au beeba ni kabuti ka. N akea ana kauring e a katika te kainikoroboki ae teimatoa tanena i aon timoini baiu ni kauoua.
I taraa nano ma te kubanako. I kina bwa e a tia ni mwaakena baiu ni kaotia bwa I rangi ni uarereke ni kaboa te arekoro n te bwa.
I bon waekoa n aki namakina te mweengaraoi. Aomata a bon moi ao ni moko.
I bon nanokawaki n taekinna bwa akea irou te ninikoria ni kitaniia n te tai naba anne. I mwiin tao 30 te miniti, temanna raoraou e titirakinai ngkana I mwengaraoi. I tuangnga bwa iai marakin atu man te katangitang ao te moko. E tuangai bwa e na uotai nakon mwengau, ao I butimwaia ma te kakaitau.
I kawaekoai nako nanon te tabo n tebotebo n ana auti mwaaneu ao n tikurabun taian mwaake ake a roro ni karokoa ae e maraki. Ae N na taua te toa ma baiu aikai n te bong are i mwiina, ao I rangi n tangiria bwa a na itiaki. E ngae n anne, uoua rain aika roro aika tanemauna n tiku n nooraki i aon kuniu ae maraki ao ni bingke.
I mwaain ae I nako ni matu, i nanon te tataro I bubuti kabwaraan au bure ibukin akean te ninikoria n nako—ao ae e bon riai riki, ibukin akean te ninikoria n aki rinnako n te moan tai. I berita nakon te Tama are i Karawa bwa N na aki manga kariaia n reke riki aei nakoiu
Te bong are i mwiina I a bon kona ni kanakoa angiin nikiran te mwaake, ao baiu a bon kuri n itiaki raoi ngke I a taua te toa. I iangoia bwa bure ai aron mwaake aika roroo akanne. E tangira te kekeiaki ao e kona ni kammaraki, ma ti kona n rairannanora ao ni kanakoi ara bure rinanon mwaakan te Mwakuri ni Kamaiu ao ni kaitiakaki man taian roro ni mwaake i nanon maiura.