Ko Aki Kona n Nakomai Ieta Ikai

Bonnie Marshall, Utah, USA

Kain abau, John, bon te mwaane ae bubura. Abwakina bon onoua te buuti aua te inti (1.9 miita) ao rawawatana e raka iaon 200 te bwaun (90.9 kg). Irouna, te mwananga n te wanikiba n te ikonomi kiraati e aki kamwengaraoi, ma e kamaraki.

N Aokati 2006 ti weteaki bwa ti na mwakuri bwa mitinare n reirein te Ekaretia i Brigham Young University–Hawaii. Ngke e a roko te tai are ti nang oki nakon mweengara, ti maaka te bwai ae ti na karaoia n te kiba nakon te mainland. N tain te tutuo n rin ti rangin ni kakaitau bwa ti kunea ae iai teuana te kaintekateka ae mwaawa n te moan ni kiraati, ngaia ae ti a manga kaeta ana tiketi. E na kona n tekateka n te kaintekateka ae kamwengaraoi ma ruuna ae tau ibukin rangana aika a abwabwaki.

Tao i nuukan kawaira ni kiba, I iangoia bwa N na nako n noria bwa e uara. Ngke N nang roko n ruun te moan ni kiraati, te tia tararua n te wanikiba e tei imatan te matoroa mani katokai.

“I kona ni buokiko?” e taku.

“Eng, I tangiria n noora kain abau teutana te tai,” I kaeka.

“I kabwara bure,” e taekinna n ae bebete ma e matoatoa, “ko aki kona ni waerake ikai.”

“Ma kai kaain abau, ao I tangiria n noria tabeua te miniti.”

E teimatoa n tuuka te mataroa, ao n taekinna riki, “I kabwarabure, ma ko aki kariaiakaki ieta ikai. I kona n angan kaain abam te rongorongo, ao ngkana e tangiriko, e kona ni kawariko. Ma te tua e kangai bwa ti kaain te moan ni kiraati aika a kona ni mena n te tabo aei.”

I bon mimi man aki ata te bwai ae N na karaoia te tai anne, ma n nooran nanon te aine aei n teimatoa n rawa, I karaurau n okirikaaki nakon au kaintekateka are I tekateka iai.

I moanna n iangoi tenua rinanin mimitong ake a taekinaki ni booki aika tabu ao irouia burabeti. Ti warekia bwa Kristo e na kawariia nake n aba n uean te teretirio (tara D&C 76:77), ao anera n tararua a na kawariia naake n aba n uean te teretio (tara D&C 76:88), ma naake a mena n aba n uea aika rinano riki aki kona ni waerake nakon aba n uean te tiretio (tara D&C 76:112; tara naba D&C 88:22–24). Iangoan te bwai ae I a tia n rinanona, I namakinna bwa I a tibwa ataia bwa e na kanga aroia naake a mena n te aba n uea ae rinano. E na kanga aia namakin ngkana a ongo taeka “I kabwarabure, ko aki kona n n roko ieta ikai”?

Tao nimaua te namwakaina imwiina ao e mate kainabau man te kaentia. Te bwai are e a tia n riki nakoiu n te wanikiba e anganai te nano ae korakora riki bwa N na maiu n te aro bwa N na aki manga ongo taeka aikanne—n te maiu are imwiina.