Ni Karokoa Ae Ti A Manga Kaitiboaki
Nakonako ni Kawain te Kantaninga—Ni kabane
Ni Beberuare 1846 bwaeoniia ae Aomata aika a Itiaki ni Boong aika Kaitira a kakioaki nako mai Nauvoo. A kaonaki ma te kantaninga bwa a na bon karekea te rau i Tion, a nakonako rikaki ni Kawain Parley—e aranaki ngkai bwa Kawain te Kantaninga—ao n rinanon te Karanga ae Mississippi.
Bon moantain te tiburing i Nauvoo ngke I moan nakonako ni Kawain te Kantaninga. Te ota e bon koora ao te nuu e bon abuee ngkai I nakonako n te kawai ae rainiaki n taian aroka. N aron te tia rawetamnei I katurutura au taratara tii iaon baitiin ukin ao inin te kaemera, rababara ukina n tain te rawetamnei, ao kamimin te ota are kaona au renti.
Teutana imwin teutana iangoakia au bakatibu ake a tia n nakonako n te kawai aei a moanna ni kaona au iango. Te moan bon Jared ao Cornelia ma natia te mwaane ae uoua ana ririki. I namakina mwaitoron te eea, ma te mwaitoro anne akea kabotauana ma te kamwaitorotoro are a rinanona Jared ma ana utu ae uarereke n tain mwanangaia. E mate Cornelia n te tabo imarenan Nauvoo ao Salt Lake. I iangoa Jared n tang ngke e tabeka natina te mwaane ao ni waaki nako.
Makakin namakinan menaia ikai bwa e rawa ni bua, I aki katoka au rawetamnei ngke a kamabubua au taratara ranin matau. Imwina I uringa te kairake ae Sarah, are e a tia n nako ma ai tinana ae tangiraki n aia kabanea ni kurubu Aomata aika Itiaki n nako Nauvoo. N te tabo teuana, te Tama are i Karawa ae tatangira e kaona ai kaembwa ma mannikiba are a na amwarake iai. Imwina a waaki ma te korakai ma nanoia ni kakataiu.
E a moanna n onrake nanou n te namakin; e taraa n ae ai angkoa Sarah e raonai. Jared ao Cornelia ma natia te mwaane ae uarereke a mena naba irarikiu. Ti uaia n nakonako i buakon te ota ao te nuu, ngkoa ao n te tai aei n otinako man te kawai—te kawai aei ibukin te kantaninga, te kawai aei ibukin rannimata. N te kawai are I aki kona ni kabwarabwara iai, a bon mena irarikiu ao e kautaki inanou ara tangira are ti tibwauaia ibukin ana euangkerio Iesu Kristo I noria bwa au koaua e korakora namakinana inanou ibukina bwa e korakora namakinana inanoia—e waaki nako man te roro teuana nakon te roro teuana—ngaiia n tatabemania a kawenea aan te kateitei ibukia ake i mwina. I tang ma te kakaitau.
N te tai ae waekoa buu te mwaane, are e tabe n rarawetamnei n taabo nako, e roko irarikiu. I tei n uaakan ma ngaia ngke I tuangnga te bwai are I rinanona. Ngaia, n aroia Aomata aika Itiaki mai Nauvoo, bon ngaia te moan inanon ana utu ni kakoaua te euangkerio. Ao Ngaia, n aroia naake a tia n nakonako n te kawai aei e raka iaon 150 te ririki mai mwaina, tiaki te kabanea ni bwai ae e na kakoauaki. Ana kakoaua ma au kakoaua e nabeakin kakoaua ake a korakora namakinana inanoia natira, n aron aia koaua Jared ao Cornelia ao Sarah e nabeakin aia kakoaua kanoaia aika a ngaa mwaitia.
Ni manuokina taekan ara rawetamnei, ngai ma buu te mwaane ti nakonako ni karaurau ni karokoa tokin Kawain te Kantaninga, ni karaurau n uringia naake a tia n rimoara.