E a Motirawa n te rau Frances J. Monson

“N te moan tai are I nora iai Frances, I ataia bwa I kunea raoi raou,” e taku Beretitenti Thomas S. Monson ni kabwarabwaran aia kareke tangira.¹ Te iango raoi aei e kamatoaki n tainako inanon maiun Frances Beverly Johnson Monson n ana beku ao ana boutoka nakon buna.

E toki maiuna ni Meei 17, 2013, ngkai Titita Monson, 85, are e a karina ni motirawa n te rau ni kaineti ma te ririki ni kara.

E ngae n anne ao ibukin kan atakina, Titita Monson e aki toki ni irira Beretitenti Monson ni kawaria kaara ao ake iai te aoraki irouia. Bon ngaia reken te korakora nakon buna ngke e weteaki bwa te bitiobi n ana ririki n ataeinimwaane, ao ni beku irarikina ngke e tararua te Canadian Mition man te 1959 nakon te 1962. E reitinako ni boutoka raona ae tangiraki “Tommy” ngke e a manga weteaki bwa te Mataniwi ni Kabuta ao ngke e a manga beku n aia Kooram Abotoro ake Tengaun ma Uoman, te Moan Beretitentii, ao te Beretitenti n te Ekaretia.

“E rangin tangira tamau ao n atai ana tarena ma bwaintangira ake e a tia n anganaki e kukurei ni boutokaia iai ao ni buokia ni kamwakuran ana tarena ake irouna,” e taku Ann Monson Dibb, are natiia te aine.²

E bungiaki n Okitobwa 27, 1927, Frances bon te nati te aine irouia Franz E. Johnson ao Hildur Booth Johnson. E mare ma Thomas S. Monson n te Tembora i Salt Lake n Okitobwa 7, 1948. E a tia ni beku n te Botaki n Aine ao te Buraimari, bon te tia kaira te anene ae tarena, iai te anua ni kakangare irouna, ao ai moarara riki bwa te kainaba ae tangira, te tina, te tibu teunaine, ao te tibu-toru.

Titita Dibb e kabwarabwara tinana bwa “ngaia temanna ae e aki toki n taai nako ni kakauongo ao n anga taeka tabeua bwa tera ae e na karaoia ngke arona bwa ngaia ae e reke n te kanganga. … Ana banna ni katoto n tainako … e riki bwa kairan maiu ae korakora. Bon akea te titiraki n aron te bwai ae kakoaua, te bwai ae karaoia, te bwai ae kantaningaia aomata bwa ana karaoia. E kaota te bwai ae ko riai ni karaoia bwa te Aomata ae ko Itiaki ngkoe, ao te Kiritian.”³

“I aki kona n nora Frances ni ngurengure ni katabeau n te Ekaretia,” e taku Beretitenti Monson. E kabwarabwara bwa “te aine ae aki kakarongoa ao iai irouna te onimaki ae korakora.”⁴

Bwai aika a na taraaki

1. Thomas S. Monson, “Te Kakabwaia ae Mwaiti,” Riaona, Meei 2008, 111.

2. Ann M. Dibb, “Frances J. Monson, Buun Beretitenti Thomas S. Monson, E a Motirawa Ngkai” (Meei 17, 2013), mormonnewsroom.org.

3. Ann M. Dibb, “Frances Monson: Rinanon ana Taratara te Nati te Aine, Ann Monson Dibb” (Mormon Times video, May 12, 2013), ksl.com.

4. Thomas S. Monson, n ana taeka Jeffrey R. Holland, “Beretitenti Thomas S. Monson: N touan mwanekan te Matita,” ni botaki nakon te Riaona, Tuun 2008, 8.