Au Motirawa n te Tiamwa irarikin te Tembora
Te tia koro rongorongo e maeka i Utah, USA.
A roko kakabwaia aika a korakora ngkai au utu a kabongana ara tai ni motirawa n nakon te tembora ni katoa tiamwa.
Tamnein Stockholm Sweden Tembora iroun Stefan Hallberg, e aki kona ni katotongaki; baekuraun ao boota © Thinkstock/iStockphoto
I ikawairake i Norway. Te tembora ae uakan e mena i Stockholm, Sweden, 8- nakon 10-te aoa kaeana n te ka. N akea riaina n taekinna, te mwananga nakon te tembora e tangira te karaurau ni babaire ao te iango raoi. Ara titeiki e bairea uoua mwanangana nakon te tembora ibukin te roronrikirake ni katoa ririki, tatabeua uoote a na buuta te bwati ao a na nako nakon te tembora n te wiikente. E boni kaunga te nako ma tabeman kaain te roronrikirake, ma Ngai ma au utu ti kan nako n te tembora ni kabane n te tai teuana..
Ngaia are teuana te ririki ti baireia bwa ti na nako Stockholm n tain te motirawa n te tiamwa. Bon te waaki ae rangin roko raoi, ao rimwi ao kanga e a riki bwa ai te banna nakoira n ara motirawa n te tiamwa. Ti bon kaembwa n te tabo ni kaembwa are e kaan ma te tembora. Ni katoa ingabong ti kautimwakaira ibukin te tetere ni bwabetito ma tabeman utu mai Norway ake a roko nakon te tembora. Imwina ti nako ni butiboro ao n nakon n uaua n te tabo ni kaembwa.
Tiamwa aikai bon kanuringa aika a tabu ibukiu ngkai. E ngae ngke ti aki uakaan ma te tembora n nako iai ni katoa namwakaina, n tainako bon te tai ae onoti ngkana ti nako. Ao e ngae ngke e a ananau te mwananga n te buti n te kaa ma ni kabotu, ma te Uea e kakabwaiaira ibukin ara anganano. Bwaai ake I rinanona n te maiu n tamnei inanon te tembora a buokai ni karikirakea au tangira ibukin te tembora ma ana otenanti. A uotira ao mani kanira riki ma ara utu.
Teuana te bwai ae I rinanona ae onoti are I uringnga ngke I riki bwa te tia kakaitara inanon te tai ae uarereke. E taraa n ae I kona n nori mamaraia au karo aika a mwaiti, ao I namakinna bwa akea inaomataia n reireinai bwa N na kanga ni maiuakina maiu ae raoiroi. E ngae ngke I tau nakon te tembora, I titiraki ibukin ana beku tamau n aron ae ngaia atun te utu. Ma ngke ti bane n nako nakon te tembora ni kabane ni karaoa te bwabetito ao te kamatoa, I namakina menan te tamnei irarikira. Ngke e katokaa baina tamau i aon atu ni kamatoai n teiu ibukia aomata ake a tia ni mate, I namakina te Tamnei ni kamatoa nakoiu bwa e bon mwakuri man ana kariaiakaki te nakoanibonga ae koaua. Aei e kaotia nakoiu bwa e ngae ngke e aki kororaoi tamau, e bon teimatoa n riki bwa te karo ngaia ae tamaroa ao I kakabwaiaki n riki bwa natina te mwaane. I namakinna bwa I riai n raira nanou n aron au kakaitara ao ni kataia n nora te rabakau ao ana tangira ibukin ana kauring.
N ririki aika a mwaiti ake imwina ni menara irarikin te tembora a teimatoa n otamwaaka uringakia n au ururing. Te tembora e a bon tia n riki bwa teuana mai buakon tabo aika a tikiraoi n te aonaaba, n aron Nein Moomon bon ibukia ana aomata Aramwa: “ai tikiraoira imataia aomata, ake a reke irouia ataakin aia Tia Kabooia” (Motiaea 18:30).