Ibukin Kakorakoraia Kairake
Kokoaua ao Etieti
Ngkai ana reirei Kristo ngkoe, anuam aikai bon kaotakin ae antai raoi ngkoe.
N ana maungatabu te butiboro n te kaoreti ni kakaean te tiambion n ana butiboro America, Joseph B. Wirthlin iai irouna are e aranna “kabwarabwaraan te taneiai” n tain te takakaro ae rangi ni kakawaki.
Kamatata n te korotamnei iroun Ben Sowards
“Te takakaro e weteai ni kabira te boro ni uotiarake i nukan te marae ni karekea te bwi ni karokoa n te tia,” e taku. “I anganaki te boro ao I biri nakon te rain n ana itera te tiim are teuana. I ataia bwa I a kaan nakon ana rain te kouru, ma I aki ataia bwa kaanra. E ngae ngke I a bon tauaki i nano i aaia taan takakaro, I a kanakoi taboni baiu nako moa uoua te inti ao I kona n namakinna. Rain te kouru bon uoua te inti (5 tientemita) raroana.
“N te tai anne I bon kaririaki bwa N na totokoa te boro nako moa. I kona ni kaman karaoia. … Ma ngkanne I uringa ana taeka tinau. ‘Joseph,’ e aki toki n taekinna nakoiu, ‘karaoa ae eti, n aki tabeakina mwiina. Karaoa ae e eti ao a na nakoraoi bwaai OK.’
“I rangi tangiria bwa e na reke au bwi man bwakau arei. Ma n raka riki nakon are bon te boto ngai imataia raoraou, I tangiria n riki bwa bon te boto ngai imatan tinau. Ao ngaia are I a katuka te boro ike mena iai—uoua te inti man te rainin te kouru.”1 Unimwaane Wirthlin (1917–2008) i mwiina riki e mwakuri bwa te mwembwa man te Kooram n Abotoro are te Tengaun ma Uoman.
Karaoan ae Bon Tamaroa
Ana babaire Unimwaane Wirthlin bon te kabotau ae te kabanea n tamaroa ibukin temanna ae e na aki kabuakaka raoiroina. Te kokoaua ao te etieti e tuoi aroarora. A tangira te aomata n tainako ni karaoa ke n atonga te bwai ae tamaroa n aki tabeakina mwiina ke terana tabeman ae a na kona n iangoia.
Teuana te kainibaire i nanon Ibukin Kakorakoraia Kairake bon te kokoaua ao te etieti. Ngkai Aomata aika Itiaki ni Boong aika Kaitira ao taan irira Kristo, ko bon kantaningaki n “riki ni kokoaua i bon iroum, tabeman, ao te Atua n tainako. N riki ni kokoaua nanona rineakin te aki kewe, kimoa, kamwamwane, ke ni mwamwana te aba ni kawai nako. …
“N rangi n irekereke ma te kokoaua bon te etieti. Te etieti nanona iangoakin ao karaoan terana ae tamaroa n tainako, n aki tabeakina mwiina. Ngkana iai iroum te etietie, ko a tauraoi ni maiuakin am kainibaire ao koaua e ngae ngkana akea ae taraiko.”2
N riki bwa te Tia Reirei
Ara kantaninga n tain te tarataraki n te maiu ae mamate aio bon te riki “bwa te aomata ae itiaki rinanon ana mwakuri ni kamaiu Kristo” (Motiaea 3:19). N riki bwa te aomata ae itiaki e aki raka riki ke ni uarereke nakon rikim bwa ana reirei Kristo ae koaua. E aki rangin matoatoa n aron ae ko kantaningaia; ko a kaman ataia bwa ko na kanga ni karaoia. E ngae n anne, e tangira te kekeiaki, ao n tabetai te kekeiaki aio e tangira ae mwaiti riki mai iroura. Ma e kona ni karaoaki.
Ana Boki Moomon e anga reirei, “Bwa nooria, a bane n anganaki aomata Tamnein Kristo, bwa aonga n ataa te raoiroi man te buakaka; ngaia are, N na kaota nakoimi kawain te motikitaeka; bwa bwaai ni kabane ake a kakao nakon karaoan te raoiroi ma n kairoro nakon kakoauan Kristo, e bon roko man mwaakan ao ana bwai n tangira Kristo; mangaia are kam na ataia ma te atatai ae kororaoi bwa bon mairoun te Atua” (Moronaai 7:16).
Ngkai ana reirei Kristo ngkoe ko kona ni kunea bwa ko kanga n taetae ao ni mwakuri man titirakiniko ibon iroum, “Terana ae e na karaoia Iesu?” Bwaai ake a tiku n am iango a na rimwi, ao ngkana ko mwakuri i aon iango aikai, ko na karekea te kakoaua i bon ibukim bwa ko a tia ni mwakuria n ae eti. E ngae n anne, e bon koaua n tainako bwa n tabetai ko na kona ni kainnanoia n tataninga teutana n noora mwiina ae koaua ao kakabwaia man am mwakuri ni kokoaua.
N riki ni Kokoaua n ae Bwanin
Ibukin Kakorakoraia Kirake e kauringira: “Te aki kokoaua e kaikoakiko ao ni kaikoakia tabeman naba. Ngkana ko kewe, kimoa, anaibwai n te titoa, ke ni kamwamwane, ko kabuakaka tamneim ao am reitaki ma tabeman. N riki ni kokoaua e na katamaroa am tai n taai aika a na roko ao am konabwai ni kairaki iroun te Tamnei ae Raoiroi.”3
Te baire ae koaua ibukin te etieti ae nanonaki ao te kokoaua ae bwanin bon are ko karaoia ngkana akea aomata irarikim n ataia bwa tera ae ko iangoia, taekinna, ke ni karaoia. Ngkai ngaira ana reirei ni koaua te Uea ae Iesu Kristo, tiaki kona n riki ke ni karaoa ae uarereke riki nakon are e a tia ni kaotia nakoira te Tia Kamaiu. Iai iroura ana bwai n tituaraoi te Tamnei ae Raoiroi ae akea kabotauana. Te Tia Kamaiu e anga reirei “Te Tia Karaunano, are te Tamnei ae Raoiroi, are E na kanakoa te Tama n arau, E na reireingkami bwaai ni kabane, ao E na kaururing i nanomi bwaai ni kabane ake I atongi nakoimi” (Ioane 14:26).
Ara Tia Kamaiu e a tia n anganira te mwaaka ae korakora are e roko man te tataro ni katoa bong, kamatebwaian booki aika tabu, ao ni wareki aia taeka burabeti ao abotoro aika maiu. Mwakuri ni katoa bong aika tamaroa aikai a katea te kokoaua ao te etieti i nanora. Uringnga, ngkai ana reirei Kristo ngkoe ao te membwa n ana Ekaretia Iesu Kristo ibukia aika Itiaki ni Boong aika Kaitira, am kokoaua bon kaotan raoiroim ao bwa antai raoi ngkoe.