Te Utu ae Akea Tokina

Kellee H. Mudrow, Utah, USA

Ngke 19 au ririki, I karaoa teuana au kabanea ni kakawari nakoia tibu imwain ae I nako inanon tenua namwakaina ibukin te mwakuri n ibuobuoki nako Ecuador. E a tia tamau ni mwaing nakon te tienta n ibuobuoki n te maiu ibukina bwa e a moanna ni buakaka marurungina. E taonaki n te aoraki ae te mwamwaninga n raonaki ma aoraki riki tabeua ni kaineti ma te aoraki ni kara.

Ngke au utu ao ngai ti bane n rin n te tienta are tabena bwa e na katauraoi ibuobuoki nakoia aika kara aika aki kona ni maeka bon irouia, I bon rangin ni un, n atakina ae te mwananga aei ma tibu te unimwaane e na bae n tara n ae au kabanea ni mwananga. I a taia bwa e na mate ngkana I a nako, ma I nanmakinna ae I kairua ngke I a kitanna.

Boni imwain ae ti rin n ana ru, te tia mwakuri temanna e a tia ni kamwainga tibu te mwaane nakon te kaintekateka te wiira. Ti kabutia nakon te tabo ni kakibotu. Tinau e taetae nakon temanna te tia mwakuri ngke tariu 16-ana ririki ao ngai ti taetae nakon tibura te unimwaane.

E aki karaoia ke n taetae n aron are ti uringnga ni kakaraoia. Te kerikaki n ana ururing e a bon kakoauaki, ao e tara n nanououa. Ngke ti titirakinna bwa iraman tibuna aika irouna, e kaeka ma te kairua. Ngkanne ti manikangareia ngke ti karaoia bwa te bwai ae rangin ni kakawaki bwa iraman aika iai raoi irouna.

Nanou e maraki ibukina. Ma imwiina, I nuukan ana aki ota ao I nukan kaekaan ara titiraki aika aki eti, e waekoa ni kaeka tibu te unimwaane ao e taku, “Te utu ae akea tokina.”

I bon mimi. Te tia mwakuri ae kaan e aki oota n te bwai ae taekinna, ma mwaneu ao ngai ti uaia n taraira. Ti a tia n ongo raoi te bwai ae taekinna. E a manga taekinna riki te kauoua n tai, “Te utu ae akea tokina.” N te tai aio tinara e ongo naba ana taeka.

Akea te bwai ae I uringa riki ibukin ara mwananga n te bong anne. Te bwai ae I ataia bon ngke ti otinako man te tienta n tararua, I tang ma te nanokawaki ao te kimwareirei—nanokawaki ibukin te mwaane are ti a katikua are N na bon aki manga kona n noria riki n te maiu aei ao ni kimwareirei ibukin ana nanoanga n taeka aika a rangin ni bebete aikanne ao te rau ae katikua inanou.

I ataia anne e ngae ngke ana iango tibu te unimwaane, e a kona n tibwaua n te kabanea n tai ana koaua ae matoatoa ao ana atatai are utu bon akea tokiia.

I waekoa n nako nakon au mwananga n ibuobuoki. Ngke e roko te rongorongo ibukin maten tibu te unimwaane te wiiki imwain ae I oki, I namakina te rau. I ataia, ao I teimatoa n ataia, bwa n te bong teuana ao N na manga noria. Te kakaitau nakon otenanti n te tembora, utu akea tokiia.