Mwakuri ibukin te Uea

Mary Jane Lumibao Suya, Philippines

Kain abau te mwaane, Cyrus, ao Ngai ti mareaki n te tembora ni Meei 23, 2006. Imwain are ti mareaki, ana mwakuri n te tabon n tutuo ibukin aoraki are e kainnanoa Cyrus bwa e na mwakuri n te Tabati. Iai ana tai ni kaibibiti, ma n tainako ae e aki toki ni mwakuri man te nukanibong nakon te aoa 8:00 n te ingabong. Imwiin te mwakuri ao e na nakon mweengana n onoia man ana kaboraoi nakon kunnikain te Tabati ao n nakon te taromauri, are e moanaki n te aoa 9:00 n te moaningabong. E reitanako ana tei aei imwiin are ti a tia ni mareaki.

N tabetai ao I nakon te taromauri n tingai ibukina bwa e rimwi man ana mwakuri. Ti kantaningaia n tainako bwa e na aki mwakuri n te Tabati. Ni moan Tabatin Tuun 2006, ti karaoa ara moan n aki mamatam n ara tai n taanga. Ti tataro ma te onimaki bwa e na kakabwaiakaki Cyrus ma te mwakuri are e na aki tangiraki iai bwa e na mwakuri n te Tabati.

Tabeua te bong imwiina tao te aoa 10:00 n te ingabong., I raraoma bwa e mena ia Cyrus ibukina bwa e aki toki n oki nakon mweengana imarenan te aoa 8:00 ao 9:00 n te moaningabong. N te tai ae aki maan ao e roko te iango irou: “E na bae ni karikirakeaki.” Cyrus n tokina e roko tao 11:00 n te moaningabong. Ngke e rinnako ni mweengara, e taekinna bwa iai te rongorongo ae e na kaongoai ae raoiroi ao ae buakaka.

I tuanga bwa e na tuangai moa te rongorongo ae buakaka. E taekinna bwa ti na waekoa ni kitana Iligan, Philippines, ao ni mwaing nako Panay, Philippines. I aki tangira te rongorongo n te moantai ibukina bwa ti tangiriia aomata n ara titeiki. A bon rangin n akoi nakoira ao ni kawakiniira kanga bon oin aia koraki, n atakina are Cyrus ao ngai bon akea ara koraki irarikira.

Ngke I titirakinna bwa bukin tera ti na mwaing nako Panay, e taku bwa ibukin te rongorongo ae raoiroi. E a tia ana bwaoti n intawiunna ibukin te mwakuri riki teuana i Panay. I waekoa n tuanganga tiaki ibukin boona ma ibukina bwa te mwakuri anne e na tangiria ni mwakuri n te Tabati. Ngke e kaeka, “Tiaki!” I rangin ni kukurei. I inga nakoina ao n tuanga bwa te mwakuri ae boou aei boni kaekaan ana tataro ao ana aki mamatam. Uoua te namwakaina imwiina, Cyrus e a moana ana mwakuri i Panay.

Te Tama are i Karawa e tabe ibukira, ao E kakabwaiaira ngkana ti kamwakura te onimaki ao n ongo Ana tua. I rangin ni kakaitau ibukin reirein te tataro ao te aki mamatam. Ana mwakuri kainabau te mwaane bon te kakabwaia nakoira. Ngkai e a reke ana tai ni kakorakora ana mwakuri n ana uoote, ao te mwakuri ae karaoia n te Tabati bon ti ana mwakuri te Uea.