Atuan taian Kakai Ana Aomata aika Itiaki Slovak i Sheffield
Ngkai taan kairiiri, mitinare, kauntira ni uoote, ao membwa i Sheffield, Engiran, a bootia ni mwakuri ni karikirakea te rikirake ae koaua, a kakabwaiaki ni kawai aika a kamiimi.
N tain te kabwarabwara ae korakora nakoia taan kakoaua aika taan taromauri, e titiraki te titiraki ae bebete te burabeti ae Moomon: “A tia n toki kakai?” E rimwiin ana kaeka n te tai ae waekoa: “Nooria I tuangkami, A tuai” (Moronaai 7:29).
E kamataata imwiina Momoon aron te mwakuri ni kamaiu ae korakora ni kakoroaki bukina ni boong aika kaitira, n tabeaianga iaon te reitaki ao te iraorao ibukon te Tamnei ae Raoiroi, aia mwakuri anera, ara tataro, ara onimaki, ao ana kakai te Uea (taraa Moronaai 7:33–37, 48).
Inanon nako boki aika a tabu, a kauringira burabeti bwa te Atua bon titebo ngkoananoa, n te bong aei ao n aki toki (taraa 3 Nibwaai 24:6; D&C 20:12). Ngkai ti ukera kakoroan nanon te tua n “nako … aonaaba ni kabane, … ni bwabetito n aran te Tama, ao te Nati, ao te Tamnei ae Raoiroi” (D&C 68:8), e kakawaki te kamatebwai ao n uring reirei aika imwiina:
-
E aki bibitaki te Atua.
-
Te Atua bon Atuan taian Kakai.
-
Ana kakai te Atua ae korakora e uota te kamaiuaki ae akea tokina nakoia Natina.
-
Te Atua e karaoi mwakuri aika kakai ni kaineti ma ara onimaki, are ti kaotia n ara mwakuri.
-
Te Tamnei ae Raoiroi iai tabena ae kakawaki n te rairaki.
Anganano n Angakarea
Inanon au tai ni beku n te aono ae Eurobe, I kakabwaiaki bwa I noori reirei aikai ni mwakuri n aron te kakai ae tabangaki i Sheffield, Engkiran. N banen 2008, Bitiobi Mark Dundon man te Moan Uoote ae Sheffield e iangoia raoi bwa tera ae kona ni karaoia ni buokia ni karikirakea ana uoote. N te kataneiai ni kairiiri, ana titeiki beretitenti e titirakina te bitiobi, “Tera aron am anganano ni kanakoraoa aron te mwakuri ni mitinare?” Man aia reirei ana tia kairiiri, e ataia Bitiobi Dundon bwa te tia kaririiri n te mition n te uoote ae raoiroi e bon rangin kakawaki, e riai karaoan raoi te kauntira ni uoote, ao te anganano ni kakauongo nakon ana kairiiri te Tamnei bon te kabanea ni kakawaki.
Imwiin iangoana raoi ma te tataro, e kabonganai raoi kiingin ana nakoanibonga Bitiobi Dundon ao n ira ana kairiiri te Tamnei ni kainaomatakia ana kauntira ake uoman, Gregory Nettleship ao Robert McEwen. E wetea imwiina te Tari Nettleship Bitiobi Dundon n riki bwa te tia kairiiri ae boou n te mition n te uoote ao te Tari McEwen n riki bwa te tia ibuobuoki ni kairiiri n te mition n te uoote. Membwa n te bitiobiriki a rangin kinaiia i bon imarenaia, ngaia are e aki bebete irouia te bitaki aei. Ma e ataia Bitiobi Dundon bwa n aron te bwai ae onoti aei eti te babaire aei, ao kauntira ni kauoman a nanorinano ni butimwaea nakoaia ae boou.
Te bitiobi, ma ana tia kairiiri aika boou n te mition n te uoote ao te kauntira ni uoote, a tataromwaaka ni karaoi babaire ao ni katei kouru i bukin karikirakean te uoote. Ngkai a karin aia babaire, a moanna n noora te nakoraoi ae riai. Bwabetito ibukin te rairaki e korakora n rikirake, ao angiina aomata a oki nakon te Ekaretia ma te kakaonimaki. E karako ae a ataia taan kairiiri n te uoote, ma e boni ngae n anne, aia onimaki ma aia mwakuri a kaniwanganaki ni kawai aika akea kantaningakina bwa a na iai mwiia.
Kaungaaki n te Tangira
Ni Maati 2011 temanna te kairake ni mitinare ma toana a reitaki ma aomata inanon kawain Sheffield. Unimwaane Nicholas Pass e noora te mwaane ma kainnabana n nakonako n rirakina ao e korakora ana namakin bwa e riai n taetae nakoia. A biri Unimwaane Pass ma toana bwa a onga n roko irouia taanga aikai. E matoatoa te reitaki—taanga aikai boni kaain Slovakia ao a kabi n taetae n Imatang—ma temanna raoraoia ae e a buokiia n raitaeka ibukiia. Inanon te maroro inanon te kawai, a kabonganai tamnei mitinare ni kabwarabwa te Moan Kaotioti ao rongorongon Moan Kaokan te euangkerio. Imwiina a butimwaea rokoia mitinare taanga aikai ao a moana reireiaia.
Ludovit Kandrac, te karo n te utu, e waakina warekan ana Boki Moomon. Imwiina ao e katoka mokona. Inanon waakin te reirei, a riai mitinare ni kabonganai raitaeka aika a mwaiti ao n reiakina naba te taetae n Slovak i bon irouia. Ni Meei 14, 2011, Ludovit, temanna mai buakoia natina aine, ao uoman riki ana koraki a bane ni bwabetitoaki.
N ana tai ni bwabetito, e kaota ana koaua te Tari Kandrac. Rinanon temanna te tia raitaeka, e karakina te namakin are e rinanona ni kaitibona ma mitinare. Ngke a nakonako mitinare aikai n rirarikin Unimwaane Pass ma toana n ana tienta Sheffield city, iai te bwai ae namakinna inanon rabwatana. E kakeaa te namakin arei ao n reitanako nakonakona, ma ngke e kamwataua n taraiia riki mitinare, e rootaki n aia tangira are a kaotia ni maroroia ma aomata. E ngae ngke e kan kawariia, e kataia n reitanako nakonakona te Tari Kandrac. E tounako ngke a roko ni kawaria mitinare te miniti are imwiina.
N raonaki ma teuana te utu n Slovak are a tia ni kaaina te Ekaretia n te ririki are mai mwaaina, bwabetitoa aikai a kanikinaea te moan kakai n te rairaki ae boou ibuakoia ana aomata Slovak i Sheffield, Engiran. Kaain te aro aika a boou aikai a roroko n taromauri ni katoa wiiki, ni kairiia aia utu ake tabeman ao raoraoia. E uki mweengaia nakoia mitinare ao ni kaoiia tabeman n aia kaawa n ongora te euangkerio.
Unimwaane Pass ma toana ae boou, Unimwaane Joseph McKay, a kakawariia utu aikai n tainako. A reireiniia,a beku ibukiia, ni buokiia, ao ni kakabwaiaiia. Bon te tai ae kamiimi ibukin te angareirei, reireinaki, ao ni karekea ana bwai n tituaraoi te Tamnei ibukin taan kakae, taan rairaki, mitinare, taan kairiiri n te titeiki ao uoote, ao membwa n aekaia nako.
“N raoniia ao ni Kakorakoraiia”
Rinanon te tiamwa ao te fall n 2011, angiina riki kaain Slovak a kaaina te Ekaretia. Rikiraken te mwaiti e kanganga ibukiia kaain te aro aika kaain te aba ni kateimatoa tatauraoan bwao ni mwamwananga nakon aia bowi autinibootaki. Inanon wiiki aika a mwaiti Aomata aika Itiaki mai Slovak aika a kakaonimaki a rianna nimaua te maaire (waniua te kiromiita) kawaia nako ni kaei bootaki n taromauri n te Tabati n te taetae ae a aki oota iai.
N Tebetembwa 2011 e a kateaki te beretitentii i Sheffield titeiki, ma Bitiobi Dundon ni weteaki bwa te beretitenti ae boou n te titeiki. N te namwakaina are imwiina e a booaki te bwaeatiaite ibukin te taetae n Imatang ao te taetae n Slovak ike a roko iai taan raitaeka.
N teiu iaon te tabo n taetae, e namakinna Beretitenti Dundon bwa te kurubu mai Slovak a riai ni tuangaki bwa a na reitaki ma te Moan Uoote ae Sheffield ma a na kaitibo n te batiritii ni kaawan Slovak. E a kuneaki te tabo ni bootaki ae tau ao a kabooaki taian ruu. N Ritembwa 11, 2011, te moan n reiti ni boowi e a booaki n te batiritii ae boou. Taan kairiiri n te Moan Uoote ae Sheffield a ingainga ni kakantaninga bwa 50 aomata a na kaea. N oneamwiia, 84 aomata—n ikotaki ma 63 kaain Slovaks—a kaea.
Rimwian manga katean te titeiki ae Sheffield, e weteaki Robert McEwen bwa te bitiobi ibukin te Moan Uoote ae Sheffield. Te Tari e teimatoa ni beku bwa te tia kairiiri n te mition. Iaaia bitiobi aika uoman. te tia kairiiri n te mition n te uoote ao te kauntira ni uoote e karaoa te mwakuri ae kamiim ni kairan te uoote n “raoniia ao ni kakorakoraiia” Aomata aika Itiaki mai Slovak (D&C 20:53).
Te kauntira ni uoote e taobarai tabeaianga n aron ae kanga aron te katauraoi ibukin kainnanoia kaain te aro aika a boou, e na kanga aron buokakiia n irii ana waaki ni kakukurei te uoote, e na kanga aron tabeakinaia n te euangkerio, ao e na kanga aron totokoan kanganga iaon taian taetae. A tataro ao a aki mamatam kaain te kauntira ibukin te buoka mai karawa ao ni mwakuri korakora imwiina. A kawariia kaain te aro aika a boou ao n irii waakin boraraoi iaon te angareirei ma mitinare aika a bwanin aia tai. A katauraoi bwao ni mwamwananga. A ootan bwaai n reirei ibukin te Ekaretia i Slovak. A kairiia kaain te aro aika a tibwa bwabetitoaki nakon te tembora ni karaoi bwabetitio ibukiia maate.
Taan kairiiri n te uoote a baronga karaoan te karikirake iaon te mwakuri n ibuobuoki ibukin te Kiritimati. Kaain te uoote a angamwane ao n rikoi bwaintakakaro, kunnikai, ao tabeua bwaintangira. Bwaintangira baeki aika a bubura ibukin te Kiritimati are ikotaki ma te amwarake ibukin te katairiki n te Kiritimati a tibwaaki n tairikin te Kiritimati nakoia ana Aomata aika Itiaki Slovak ao tabeua utu inanon tian te uoote.
Kaain te aro aika a maan ao aika a boou e karako aia atatai n aron aia taetae i bon imarenaia, ma a boni bane n namakina maraun te taetae ma te tangira. Te namakin ae kamiimi ae kakimwareirei, kakukurei, a rootaki iai kaain te aro ao taani kakae.
N te ririki are imwiina te kurubu ae uarereke aei e rikirake nakon te iunite ae matoatoa n te Ekaretia, ma utu aika a bwanin n tia ni bwabetitoaki ao ni katiteuanaaki ma te Ekaretia. Kaaro a katabuaki nakon nakoanibonga aika te Aaron ao te Merekitereka, naati mwaane a katabuaki nakon te Nakoanibonga ae te Aaron, te Buraimwari e raka ana mwaiti iaon 20 ataei ni kateaki, ao aia burokuraem Kairake n Ataeinimwaane ao Kairake n Ataeinaine a barongaaki ma 25 riki kairake n roroko ni katoa wiiki. Te Uea e katauraoiia mitinare aika a bwanin aia tai mai Czech Ribwabiriki ake a kona n taetae n taetaen te aba ao n reita aia boutoka nakon te kurubu. N te tai naba anne, utu aikai a kanakoi araia aia aomata nako abaia.
Atuan taian Kakai
Bukin tera ngkai e riki aei? Ibukina bwa te Atua e tuai n toki arona are Atuan taian kakai. Ibukina bwa mitinare aika a kakaonimaki a botumwaaka n ukeriia naake a tauraoi ni butimwaea te euangkerio. Ibukina bwa te beretitenti n te titeiki ao bitiobi a mwakuri inanon te onimaki n ira ana kairiiri te Tamnei ae Raoiroi. Ibukina bwa te kauntira ni uoote e karaoa mwiokoana ao ni mwakuri inanon te katiteuanaaki. Ibukina bwa kaain te aro a reiakinaki te taetae n tangira ao ni mwakuri iaon taian kakao ake a roko mairouia taan kairiiri, ni karekea aia onimaki ao n onimakinna bwa te Atua e nanona are E taekinna: “Bon Ngai te Atua; ao Ngai Atuan taian kakai; ao N na kaotia nakon te aonaaba bwa ti te arona ngai ngkoananoa, n te bong aio, ao n aki toki” (2 Nibwaai 27:23).
Te tokanikai i Sheffield e aki riai n riki bwa te bwai ae onoti. E kauringiira taekan taian berita ake a kanakoaki mairouia burabeti ao ni kona ni kakorakora ara onimaki ao nanora n riki bwa ana bwai ni mwakuri te Atua man kaoakiia aomata ake irarikira n oki nakon Kristo. Ngkana ti karaoia, ti na karekea nnera n te tabo ike e kona ni kakabwaiaira iai te Uean ma taai n angareirei, ni kakamwakuri, ao n tabeakiniia tabeman. Ao ti na noori bwaai ni kakoaua bwa E teimatoa n riki bwa Atuan taian kakai.