Ira te Burabeti
Kamaiua Neierei!
Ni katoa tiamwa te utu ae Monson a kabanea uoua te namwakaina ni maeka n aia kaebin n te Karanga ae Provo. Tommy Monson e reireinna n uaua n te karanga ae birimwaaka airana. N te bwakantai teuana ae abue ngke 13 ana ririki ni maiuTommy, e taua ni koona te rabwa n nano ae katibuaki n te ang ao n tekateka inanona ni beibeiti inanon te karanga.
N te bong anne kurubu n aomata aika mwaiti a ikotaki n te tabo ni bikiniki irarikin te karanga n amwarake ao n takakaro. E a tabe ni beibeti Tommy rinanon iteran te karanga ae aeira ao ngke e ongo te bwanaa n takarua “Kamaiua neierei! Kamaiua neierei!” E bwaka te ataeinaine inanon te nimwamwano ae kamamate. Akea mai buakoia aomata ake i eta ae a kona n uaua ni kamaiua.
Anne ngke e a kaoti Tommy inanon te bwai ae riki ao e a nora atuun te ataeinaine ni bua i aan te ran. E kaenakoa baina Tommy, e burita iran te ataeinaine anne, ao imwina e tabekia nakon iteran te rabwa are te iterana. Imwina e a bwennarina Tommy nako matanimwin te karanga. Te moan, ana utu te ataeinaine anne a rabwatia, a kiitinna ao a tang. Imwina ao a manga nakon Tommy n rabwatia ao ni kiitina Tommy. E namakina te mama n aron te bwai ae riki, ao e waekoa n okira ana rabwa.
Ngkai e reitanako beibetina Tommy inanon te karanga, e kaonaki ma te namakin ae abuee. E noria bwa e a tia ni buoka kamaiuan temanna. Te Tama are i Karawa e a tia n ongo te tang, “Kamaiua neierei! Kamaiua neierei!” E reiakinna bwa te namakin ae kakateke bon ataakina bwa te Atua, Tamara are i Karawa, e ataira n tatabemanira nako ao e kariaia bwa ti na buokia ni kamaiuia tabeman.