Kairoroaki n te Onimaki
Te tia kororongorongo e maeka i Carolina Meang, USA.
N na bon aki mwaninga ngke I nakonako n te tabo anne n te Winter Quarters, Nebraska, USA, ike a tia ni maeka iai bwaeoniia inanon ririki aika mwaiti n nako. Te tano e taraa n tabu, n taraa n ae kanga I a tia n roko i mataroan tinanikun te tembora.
A onrake matau n ran ni mata, ni kamabubua au taratara. I noora te bouananti man aki kona ni kina. Ngke I kaoa ranin matau, I noora te mwaane ao te aine ae a onrake ubuna n te nanokawaki. Ngke I tabe n taraia ni kaniia, I noora katotongan te ataei ae wene n te ruanimate n rangaia.
Te tabo aei e kaonai ma te nanoanga, nanokawaki, te maaku, kukurei, ao te kimwareirei aika mwaiti. I tangiria ni kanakoa te maraki aika a namakinna aomata Aika Itiaki aikanne, ma I kukurei n te tai naba anne ibukin te mwakuri n anganano ae a tia ni karaoia ibukin te euangkerio.
Au atatai n te Winter Quarters e buokai n ataia bwa te Tama are i Karawa e anga te euangkerio nakoia Natina ao ni kariaia ma te rinerine bwa a na karaoia nakon are a tangiria. Ana karo te ataei anne a na kona n tia n rinea te reirei ae bebete riki. Irakin te burabeti ao maiuakinan te euangkerio e tangiriia bwaeoniia aikai bwa a na waaki nako e ngae ngke e nanonaki bwa a na tauniia natiia aika a tia ni mate. Ma a rineia bwa a na kawakina te euangkerio inanon maiuia ao ni butimwaai kakaewenako nakoia. I reiakinna bwa kabanean aia tai ae korakora Aika Itiaki’ nakon te euangkerio ao nanoia ae korakora ni waaki nako a kairoroaki n te onimaki ao te kantaninga—te kantaninga ae tamaroa ibukin te tai ae na roko ao te onimaki bwa e kinaia te Uea ao e kona ni buokia ni marakiia.