Rongorongo man te Moan Beretitentii
Te Aonaaba E Kainnanoia Bwaeoniia n te Bong Aei
Ibukiia aika mwaiti, taan mwamwananga aika bwaeoniia n te 1847 e aki moanaki i Nauvoo, Kirtland, Far West, ke i New York ma bon i England, Scotland, Scandinavia, ke Tiaman. Ataei aika a uarereke aki kona n ata te onimaki ae korakora are e kaungaia aia karo bwa a na katikui aia utu, raoraoia, te rau, ao te kamanoaki.
Te ataei temanna e na bae n titiraki, “Mommy, Ibukin tera ti a kitana mwengara? Ti na nakea?”
“Nakomai ngkoe, ae ko kakawaki, ti na nako Tion, ana kaawa Atuara.”
Imarenan kamanoan te mweenga ao te berita n Tion e tei ranin te Atlantic ae korakora ma ni kakamaku. Antai ae e kona ni kabwarabwara te maaku are e roota nanon te aomata n taai n rianna aika a kakamaku aikanne? N ni wirikirikiaki n ana wirikiriki te Tamnei ae marara, ni kamatoaki n te onimaki ae bebete, bwaeoniia Aika Itiaki aikanne a onimakina te Atua ao a reitanako kawaia.
N tokina ao a roko i Nauvoo n nako riki n ti kaitarai kanganga iaon te kawai. Ruanimateia aika wanawana ao ruanimate aika a mwakena te kawai mai Nauvoo nako Salt Lake City. Aikanne tabeua boona aika a kabwakai bwaeoniia. A taunaki rabwataia n te rau, ma araia a maiu n aki toki.
Kaao n nakonako ni korakai ni katikitiki, wiiran waekon a kerutata, mwaane aika ninikoria a moanna ni kua, turam ni buaka a katangaki, ao taan iraeia aomata a tang n takarua. Ma te onimaki e korakora ao te angibuaka-e kaungaia bwaeoniia bwa ana waaki nako ma aia mwananga n taai aika kanganga. N tainako a anenea:
Waaki ngkami aika kam raoiroi;
Tai rawa ni beku
E bon matoa te mwananga,
Buokam te Uea. …
A Raraoi ni Bane! A Raraoi ni Bane1
Bwaeoniia aikai a uring ana taeka te Uea: “Ana kataaki au aomata ni bwaai ni kabane, bwa aonga ni kona ni karekea te mimitong ae I a tia ni kataua ibukiia, riki mimitongin Tion.”2
Kawain te tai e kabuai ara ururing ao e kakerikaki ara kakaitau ibukiia naake a tia n nakonako n te mwananga ae moan te kamaraki, ni katikui rannimata aika a mwakena te kawai n ruanimate aika akea araia. Ma a uara kakaewenako n te bong aei? Akea iai kawai aika kiribwa n nakonako iai, akea maunga aika kiribwa n tamwarakei, akea tabuki aika katati n rinanoi, akea kawai aika ko na karaoi, akea karaanga aika ko na rinanoi? Ke iai kainanoana aika koaua ibukin tamnein te bwaeoniia bwa e na kairiira ni kararoaira man taian kanganga ake ana kona ni kabwautiira ao ni kairiiria nakon Tion ni kamanomano?
Tebwina te ririki n nako n tokin te Kauoua ni Buaka n te Aonaaba, nooran te aroaro ae riai e moanna ni kekerikaaki. Mwaitin te bure e teimatoa n rikirake, aomata a moanna ni karaoi katei aika aki riai. A mwaiti aomata aika a ukoukori urubwai aika bubura ao maiuia e uarereke, ukoukori kakukurei aika aki teimatoa ngkai anga nanoia nakon kakukurein te maiu ae akea tokina. Ngaia ae ti kararoa te rau.
Ti mwaninga bwa a kanga kaain Erene ao i-Rom n tokanikai iaon te aonaaba ni beekan ao e kanga tangin te bu anne n toki—e kanga te taningaroti ao te mamara n tokina iaon aia kanganga. N tokina, a mwaiti riki aika a tangira te inaomata, a tangira te kamanoaki ao te maiu ae rau; ao a kabuai ni kabane—te rau ao te kamanoaki ao te inaomata.
Tai mwamwane n ana kariri Tatan, ma, tei ni matoa ni boutoka ao ni kamanoa te koaua. Aki nakoraoin ana kantaninga te tamnei e na bon aki korobukina man teimatoan tangiran te kimwareirei ibuakon tangiran te bwai ae ti tangiria ao te bure. Te bure e aki kona ni kairiko nakon te tamaroa. Te kairiribai e aki kona n anga te tangira. Te kimamaku e aki kona n anga te ninikoria. Te nanououa e aki kona n anga te onimaki.
Tabeman a kunea bwa e kanganga irouia bwa a na kona n tokanikai iaon aia kakaenaena ao aia taeka aika a karika te un aomata aika a nanobaba aika a manikangarea bwainan te itiaki, te kokoaua, ao te ongotaeka nakon ana tua te Atua. Ma e a tia te aonaaba n iangoia bwa e aki kakawaki te ongotaeka nakon reirei. Ngke e tuangaki Nooa bwa e na kaba te aake, ao aomata aika burababa a taraa karawa ae akea iai te nang ni ngareakin ao n taekin taekaia aika onimaki n te kawai are e kaota te bwai ae aki tamaroa ao n akea te karinerine—ni karokoa e bwaka te karau.
Ti na reiakina te reirei ae rangin ni kabane mwane anne n tainako? A bitaki taai, ma te koaua e teimatoa. Ngkana ti reiakin man bwaai aika tia n riki n taai aika nako, ti na bon bae ni manga karaoi ma rawawatan nanoia, korakaia, ao marakiia. Iai iroura te wanawana ni Karinea ae ata te moa ao te toki—ara Uea, are e karaoa te baire ni kamaiu—nakon te naeta are, e kakea tikiraoina?
Te rikitionare e kamatata bwa te bwaeoniia ai aron “te aomata ae nako rimoaia aomata ni katauraoa ke ni kauka te kawai ibukia tabeman bwa a na iria.”3 Ti kona ni kairaki inanora n te nano ao te teimatoa n te kantaninga are e kanikinaeia bwaeoniia n te roro are imwaina? Ko kona ngkoe ao Ngai, ni bon koauana, n riki bwa bwaeoniia?
I ataia ti kona n riki n aekakina. O, e kanga te aonaaba ni kainnanoia bwaeoniia n te bong aei!
Reirei man te Rongorongo Aei
Booki aika tabu a kabwarabwara bwa taan reirei n te mweenga a riai ni “kauring, n tataekina, ni kaumakia, ao n reirei, ao ni kaoia n nakon Kristo” (D&C 20:59). Iangoia n taekin taeka ni kauring ao kakao ake a taekinaki n ana rongorongo Beretitenti Monson nakoia ake ko kawariia. Ko na bae n tangiria ni maroroakinna ma ngaia kawai ni kinai ao n iri katoto aika raraoi, totokoi mwakuri ni kewe, ao reirei man aia bure tabeman. Titirakiniia naake ko reireiniia bwa a na kanga n riki bwa bwaeoniia n te bong aei.
A kona ataei ni kukurei riki ni wareki rongorongoia bwaeoniia man warekan te On the Trail tieriiti n te iteraniba 62 n te beeba ni kaongora aei.