ʻE ʻAve Koe ʻe Ho Ngaahi Kaungāmeʻá Ki Fē?
Kuo hoko nai ʻeni kiate koe? ʻOkú ke tangutu ʻi he lotú ʻo fanongo ki he tokotaha malangá, ʻohovale pē ʻokú ke fanongo ki ha ongo leʻo lahi ʻoku haʻu mei he ʻaofi ʻi ʻolungá. ʻOkú ke ʻohovale ʻi he ava hake ʻa e ʻató pea ʻasi mai ʻa e langí, peá ke sio hake ki he mata ʻo ha kau tangata ʻe toko fā ʻoku fakasiosio hifo ki he haʻofangá. Hoko ai mo ʻenau tukutuku hifo ha tangata ʻi ha mohenga ki he loto falelotú.
Kuo hoko nai ʻeni kiate koe? Mahalo pē ʻikai. Ka naʻe hoko ha meʻa tatau lolotonga ʻa e ngāue fakafaifekau ʻa e Fakamoʻuí.
Ko Ha Mana ʻo e Fakamoʻuí
ʻOku kamata ʻa e talanoa ʻi he Luke 5:18 ʻo pehē, “Naʻe ʻomi ʻe he kau tangatá ʻa e tangata ʻi hono mohengá kuo pūkea ʻi he mahaki teté: pea naʻa nau feinga pē fēfeeʻi hono lava mai ki lotó, ke tuku ʻi [he] ʻao [ʻo Sīsuú].” Naʻe taha pē ʻa e palopalemá, naʻe ʻikai ke nau lava ʻo ʻomi honau kaungāmeʻa naʻe puké koeʻuhí ko ʻene tokolahí! Naʻe ʻefiʻefi mo e ngaahi matapaá ʻi he tokolahi ʻa e kakaí, pea naʻe ʻikai ha founga ke nau hū ai ki loto.
ʻI he taimi ko ʻení naʻe mei lava pē ke loto-foʻi ʻa e kau tangatá pea nau foki ki ʻapi. Ka naʻe ʻikai. ʻE lava pē ke ke fakakaukauloto ki he fepōtalanoaʻaki naʻe fakahokó: ʻE fehuʻi ʻa e tokotaha, “Ko e hā te tau faí?” Pea pehē ʻa e taha, “ ʻOku ʻi ai ʻeku fakakaukau. Tau kaka ki he funga falé ʻo fakaava ʻa e ʻató, pea tau tuku hifo ia ki he falikí!” ʻE lava foki ke ke fakakaukauloto ki he tangata naʻe puké, ʻi he tuʻunga ko ʻení, ʻene fakafanongo ki he ngaahi palani faikehe ko ʻení pea ʻokú ne fehuʻi, “Ko e hā ʻa e meʻa te mou fai?”
ʻOku hoko atu e talanoá:
“Naʻa nau ʻohake ia ki [funga] fale, ʻo tukutuku hifo ia ʻi he ʻató ʻi he mohengá ki he haʻohaʻongá, ʻi he ʻao ʻo Sīsuú.
“Pea kuo mamata ʻe ia ki heʻenau tuí, peá ne pehē kiate ia, Tangata, kuo fakamolemole kiate koe hoʻo ngaahi angahalá” (Luke 5:19–20).
Naʻe fakakaukau ʻa e kau tangata tohí mo e kau Fālesí ko e lea fie ʻOtua ʻeni, pea tali ʻe Sīsū ʻo pehē :
“He ʻoku faingofua ʻa e fē, ke lea, Kuo fakamolemole kiate koe hoʻo ngaahi angahalá; pe ko e lea, Tuʻu hake ʻo ʻalu?
“Ka koeʻuhí ke mou ʻilo ʻoku ʻi he Foha ʻo e tangatá ʻa e mālohi ʻi māmani ke fakamolemole ʻa e angahalá, (pea pehē ʻe ia ki he mahaki teté,) ʻOku ou pehē atu kiate koe, Tuʻu hake, ʻo toʻo ho mohengá, pea ke ke ʻalu ki ho falé” (Luke 5:23–24).
ʻOku fakaʻofoʻofa ʻa e ikuʻanga ʻo e talanoá:
“Pea naʻe tuʻu hake leva ia ʻi honau ʻaó, peá ne toʻo mai ʻa ia naʻe tokoto aí, ʻo ʻalu ki hono falé, mo fakamālō ki he ʻOtuá.
“Pea nau ofo ai kotoa pē, mo nau fakamālō ki he ʻOtuá, pea fonu ʻi he manavahē, ʻo nau pehē, Kuo tau mamata ʻi he ʻahó ni ki he ngaahi meʻa foʻou” (Luke 5:25–26).
Kapau ʻOkú Ke Ongoʻi Vaivai Fakalaumālie
Mahalo pē kuo teʻeki ke ke mamata ʻi ha faʻahinga meʻa pehé ni, ka ʻoku ʻi ai ha ngaahi founga te ke lava ai ʻo fakaʻaongaʻi ʻa e talanoa ko ʻení ʻi hoʻo moʻuí. ʻE lava ke ke fakakaukau ʻo pehē ko e tangata mahakí koe. Tau pehē pē naʻá ke vaivai—ʻo ʻikai fakatuʻasino, kae fakalaumālie. ʻE ʻave koe ʻe ho ngaahi kaungāmeʻá ki fē? Mahalo ʻoku ʻi ai ha paati pe faiva pe ʻekitivitī kehe, pea ʻoku ʻikai hao leʻo ʻi he fili ʻoku fakahokó—te nau ʻave nai koe ki fē? ʻOku akoʻi kiate kitautolu ʻe he talanoa ko ʻení ha lēsoni fakaʻofoʻofa: Mahalo ʻe ʻi ai e ʻaho he ʻikai te ke mālohi ʻo hangē ko ia ʻoku totonu ke hokó. ʻI he tuʻunga ko iá ʻoku mahuʻinga ʻaupito ʻa e ngaahi kaungāmeʻa ʻokú ke filí. Fili ha ngaahi kaungāmeʻa te nau taki koe kia Kalaisí. Ko e tāpuaki taʻe-hano-tatau ke ʻi ai hao ngaahi kaungāmeʻa te nau hiki hake koe ki ha potu ʻoku māʻolunga angé.
Ko e Faʻahinga Kaungāmeʻa Fēfē Koe?
Ka ʻoku ʻi ai ha founga ʻe taha ke tau vakai ai ki he folofolá ni. Fakakaukau ko e kaungāmeʻá koe. Ko e faʻahinga kaungāmeʻa fēfē koe? Neongo ko e Fakamoʻuí naʻá Ne fakamoʻui mo fakamolemoleʻi ʻa e tangatá, ka ʻoku kau mo e kau tangatá ʻi he laú. Naʻa nau ʻofa ʻi honau kaungāmeʻá pea fietokoni kiate ia. Naʻe ʻikai te nau loto-foʻi ʻo foki ki ʻapi ʻi he taimi faingataʻá. Fakakaukauloto atu ki he fiefia naʻa nau maʻú ʻi he taimi naʻa nau sio hifo ai mei he ʻató ki honau kaungāmeʻá ʻokú ne toʻo hono mohengá ʻo ʻalú! Ko e toe meʻa ia ʻe taha ʻoku tau ako: Hoko ko e kaungāmeʻa ʻokú ne ʻomi ʻa e kakaí kia Kalaisi. Ko e ngaahi kaungāmeʻa ʻeni naʻe loto-toʻa, vilitaki pea mohu founga. ʻI he lea kotoa pē, ʻi he tōʻonga, pea ʻi he fili kotoa pē, te ke lava ai ʻo ʻomi ʻa e kakaí ki he Fakamoʻuí, ʻa ia he ʻikai ngata ʻi heʻene fakamoʻui fakatuʻasino mo fakalaumālie foki.
Ko Hono Tukutuku Hifo ʻo e Mahaki Teté mei he ʻAtó kia Sīsū, tā ʻe Frank Adams, fakaʻaongaʻi ʻi he angalelei ʻa e Musiume Fakahisitōlia ʻa e Siasí