Te Mau Fua Koe!
Mei ha lea ʻi he konifelenisi lahi ʻo ʻOkatopa 2006
ʻI heʻeku fakaʻuli atu ki he ngāué ʻi ha pongipongi ʻe taha, ne u fakalaka ʻi ha fakaʻilonga. Naʻe fakalea ʻo pehē, “Ko e Tokoní ʻOku Mahuʻinga Tahá.” Ne ʻikai lava ke matoʻo atu e kiʻi kupuʻi lea ko ʻení mei hoku ʻatamaí. Ko hono moʻoní ko e ngāué ʻoku mahuʻinga tahá—ʻa e ngāue ʻa e ʻEikí.
ʻI ha ngaahi taʻu lahi kuo hilí ne u maʻu ʻa e faingamālie ke tapuakiʻi ha kiʻi finemui fakaʻofoʻofa taʻu 12 ko Seimi Palamā. Ne toki ʻilo pē kimuí ni ʻoku maʻu ʻe he kanisaá. Naʻá ne ʻilo, kuo pau ke tafa tuʻolahi ʻa e vaʻe ko ē ʻoku maʻu ʻe he kanisaá. Naʻá ne fakakaukau pē he ʻikai lava ʻo kau he palani lue lalo lōloa ʻa ʻenau kau Finemuí ʻi ha hala makamaka.
Naʻe talaange ʻe Seimi ki hono ngaahi kaungāmeʻá he ʻikai ke ne kau ʻi heʻenau lue laló. ʻOku ou tui pē naʻe kiʻi mamahi hono lotó.
Ka naʻe ʻikai tali ia ʻe he kau finemuí ʻo nau pehē ange, “ ʻIkai Seimi, te ke ʻalu mo kimautolu!”
Naʻá ne tali ange, “Ka ʻoku ʻikai ke u lava ʻo lue.”
“Te mau fua koe ki ʻolunga!” Pea naʻa nau fakahoko ia.
Heʻikai teitei ngalo ʻi ha taha ʻo e kau finemui mahuʻinga ko ʻení ʻa e ʻaho fakangalongataʻa ko iá ʻi he ʻafio hifo ha Tamai Hēvani ʻofa ʻo malimali mo finangalo lelei ki he meʻa naʻa nau fakahokó.
ʻOku tau lau ʻi he Tohi ʻa Molomoná ki he Tuʻi angatonu ko Penisimaní. Naʻá ne folofola ʻo pehē, “Pea vakai, ʻoku ou fakahā kiate kimoutolu ʻa e ngaahi meʻá ni koeʻuhí ke mou ʻiloʻi ʻa e potó; koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá” (Mōsaia 2:17).
Ko e ngāue ʻeni ʻoku mahuʻingá, ʻa e ngāue kuo ui kotoa kitautolu ki aí: ʻa e ngāue ʻa e ʻEiki ko Sīsū Kalaisí.
Ngaahi tā fakatātā ʻa Taia Morley
Vaʻinga Fakatauhoá
Tā ha laine mei he fakatātā ʻa e fānaú ki ha meʻa ʻi lalo naʻe kau ʻi he talanoá. Ko e talanoa e niʻihi ʻe lahi ange ʻi he meʻa ʻe tahá ʻe maʻú.