ʻI he Ongoongó

Maʻu Ngofua Ange e Ngaahi Maʻuʻanga Tokoní ʻi he Falekoloa he ʻInitanetí [Online Store]

ʻOku faingataʻa ki he tokolahi ʻo e kāingalotu ʻe toko 14 miliona ʻo e Siasí ke ō ki ha taha ʻo e ngaahi falekoloa fakatau fakamovetevete ʻe 130 ke maʻu e ngaahi nāunau ʻo e Siasí. Ko ia ai ʻoku fulihi ʻe he Potungāue Tufakiʻanga Nāunau ʻa e Siasí ʻa e founga ngāué. ʻOku ʻomi ʻe ha falekoloa he ʻinitanetí e ngaahi nāunaú ki he kāingalotú.

ʻOku fakafaingofuaʻi ʻe he store.lds.org ke hū mai e ngaahi nāunau ako ʻo e ongoongoleleí, hivá, mītiá, fakatātaá, kāmení, vala temipalé, ngaahi maʻuʻanga tokoni ki he ʻapí mo e fāmilí mo ha ngaahi nāunau kehe. ʻOku taʻetotongi pē hono fakafolau atu e ngaahi nāunaú ki he māmaní, pea totongi siʻisiʻi pē kapau ko ha fie maʻu ke ʻoatu fakavavevave.

ʻOku fakamahino ʻe he tokotaha ʻoku hū ki he saití ʻa hono fonuá. ʻI he lava ko ia ke maʻu e falekoloa he ʻinitanetí maʻá e fonua takitaha, te nau fakaʻasi mai e ngaahi koloa ʻoku lava ke maʻu he lea fakafonua ko iá pea mo hono mahuʻingá ʻi he paʻanga fakalotofonuá. ʻE lava ke tuku atu ha ngaahi nāunau taʻetotongi fakahangatonu mei he saití.

ʻOku fetongi ʻe he saiti foʻoú ʻa e ldscatalog.com ʻi he lea faka-Pilitāniá, Sipeiní mo e faka-Lūsiá. ʻE lava ke maʻu atu ʻa e ngaahi lea fakafonua kehé ʻi he ngaahi māhina ka hokó, kau ai ʻa e lea faka-Potukalí, Falanisē, Siamane, ʻĪtali, Siapani, Kōlea mo e faka-Siaina ʻi he hokohoko ko iá.